Luˇkaꞈ 22
22
Yeˬsuˇ-ahˇ sehꞈ-eu gʼaˇ duˬ bawˬ kʼoeˬ-euˬ
(Maꞈtehˬ 26.1-5; Maˬkuˆ 14.1-2; Yoˇhaˬ 11.45-53)
1Baˬsaˬkaˬ Bawˬ-iˬ lehˇ kuˇ-eu Dehˬ tseˬ maˬ dawˆ-euˬ Kaˬ muˇ dzaˬ-eu Bawˬ-iˬ gʼeh-eu aˇ yamˬ peh laˇ-euˬ meh. 2Piˇ ma aˬ yuiꞈ deuˬ hawˇ-eu, Zahˇ dawˬ kʼoꞈ dawˬ mehˬ-eu saˬ laˬ deuˬ-aˬ, tsawˇ haˬ aˇ maꞈ-ahˇ guˆ-eu meh. Kʼoeˇ miˇ neh, Yeˬsuˇ-ahˇ ciˬ cuˇ ni sehꞈ kʼoeˬ-eu gaˇ ma poˆ luꞈ-eu meh.
Yuˇdaˆ neh Yeˬsuˇ-ahˇ ahˬ dzaˬ-euˬ
(Maꞈtehˬ 26.14-16; Maˬkuˆ 14.10,11)
3Kʼoeˇ naˇ, Zaˬ lahˇ tseˇ nyiꞈ gʼaˬ laꞈ kʼoeˇ ahˇ-eu Iˇsaˬgaˬliˬoˆ lehˇ ehˇ-eu Yuˇdaˆ kʼoeˇ gʼaˬ-ahˇ nehꞈ Saˬdaˬ uˇ leˇ-euˬ meh. 4Kʼoeˇ miˇ neh, piˇ ma aˬ yuiꞈ deuˬ hawˇ-eu uˬ duˬ tahˬ nymˇ nymˇ ma-ahˇ loꞈ piˇ-eu deuˬ kʼoeˇ taˆ uˆ lahˇ-eu yaw huiˬ yaw mahˇ deuˬ jawˇ gaˇ Yuˇdaˆ iˇ-awˇ, Yeˬsuˇ-ahˇ aˬ joˆ-ehˇ ahˬ dzaˬ-eu gaˇ kawˆ ja cawˬ-iˇ-euˬ meh. 5Aˬ yawꞈ maꞈ laˬ kʼaˬ cehˇ-awˇ, aˬ yawꞈ-ahˇ pyuˇ biꞈ-eu gʼaˇ duˬ nui ma tsaˬ-euˬ meh. 6Yuˇdaˆ gʼeh nui ma tsaˬ-awˇ, aˬ cawˬ maˬ bi siˬ ni Yeˬsuˇ-ahˇ aˬ yawꞈ maꞈ-euˬ aˬ laꞈ laꞈ kʼoeˇ a ahˇ nehˬ-eu gʼaˇ duˬ aˬ myah yehꞈ laˇ nga lehˇ jawˬ-euˬ meh.
Yeˬsuˇ Baˬsaˬkaˬ Bawˬ-iˬ dzaˬ-eu gʼaˇ duˬ lehˬ hmˬ-eu
(Maꞈtehˬ 26.17-25; Maˬkuˆ 14.12-21; Yoˇhaˬ 13.21-30)
7Kʼoeˇ naˇ, Baˬsaˬkaˬ dzaˬ byawˇ gʼaˇ duˬ yawˇ zaˬ ya sehꞈ-eu aˇ nah pyeuꞈ-eu Dehˬ tseˬ maˬ ahˇ-eu kaˬ muˇ dzaˬ-eu aˇ nah keuˆ le-euˬ meh. 8Beˬtuˆluˆ hawˇ-eu Yoˇhaˬ aˬ nyaꞈ-ahˇ Yeˬsuˇ ehˇ nehˬ-eu, “Naw nyaꞈ iˇ-awˇ aˬ dui maꞈ Baˬsaˬkaˬ dzaˬ byawˇ dzaˬ-eu gʼaˇ duˬ lehˬ hmˬ-iˇ-awˬ.”
9Aˬ yawꞈ nyaꞈ ehˇ-eu, “Aˬ geu gaˇ lehˬ hmˬ-iˇ nmˇ.”
