© ཀལ༌ཏེས༌ བྲིས༌ཏེ༌ ཡོད༌ན༌ མན༌ནེ༌ འི༌ བྲིས༌ཁན༌ དང༌ སིལ༌ཁན༌ ཚང༌མའེ༌ Creative Commons Attribution-NonCommercial-NoDerivatives 4.0 International License འི༌ ལག༌ག༌ ཡོད༌། ℗ This work is licensed under a Creative Commons Attribution-NonCommercial-NoDerivatives 4.0 International License 

Ladakhi SIL (NT) NonDrama

པེ༌སག༌གི༌ དོན༌ཏང༌ངི༌ སང༌ སྔུན༌ལ༌, གཙོ༌བོ༌ ཡེ༌ཤུའ༌ འི༌ ཇིག༌རྟེན༌བོ༌ ཕངས༌ཏེ༌ ཁོང༌རང༌ངི༌ ཡབ༌བི༌ཀ༌ སྐྱོད༌ཅེས༌སི༌ ཏུས༌ ལེབས༌ཏེ༌ ཨིན༌ཁན༌བོ༌ ཐུག༌གྱུས༌ ཡོད༌པིན༌། ཁོང༌ངི༌ འི༌ ཇིག༌རྟེན༌ནི༌ ནང༌ང༌ ཁོང༌རང༌ངི༌ མི༌གུན༌ལ༌ ཅམས༌པ༌ ཛདས༌, ཏ༌ ཁོང༌ངི༌ ཁོང༌རང༌ངི༌ ཅམས༌པ༌ ཁོང༌གུན༌ལ༌ ཚད༌ གང༌པོ༌ སྟན༌ན༌ ཛདས༌། ཁོང༌གུན༌ ཕི༌ཏོག༌གི༌ དོན༌ཏང༌ དོན༌ཨིན༌ ཡོད༌པིན༌, ཤེ༌ཏན༌ནི༌ ཤི༌མོན༌ནི༌ བུ༌ཚ༌ ཡུ༌དཱ༌ ཀར༌ཡོད༌པའེ༌ སྙིང༌ངི༌ ནང༌ང༌ ཡེ༌ཤུའ༌ ངོ༌ལོག༌ ཅོ༌ཅུག༌ཅེས༌སི༌ སམ༌བ༌ སྐྱེ༌ཅུགས༌ ཚར༌ཏེ༌ ཨིན༌པིན༌།
ཡེ༌ཤུའི༌ ཡབ༌བི༌ ཅི༌ཚང༌མ༌ ཁོང༌ངི༌ ཆག༌ག༌ སྟད༌ད༌ ཛད༌ཁན༌ དང༌ ཁོང༌ དཀོན༌མཆོག༌གི༌ ཆོགས༌ནེ༌ སྐྱོད༌ཁན༌ ཡང༌ དཀོན༌མཆོག༌གི༌ སྐུན༌དུན༌ལ༌ ལོགས༌ཏེ༌ སྐྱོད༌ཅེས༌པོ༌ ཁྱེན༌ན༌ ཛད༌དད༌པིན༌། ཏེ༌ནེ༌ ཁོང༌ ཅོག༌ཙེ༌ དུན༌ལ༌ ཞངས༌ ཡང༌ རང༌ངི༌ ཁེ༌ཐོག༌གི༌ ནམ༌ཟའ༌ ཕུད༌ད༌ ཛདས༌ཏེ༌ ལག༌ཕིས༌ ཆེན༌མོ༌ཞིག༌ ཁོང༌རང༌ངི༌ སྐྱེད༌པ༌ སྲིལ༌ལ༌ ཛདས༌། ཏེ༌ སྟིང༌ནེ༌ ཁོང༌ངི༌ ཅི༌ལིམ༌ཅི༌ ནང༌ང༌ ཆུ༌ ལུགས༌ཏེ༌ ཁོང༌རང༌ངི༌ ལོབ༌ཕྲུགས༌གུན༌ནི༌ རྐང༌པ༌ ཁྲུ༌ཅེས༌ གོ༌ཟུག༌ ཛད༌ཏེ༌ སྐྱེད༌པ༌ སྲིལ༌ལ༌ ཛད༌ཁན༌ནི༌ ལག༌ཕིས༌ ཆེན༌མོ༌ ཉམ༌པོ༌ ཕིའ༌ ཛདས༌།
ཁོང༌ ཤི༌མོན༌ པི༌ཏྲར༌རི༌ དུན༌ལ༌ ལེབ༌བ༌ཅིག༌, པི༌ཏྲར༌རི༌ ཟེརས༌, “གཙོ༌བོ༌ ཉེ༌རང༌ངི༌ ངའེ༌ རྐང༌པ༌ ཁྲུའ༌ ཛད༌དད༌ད༌?”
