Akha - 2001 Edition (NT) Drama

Akha Bible Revision (Latin Script) © Thailand Bible Society, 2011.

Yeˬsuˇ aˬ yawꞈ-euˬ zaˬ lahˇ deuˬ-ahˇ heu loꞈ-ehˇ ehˇ nehˬ-euˬ meh.“Tiˬ poˆ-aˬ, smˇ muiˬ smˇ baw tiˬ gʼaˬ jawˇ-eu meh. Aˬ yawꞈ-euˬ myawˬ bi jeˬ-hmˬ-euˬ tiˬ gʼaˬ jawˇ-awˇ, myawˬ jeˬ hmˬ-eu tsawˇ haˬ kʼoeˇ gʼaˬ aˬ yawꞈ-euˬ myawˬ gahˬ zmˬ dzeh luꞈ-eu gaˇ kawˆ, aˬ cawˬ aˬ yawꞈ-ahˇ tsaꞈ gaˬ laˇ-euˬ meh. Kʼoeˇ miˇ neh, myawˬ jeˬ hmˬ-eu kʼoeˇ gʼaˬ-ahˇ aˬ yawꞈ kuˇ-awˇ ehˇ nehˬ-eu, ‘Nawˬ-euˬ gaˇ kawˆ ngaˇ ya gaˬ-euˬ maˬ muiˬ nya. Nawˬ neh ngaˬ-euˬ myawˬ jeˬ hmˬ-euˬ jaˇ laˇ dawˬ tawˆ luꞈ ngaˇ jawˇ gaˇ yuˇ laꞈ sheˇ. Nawˬ-ahˇ ngaˬ-euˬ myawˬ jeˬ hmˬ-eu gʼaˬ maˬ paˇ gi geuꞈ nya ngaˇ.’ Myawˬ jeˬ hmˬ-eu kʼoeˇ gʼaˬ yawˬ haˇ yawˬ ha ehˇ-eu, ‘Ngaˇ aˬ joˆ-ehˇ jahˇ paˬ maˬ siˬ miˇ-a. Ngaˬ-euˬ baw leˬ ngaˬ-ahˇ aˬ yawꞈ-euˬ myawˬjeˬ hmˬ-eu gʼaˬ maˬ paˇ bi geuꞈ laꞈ-eu ngaˇ. Ngaˇ-aˬ, aˬ cawˬ loꞈ-ehˇ miˇ tsaˬ-ahˇ duˬ duˬ-ehˇ kʼawꞈ maˬ mˇ dzaˬ coeˇ nya. Aˬ cawˬ-ahˇ shaˇ dzaˬ shaˇ dawˇ-iˇ-eu kʼawꞈ, shaꞈ dawˇ miˇ-a. Nymˬ-mˇ ngaˇ heu loꞈ-ehˇ noeˬ tsehˆ ma. Myawˬ jeˬ hmˬ-eu gaˇ heu hmˬ maˬ ya mˇ-ehˇ pyeuꞈ-iˇ kʼawꞈ, aˬ cawˬ ngaˬ-ahˇ iˇ kahˇ-ahˇ ha ahˇ nehˬ laꞈ ni ngaˇ jahˇ ma.’
Kʼoeˇ naˇ, aˬ yawꞈ-euˬ baw leˬ-ahˇ dziˇ dzoˆ kʼaˇ daˆ-eu baw leˬ tiˬ gʼaˬ saˇ-iˬ tiˬ gʼaˬ-ahˇ aˬ yawꞈ kuˇ-euˬ meh. Yaw beh gʼaˬ-ahˇ aˬ yawꞈ ehˇ nehˬ-eu, ‘Nawˇ ngaˬ-euˬ baw leˬ-ahˇ dziˇ dzoˆ aˇ myaˆ ni daˆ te.’ Kʼoeˇ gʼaˬ ehˇ-eu, ‘Tsiˇ tiˬ yaˇ keuˆ daˆ-eu ma.’ Aˬ yawꞈ ehˇ-eu, ‘Hehˬ. Nawˬ-euˬ jaˇ laˇ sahˬ boꞈ yuˇ-awˇ, yaw kawˇ-ehˇ nuiˇ-awˇ ngaˬ tseˇ keuˆ tehꞈ-ehˇ boꞈ ahˇ taˬ-awˬ.’ Kʼoeˇ naˇ, yawˬ gʼaˬ yawˬ-ahˇ aˬ yawꞈ ehˇ nehˬ-eu, ‘Nawˇ dziˇ dzoˆ aˇ myaˆ ni daˆ te.’ Kʼoeˇ gʼaˬ ehˇ-eu, ‘Cehˇ tiˬ heˇ zeuˇ daˆ-eu ma.’ Aˬ yawꞈ ehˇ nehˬ-eu, ‘Hehˬ. Nawˬ-euˬ jaˇ laˇ sahˬ boꞈ yuˇ-awˇ, yehꞈ yaˇ zeuˇ tehꞈ-ehˇ boꞈ ahˇ taˬ-awˬ.’