10Yeˬsuˇ ehˇ-eu, “Naw nyaꞈ meuˬ-ahˇ uˇ leˇ ngeh, iˇ cuꞈ mui deuˇ oeˬ lahˬ baꞈ luꞈ-eu tsawˇ haˬ tiˬ gʼaˬ-ahˇ ya tahˬ puˬ tehꞈ-a. Aˬ yawꞈ uˇ-iˇ-eu nymˇ-ahˇ keuˆ ni aˬ yawꞈ-euˬ mehˬ nah caw teh gʼeh-awˬ. 11Kʼoeˇ naˇ, nymˇ kʼoeˇ nymˇ-euˬ nymˇ sahˇ gʼaˬ-ahˇ, ‘Saˬlaˬ nyaˇ-eu aˬ yawꞈ hawˇ-eu aˬ yawꞈ-euˬ zaˬ lahˇ deuˬ Baˬsaˬkaˬ dzaˬ byawˇ dzaˬ-eu gʼaˇ duˬ aˇ lawˆ aˬ gaˇ jaˆ ta jeˇ’ lehˇ naˇ haˬ-awˬ. 12Kʼoeˇ ngeh, nymˇ-euˬ laꞈ taˆ tiˆ-ahˇ laˆ saˆ taˬ-awˇ jaˆ-eu aˇ lawˆ lawˆ ma tiˬ lawˆ, naw nyaꞈ-ahˇ aˬ yawꞈ mehˬ nehˬ laꞈ tehꞈ-a. Kʼoeˇ gaˇ lehˬ hmˬ dah taˬ-awˬ.”
13Aˬ yawꞈ nyaꞈ iˇ haw ngeh, yawˬ jeˬ na luꞈ Yeˬsuˇ neh ehˇ-euˬ loꞈ-ehˇ jaˆ gaˇ ya mawˇ-awˇ, Baˬsaˬkaˬ dzaˬ byawˇ Lehˬ hmˬ laˆ dawˆ-euˬ meh.
Sahˬpaˬ Yeˬsuˇ-euˬ Ciꞈ hawˬ dzaˬ byawˇ
(Maꞈtehˬ 26.26-30; Maˬkuˆ 14.22-26; 1 Gawˇliˬtu 11.23-25)
14Baˬsaˬkaˬ dzaˬ byawˇ dzaˬ-eu aˇ yamˬ keuˆ laˇ ngeh, Yeˬsuˇ hawˬ jeh-ahˇ jawˬ leˇ-euˬ meh. Gʼaˬ kʼehˇ deuˬ kʼawꞈ, aˬ yawꞈ nehˬ-ehˇ jawˬ leˇ-euˬ meh. 15Aˬ yawꞈ maˬ-ahˇ aˬ yawꞈ ehˇ nehˬ-eu, “Ngaˇ maˬ ya kamˇ shiˇ mi naˆ-ehˇ, naw maꞈ nehˬ-ehˇ Baˬsaˬkaˬ dzaˬ byawˇ heu byawˇ dzaˬ taꞈ mawꞈ dui dui-eu ma. 16Aˬ jeˬ miˇ neh ehˇ naˇ, Miˬyehˇ Miˇkʼahˬ laꞈ kʼoeˇ dzaˬ byawˇ heu-euˬ dawˬ tsuiꞈ maˬ byah laˇ kʼoeˇ keuˆ ni, dzaˬ byawˇ heu ngaˇ maˬ paˇ dzaˬ ma lehˇ, naw maꞈ-ahˇ ngaˇ ehˇ-eu ma.”
17Kʼoeˇ naˇ, Yeˬsuˇ kʼmˬ maˬ ciˬ-awˇ, Miˬyehˇ-euˬ guiˬ lahˬ-ahˇ ja ceuˬ-awˇ ehˇ-eu, “Kʼmˬ maˬ heu ciˬ-awˇ, tiˬ gʼaˬ ui cuiˆ dawˇ-awˬ. 18Aˬ jeˬ miˇ neh ehˇ naˇ, Miˬyehˇ Miˇkʼahˬ maˬ keuˆ le kʼoeˇ keuˆ ni, aˬ gaꞈ dzaˇ uiˇ ngaˇ maˬ paˇ dawˇ ma.”
