Ayore - 2018 GP (NT) NonDrama

Ayore - 2018 GP (NT) Drama

Ayoreo 1982 Misión Nuevas Tribus, Cochabamba, Bolivia

Mu udojo quigade ga yocangaráni Jesús chisa ayorérigo uñane to ujetiga ore dobi iroquéode to. Ga ore batigai u 70. Ga Jesús chojningame ore:
–Boyo ga bajaque uágaja yiquei. Ga gare uágaja ñane jne. Ga angoñoma uágaja ore idáyode jnese uje ore déji yoquiquigode udore iji yoquiquei.–
Jecute Jesús chacãra dacajnaquéode aja cucha pĩrátique enga chojninga:
–Yoquipesudode udojo cucha ome Dupade, gajnúone u cucha pĩrátique uje sué yoquibai uje garósi uyógome. Ga jé jogadi tu ujetiga qué yutocobi Dupade ujetiga chṍrape uyoque ome yoquisai tuté cucha.–
Enga Jesús chojningápome ore rĩ:
–Boyo mu ajusópise uaqueo iji erámi uje a uásejna ayorérigo jne ujetiga ore pota ore sué uacabai ome uacáringáringo chucho. Uje a uacajnúringui u áyasarigui jne ujetiga agúsoji cuchiso sijnátigo ajénique. Boyo mu jé ca acueyoi uacajnutique cucha jne. Jé aja uacoidéraque uacapláta. Jé aja uacarídai gatérigo. Mu oyo caru aja uacaquitique erãpe uté. Ca ajnaséchoji uacaqui tuté yui. Mu ujetiga eso uacajegaidi tuté uacaquique ga añuchopúsu uacarúrigo quitique guio ome uacapusiétique guiguíjna iguíjnasónique. Enga ojnichome jne: "Yajéode u ujetiga pajesereringai ca íjnoque iji uaque iji uacajogadi udé." Ujetiga jec ũré enga ayoré parai uté enga a uacaruode udore quigode a tocade ome ore jne. Jé basa ujetiga ca ayoré paraque uté enga a ca uacaruode tocade ome ore jne. Jé ca uacáyipiedie déji ujetiga asõchóji ore idai údode ujetiga ecãcho uacapusiétigo. Jé ayáyoji uacapusiétique bajai uté gari enga acho uté gueranone piboso ome uaque jne. Chamáñaje ujetiga uaque gosode doi Dupade iroquéode ga jé tiógara ujetiga ore chosõre uaque. Ujetiga ese ore idáidatérique ujetiga ore chimesẽre ua ome bacajnaquérigo, ga acadipise ore ome Dupade adode. Mu ca etaque udore gosode guẽratígo cucha ome ua. Agu ga ca ese unerotiguérique. Ajnusi uágome ejnarétatigo ujetiga aquetáyope ore iji ore idai tuté. Acacho ore ome Dupade adode enga angoñome ore uje e idógosi ujetiga Dupade cho darasade iji dameserãsórone. Mu ujetiga uaqueyai tuté ore chetaguipise uacacajnaquéode ga beyoi ga ajnáño dajei aja ore idai guetique, ga ojnichome ore: "Cajicho yoque to é. Uje jé yátagoja jnumi isapídode iji yoquirídade uje yijninguéco aja uaque. Ga udojo imoi tu uje yetajopise uacadode ome yoque. Yocósi te ome uaque gu ujetiga arajáyo to uje Dupade ujnomei e idógosipísiji uaque ujetiga aduchorase to. Mu uaquetácho uyógome uaquedai."–
Mu Jesús chojningame dacadigode udore ore:
–A chise dínique jne jeta Dupade cho dajuñame ayoréode ore iji ore idáidatérigo udore. Ga a ujuyaquédatérique sué Sodóma idaisórone ore gajné casicaite pujuyaquei gai jne ome uraque dedai tuté.–


