© ཀལ༌ཏེས༌ བྲིས༌ཏེ༌ ཡོད༌ན༌ མན༌ནེ༌ འི༌ བྲིས༌ཁན༌ དང༌ སིལ༌ཁན༌ ཚང༌མའེ༌ Creative Commons Attribution-NonCommercial-NoDerivatives 4.0 International License འི༌ ལག༌ག༌ ཡོད༌། ℗ This work is licensed under a Creative Commons Attribution-NonCommercial-NoDerivatives 4.0 International License 

Ladakhi SIL (NT) NonDrama

ཞག༌ ཉིས༌སི༌ སྟིང༌ནེ༌, གཱ༌ལིལ༌ལིའི༌ ཡུལ༌ཇོངས༌སི༌ ཀ༌ནཱའེ༌ གྲོང༌ཁྱེར༌རི༌ ནང༌ང༌ བག༌སྟོན༌ཞིག༌ ཡོད༌པིན༌, ཡང༌ ཡེ༌ཤུའི༌ ཨ༌མ༌ ཏེ༌རུ༌ སོང༌། ཡེ༌ཤུ༌ དང༌ ཁོང༌ངི༌ ལོབ༌ཕྲུགས༌གུན༌ནའང༌ ཏེ༌ བག༌སྟོན༌ལ༌ བོད༌ཏེ༌ ཡོད༌པིན༌། ཏེ༌རུ༌ བག༌སྟོན༌ནི༌ གྲོན༌ནི༌ ཏུས༌ལ༌ རྒུན༌ཆང༌ ཚར༌ར༌ཅིག༌, ཡེ༌ཤུའི༌ ཨ༌མའེ༌ ཡེ༌ཤུའ༌ ཟེརས༌, “ཁོང༌གུན༌ལ༌ རྒུན༌ཆང༌ ཚར༌ཏེ༌ མི༌དུག༌།”
ཡེ༌ཤུའི༌ ཨ༌མའ༌ མོལས༌, “ཅེས༌པའེ༌ བུ༌མོ༌, ང༌ འི༌ ནང༌ང༌ ཅིའ༌ སྲེའད༌། ཏ༌རུང༌ ངའེ༌ ཏུས༌ མ༌ལེབ༌བ༌ཨིན༌།”
ཨ༌མའེ༌ ཡོག༌པོ༌གུན༌ལ༌ ཟེརས༌, “ཁོང༌ངི༌ ཅི༌ མོལ༌ནའང༌ ཏེ༌ཟུག༌ ཅོས༌།”
ཏེན༌ན༌ དུན༌ལ༌ ཡ༌ཧུ༌དཱ༌པའེ༌ རྩང༌མ༌ ཅོ༌ཅེས༌སི༌ ལུག༌སྲོལ༌ ནང༌ཞིན༌ ཁྲུ༌ཅེས༌ལ༌ ཆུའི༌ ཟ༌མ༌ དྲུག༌ ཡོད༌པིན༌། འི༌ ཟ༌མ༌ རེ༌རེ༌ ནང༌ང༌ ཧ༌ལམ༌ ཆུ༌ ལི༌ཀྲར༌ 80-120 ཟམ༌ ཆུད༌དད༌པིན༌།
ཡེ༌ཤུའི༌ ཡོག༌པོ༌གུན༌ལ༌ མོལས༌, “ཏེ༌ ཛ༌མ༌གུན༌ནི༌ ནང༌ང༌ ཆུ༌ སྐོང༌,” ཡོག༌པོ༌གུན༌ནི༌ ཁོང༌ངི༌ མོལ༌ཁན༌ ནང༌ཞིན༌ ཛ༌མ༌གུན༌ གང༌ཅུགས༌ཏེ༌ ཆུ༌ སྐངས༌།
ཏེ༌ སྟིང༌ནེ༌ ཡེ༌ཤུའི༌ ཡོག༌པོ༌གུན༌ལ༌ མོལས༌, “ཏ༌ ཟ༌མའེ༌ ནང༌ནེ༌ ཆུ༌ ཅུས༌ཏེ༌, གྲོན༌ནི༌ ལྡིང༌སྤོན༌ལ༌ ཁྱེར༌,” ཡང༌ ཁོང༌གུན༌ནི༌ ཡེ༌ཤུའི༌ མོལ༌ཁན༌བོ༌ ཅོས༌།