19Kʼoeˇ loꞈ-ehˇ ehˇ gʼaˬ ngeh, aˬ yawꞈ kaˬ muˇ yuˇ-awˇ, Miˬyehˇ-euˬ guiˬ lahˬ-ahˇ ja ceuˬ-awˇ ngawˬ pyehˬ-euˬ meh. Kʼoeˇ naˇ, aˬ yawꞈ maꞈ-ahˇ biˇ nehˬ-awˇ ehˇ-eu, “Heu-aˬ, naw maꞈ gʼaˇ duˬ lawˇ nehˬ-euˬ ngaˬ-euˬ gʼawˇ mawˇ ma. Ngaˬ-ahˇ noeˬ keuˆ-eu laꞈ kʼoeˇ heu loꞈ-ehˇ mˇ-awˬ.”
20Kʼoeˇ gaˇ duˇ ni, ciꞈ hawˬ dzaˬ gʼaˬ ngeh, aˬ yawꞈmaꞈ-ahˇ kʼmˬ maˬ ciˬ nehˬ-awˇ ehˇ-eu, “Heu-aˬ, naw maꞈ gʼaˇ duˬ yoeˇ le-euˬ ngaˬ-euˬ shiˬ baˬ da neh pyeuꞈ laˇ-euˬ dawˬ ma saˇ jaˇ yaw shuiꞈ ma.
21“Ehˇ kʼawꞈ, ngaˬ-ahˇ ahˬ dzaˬ-eu gʼaˬ-euˬ aˬ laꞈ-aˬ, ngaˬ nehˬ-ehˇ hawˬ jeh taꞈ luꞈ meh. 22Tsawˇ haˬ-euˬ Zaˬmaˇ-aˬ, Miˬyehˇ neh noeˬ tsehˆ taˬ-euˬ loꞈ-ehˇ ya shiˇ tehꞈ-a. Ehˇ kʼawꞈ, aˬ yawꞈ-ahˇ ahˬ dzaˬ-euˬ gʼaˬ ya noeˬ shaˬ dui dui tehꞈ-a.”
23Kʼoeˇ ngeh, aˬ yawꞈ maꞈ laꞈ kʼoeˇ aˬ yawꞈ-ahˇ ahˬ dzaˬ-euˬ gʼaˬ aˬ suˇ gʼaˬ-a lehˇ, aˬ yawꞈ maꞈ tiˬ gʼaˬ tiˇ gʼaˬ naˇ haˬ-eu meh.
Aˬ geu gʼaˬ huiˬ dzehˬ-eu gaˇ kawˆ pyehˇ-eu
24Zaˬ lahˇ deuˬ yaw kaˬ, aˬ geu gʼaˬ aˬ cawˬ naˆ maˬ tseˇ huiˬ dzehˬ-eu gaˇ kawˆ tsawˇ pyehˇ pyehˇ-eu meh. 25Aˬ yawꞈ maꞈ-ahˇ Yeˬsuˇ ehˇ nehˬ-eu, “Aˬ cawˬ miˇ kʼahˬ-euˬ sahˬ paˬ deuˬ-aˬ, miˇ kʼahˬ zaˬ deuˬ kʼoeˇ taˆ baoˬ jaˆ-eu meh. Miˇ kʼahˬ-ahˇ uˆ lahˇ-eu tsawˇ haˬ deuˬ kʼawꞈ, guiˬ lahˬ biꞈ-eu tsawˇ haˬ deuˬ lehˇ yawˬ haˇ yawˬ ha kuˇ-eu meh. 26Ehˇ kʼawꞈ, naw maꞈ-aˬ, kʼoeˇ loꞈ-ehˇ taˬ geuꞈ. Naw maꞈ laꞈ kʼoeˇ aˬ cawˬ naˆ maˬ tseˇ huiˬ dzehˬ-eu gʼaˬ-aˬ, aˬ cawˬ naˆ maˬ tseˇ nyiˇ-eu gʼaˬ loꞈ-ehˇ geuꞈ-awˇ, aˬ cawˬ koeˇ taˆ aˬ yuiꞈ aˬ tsu geuꞈ-eu gʼaˬ-aˬ, aˬ cawˬ-euˬ zaˬ kʼaˆ loꞈ-ehˇ geuꞈ-awˬ. 27Huiˬ dzehˬ-eu gʼaˬ aˬ geu gʼaˬ-a. Hawˬ jeh-ahˇ jawˬ-awˇ dzaˬ-eu gʼaˬ-a loˇ. Hawˬ byawˇ laˆ dawˆ nehˬ-eu gʼaˬ-a loˇ. Hawˬ jeh-ahˇ jawˬ-awˇ dzaˬ-eu gʼaˬ huiˬ dzehˬ-eu maˬ ngeuˇ-a loˇ. Ehˇ kʼawꞈ, ngaˇ-aˬ, naw maꞈ-ahˇ hawˬ byawˇ laˆ dawˆ nehˬ-eu gʼaˬ loꞈ-ehˇ duˇ-eu ma.