ཡེ༌ཤུའི༌ ཁོའ༌ ལན༌སལས༌, “ངའེ༌ ཅོ༌ཁན༌བོ༌ དག༌ས༌ ཁྱོ༌རང༌ང༌ ཧ༌མི༌གོ༌, ཨིན༌ནའང༌ སྟིང༌ནེ༌ ཧ༌གོ༌ཨིན༌།”
པི༌ཏྲར༌རི༌ ཟེརས༌, “མན༌, ཉེ༌རང༌ངི༌ ངའེ༌ རྐང༌པ༌ མ༌ནེ༌ ཁྲུ༌ མ༌ཛད༌།”
ཡེ༌ཤུའི༌ ཁོའ༌ མོལས༌, “ཀལ༌ཏེས༌ ངའེ༌ ཁྱོ༌རང༌ངི༌ རྐང༌པ༌ མ༌ཁྲུ༌ན༌ ཏེ༌ནེ༌ ངའེ༌ ནོར༌སྐལ༌ལི༌ ནང༌ང༌ ཁྱོ༌རང༌ང༌ ཁག༌ མེད༌།”
ཤི༌མོན༌ པི༌ཏྲར༌རི༌ ཟེརས༌, “ཏེ༌ཟུག༌ ཨིན༌ན༌, ཏེ༌ནེ༌ གཙོ༌བོ༌ ངའེ༌ རྐང༌པ༌ མ༌ཚད༌, ལག༌ དང༌ གོའང༌ ཁྲུའ༌ཛད༌།”
ཡེ༌ཤུའི༌ ཁོའ༌ ལན༌སལས༌, “ཆུའ༌ ཞུགས༌ཁན༌ནི༌ མི༌བོའེ༌ རྐང༌པ༌ཙ༌ མ༌ནེ༌ ཁྲུ༌གོས༌ མེད༌ཏེ༌ ཨིན༌ནོག༌, ཁོའེ༌ ཟུགས༌པོ༌ གང༌པོ༌ ལག༌མོ༌ ཨིན༌ནོག༌། ཅིག༌ཅིག༌ མ༌སྟོགས༌ ཁྱོ༌ཞའ༌ ཚང༌མ༌ རྩང༌མ༌ ཨིན༌།” ཡེ༌ཤུའ༌ ངོ༌ལོག༌ ཅོ༌ཅེས༌ཅན༌ནི༌ མི༌བོ༌ ཐུག༌གྱུས༌ ཡོད༌ པ༌སང༌, “ཅིག༌ཅིག༌ མ༌སྟོགས༌ ཁྱོ༌ཞའ༌ ཚང༌མ༌ རྩང༌མ༌ ཨིན༌” མོལས༌།
ཡེ༌ཤུའི༌ ལོབ༌ཕྲུགས༌གུན༌ནི༌ རྐང༌པ༌ ཁྲུ༌ ཚར༌ར༌ཅིག༌ ནམ༌ཟའ༌ ནམས༌ཏེ༌ ཁོང༌རང༌ངི༌ ནས༌སའེ༌ཀ༌ ཞུགས༌, ཡང༌ ཁོང༌ངི༌ ལོབ༌ཕྲུགས༌གུན༌ལ༌ ཏྲིའ༌ ཛདས༌, “ངའེ༌ ཅོས༌ཁན༌ནི༌ ཏོན༌བོ༌ ཁྱོ༌ཞའ༌ ཧ༌གོའ༌? ཁྱོ༌ཞའེ༌ ང༌ ལོབ༌བོན༌ དང༌ གཙོ༌བོ༌ ཟེར༌ར༌ནོག༌, ཏེ༌ཟུག༌ ཟེར༌ཅེས༌པོ༌ ཀྲང༌པོ༌ ཨིན༌ནོག༌, ཅིའ༌ཟེར༌ན༌ ང༌ ཏེ༌བོ༌ ཨིན༌ནའང༌ ཨིན༌། ཏ༌ ང༌ ཁྱོ༌ཞ༌གུན༌ནི༌ ལོབ༌བོན༌ དང༌ གཙོ༌བོ༌ ཨིན༌ཨིན༌ཞིག༌ ཁྱོ༌ཞའེ༌ རྐང༌པ༌ ཁྲུའད༌ན༌, ཁྱོ༌ཞ༌གུན༌ནིའང༌ ཅིག༌ དང༌ ཅིག༌གི༌ རྐང༌པ༌ ཁྲུ༌གོས༌། ངའེ༌ ཅོས༌ཁན༌གུན༌ ཁྱོ༌ཞེའང༌ ཅོ༌ཅེས༌སི༌ ཕིའ༌ ཁྱོ༌ཞ༌གུན༌ལ༌ ངའེ༌ སྤེ༌ཞིག༌ སྟན༌ཏེ༌ ཨིན༌། ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ཡོག༌པོ༌ སྤོན༌བོའེ༌ སང༌ ཆེའ༌ མ༌ནོག༌, ཡང༌ ལོན༌ ཁྱོང༌ཁན༌བོ༌ ལོན༌ ཀལ༌ཁན༌བོའེ༌ སང༌ ཆེའ༌ མ༌ནོག༌། ཏ༌ ཁྱོ༌ཞ༌གུན༌ལ༌ འི༌གུན༌ ཧ༌གོ༌ཏེ༌ ཨིན༌ནོག༌། འི༌གུན༌ནི༌ཀ༌ ལག༌ལེན༌ ཅོ༌ན༌ ཅིན༌ལབས༌ ཐོབ༌ཨིན༌།”