Jesús chojningápo rĩ:
–Yuruode gajnengórone u idáidatéode jogosórone ore uje ore chetaque yu gu. Enga yósi tome ore: ¡Jé bioque ji! Ujetiga Tíro, Sidón jogosórone chimo yipesútedatéode udojo to, ga a ca toguirásome ore ujetiga ore cho uaque. Ga a ore chécãrirase datígo to. Uje a ore chorase dáyugu cutejmane dapesute gajnarécho. Mu Corazín jogosórone uhuaque, jeoga Betsáida jogosórone uhuaque, uacapañáicho yipesútedatéode que, mu que ecãcho uacatique go. Uje que eso yocacajnaquéode unétique go. Jecute yosõripísi jóroque uaque uje iyieja Dupade ujuyaquei yui to ome uaque. Mu a chise dínique jne ujetiga uacajnetique Dupade ujuyaqué chise uaque ga a sué Tíro, Sidón jogosórone ore gajnei Dupade ujuyaqueque gai jne. Mu yuruode gajnengórone u Capernaúm jogosórone uaque to rĩ. Uacoyo ayorédatéi iji uaque. Mu que ayorédaté uaque go. Uje uaquetácho yuruode ga a uacaqui tu jnaropié jne.–
E Jesús catecãrápoi dacadigode ore rĩ ga chósi te ome ore:
–Ujetiga uñeque ca tangári uaque ga jé gajnui tu ujetiga ca tangári yu to gotique. Mu ujetiga uñéngo tangári uaque ga cho ujetiga ore tangaripísi yu. Mu uté gosi ujetiga chetaque yu ga gajnui jé u ujetiga chetaque Dupade uje iroque yu aja uaque gu.–

Mu Jesús utocaite ejóiso uje 70 ore, ore jno Jesús uruode údi mu ore chisápo Jesús rĩ. Enga ore irasiguipise raque. Ga ore chojningame:
–Yocangaráni á, yoquirasiguipise yoc, uje Satanás utocaidode isagode, yiquetágo ore uje yĩ́caco bei enga yijnángo bajopié tome ore.–
Enga Jesús chajnai ore uruode enga chojninga:
–Yiraja. Chamáñaje yimo Satanás to nanique uje basíji gatajnoquei. Gajnui u ajnorátique nanique. Enga e yerané yujopié taja uaque ga jé uacáringane pujnuéngaisṍre jogadi tu ome Satanás, utocaidode ore rĩ. Ga a achíyorási ugáriguiji jnutique, jeoga suárechequéraque mu a ca toque ujeta cuchárique uté chósi ti iji uaque. Mu ca aninañoma uaque uje Satanás utocaidode todópisa uaque uje uacajnáño yujopié tome ore, mu anínaño uaque gu uje Dupade e churúsãre uaquéode iji gaté ga e dimáneo.–


Jecute Dupade Ujopié Espíritu Sánto irágupúsu Jesús ajei enga irasiguipise re. Chicotapise dayé Dupade ga chojninga:
–Yacaranguipísome ua, Yapá, uje bajnué gateminórone ore gai jnese, jé aja jnutiminórone ore to. Yacaranguipísome ua to uje bapógu badode udore ome ayoré dicotárechoquíode, ayoré irajatade ore rĩ. Mu que apógu ome udore ore gotique uje qué garósi ore irajatigade. Jec arec uje báyipie ueradedie udire e tocade ome ore.–
Cha catecã́ri dayé Dupade ga chojninga:
–Yapade tẽrája yu ome cuchade udore jnese. Uje abape yu gu. Enga a ca togome uñeque ujetiga chiraja yapade uté gosi. Mu gusu yu uje yiraja uté uje abipise yu gu. Ga jé isocai tu ome gosode udore uje a ca ore chiraja uyu gosi. Gusu yapade uje chiraja yu uje ape yu gu. Mu gusu yu rĩ ujetiga yingo yapade ome udore gosode ga jé u ujetiga ore chiraja to.–
E chajire dacadigode ore ga catecã́ri ore. Mu gusu uruode gajnengórone u ore enga chojninga:
–Anínañopúsu uaque ome uacamone cucha uje uacamóñopise ome uaquedodie. Uje Dupade uruode atatasõre bajade, eduguéjnane ore rĩ, ore pota jóroga nanique ujetiga ore chimo yu to. Mu que togome ore go jeta ore chimo yu to. Ore potapísa jóroga ujetiga ore chimo yipesútedatéode uje uacamóño. Jé chopo ome yacajnaquéode udojo rĩ ujetiga ore tangári jórogui uje e uacadúcho que. Mu que togome ore jeta ore chudute, ujetiga ore chimo cuchade udore to.–