28“Naw maꞈ ngaˬ-ahˇ maˬ byehˇ dzeh ni, ngaˬ nehˬ-ehˇ tiˬ kawˆ loꞈ-ehˇ shaˬ-eu zahˬ-eu jeˬ-ahˇ daˬ dzeuˇ laꞈ-euˬ meh. 29Ngaˬ Da neh ngaˬ-ahˇ uˆ lahˇ-eu baoˬ biꞈ laꞈ-euˬ loꞈ-ehˇ, naw maꞈ-ahˇ kʼawꞈ baoˬ kʼoeˇ ngaˇ biꞈ-eu ma. 30Ngaˇ uˆ lahˇ-eu miˇ kʼahˬ laꞈ kʼoeˇ, naw maꞈ ngaˬ-euˬ hawˬ jeh-ahˇ ya dzaˬ yaw dawˇ taꞈ-awˇ, Iˇsaˬleˬlaˆ tsawˇ jeuˬ tseˇ nyiꞈ jeuˬ kʼoeˇ taˆ uˆ lahˇ-eu dzoeˬ dzaˬ nuiˇ mahˬ deuˬ kʼoeˇ taˆ, naw maꞈ nuiˇ-awˇ ya dzoeˬ tehꞈ-a.
Yeˬsuˇ-ahˇ maˬ siˬ lehˇ Beˬtuˆluˆ pyehˇ tehꞈ-a
(Maꞈtehˬ 26.31-35; Maˬkuˆ 14.27-31; Yoˇhaˬ 13.36-38)
31“Siˇmoˬ-oˇ, Siˇmoˬ-oˇ, haw taˬ-awˬ. Cehˇ baw shawˇ-eu loꞈ-ehˇ, yaw muiˬ yaw doeˇ siˬ duˬ laˇ ni naw maꞈ dawˬ tawˆ luꞈ-ahˇ lawˬ haw-eu gʼaˇ duˬ, nehꞈ Saˬdaˬ a kawˬ-aˬ za taˬ-euˬ meh. 32Ehˇ kʼawꞈ, Siˇmoˬ nawˇ jah-eu jeˬ-ahˇ maˬ ya byehˇ dzeh ni ngaˇ guiˬ lahˬ shaˇ luꞈ-eu ma. Nawˇ noeˬ poˆ-awˇ gʼoꞈ kʼoꞈ laˇ ngeh, nawˬ-euˬ cawˬ zaˬ lahˇ deuˬ-ahˇ gʼaˬ biꞈ nehˬ-awˬ.”
33Beˬtuˆluˆ ehˇ-eu, “Sahˬpaˬ-oˇ, nawˬ nehˬ-ehˇ paꞈ kuˆ-ahˇ tiˬ kawˆ loꞈ-ehˇ uˇ-awˇ tiˬ gaˇ shiˇ-eu gʼaˇ duˬ ngaˇ noeˬ tsehˆ taˬ-euˬ ma.”
34Yeˬsuˇ ehˇ-eu, “Beˬtuˆluˆ-oˇ, ngaˇ nawˬ-ahˇ heu loꞈ-ehˇ ehˇ-eu ma. Nymˇ ciꞈ ya poeˇ maˬ doeˇ laˇ mi naˆ-ehˇ, ngaˬ-ahˇ maˬ siˬ lehˇ, smˬ poˆ keuˆ ni nawˇ pyehˇ tehꞈ-a.”
Pyuˇ pawˬ behˆ, pehˇ tahˬ, mi cehˇ
35Kʼoeˇ naˇ, Yeˬsuˇ aˬ yawꞈ-euˬ zaˬ lahˇ deuˬ-ahˇ ehˇ nehˬ-eu, “Ngaˇ naw maꞈ-ahˇ, pyuˇ pawˬ behˆ, pehˇ tahˬ, sehˬ nawˆ, heu deuˬ maˬ bi yuˇ ni kʼehˇ gʼeh ngeh, naw maꞈ tiˬ jeˬ paˬ loˬ-euˬ jaˆ te loˇ.”
Aˬ yawꞈ maꞈ ehˇ-eu, “Tiˬ jeˬ-iˬ maˬ loˬ-aˬ.”