གཙོ༌བོ༌ ཡེ༌ཤུའི༌ མོལས༌, “ངའེ༌ ཁྱོ༌ཞའ༌ ཚང༌མའེ༌ སྐོར༌ལ༌ ཟེར༌ར༌མེད༌, ངའེ༌ ལྡམས༌ཁན༌གུན༌ ང༌ གྱུས༌ཡོད༌། ཨིན༌ནའང༌ ཏམ༌པའེ༌ སུང༌རབས༌སི༌ ནང༌ང༌, ‘ང༌ ཉམ༌པོ༌ ཟའ༌ཁན༌བོའེ༌ ངའ༌ ངོ༌ལོག༌ ཅོ༌ཨིན༌’ བྲིས༌ཁན༌བོ༌ དྲན༌དྲ༌ གྲུབ༌གོས༌། འི༌གུན༌ ཇུང༌ ཟ༌ནེ༌ ཁྱོ༌ཞ༌གུན༌ནི༌ ང༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཨིན༌ཁན༌བོ༌ ཏད༌པ༌ ཅོ༌ཅེས༌སི༌ ཕིའ༌ ངའེ༌ འི༌བོ༌ ཇུང༌ངི༌ སང༌ སྔུན༌ལ༌ དག༌ས༌ ཁྱོ༌ཞ༌གུན༌ལ༌ ཟེར༌རད༌། ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ངའེ༌ ཀལ༌ཁན༌གུན༌ལ༌ གའ༌སུས༌ ཅོ༌ཁན༌གུན༌ནི༌ ངའ༌ གའ༌སུས༌ ཅོས༌ཏེ༌ ཨིན༌, ཡང༌ ང༌ གའ༌སུས༌ ཅོ༌ཁན༌གུན༌ནི༌ ང༌ ཀལ༌ལ༌ ཛད༌ཁན༌བོའ༌ གའ༌སུས༌ ཞུས༌ཏེ༌ ཨིན༌ནོག༌།”
ཏེ༌བོ༌ མོལ༌ཏེ༌ སྟིང༌ནེ༌ ཡེ༌ཤུའི༌ སེམས༌ལ༌ མ༌སྲན༌ཏྲེ༌ ནགས༌ ཐོང༌, ཡང༌ སྤང༌པོ༌ སལ༌ཏེ༌ མོལས༌, “ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ཁྱོ༌ཞའེ༌ ཕྲོ༌ནེ༌ ཅིག༌ཅིག༌གི༌ ངའ༌ ངོ༌ལོག༌ ཅོ༌ཨིན༌།”
ཏེ༌ནེ༌ ལོབ༌ཕྲུགས༌གུན༌ནི༌ ཅིག༌ དང༌ ཅིག༌ག༌ ལྟས༌, ཅིའ༌ཟེར༌ན༌ ཁོང༌ངི༌ སུའི༌ སྐོར༌ལ༌ མོལ༌ཏེ༌ ཨིན༌ སུའང༌ གྱུས༌ མེད༌པིན༌། ཡེ༌ཤུའི༌ ཅེས༌པ༌ ཛད༌ཁན༌ནི༌ ལོབ༌ཕྲུགས༌པོ༌ ཁོང༌ངི༌ ལྡོའེ༌ཀ༌ དུགས༌ཏེ༌ ཡོད༌པིན༌། ཤི༌མོན༌ པི༌ཏྲར༌རི༌ ཏེ༌ ལོབ༌ཕྲུགས༌པོའ༌, སུའི༌ སྐོར༌ལ༌ མོལ༌ཏེ༌ ཨིན༌ ཡེ༌ཤུའ༌ ཏྲི༌ཅེས༌ལ༌ རྡའ༌ ཏངས༌?
