If you have would like a copy of this version please contact info@davaraudiobibles.org

Limbu Old Testament

खे़ब्‍याङ् यहवे दाङ्‌बाल्‍ले़ नुहन् मे़त्तु, “खे़ने़ॽ नु के़हिम्‍सयङ् के़रे़क् वालाधाओ लासे़म्‍मे़ॽ, थेआङ्‌भे़ल्‍ले़ कन् थाःक्‍को आङ्‌गाॽ आमिक्‍साओ खे़ने़ॽ साम्‌योबा निने़आङ् वाॽ॥ के़रे़क् परिक्‍ले़न् सुत्‍थोबा कुम्‍बाबा नु कुम्‍मामा कुगाप् नुसि थक्‍साहाॽ, हे़क्‍क्‍याङ् सुत्‍थोबा मेःम्‍बा थक्‍साहाॽलाम्‍बा कुम्‍बाबा नु कुम्‍मामा कुगाप् थिक्, हे़क्‍क्‍याङ् के़रे़क् इक्‍सादिङ् खाम्‍बेःक्‍मोबा परिक् परिक्‍पा पुसाहाॽओलाम्‍माङ् कुगाप् नुसि तारे़से़ॽ॥ कुम्‍बाबा नु कुम्‍मामा थक्‍साहाॽ नु पुहाॽ मे़हिङ्‌ल फाॽआङ् तारे़से़ॽ॥ आल्‍लआङ्‌धो नुसि ये़न् एगाङ् इक्‍सादिङ् खाम्‍बेःक्‍मो आङ्‌गाॽ लिबोङ् ये़न् थारिक् से़न्‍दिक् ले़न्‍दिक् पाङ्‌गे़न्‍दिङ् वहिप्‍मान् थार याःन्‍दुङ्‌ॽ॥ आङ्‌गाॽ चोगुङ्‌सिङ्‌बा के़रे़क् कुहिङ्‌वे़त् पाधुङ्‌साहाॽ मे़क्‍खुङ्‌सिङ्‌ॽ॥”
खे़ब्‍याङ् यहवे दाङ्‌बाल्‍ले़ इङ्‌जाःङ् चोगुबा हे़क्‍केए नुहःल्‍ले़ के़रे़क् चोगु॥
नुहन् किप् तुक्‍सि तङ्‌बे के़रे़ल्‍ले़ इक्‍सादिङ् खाम्‍बेःक्‍मो वदप्‍मा थाङे़आङ् वये़॥ हे़क्‍क्‍याङ् नुहन्, कुमेःत्तिन् कुस्‍सा ये़म्‍बित्‍छाहाॽ, हे़क्‍क्‍याङ् कुम्‍बाङ्‌लिहाॽ वदप्‍मा के़गे़प्‍पा च्‍वाःत्तोनु हिङ्‌मारे़ लागि वालाधाओ मे़लासे़॥ सुत्‍थो थक्‍साहाॽ नु सुत्‍थो मेःम्‍बा थक्‍साहाॽ हे़क्‍क्‍याङ् खाम्‍बेःक्‍मो के़उःङ्‌सिबा के़रे़क् थक्‍साहाॽ, निङ्‌वाॽफुमाङ्‌ङिल्‍ले़ नुहन् इङ्‌जाःङ् पिरुबा कुइसिक् कुगाप् कुगाप्, कुम्‍बाबा नु कुम्‍मामा थक्‍साहाॽ नुहःन्‍नु वालाधाओ मे़द्‌ये़॥ हे़क्‍क्‍याङ् नुसि ये़न् के़रे़ल्‍ले़ इक्‍सादिङ् खाम्‍बेःक्‍मो वदप्‍मा वहिःत्तिन् थ्‍ये़॥
नुहन् किप् तुक्‍सि तङ्‌बे के़रे़बा निसिगेक्‍पा ला थिबोङ्‌ङाङ् नुसि ये़न् के़रे़ल्‍ले़ यम्बयम्‍बा मुहिःक्‍सो खाहिःक्‍सोओ वाबुन्‍हाॽ फक्‍ते़लःन्‍दे़, हे़क्‍क्‍याङ् ताङ्‌साङ्‌बोबा वदप्‍माल्‍ले़न् लाम्‍धेःप्‍पाहाॽ हरे़॥ हे़क्‍क्‍याङ् लिबोङ् ये़न् थारिक् से़न्‍दिक् ले़न्‍दिक् चक्‍मे़ल्‍लॽए वहित् थ्‍ये़आङ् पत्‍छे़॥