36Yeˬsuˇ ehˇ-eu, “Ehˇ kʼawꞈ, nymˬ-mˇ poˆ jawˇ-aˬ, pyuˇ pawˬ behˆ kʼaˇ ahˇ-eu tsawˇ haˬ, pyuˇ pawˬ behˆ pi gʼeh-awˬ. Pehˇ tahˬ jaˆ-eu tsawˇ haˬ kʼawꞈ, shaꞈ gʼeh-awˬ. Mi cehˇ maˬ ahˇ-eu tsawˇ haˬ, yawˬ ha-euˬ pehˇ kʼahˬ ahˬ-awˇ mi cehˇ zeuˇ-awˬ. 37Aˬ jeˬ miˇ neh ehˇ naˇ, ‘Aˬ yawꞈ-ahˇ smˇ kʼoeˬ tahˇ joe loꞈ-ehˇ sawˇ nehˬ tehꞈ-a’ lehˇ ehˇ-eu dawˬ kʼoeˇ dawˬ ngaˬ-euˬ kʼoeˇ taˆ keuˆ le tehꞈ-a. Ngaˬ-euˬ gaˇ kawˆ kʼaˇ boꞈ taˬ-euˬ jeˬ byah laˇ meh.”
38Zaˬ lahˇ deuˬ ehˇ-eu, “Sahˬpaˬ-oˇ, haw sheˇ. Heu gaˇ mi cehˇ nyiˬ kahˇ ahˇ ma,”
Yeˬsuˇ ehˇ-eu, “Gʼaˬ tehꞈ-a.”
Saˬloˬ gawˬ jawˬ kʼoeˇ taˆ Yeˬsuˇ guiˬ lahˬ shaˇ-euˬ
(Maꞈtehˬ 26.36-46; Maˬkuˆ 14.32-42)
39Yeˬsuˇ-aˬ, aˬ myah myah aˬ yawꞈ kʼaˇ jahˇ-eu loꞈ-ehˇ, meuˬ-ahˇ neh doˆ-iˇ-awˇ, saˬ loˬ gawˬ jawˬ-ahˇ le-euˬ meh. Zaˬ lahˇ deuˬ kʼawꞈ, aˬ yawꞈ nehˬ-ehˇ le-euˬ meh. 40Jawˇ duˬ kʼoeˇ tsahˇ-ahˇ aˬ yawꞈ le keuˆ ngeh, “Muˇ juˇ juˇ-eu mehˬ nah maˬ ya caw teh gʼeh ni guiˬ lahˬ shaˇ-awˬ” lehˇ, aˬ yawꞈ maꞈ-ahˇ ehˇ nehˬ-euˬ meh.
41Kʼoeˇ naˇ, aˬ yawꞈ maꞈ jawˇ gaˇ neh daˇ biˬ tiˬ biˬ kaˬ gaˇ aˬ yawꞈ iˇ-awˇ, pawˬ tsuiꞈ pawˬ dmˬ dmˬ-awˇ guiˬ lahˬ shaˇ-euˬ meh. 42“Aˬ da-oˇ, nawˇ nui ma tsaˬ naˇ shaˬ zahˬ naꞈ dui dui-eu kʼmˬ maˬ heu kʼmˬ-ahˇ bi dzeuˇ-iˇ laꞈ. Ehˇ kʼawꞈ, ngaˬ-euˬ nui noeˬ taˬ bi pyeuꞈ laꞈ. Nawˬ-euˬ nui noeˬ bi pyeuꞈ-awˬ.” 43Mˬ taˆ gʼaˬ kʼehˇ tiˬ gʼaˬ aˬ yawꞈ jawˇ gaˇ doˆ le-awˇ, aˬ yawꞈ-ahˇ gʼaˬ biꞈ lahˬ nehˬ-euˬ meh. 44Aˬ yawꞈ nui ma shaˬ zahˬ mˇ dui dui-eu laꞈ kʼoeˇ, yaw beh naˆ maˬ tseˇ guiˬ lahˬ paˇ shaˇ dui dui-euˬ meh. Shiˬ miˇ tsa dzaˆ ka-eu loꞈ-ehˇ, aˬ yawꞈ kuˬ pyuˇ yoeˇ le-euˬ meh.
