Lalang Hu Dios

Duun taena ha aldaw uminawà si Jesus diyà ta balay daw pinuu duun hu kilid ku danaw. Tumenged ta madakel tungkay sa mga etaw ha nangaamul-amul diyà ta kandin mininuu haena duun hu barutu na sa mga etaw diyà dà ta gaun hu pagpaliliman kandin. Dayun madakel sa mga intudlù din kandan pinaagi hu mga pananglitan ha tagyanaen, “Amin etaw ha duminiyà ta uma hu pagpamegas. Su isawed din haena sa binhì amin diyà dà nakatanà ta dalan aman pinanukà hu mga tagbis. Amin daan binhì ha duun dà nakatanà hu batuwen. Saena laus dà lumineteb ta atiyuay dà sa pisà duun, ba su sildahan hu tungkay mapasù sagunà dà haena nangagangu ta hurà man panggamut. Amin daan binhì ha duun nakatanà hu sampiniten. Tuminubù daan haena ba naenep dà hu mga sampinit. Ba amin binhì ha duun nakatanà hu balumbun ha bugtà. Saena tuminubù daan daw namunga gayed, sa duma duun tignanggatus sa bunga din daw sa duma daan namunga hu tigkaeneman na amin daan namunga hu tigkatluan.
“Henhenaa nuy gayed sa napaliman nuy ha inikagi ku.”


Uminubay diyà ki Jesus sa mga tinun-an din daw panginginsà, “Imbà mga pananglitan sa taggamiten nu ku tagtudlù ka hu mga etaw?”
Tuminubag si Jesus, “Sa inlilung su anay mahitenged hu pagharì hu Dios impadayag en inyu, ba saena hurà katun-i hu duma ha mga etaw. Sa etaw ha amin en kandin mailahan hu tungkay pa gayed madakel dì hu kinahanglanen din, ba saena ha hurà din en hu kandin bisan su iyan-iyan din dà timuen pa gayed diyà ta kandin. Iyan haini hinengdan ha mga pananglitan sa taggamiten ku ta,
‘Tag-ahà sidan ba harì pakaindan, daw tagpaliliman daan sidan ba harì pakasabut.’
Natuman diyà ta kandan sa inikagi hi Isaias sa prupita ha tagyanaen,
‘Sigi dà sidan tagpalilimanà ba harì sidan pakasabut daw sigi dà sidan tag-ahaay ba harì sidan pakaindan, ta inipelan dan sa mga talinga dan daw taglipedengà sidan daw tungkay gayed madesen sa henà-henà dan. Ta ku pakaindan pa daw pakasabut ngaay sidan maghinulsul gayed hu mga salà dan daw luwasen sidan hu Dios.’
Ba malipayen kaw gayed ta nakaindan kaw daw nakapaliman kaw daan. Laus gayed sa ag-ikagiyen ku inyu ha madakel ngaay sa mga prupita daw matareng ha etaw su anay ha agkabayà tungkay ag-ahà hu naahà nuy iman daw agpaliliman ngaay daan hu napaliman nuy iman, ba hurà dan en gayed haena kahimu.


“Magpaliliman kaw en ta ag-ikagiyen ku inyu sa kahulugan taena ha pananglitan mahitenged hu namegas. Ku amin mga etaw ha nakapaliman mahitenged hu pagharì hu Dios ba hurà makasabut taena, agkailing sidan hu binhì ha diyà dà nakatanà ta dalan ta sagunà pakauma si Satanas daw agawen din sa napaliman dan. Su binhì ha duun dà nakatanà hu batuwen iyan su mga etaw ha nakapaliman hu lalang hu Dios daw sagunà duminawat taena ha malipayen. Ba tumenged ta harì agpanggamut sa pagtuu dan saena harì en agkalugay. Ku makauma sa malegen ha alantusen daw pasipalahan sidan tumenged hu pagdawat dan hu lalang hu Dios sagunà dà sidan ag-endà hu pagtuu. Su binhì ha duun nakatanà ku sampiniten iyan su mga etaw ha nakapaliman en hu lalang hu Dios. Ba tumenged hu mga kasamukan dan dini ta kalibutan daw hu kabayà dan ha magsapian sidan sa lalang hu Dios agkalipatan dan dà aman harì en haena agpamunga diyà ta kandan. Ba su binhì ha duun nakatanà hu balumbun ha bugtà iyan su mga etaw ha nakapaliman hu lalang hu Dios daw nakasabut taena aman agpamunga. Sa duma agpamunga hu madakel daw sa duma tumanan dà sa bunga dan, sa duma atiyù dà daan sa bunga dan.”

Amin pa pananglitan ha inikagi hi Jesus ha tagyanaen, “Sa pagharì hu Dios agkailing hu etaw ha namegas hu maayad ha binhì duun hu uma din. Ba su tagtiduga en haena su daleman nakauma daan sa kuntra din dayun migsawed hu mga lisu hu hilamunen duun taena ha uma daw awà. Aman su mamunga en su impamegas ha binhì nakaamul daan duun sa hilamunen.
“Su mga suluguen taena ha etaw duminiyà ta kandin daw uminikagi, ‘Maayad sa impamegas ha binhì duun taini ha uma nu. Hindu gid hayana napuun sa mga hilamunen?’
“Saena ha etaw tuminubag, ‘Sa kuntra ku migsawed tayana.’
“Aman minikagi sa mga suluguen din, ‘Agkabayà ka ba ha baduten day en hayana sa mga hilamunen?’
“Ba saena ha etaw tuminubag, ‘Harì nuy pa enà ta makalagkes kan sa pamulahen taw. Ipatayà en enà taman hu tilegtay. Asem ku tilegtay ikagiyan ku sa agpamanlegtay ha unahen dan amulen daw bigsuli sa hilamunen daw human legtayà su impamegas daw itagù duun hu bugawan.’”