हाबा खे़न् ये़न्‍नो नुहन्, कुमेःत्तिन् खुने़ॽ कुस्‍सा सेम, हाम नु ये़पे़दे़न्, हे़क्‍क्‍याङ् खुने़ॽ कुम्‍बाङ्‌लिहाॽ वालाधा सिगाङ् मे़लासे़॥ खे़ङ्‌हाॽ हे़क्‍क्‍याङ् के़रे़क् परिक्‍पा ताम्‍भुङ् थक्‍साहाॽ, के़रे़क् हिम्‍धक्‍साहाॽ, खाम्‍मो के़उःङ्‌सिङ्‌बा के़रे़क् थक्‍साहाॽ हे़क्‍क्‍याङ् के़रे़क् परिक्‍पा पुसाहाॽ खे़ङ्‌हाॽरे़ खुन्‍छि लिन् कुइसिक् वालाधाओ मे़लासे़॥ साःङ्‌गुगे़न् कुसक्‍मा के़याक्‍पा के़रे़क् थक्‍साहाॽ नु पुसाहाॽ कुगाप् कुगाप् नुहओ मे़द्‌ये़आङ् वालाधाओ मे़लासे़॥ निङ्‌वाॽफुमाङ्‌ङिल्‍ले़ नुहन् इङ्‌जाःङ् पिरुबा हे़क्‍केए वालाधाओ के़लाःप्‍पा थक्‍सापुसाहाॽ कुम्‍बाबा नु कुम्‍मामाए मे़द्‌ये़॥ खे़न् एगाङ् यहवे दाङ्‌बाल्‍ले़ वालाधाःल्‍ले़ लाम्‍धेत्तिन् सुबु॥
इक्‍सादिङ् खाम्‍बेःक्‍मो लिबोङ् ये़न् थारिक् चक्‍मे़ल्‍लॽए वदप्‍मा के़रे़आङ् ने़स्‍से़॥ च्‍वाःत्तिन् पोरे़आङ् वालाधान् खाम्‍बेःक्‍मोनु थाःङ्‌धाःङ् पङ्‌मा हेःक्‍तु॥ च्‍वाःत्तिन् पोरे़आङ् इक्‍सा खाम्‍बेःक्‍को सधे़क् तिम्‍से़ हे़क्‍क्‍याङ् वालाधान् च्‍वाःत् सम्‍धाङ् थाःङ्‌धाःङ् पोगे़॥ च्‍वाःत्तिन् इक्‍सादिङ् खाम्‍बेःक्‍मो साॽरिक् यरिक् पोरे़ हे़क्‍क्‍याङ् ताङ्‌साक्‍पाल्‍ले़ कुसिःक्‍तोबा केःम्‍केःम्‍बा के़रे़क् कोःक्‍माहाॽ च्‍वाःत्तिल्‍ले़ सुःप्‍तु॥ च्‍वाःत्तिन् पोरे़ थाङे़ हे़क्‍क्‍याङ् कोःक्‍माहाॽ नुसि मितर थारिक् लुप्‍तु॥ इक्‍सादिङ् खाम्‍बेःक्‍मो मुन्‍जिङ् वयाक् के़लॽबा के़रे़क्—पुसाहाॽ, हिम्‍धक्‍साहाॽ, ताम्‍भुङ् थक्‍साहाॽ, खाम्‍मो के़उःङ्‌सिङ्‌बा के़सःन्‍छिङ्‌बा के़रे़क् थक्‍साहाॽ हे़क्‍क्‍याङ् के़रे़क् मे़न्‍छाम् याप्‍मिहाॽ मे़स्‍ये़॥ से़ङ्‌से़ङ्‌बा खाम्‍बेःक्‍मो के़वाॽबा कुसक्‍मा के़याक्‍पा के़रे़क् मे़स्‍ये़॥ हे़क्‍क्‍याङ् खाम्‍बेःक्‍मो कुहिङ्‌वे़त् के़वाॽबा—मे़न्‍छाम् याप्‍मि, थक्‍सा, कुत्‍छिङ् के़उःङ्‌सिङ्‌बा के़सःन्‍छिङ्‌बा थक्‍साहाॽ नु पुहाॽ खक्‍पे़त् मे़स्‍ये़॥ खे़ङ्‌हाॽ इक्‍सादिङ् खाम्‍बेःक्‍मालाम् मे़मे़गे़, नुहन् हे़क्‍क्‍याङ् खुने़ॽनु वालाधाओ के़याक्‍पाहाॽरक् मे़हिङे़॥
हे़क्‍क्‍याङ् इक्‍सादिङ् खाम्‍बेःक्‍मो किप् थिक्‍काङ् ङाबोङ् ये़न् थारिक् च्‍वाःत्तिन् ने़स्‍से़॥

Mihaino ny तोलिङ्‌सोमु 7