Maˬ sui maˬ dawˇ-eu myawˬ jeˬ hmˬ-eu tsawˇ haˬ kʼoeˇ gʼaˬ kʼoeˇ loꞈ-ehˇ yaw gahˇ zmˬ gaˇ, baw leˬ gʼaˬ ja ceuˬ nehˬ-euˬ meh. Miˇ tsaˬ shiˬ shaˬ jiˇ-ahˇ gaˬ-eu tsawˇ haˬ deuˬ-aˬ, yaw shehꞈ zaˬ deuˬ naˆ maˬ tseˇ yaw gahˇ zmˬ nya dzehˬ-eu meh.
“Ngaˇ naw maꞈ-ahˇ ehˇ nehˬ nyaˇ. Miˇ tsaˬ pyuˇ shuiˇ myawˬ gahˬ-ahˇ gʼoe-awˇ, aˬ cawˬ-ahˇ cawˬ cawˬ taꞈ-awˬ. Kʼoeˇ loꞈ-ehˇ jahˇ naˇ, pyuˇ shuiˇ myawˬ gahˬ kʼoeˇ deuˬ byoˆ-iˇ jiˇ ngeh, mˬ maˬ maˬ byaˆ zaˇ ziˇ ziꞈ-eu jawˇ duˬ laꞈ kʼoeˇ, naw maꞈ-ahˇ ha geuꞈ nehˬ laꞈ tehꞈ-a. Gaˇ yaw nyiˇ laꞈ kʼoeˇ saˇ jaˇ ziꞈ-eu tsawˇ haˬ-aˬ, gaˇ yaw huiˬ laꞈ kʼoeˇ kʼawꞈ saˇ jaˇ ziꞈ tehꞈ-a. Gaˇ yaw nyiˇ laꞈ kʼoeˇ maˬ sui maˬ dawˇ-eu tsawˇ haˬ-aˬ, gaˇ yaw huiˬ laꞈ kʼoeˇ kʼawꞈ maˬ sui maˬ dawˇ-aˇ. Miˇ tsaˬ pyuˇ shuiˇ myawˬ gahˬ-ahˇ naw maꞈ tuˆ tehˬ ngeh, saˇ jaˇ maˬ ziꞈ naˇ, maˇ maˇ ni gʼeh-eu pyuˇ shuiˇ myawˬ gahˬ-ahˇ bi tuˆ tehˬ-eu gʼaˇ duˬ naw maꞈ-ahˇ aˬ suˇ gʼaˬ jah coeˇ nmˇ. Naw maꞈ aˬ cawˬ-euˬ myawˬ gahˬ-ahˇ saˇ jaˇ maˬ ziꞈ naˇ, naw maˬ-ahˇ oꞈ-eu myawˬ gahˬ aˬ suˇ gʼaˬ a nehˬ laꞈ peuˬ nmˇ.
“Tsawˇ haˬ tiˬ gʼaˬ-iˬ baw leˬ nyiˬ gʼaˬ-euˬ zaˬ kʼaˆ maˬ geuꞈ nya-a. Tiˬ gʼaˬ-ahˇ bye naˇ, tiˬ gʼaˬ-ahˇ gaˬ tehꞈ-a. Tiˬ gʼaˬ-ahˇ yaw zeu baw naˇ, tiˬ gʼaˬ-ahˇ yaw zeu maˬ baw-aˇ. Naw maꞈ, Miˬyehˇ-euˬ zaˬ kʼaˆ hawˇ-eu pyuˇ shuiˇ myawˬ gahˬ-euˬ zaˬ kʼaˆ, nyiˬ jeˬ luꞈ tiˬ kawˆ loꞈ-ehˇ maˬ geuꞈ nya-a.”
Paˬliˬsehˇ deuˬ-aˬ, pyuˇ shuiˇ-ahˇ gaˬ-eu tsawˇ haˬ pyeuꞈ-eu miˇ neh, Yeˬsuˇ kʼoeˇ loꞈ-ehˇ ehˇ-eu ya gaˬ ngeh, Yeˬsuˇ-ahˇ naˬ gʼa naˬ gʼa-ehˇ uiˇ-eu meh. Yeˬsuˇ aˬ yawꞈ maꞈ-ahˇ ehˇ nehˬ-eu, “Naw maꞈ-aˬ, tsawˇ haˬ zaˬ-euˬ mehˬ shi yaw tsaˬ yaw dawˇ jahˇ geuꞈ-eu meh. Ehˇ kʼawꞈ, naw maꞈ-euˬ nui ma-ahˇ Miˬyehˇ siˬ nya meh. Aˬ jeˬ miˇ neh ehˇ naˇ, tsawˇ haˬ zaˬ neh ciˬ poeˬ-euˬ jeˬ-ahˇ Miˬyehˇ nui daˆ daˆ-eu meh.