རྒུན༌ཆང༌ གྱུར༌ཁན༌ནི༌ ཆུ༌བོ༌ ལྡིང༌སྤོན༌ནི༌ ཉངས༌, ཁོའ༌ འི༌ རྒུན༌ཆང༌བོ༌ ཀ༌ནེ༌ ཁྱོངས༌ གྱུས༌ མེད༌པིན༌, ༼ཨིན༌ནའང༌ ལྡིངས༌སྤོན༌ལ༌ ཆུ༌ ཁྱེར༌ཁན༌ནི༌ ཡོག༌པོ༌གུན༌ལ༌ གྱུས༌ཡོད༌པིན༌༽ ཁོའེ༌ མག༌པའ༌ བོད༌ཏེ༌ ཟེརས༌, “ཚང༌མའེ༌ གྲོན༌པོ༌གུན༌ལ༌ ཆང༌ གྱལ༌ལ༌བོ༌ སྔུན༌ལ༌ ཏངས༌ཏེ༌ གྲོན༌པོ༌གུན༌ ར༌རོས༌ས༌ཅིག༌ ཆང༌ ཐུའ༌བོ༌ ཁྱོང༌ཅེན༌, ཨིན༌ནའང༌ ཁྱོ༌རང༌ངི༌ ཚང༌མའེ༌སང༌ ཆང༌ གྱལ༌ལ༌བོ༌ དག༌ས༌ ཚག༌པ༌ བོར༌ཏེ༌ རག༌།”
འི༌བོ༌ ཡེ༌ཤུའི༌ ཧ༌ལས༌ཤེས༌སི༌ ལྟས༌ ཏང༌པོ༌བོ༌ ཨིན༌པིན༌, ཀ༌བོ༌ ཁོང༌ངི༌ གཱ༌ལིལ༌ལི༌ ཡུལ༌ཇོངས༌སི༌ ཀ༌ནཱའེ༌ གྲོང༌ཁྱེར༌ལ༌ སྟན༌ན༌ ཛད༌ཏེ༌ ཁོང༌རང༌ངི༌ ཟིར༌རྗིད༌ སྔོན༌ ཅུག༌ག༌ ཛདས༌, ཡང༌ ཁོང༌ངི༌ ལོབ༌ཕྲུགས༌གུན༌ནི༌ ཁོང༌ངི༌ཀ༌ ཏད༌པ༌ ཅོས༌།
ཏེ༌ སྟིང༌ནེ༌ ཡེ༌ཤུ༌, ཁོང༌ངི༌ ཨ༌མ༌, ནོ༌ དང༌ ལོབ༌ཕྲུགས༌ གུན༌ ཀ༌ཕར༌ན༌ཧུམ༌ གྲོང༌ཁྱེར༌ལ༌ སྐྱོདས༌, ཏེ༌རུ༌ ཞག༌ ཁ༌ཅིག༌ ཞུགས༌།


ཡ༌ཧུ༌དཱ༌པའེ༌ པེ༌སག༌གི༌ ཏུས༌ཆེན༌ ཉེ༌མོ༌ ལེབ༌བ༌ཅིག༌, ཡེ༌ཤུ༌ ཀེན༌ལ༌ ཡེ༌རུ༌ཤ༌ལེམ༌མ༌ སྐྱོདས༌། ཁོང༌ངི༌ ཏེ༌རུ༌ ཆོད༌ཁང༌ངི༌ གྱང༌སྐོར༌རི༌ ནང༌ང༌ ལང༌ཏོ༌, ལུག༌ དང༌, ཕུར༌གོན༌ གུན༌ ཙོང༌ཁན༌ ཡང༌ པེ༌ནེ༌ རྡེབ༌ཁན༌ གུན༌ ཁོ༌རང༌གུན༌ནི༌ ཅོག༌ཙེ༌ དུན༌ལ༌ དུག༌ཏེ༌ ཡོད༌ད༌ ཟིགས༌། ཡེ༌ཤུའི༌ ཐག༌པ༌ཞིག༌ག༌ རྟལ༌ལྕག༌ ཛད༌ཏེ༌, ཆོད༌ཁང༌ངི༌ གྱང༌སྐོར༌རི༌ ནང༌ང༌ ཡོད༌ཁན༌ནི༌ ལུག༌, ལང༌ཏོ༌ དང༌ ཕུར༌གོན༌ ཚང༌མ༌ ཕི༌ལོག༌ག༌ ཕིང༌ང༌ ཛདས༌, ཡང༌ པེ༌ནེ༌ རྡེབ༌ཁན༌གུན༌ནི༌ ལྕགས༌སི༌ པེ༌ནེ༌གུན༌ ཁྲེས༌ཏོར༌ ཛད༌ཏེ༌ ཅོག༌ཙེ༌གུན༌ ལོག༌ག༌ ཛདས༌། ཡང༌ ཕུར༌གོན༌ ཙོང༌ཁན༌གུན༌ལ༌ མོལས༌, “འི༌ ཚང༌མ༌ ཕིངས༌ཏེ༌ ཁྱེར༌, ངའེ༌ ཡབ༌བི༌ ཞུགས༌ས༌བོ༌ ཁྲོམས༌ས༌ མ༌ཅོ༌ཤིག༌།”