Amin pa pananglitan ha inikagi hi Jesus ha tagyanaen, “Sa pag-adagi hu tagharian hu Dios agkailing hu lisu ha impamegas duun hu uma. Bisan ku atiyuay gayed tungkay ha lisu ba ku tumubù en haena mabuhat ha tungkay kinaadagiyan ha pamulahen daw sa mga panga din mabuhat ha dalagpuay daw salagà hu mga tagbis.”
Amin pa lain ha pananglitan ha inikagi hi Jesus ha tagyanaen, “Sa tagharian hu Dios agkailing daan hu igpatulin ha iglamud duun hu madakel ha harina dayun su harina agtulin.”
Inikagi haena hi Jesus duun hu mga etaw pinaagi hu mga pananglitan. Sa alan ha inikagi hi Jesus kandan pinaagi dà gayed hu mga pananglitan. Aman natuman sa inikagi hu prupita ha tagyanaen,
“Mga pananglitan sa aggamiten ku ku tag-ikagi a duun hu mga etaw. Igtultul ku kandan haena sa inlilung sugud dà hu katanghagaa ta kalibutan.”

Su umawà si Jesus duun ku madakel ha mga etaw sumineled haena diyà ta balay. Dayun uminubay diyà ta kandin su mga tinun-an din ha minikagi, “Saysaya kanay sa kahulugan taena ha pananglitan nu mahitenged hu hilamunen duun hu uma.”
Tuminubag si Jesus, “Siak sa Batà hu Etaw iyan a su namegas hu maayad ha binhì. Saena ha uma iyan sa kalibutan daw su maayad ha binhì iyan sa mga tagharian hu Dios. Saena ha mga hilamunen iyan sa mga sakup hi Satanas daw su kuntra ku ha migsawed ku lisu taena ha hilamunen iyan si Satanas. Sa tilegtay iyan sa katapusan hu panahun daw sa agpamanlegtay iyan sa mga balinsuguen hu Dios.
“Iling hu hilamunen ha agsakemen daw bigsuli iyan daan haena maul-ulahan hu katapusan hu panahun. Siak sa Batà hu Etaw agsuguen ku sa mga balinsuguen hu Dios ha amul-amulen dan sa mga etaw ha migbuhat hu madaet daw su mga etaw ha iyan igpakasalà hu mga duma dan daw ipanlambeg sidan diyà ta Impirnu ha duun sidan makag-ulahuay hu kalugul daw magkakangget sa mga ngipen dan hu kasakitan. Dayun sa mga matareng ha etaw mailing hu aldaw ha magpangaluanlag duun hu tagharian hu Dios ha Amay dan. Henhenaa nuy gayed sa napaliman nuy ha inikagi ku.

“Sa tagharian hu Dios agkailing hu bulawan ha nakalebeng duun hu uma. Amin etaw ha nakaahà duun aman tungkay gayed nalipay. Ba bà din dà haena tinambuni daw pauulì. Dayun impamaligyà din sa alan ha mga butang din daw palilikù hu pagpalit taena ha uma.
“Sa tagharian hu Dios agkailing daan taena ha agpanapì pinaagi hu pagpamalit hu pirlas. Su makaahà haena hu tungkay madagway ha pirlas imbaligyà din sa alan ha mga butang din daw palita haena sa madagway ha pirlas.
“Sa tagharian hu Dios agkailing daan hu baling ha inlabya duun hu danaw. Ku mataguan en haena hu migkalain-lain ha sedà guyuden haena hu mamamaling diyà ta gaun. Dayun pamilien dan sa maayad duun daw itagù duun hu talaguay, ba sa mga madaet duun bà dan dà iglambeg. Iyan daan haena maul-ulahan asem duun hu katapusan hu panahun. Igtapid hu mga balinsuguen hu Dios sa madaet ha etaw duun taena ha matareng daw ipanlambeg sa madaet diyà ta Impirnu ha duun sidan makag-ulahuay hu kalugul daw magkakangget sa mga ngipen dan hu kasakitan.”
Dayun ininsaan sidan hi Jesus, “Nasabut nuy ba sa tag-ikagiyen ku?”
Tuminubag sidan, “Hee.”
Inikagiyan din sidan, “Sa manunudlù hu Kasuguan ha tinudluan mahitenged hu tagharian hu Dios agkailing hu etaw ha madakel tungkay sa mga butang din diyà ta balay din, daw saena ha mga butang kenà alan dà karaan ba amin daan duun mga bag-u.”


Su mapengahan hi Jesus ikagiya sa mga pananglitan luminikù duun hu kandin ha banuwa daw migtudlù duun hu simbahan. Ba sa nakapaliman kandin tungkay nangabeleng, kagi dan, “Sin-u gid sa migtudlù kandin daw imbà pakahimu hu mga belenganen? Kenà ba batà man hayana hu panday daw sa inay din iyan man si Maria, sa mga suled din iyan si Santiago daw si Jose, si Simon daw si Judas, daw dini dà daan tagtimà sa mga atebay din? Imbà din agkahimu sa mga belenganen?” Tumenged taena hurà dan dawata sa intudlù din.
Inikagiyan sidan hi Jesus, “Sa prupita agtahuran duun hu bisan hindu ha lugar dì hu kandin ha banuwa daw duun hu balay din.”
Tumenged ta harì en daan sidan agtuu kandin atiyuay dà sa impaahà din kandan ha mga belenganen.

Mihaino ny Mateo 13