45Aˬ yawꞈ guiˬ lahˬ shaˇ luꞈ-eu tuˇ laˇ-awˇ, zaˬ lahˇ deuˬ jawˇ gaˇ gʼoꞈ-iˇ ngeh, noeˬ shaˬ dui dui-awˇ gʼaˬ doeˇ doeˇ-eu miˇ neh, yuꞈ kʼaˆ taˬ-euˬ gaˇ ya mawˇ-euˬ meh. 46Aˬ yawꞈ maꞈ-ahˇ aˬ yawꞈ ehˇ nehˬ-eu, “Naw maꞈ aˬ jeˬ miˇ neh yuꞈ kʼaˆ luꞈ te. Muˇ juˇ juˇ-eu mehˬ nah maˬ ya caw teh gʼeh ni, tuˇ-awˇ guiˬ lahˬ shaˇ-awˬ.”
Yeˬsuˇ-ahˇ nyehꞈ-euˬ
(Maꞈtehˬ 26.47-56; Maˬkuˆ 14.43-50; Yoˇhaˬ 18.3-11)
47Yeˬsuˇ dawˬ ngehˬ gʼaˬ-eu maˬ dah ni, zaˬ lahˇ tseˇ nyiꞈ gʼaˬ laꞈ kʼoeˇ ahˇ-eu Yuˇdaˆ lehˇ myahˇ-euˬ gʼaˬ mehˬ huˬ huˬ-awˇ, tsawˇ haˬ aˇ maꞈ tiˬ maꞈ laˇ keuˆ-euˬ meh. Aˬ yawꞈ Yeˬsuˇ-ahˇ mehˬ cuˇ cuˇ-eu lehˇ, Yeˬsuˇ-euˬ dawˬ peh le-euˬ meh. 48Ehˇ kʼawꞈ, Yeˬsuˇ aˬ yawꞈ-ahˇ ehˇ nehˬ-eu, “Yuˇdaˆ-oˇ, nawˇ Tsawˇhaˬ-euˬ Zaˬmaˇ-ahˇ mehˬ cuˇ tiˬ poˆ cuˇ-awˇ ahˬ dzaˬ-eu lehˇ gʼeh-eu ma loˇ.”
49Yeˬsuˇ nehˬ-ehˇ jawˇ luꞈ-eu tsawˇ haˬ deuˬ, Yeˬsuˇ-ahˇ nyehꞈ laˇ-euˬ ngaˇ lehˇ haw siˬ ngeh, “Sahˬpaˬ-oˇ, nga maꞈ mi cehˇ neh deuˆ ma de” lehˇ ehˇ-eu meh. 50Aˬ yawꞈ maꞈ laꞈ kʼoeˇ tiˬ gʼaˬ, Piˇma Yaw huiˬ gʼaˬ-euˬ zaˬ kʼaˆ-ahˇ mi cehˇ neh coeˇ-awˇ, naˬ paꞈ aˇ maˇ paw pyawˬ coeˇ tsehˆ dzeh-euˬ meh.
51Ehˇ kʼawꞈ, “Gʼaˬ-aˇ. Taˬ paˇ jahˇ” lehˇ Yeˬsuˇ ehˇ-awˇ, na paꞈ-ahˇ toeˬ ciˆ-awˇ laˆ taˬ nehˬ-euˬ meh.
52Kʼoeˇ naˇ, piˇ ma aˬ yuiꞈ deuˬ, Uˬ duˬ tahˬ nymˇ nymˇ ma-ahˇ loꞈ piˇ-eu guiˇ maꞈ deuˬ kʼoeˇ taˆ uˆ lahˇ-eu yaw huiˬ yaw mahˇ deuˬ hawˇ-eu, Uˬ duˬ tahˬ nymˇ nymˇ ma laꞈ kʼoeˇ aˬ yuiꞈ aˬ tsu geuꞈ luꞈ-eu deuˬ -ahˇ, Yeˬ suˇ heu loꞈ-ehˇ ehˇ nehˬ-eu meh. “Smˇ kʼoeˬ tahˇ joe-ahˇ nyehꞈ-eu loꞈ-ehˇ, mi cehˇ hawˇ-eu daˇ kawˬ baꞈ-awˇ naw maꞈ ngaˬ-ahˇ ya nyehꞈ laˇ ta loˇ. 53Naw maꞈ nehˬ-ehˇ Uˬ duˬ tahˬ nymˇ nymˇ ma laꞈ kʼoeˇ yawˬ nah na luꞈ ngaˇ jawˇ luꞈ ngeh, naw maꞈ ngaˬ-ahˇ maˬ nyehꞈ-a. Ehˇ kawꞈ, yaw zahˇ-euˬ baoˬ uˆ lahˇ-eu aˇ yamˬ heu yamˬ, naw maꞈ heu loꞈ-ehˇ mˇ-eu gʼaˇ duˬ tsaˬ dui dui-eu aˇ yamˬ meh.”