Udojo quigade uje Jesús chacate ayoréburique ga Moisés urusarane atatasórone uñeque chague iji ore ajei ga catecã́ri Jesús ujetiga qué chetingare Jesús. Ga chósi tome uté:
–Yocacadisṍri á, ¿jé yisocárique dérasi rique a, ujetiga yise yúringárique piquetaque to a?–
Mu Jesús chajnai uté gosi uruode ga chósi tome:
–¿Cho rique Moisés urusarane quigode a, ome yocúringáringo piquetacho a? ¿Ja ca araja quigode to a?–
Moisés urusarane atatasṍri uté chajnai ga chojningame:
–Moisés urusarane quigode u uje chósi te: "Ajnorapise bangaráni Dupade ome báringai ayoré jnese. Ga ejnapise báyipie taja uté. Ga ejnapise betotiguei taja rĩ. Ga ajusípise bojórique ayoré guio to. Ga jé gajnui tu uje bajuse beo to."–
Jecute Jesús chajnai uté uruode ga chojningame:
–Jé ũrepise ua ome barecujaidie udire. Mu be quigode ga a ese báringárique piquetáguiji deréjnane jnese jne.–
Mu qué Moisés urusarane atatasṍri uté chajo raja Jesús ujetiga qué botárapo rĩ. Ga chojningame Jesús:
–¿Jé gosírase a jeta yujuse guio a?–
Jecute Jesús chojningame uté:
–A yatataba jnanione adode jne ome ua ujetiga arajape quitígo. Uje jnani déji nanique ga gusu iji dajei uje tṍraji Jerusalén ga qui turásu Jericó. Mu oriechoquírigo ore chise jnani uté ga ore toria ugúchade jnese. Ore chatapója iguidé gamitodie rĩ. Ga ore chujé jnani tuté údode ga jé u uje ore jno. Ga chirõre ujeta jnani toi ome ore yupídode. Mu diga judíode ore angarátique chise uté mu chimo mu que chosõre gotique ga cho caru iji dosadi. Enga jé isocai tu ome levíteode uñai rĩ. Uje chise uté jogadi to ga chimo to. Mu que chosõre gotique. Mu quítequiguíji dosadi to.
Mu samáriagotique chise to ga chimo uté ga jĩrique chosõripise. Jecute uté chisa jnani tuté ga chanire bisitígo aja oriechoquíode ucode ore yupídode. Ga chigarupo gáyode rĩ ome borapéode. Enga qué chujépo aja dachidi burica gai to rĩ. Ga jé u uje jno údi aja ore upusiétique guiguíjna ujetiga chirodíji uté. Mu chise dire gatérique uje samáriagosi e jnome daquitique jne. Ga chijnime doidérigui daplátai ome guiguíjnai gajnengóri ga chisi ome ga chojningame: "Bajné de daque jã. Arodipísape jnani tuté jne. Que cho cucháric ujetiga bẽratígo cucha déji yeranenie udire iquei. Mu a yo boré jne jeta e yĩriápo rĩ."–
Jesús cha cho dojña ga catecãrápoi Moisés urusarane atatasṍri uté rĩ. Ga chojningame:
–¿Déji rique ome ua ya, iji jnani gadiógode udore uje ore chise jnani tuté iji cachodi iji dajeque pajei, ujetiga gosi iji ore suse pajnangoi tuqué guio a?–
Enga Moisés urusarane atatasṍri chojningame:
–Uté u arĩ́e uje chosõre jnani uté.–
Jecute Jesús chojningame uté:
–Be ga jé be uté jmapié to.–

Mu jé Jesús, acadigode ore jno dáringai urugu údi. Mu ore díji ore idai ajámi uje tõrapísiji chequéraque uje i tu Márta. Ga Márta dejéna Jesús ore ujetiga ore pusi uaté iguíjnai. Uje Jesús chacája ore iguíjnai ajei mu Márta neróraque déji to uje i tu María. Ga uaté doi Jesús ejópisi ga cháji ujetiga tangári acajnaquéode quigode. Mu Márta uaté isagode cucha suépise gai. Ga tibágui Jesús ga catecã́ri Jesús ore enga chojninga:
–Yangaráni á, ¿jé ca cho cucháringome ua ya, ujetiga yẽro tuaté cháji bari iji de bisideque? Ga noñome cucha pisagode udore iji yari uje que chátaja yu gotique. Angomome ga chátaja yu.–
Mu Jesús chajnai uaté uruode ga chósi tome:
–Márta, Márta, aya báyuguhebátigade, bedójnaringuéone ore ome bapesudode cucha udore jne. Uje cucha chojmarai déji ujetiga pajiriguipise. Ga María u uje ajegaite cuchai tuté. Enga que togome yu jeta yingome uaté ga cha.–

Mihaino ny Lúcas 10