ཁོ༌ ཡེ༌ཤུའི༌ ཆོགས༌ལ༌ ཉེས༌ཏེ༌ ཁོང༌ང༌ ཏྲིས༌, “གཙོ༌བོ༌ ཁོ༌ སུ༌ ཨིན༌ནོག༌?”
ཡེ༌ཤུའི༌ ལན༌སལས༌, “ངའེ༌ ཏ༌གི༌ ད༌བེན༌ནི༌ ནང༌ང༌ སྤགས༌ཏེ༌ ཏང༌ཅེས༌ཅན༌བོ༌ ཨིན༌།” ཏེ༌ནེ༌ ཡེ༌ཤུའི༌ ཤི༌མོན༌ ཀར༌ཡོད༌པའེ༌ བུ༌ཚ༌ ཡུ༌དཱ༌ ཏ༌གི༌ སྤགས༌ཁན༌བོ༌ སལས༌། ཏ༌གི༌ ཁམ༌བུ༌བོ༌ ཟའ༌ཅིག༌ ཤེ༌ཏན༌ ཁོའེ༌ ནང༌ང༌ ཞུགས༌། ཡེ༌ཤུའི༌ ཁོའ༌ མོལས༌, “ཁྱོ༌རང༌ངི༌ ཅོ༌ཅེས༌ཅན༌བོ༌ གྱོགས༌པ༌ ཅོས༌།” ཨིན༌ནའང༌ ཁར༌ཇི༌ ཟེན༌ ཡོད༌ཁན༌ ཞན༌ཚང༌མའ༌ ཡེ༌ཤུའི༌ ཁོའ༌ ཏེ༌ཟུག༌ ཅིའ༌ མོལ༌ཏེ༌ ཨིན༌ ཅའང༌ ཧ༌མ༌གོ༌། ཡུ༌དཱ༌ པེ༌ནེ༌ ཁག༌ཁུར༌པ༌ ཨིན༌པ༌, ཁ༌ཅིག༌གི༌ ཡེ༌ཤུའི༌ ཁོའ༌ ཏུས༌ཆེན༌ནི༌ ཕིའ༌ སྒོས༌དོམ༌གུན༌ ཉོ༌ཅེས༌ ཡ༌ ཉལ༌བ༌ཅན༌ གུན༌ལ༌ པེ༌ནེ༌ ཏང༌ཅེས༌སི༌ ཕིའ༌ མོལ༌ཏེ༌ ཨིན༌གྲོ༌ སམ༌། ཡུ༌དཱའེ༌ ཏ༌གི༌ ཁམ༌བུ༌བོ༌ ཟོས༌ཏེ༌ ཁོ༌ ཕི༌ལོག༌ག༌ བིང༌ཏེ༌ སོང༌, ཏེ༌ ཟ༌ནེ༌ ཚན༌ སོང༌ཏེ༌ ཡོད༌པིན༌།


ཡུ༌དཱ༌ སོང༌ ཚར༌ར༌ཅིག༌ གཙོ༌བོ༌ ཡེ༌ཤུའི༌ མོལས༌, “ཏ༌ མི༌རིགས༌སི༌བུའ༌ སྤལ༌ ཐོབ༌ཨིན༌, ཡང༌ ཁོ༌ གྱུད༌ཏེ༌ དཀོན༌མཆོག༌ག༌ སྤལ༌ ཐོབ༌ཨིན༌། ཀལ༌ཏེས༌ ཁོའེ༌ ཞས༌ཏེ༌ དཀོན༌མཆོག༌ག༌ སྤལ༌ ཐོབ༌བད༌ན༌, དཀོན༌མཆོག༌གི༌ ཁོང༌རང༌ངི༌ ནང༌ང༌ སྲས༌ལའང༌ སྤལ༌ གྱོགས༌པ༌ སལ༌ལ༌ ཛད༌ཨིན༌། ངའེ༌ ཕྲུ༌གུ༌གུན༌, ཁྱོ༌ཞ༌གུན༌ ཉམ༌པོ༌ ང༌ ཏ༌རུང༌ ཏུས༌ ཉུ༌ངུན༌ཞིག༌ ལུས༌ཨིན༌། ཁྱོ༌ཞའེ༌ ང༌ ཙལ༌ཨིན༌, ཀ༌ཟུག༌ ངའེ༌ ཡ༌ཧུ༌དཱ༌པའེ༌ འུ༌སྐྱོང༌གུན༌ལ༌ ཟེར༌པིན༌ དག༌ས༌ ཁྱོ༌ཞ༌གུན༌ལའང༌ ཟེར༌རད༌, ཀ༌རུ༌ ང༌ ཆའད༌ ཁྱོ༌ཞ༌གུན༌ ཏེ༌རུ༌ ཡོང༌ མི༌ཉན༌། ངའེ༌ ཁྱོ༌ཞ༌གུན༌ལ༌ བཀའ༌རྒྱ༌ སོ༌མ༌ཞིག༌ ཏང༌ངད༌, ཅིག༌ དང༌ ཅིག༌ག༌ ཅམས༌པ༌ ཅོས༌། ངའེ༌ ཁྱོ༌ཞའ༌ ཅམས༌པ༌ ཅོའ༌ ཙོགས༌ལ༌, ཁྱོ༌ཞ༌གུན༌ནིའང༌ ཅིག༌ དང༌ ཅིག༌ག༌ ཅམས༌པ༌ ཅོ༌གོས༌། ཏེ༌བོའེ༌ མི༌ཚང༌མ༌ལ༌ ཁྱོ༌ཞ༌གུན༌ ངའེ༌ ལོབ༌ཕྲུགས༌ ཨིན༌ཁན༌བོ༌ ཤེས༌ཨིན༌, ཀལ༌ཏེས༌ ཁྱོ༌ཞའེ༌ ཅིག༌ དང༌ ཅིག༌ག༌ ཅམས༌པ༌ ཅོ༌ན༌།”
ཤི༌མོན༌ པི༌ཏྲར༌རི༌ ཡེ༌ཤུའ༌ ཟེརས༌, “གཙོ༌བོ༌ ཉེ༌རང༌ ཀ༌རུ༌ སྐྱོད༌ཅེས༌ ཨིན༌?”
ཡེ༌ཤུའི༌ ལན༌སལས༌, “ང༌ ཆ༌སའ༌ དག༌ས༌ ཁྱོ༌རང༌ ཡོང༌ མི༌ཉན༌, ཨིན༌ནའང༌ སྟིང༌ནེ༌ ཁྱོ༌རང༌ ངའ༌ བྲངས༌ཏེ༌ ཡོང༌ཨིན༌།”
པི༌ཏྲར༌རི༌ ཏྲིས༌, “ཀྱེ༌ གཙོ༌བོ༌ ང༌ ཉེ༌རང༌ ཉམ༌པོ༌ དག༌ས༌ ཅིའ༌ ཡོང༌ མི༌ཉན༌། ཉེ༌རང༌ངི༌ ཕིའ༌ ངའེ༌ སྲོག༌ ཏང༌ཨིན༌།”
ཡེ༌ཤུའི༌ ལན༌སལས༌, “ཁྱོ༌རང༌ངི༌ ངའེ༌ ཏོན༌ལ༌ རང༌ངི༌ སྲོག༌པོ༌ ཏང༌ཨིན༌ན༌? ངའེ༌ ཁྱོ༌རང༌ང༌ དེན༌བ༌ དེན༌བ༌ ཟེར༌རད༌, ཅ༌པོའེ༌ ཅ༌སྐད༌ ཏང༌ངི༌ སང༌ སྔུན༌ལ༌, ཁྱོ༌རང༌ངི༌ ངའ༌ ལན༌ སུམ༌ མི༌ཤེས༌ཟུན༌ ཏང༌ཨིན༌།”

Mihaino ny ཡོ༌ཧཱ༌ནན༌ 13