Yeˬsuˇ-ahˇ maˬ siˬ lehˇ Beˬtuˆluˆ pyehˆ-euˬ
(Maꞈtehˬ 26.57-58,69-75; Maˬkuˆ 14.53-54,66-72; Yoˇhaˬ 18.12-18,25-27)
54Kʼoeˇ naˇ, aˬ yawꞈ maꞈ Yeˬ suˇ-ahˇ nyehꞈ-awˇ, Piˇ ma Yaw huiˬ gʼaˬ-euˬ nymˇ-ahˇ sheuˬ gʼeh-euˬ meh. Beˬtuˆluˆ-aˬ, naˇ kʼah paw ui cuiˆ gaˇ mahˇ kaˬ gaˇ cah-awˇ caw teh luꞈ-eu meh.
55Kmˇ cehˇ gawˬ lahˇ taˬ-euˬ laꞈ kʼoeˇ jaˆ-eu pu ka gʼahˇ ceh aˬ yawꞈ maꞈ miˬ dzaˬ baw doꞈ-awˇ nuiˇ ngeh, Beˬtuˆluˆ kʼawꞈ, ga dzuˇ leˇ-euˬ meh. 56Aˬ yawꞈ miˬ dzaˬ bya gaˇ nuiˇ luꞈ-eu zaˬ miˬ zaˬ zaˬ kʼaˆ tiˬ gʼaˬ ya mawˇ ngeh, aˬ yawꞈ-ahˇ haw tsoˆ taˬ-awˇ ehˇ-eu, “Tsawˇ haˬ heu gʼaˬ jiˇ Yeˬsuˇ nehˬ-ehˇ jawˇ-euˬ tsawˇ haˬ meh.”
57Ehˇ kʼawꞈ, Beˬtuˆluˆ tsawˇ pyehˇ pyehˇ-awˇ ehˇ-eu, “Aˬ buˇ-oˇ, aˬ yawꞈ-ahˇ ngaˇ maˬ siˬ nya nya.”
58Tiˬ kʼehˬ paˇ keuˆ laˇ ngeh, tsawˇ haˬ tiˬ gʼaˬ aˬ yawꞈ-ahˇ paˇ haw siˬ-awˇ ehˇ-eu, “Nawˇ gʼeh aˬ yawꞈ maꞈ-euˬ aˇ muˇ-ahˇ uˇ-eu tsawˇ haˬ meh.”
Ehˇ kʼawꞈ, Beˬtuˆluˆ paˇ pyehˇ-eu, “Mawˬ cawˬ-oˇ, ngaˇ maˬ ngeuˇ.”
59Naˬ liˬ tiˬ laꞈ ehˇ gʼaˬ ni paˇ kaˇ-iˇ ngeh, tiˬ gʼaˬ paˇ ehˇ-eu, “Tsawˇ haˬ heu gʼaˬ Yeˬ suˇ nehˬ-ehˇ jawˇ euˬ yaw duˬ baw meh. Aˬ jeˬ miˇ ehˇ naˇ , aˬ yawꞈ Gaˬliˬlehˇ tsawˇ haˬ meh.”
60Ehˇ kawꞈ, Beˬtuˆluˆ pyehˇ-eu, “ Mawˬ cawˬ-oˇ, nawˇ ehˇ-eu gaˇ kawˆ teu ngaˇ tiˬ jeˬ-iˬ maˬ siˬ nya nya.”
Aˬ yawꞈ kʼoeˇ loꞈ-ehˇ ehˇ gʼaˬ-eu maˬ dah ni, ya poeˇ doeˇ doˆ laˇ-euˬmeh.
61Kʼoeˇ ngeh, Sahˬpaˬ Yeˬsuˇ zeuˆ pyawˇ leꞈ-awˇ, Beˬtuˆluˆ-ahˇ haw-euˬ meh. “Nymˇ ciꞈ ya poeˇ maˬ doeˇ laˇ mi naˆ-ehˇ, ngaˬ-ahˇ maˬ siˬ lehˇ smˬ poˆ keu ni nawˇ pyehˇ tehꞈ-a” lehˇ, Sahˬpaˬ Yeˬsuˇ neh aˬ yawꞈ-ahˇ ehˇ nehˬ-euˬ dawˬ kʼoeˇ dawˬ-ahˇ Beˬtuˆluˆ noeˬ doˆ leˇ-euˬ meh.