Zahˇ dawˬ kʼoꞈ dawˬ hawˇ-eu Miˬyehˇ gʼaˇ duˬ ngehˬ dah-eu deuˬ-euˬ sahˬ boꞈ laꞈ kʼoeˇ boꞈ taˬ-euˬ deuˬ-aˬ, Iˇ cuꞈ shawˇ-eu Yoˇhaˬ maˬ doˆ le mi naˆ-ehˇ keuˆ ni-euˬ gʼaˇ duˬ meh. Yoˇhaˬ-euˬ ziˇ-ahˇ neh dahˬ beh-awˇ Miˬyehˇ Miˇkʼahˬ gaˇ kawˆ Laˬ kʼaˬ cehˇ-eu Guiˬ lahˬ dawˬ mehˬ-awˇ, tsawˇ haˬ yawˬ gʼaˬ na luꞈ tahˬ ceh ceh-awˇ kʼoeˇ gaˇ uˇ leˇ-eu leh jeh luꞈ meh. Ehˇ kʼawꞈ, mˬ hawˇ-eu miˇ byoˆ-iˇ jiˇ kʼawꞈ, Zahˇ dawˬ kʼoꞈ dawˬ laꞈ kʼoeˇ boꞈ taˬ-euˬ aˇ boꞈ boꞈ zaˬ tiˬ boꞈ tehꞈ-ehˇ kʼawꞈ byoˆ-iˇ-eu maˬ awˬ-a.


“Yawˬ ha-euˬ miˬ zaˬ kʼoꞈ-awˇ, yawˬ gʼaˬ yawˬ sheuˬ paˇ-eu tsawˇ haˬ aˬ geu gʼaˬ maˬ kaˬ, yawˬ ha-euˬ miˬ zaˬ-ahˇ bahˬ-eu meh. Aˬ cawˬ-euˬ miˬ kʼoꞈ-ahˇ sheuˬ-eu tsawˇ haˬ kʼawꞈ, aˬ cawˬ-euˬ miˬ zaˬ-ahˇ bahˬ-eu meh.

“Smˇ muiˬ smˇ baw tiˬ gʼaˬ jawˇ-eu meh. Aˬ yawꞈ-aˬ, aˇ poeˬ kʼaˆ dui dui-eu mehˬ tsoeˬ yaw pyuˇ yaw neˇ dm-awˇ, yawˬ nah na luꞈ dzaˬ-awˇ dawˇ-awˇ byawˬ gʼa luꞈ-eu meh. Aˬ yawꞈ-euˬ kmˇ cehˇ laˇ gʼoˆ dawˬ peh, Laˬzaˬluˇ lehˇ myahˇ-euˬ gʼawˇ mawˇ mawˇ lah-ehˇ maˇ naˇ naˇ-eu iˇ shaˬ iˇ taw tiˬ gʼaˬ baꞈ taˬ laˇ-awˇ bi ga-euˬ meh. Smˇ muiˬ smˇ baw kʼoeˇ gʼaˬ-euˬ hawˬ jeh-ahˇ neh ga ka le-euˬ dzaˬ ngehˬ dawˇ dzeh ya dzaˬ gaˇ aˬ yawꞈ noeˬ tmˬ-eu meh. Aˬ kuiˬ laˇ laˇ-ehˇ aˬ yawꞈ-euˬ maˇ naˇ-ahˇ myeuꞈ-eu meh.