ཡེ༌ཤུའི༌ ལོབ༌ཕྲུགས༌གུན༌ལ༌ ཏམ༌པའེ༌ སུང༌རབས༌སི༌ ནང༌ང༌ བྲིས༌ཏེ༌ ཡོད༌ཁན༌བོ༌ ཨིད༌ཏུ༌ ཡོངས༌, “ངའེ༌ སེམས༌སི༌ ནང༌ང༌ ཉེ༌རང༌ངི༌ ཏམ༌པ༌ ནས༌སའེ༌ ཕིའ༌ ཅམས༌པ༌བོ༌ ནི༌, མེ༌ བར༌ཁན༌ ཙོགས༌ ཨིན༌ ཀ༌བོའེ༌ ང༌ མེད༌ཁན༌ ཅོ༌ཨིན༌།”
ཡ༌ཧུ༌དཱ༌པའེ༌ སྤོན༌བོ༌གུན༌ནི༌ ཡེ༌ཤུའ༌ ཟེརས༌, “འི༌གུན༌ ཅོ༌ཅེས༌སི༌ ཝང༌ ཡོད༌ཁན༌བོ༌ སྟན༌ཅེས༌ལ༌ ཁྱོ༌རང༌ངི༌ ཅི༌ ཧ༌ལས༌ཤེས༌སི༌ སྟགས༌ཤིག༌ སྟན༌ཨིན༌།”
ཡེ༌ཤུའི༌ ཏེ༌ མི༌གུན༌ལ༌ ལན༌སལ༌ཨིན༌ མོལས༌, “འི༌ ཆོད༌ཁང༌བོ༌ ཤིག༌, ངའེ༌ ཞག༌ སུམ༌མི༌ ནང༌ང༌ ཡང༌ ལང༌ཨིན༌།”
ཏེ༌གུན༌ནི༌ ཁོང༌ང༌ ཏྲིས༌, “འི༌ ཆོད༌ཁང༌བོ༌ རྩིག༌ག༌ལ༌ ལོ༌ ཞིབ༌ཅུ༌ ཞ༌རུག༌ གོར༌ཏེ༌ ཨིན༌པིན༌, ཅི༌ ཁྱོ༌རང༌ངི༌ འི༌བོ༌ ཞག༌ སུམ༌མི༌ ནང༌ང༌ ཞང༌ཨིན༌ན༌?” ཨིན༌ནའང༌ ཡེ༌ཤུའི༌ མོལ༌ཁན༌ནི༌ ཆོད༌ཁང༌བོ༌ ནི༌ ཁོང༌རང༌ངི༌ སྐུ༌ཟུགས༌སི༌ སྐོར༌ལ༌ ཨིན༌པིན༌། ཁོང༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ཞངས༌ཏེ༌ སྟིང༌ནེ༌ ཁོང༌ངི༌ ལོབ༌ཕྲུགས༌གུན༌ལ༌ ཁོང༌ངི༌ འི༌ ཞལ༌ཏ༌ མོལ༌ཁན༌གུན༌ ཨིད༌ཏུ༌ ཡོངས༌, ཡང༌ ཁོང༌གུན༌ནི༌ ཏམ༌པའེ༌ སུང༌རབས༌ དང༌ ཡེ༌ཤུའི༌ མོལ༌ཁན༌ནི༌ ཞལ༌ཏ༌གུན༌ནི༌ཀ༌ ཏད༌པ༌ ཅོས༌།
ཡེ༌ཤུ༌ པེ༌སག༌གི༌ ཏུས༌ཆེན༌ལ༌ ཡེ༌རུ༌ཤ༌ལེམ༌མ༌ ཞུགས༌ཏེ༌ ཡོད༌ ཟ༌ནེ༌, ཏེ༌རུ༌ མི༌ མང༌པོའེ༌ ཁོང༌ངི༌ ཧ༌ལས༌ཤེས༌སི༌ ཛད༌པ༌གུན༌ ཐོང༌ཏེ༌, ཁོང༌ངི༌ཀ༌ ཏད༌པ༌ ཁྱོངས༌། ཨིན༌ནའང༌ ཡེ༌ཤུའ༌ ཏེ༌ མི༌གུན༌ནི༌ཀ༌ ལོ༌མ༌ཁྱེལ༌ ཅིའ༌ཞུ༌ན༌ ཁོང༌ངི༌ ཚང༌མའེ༌ སྙིང༌ ཁྱེན༌ན༌ ཛདས༌། མི༌གུན༌ ཀ༌ཟུག༌ཤིག༌ ཨིན༌ཁན༌བོ༌ ཁོང༌ང༌ སུའིང༌ ཤད༌གོས༌ མེད༌ཀྱག༌ ཅིའ༌ཞུ༌ན༌ ཁོང༌ངི༌ ཁོང༌གུན༌ནི༌ སྙིང༌ངི༌ ནང༌ང༌ ཡོད༌ཁན༌བོ༌ ཁྱེན༌ན༌ ཛད༌ད༌ནོག༌།

Mihaino ny ཡོ༌ཧཱ༌ནན༌ 2