62Kʼoeˇ naˇ, Beˬtuˆluˆ doˆ-iˇ-awˇ, ngoeˇ dui dui- euˬ meh.
Yeˬsuˇ-ahˇ naˬ gʼa naˬ gʼa-ehˇ diˬ-euˬ
(Maꞈtehˬ 26.67,68; Maˬkuˆ 14.65)
63Yeˬ suˇ-ahˇ nyehꞈ-awˇ loꞈ luꞈ-eu tsawˇ haˬ kʼoeˇ deuˬ, aˬ yawꞈ-ahˇ naˬ gʼa naˬ gʼa-ehˇ diˬ-euˬ meh.
64Kʼoeˇ naˇ aˬ yawꞈ-euˬ myaˆ nuiˆ kaꞈ kaˬ nehˬ-awˇ , “Nawˇ Miˬ yehˇ gʼaˇ duˬ ngehˬ dah nya-eu jeˬ maˇ-iˬ, nawˬ-ahˇ naˬ tehˆ tehˆ-euˬ aˬ suˇ gʼaˬ nga lehˇ ehˇ haw sheˇ” lehˇ ehˇ nehˬ-euˬ meh.
65Kʼoeˇ naˇ, aˬ yawˬ maꞈ aˬ yawꞈ-ahˇ yehˬ bawˬ sehˇ lu-ehˇ gʼawˬ mya jeˬ ehˇ niˇ gʼa nehˬ-euˬ meh.
Yeˬ suˇ-ahˇ Baꞈdzah mehˬ shi nyehꞈ gʼeh-euˬ
(Maꞈtehˬ 26.59-66; Maˬkuˆ 14.55-64; Yoˇhaˬ 18.19-24)
66Uˬ bya bya laˇ ngeh, tsawˇ mawˬ tsawˇ kʼaˆ deuˬ, piˇ ma aˬ yuiꞈ deuˬ hawˇ-eu Zahˇ dawˬ kʼoꞈ dawˬ mehˬ-eu saˬ laˬ deuˬ tiˬ gaˇ uiˬ leˇ-awˇ, Yeˬ suˇ-ahˇ Baꞈ dzah#22.66 ʼBaꞈ dzahʼ lehˇ ehˇ-eu dawˬ tsuiꞈ Maꞈtehˬ 26.59-ahˇ haw-awˬ. -euˬ mehˬ shi bi sheuˬ laꞈ-euˬ meh.
67Aˬ yawꞈ maꞈ ehˇ-eu, “Nawˇ Ka li ngeuˇ ma loˇ lehˇ, nga maꞈ-ahˇ ehˇ nehˬ laꞈ sheˇ.”
Yeˬ suˇ ehˇ-eu, “Ngaˇ ehˇ kʼawꞈ naw maꞈ maˬ jah-aˇ. 68Ngaˇ naw maꞈ-ahˇ paˇ naˇ haˬ kʼawꞈ, naw maꞈ maˬ ehˇ kʼoꞈ nehˬ laꞈ-aˇ. 69Ehˇ kawꞈ, aˬ kaˇ naˇ, Tsawˇhaˬ-euˬ Zaˬmaˇ-aˬ, Baoˬhuiˬ-eu Miˬyehˇ-euˬ aˇ maˇ paw ya nuiˇ tehꞈ-aˬ.”
70Kʼoeˇ ngeh, aˬ yawꞈ maꞈ dawˬ tawˆ luꞈ ehˇ-eu, “Toˆ-ehˇ ngeuˇ naˇ, nawˇ Miˬyehˇ-euˬ Zaˬmaˇ ngeuˇ te loˇ.”
Aˬ yawꞈ ehˇ-eu, “Ngeuˇ meh lehˇ naw maꞈ ehˇ ngaˇ tawˇ.”
71Kʼoeˇ ngeh jawˇ, aˬ yawꞈ maꞈ ehˇ-eu, “A dui maꞈ saˇ kiˇ yawˬ-awˇ yawˬ maˬ paˇ loˬ meh. Aˬ yawꞈ-euˬ kʼaˬ meh-ahˇ ngehˬ doˆ laꞈ-euˬ dawˬ aˬ dui gaˬ duˬ-euˬ ma.”
Pašlaik izvēlēts:
Luˇkaꞈ 22: AHK
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Akha Bible Revision (Latin Script) © Thailand Bible Society, 2011.