“Iˇ shaˬ iˇ taw kʼoeˇ gʼaˬ shiˇ-awˇ, mˬ taˆ gʼaˬ kʼehˇ deuˬ neh Aˬbyaˬhaˬ-euˬ bawˇ kʼahˇ-ahˇ ciˬ keuˆ ha nehˬ leˇ-euˬ meh. Smˇ muiˬ smˇ baw kʼoeˇ gʼaˬ kʼawꞈ shiˇ-awˇ, baꞈ pahˬ-iˇ-euˬ meh. Shiˇ-eu miˇ kʼahˬ laꞈ kʼoeˇ kʼehˬ-eu kʼaˆ-eu jeˬ-ahˇ aˬ yawꞈ ya daˬ-awˇ, naˇ dui gawˇ dui dui-eu laꞈ kʼoeˇ gʼawˇ leuˇ haw leꞈ ngeh, gaˇ mahˇ kaˬ gaˇ Aˬbyaˬhaˬ-ahˇ haw mawˇ-awˇ, Aˬbyaˬhaˬ-euˬ bawˇ kʼahˇ-ahˇ Laˬzaˬluˇ nuiˇ luꞈ gaˇ ya mawˇ-euˬ meh. Kʼoeˇ ngeh, aˬ yawꞈ guˇ-awˇ ehˇ-eu, ‘Aˬ da Aˬbyaˬhaˬ-oˇ, ngaˬ-ahˇ gʼawˬ shaˬ gaˬ nehˬ laꞈ-awˬ. Laˬzaˬluˇ-euˬ laꞈ noeˇ iˇ cuꞈ-ahˇ bi cawˬ duiˆ-awˇ, ngaˬ-euˬ mehˬ laˇ coꞈ-iˇ ni tiˬ poˆ bi dzaˆ aˬ le sheˇ. Miˬ dzaˬ lahˇdui dui-eu miˇ neh tiˬ pawꞈ-iˬ maˬ daˬ coeˇ nya.’
Ehˇ kʼawꞈ, Aˬbyaˬhaˬ ehˇ-eu, ‘Aˬ li-oˇ, miˇ tsaˬ kʼoeˇ taˆ dehꞈ ngeh, nawˇ yaw nuiˬ jeˬ-ahˇ za-awˇ, Laˬzaˬluˇ maˬ muiˬ-eu jeˬ zaˬ-euˬ gaˇ noeˬ mawˇ-awˬ. Ehˇ kʼawꞈ, nymˬ-mˇ poˆ jawˇ-aˬ, Laˬzaˬluˇ heu gaˇ saˇ lehˆ ni ya jawˇ luꞈ-awˇ, nawˇ ya daˬ dui dui luꞈ meh. Kʼoeˇ uˬ taꞈ, nga maꞈ jawˇ gaˇ neh naw maꞈ jawˇ gaˇ maˬ iˇ maˬ laˇ tawꞈ nya ni, naꞈ dui dui-eu kuˬ kaˬ kaˬ ma bi jaˆ tsoeˬ taˬ-euˬ meh.’ Smˇ muiˬ smˇ baw kʼoeˇ gʼaˬ ehˇ-eu, ‘Aˬ da-oˇ, ngaˇ nawˬ-ahˇ heu loꞈ-ehˇ shaˇ ma. Laˬzaˬluˇ-ahˇ ngaˬ da-euˬ nymˇ-ahˇ tiˬ poˆ bi iˇ sheˇ. Ngaˬ-euˬ mehˇ nmˇ ngaˬ gʼaˬ jawˇ-eu ma. Kʼehˬ-eu kʼaˆ-eu jeˬ-ahˇ ya daˬ dui dui-eu jawˇ duˬ heu tsahˇ-ahˇ, aˬ ha mehˇ nmˇ maˬ ya laˇ keuˆ ni yahˇ-eu gʼaˇ duˬ tiˬ poˆ bi ehˇ gaˬ-iˇ sheˇ.’
“Aˬbyaˬhaˬ ehˇ-eu, ‘Moˇseˬ hawˇ-eu Miˬyehˇ gʼaˇ duˬ ngehˬ dah-eu deuˬ jawˇ meh. Aˬ yawꞈ maꞈ-euˬ ehˇ dawˬ-ahˇ aˬ ha mehˇ nmˇ naˇ haˬ luꞈ-uˇ.’ Smˇ muiˬ smˇ baw kʼoeˇ gʼaˬ ehˇ-eu, ‘Aˬ da Aˬbyaˬhaˬ-oˇ, kʼoeˇ loꞈ-ehˇ tehꞈ-ehˇ kʼawꞈ maˬ ngeuˇ-a siˬ. Shiˇ-euˬ tsawˇ haˬ tiˬ gʼaˬ paˇ gʼoꞈ poˆ-iˇ-awˇ ehˇ nehˬ-iˇ naˇ, aˬ ha mehˇ nmˇ iˬ baˇ noeˬ poˆ tehꞈ-a.’ Ehˇ kʼawꞈ, Aˬbyaˬhaˬ ehˇ-eu, ‘Moˇseˬ hawˇ-eu Miˬyehˇ gʼaˇ duˬ ngehˬ da-eu deuˬ-euˬ dawˬ-ahˇ aˬ yawꞈ maꞈ maˬ naˇ haˬ naˇ, shiˇ-euˬ tsawˇ haˬ gʼoꞈ dehꞈ laˇ-awˇ ehˇ nehˬ-iˇ kʼawꞈ, aˬ yawꞈ maꞈ maˬ jah-aˇ.”’

Mihaino ny Luˇkaꞈ 16