Ayore - 2018 GP (NT) NonDrama

Ayore - 2018 GP (NT) Drama

Ayoreo 1982 Misión Nuevas Tribus, Cochabamba, Bolivia

Mu chise deréjnai uje Jesús déji yote quedéjnai pijnanai uje yote quedéjnai tuté i tu Genesaret. Enga ayoréburique ore chise Jesús iji to. Ga chacate ore iji mu ore chapédugu yote quedéjnai pijnanai. Mu ore ajegaidi tu ujetiga ore chudute Dupade ujnomei to. Mu Jesús chimo cuco gárerigo uje déji yote quedéjnai iberoi. Mu cucode gachisórone que ore déji ajei gotique uje oyite gaisórone ore, enga qué ore churu oyídode gajnenie dorárigui dachímeno. Mu diga Jesús chacája cucode udore uñeque uje cucoi gachisṍri i tu Simón. Ga chojningame Simón:
–Bope yocúdi aja yoquiquei. Uje ayoréode ore chapédugu erámi gu.–
Ga jé u uje Jesús chácare iji cucoi ajei enga chacate ayoréode iji yote quedéjnai edúdi. Uje e chejna dacajnaquéode guesi ome ore enga chojningame Simón:
–Bope bachidi cuco údi aja yodi ajedatei ujetiga yisago oyítigo ome uacora chímeno.–
Mu Simón chajnai Jesús uruode ga chojningame:
–Yocacadisṍri á, cachi yirógode yejnángo dejai iji yodi que, mu que yujégo oyítique. Mu a yiji báyipiedie jne. Ga yichaba yora yichímeno aja yodi jne rĩ.–
Mu uje Simón ore tṍra dora taja yodi ga ore isagode jiépisi iji oyídode. Ga ore ora uaté pota ujetiga dajúgome oyídode. Uje oyídode irágupúsu ore ora ajei ga Simón ore chutai dajorane iji cuco uñai ajei ujetiga ore cháta rágaja ore to. Jecute ore di, ga ore chĩreta cuco gárode udore ome oyídode. Mu pénupise oyídode ga idógosi ujetiga oyídode jno cucode údi aja yodi údi. Mu quene Simón Pédro ore chiraja Jesús úringai ujopíerãque ome ipesútedatéode udore ome ore. Ga jé u uje Simón Pédro chichaga dagataidie iji iquei enga chojningame:
–Yangarádejná, bome yu uje jnani ate gajnareque uyu gu.–
Uje Jesús chajuque Simón Pédro, jorane ore, ore agutedie ome dapesútedatéode udore gu ome dejnane oyícho. Ga jé cho ome Zebedéo ujnacarode Juan, Jacóbo ore to. Uje Simón Pédro ore jõra ore to iji cucode udore to. Mu Jesús chojningame Simón:
–Ca o báyugu ua ome cuchade udore. A aya báringai oyite gaisõre jne ga a acate ayorérigo ore to jne ga a amate ayorérigo ore aja yu jne.–
Jecute ore jno cucode udore údi aja guesi. Mu ore noñome iji te ga ore nóna Jesús jnese.


Uje Jesús chise ore idáyode uñeque enga jnani ejnarétatique tibágui Jesús uje ejnarei i tu lépra. Uje chimo Jesús ga chichaga dagataidie aja jnumi iji iquei, mu chajire jnumi. Chijócha ajei údi enga chojninga:
–Pangarádejná, ujetiga bajéo enga aqueta yu. Uje bajopié déji ome cuchade udore gu.–
Enga Jesús chisa jnani jmanai enga chojningame:
–Yipota arĩ́e ujeta yiqueta ua.–
Uje urúo udojo ga jé u uje jnani uté ejnarei chijnime re iji. Mu Jesús chojningame uté:
–Ca angoma báringai piquetaque aja erámi. Mu bope bádi aja judíode yocangaránone sacerdote uñeque iji Dupade iguíjna cuchábi ajei. Ga bebi Moisés áyipie quigode ome báringai piquetaque ga ẽramája Dupade ome cuchisórique ujetiga imoi tu ujetiga ore cho ayoré ijõre iji ua.–
Mu Jesús úringai ujnomerãque chubu erámi ome ayoréode ore. Jecute ore timíninga Jesús aja tijode ujetiga ore tangári acajnaquéode. Ga jé u to ujetiga chiqueta ore ujáningo ome ore ejnarétigo. Mu Jesús noñome ayoréode ore iji te ujetiga chise dayaritique ujeta gusu iji uje isocabeque gu ujetiga catecãrámi dayé Dupade iji.


Enga chise deréjnarique uje Jesús chácariji ayorébui ore ajei iji jnanírique iguíjnarique. Mu oidé tu Dupade Ujopié Espíritu Sánto uje chiqueta ayoréode, uje chacadápo ore rĩ. Enga Moisés urusarane ojñasórone, fariséode ore uñéngo ore déji to uje ore tṍraji ore unirone Galiléa, Judéa ore, jé iji idáidatéi Jerusalén rĩ. Mu ayorérigo ore di dojórique ayoré údi uje ore chijnónguiji pidode. Uje poritaque nanique uje que dique go. Ga ore ipotigádi tu ujetiga ore na aja guiguíjnai ajei enga ore chicháji Jesús iquei ujetiga chiquetape. Mu a ca togome ore ujetiga ore nája guiguíjnai ajei uje ayoréode ore chapédugu guiguíjnai ajei gu. Jecute ore cheru guiguíjnai ome. Ga ore pésu guiguíjnai ójo edóraque iji gaté ga ore na ayoré ejnarétai aja damané edo. Ga ore chiramurase ome ducarigode iji ayorébui ajei aja Jesús iquei. Mu Jesús chimo ore uje ore changureta ome ujopié ga jé u uje chojningame ejnarétai:
–Yĩrope bate gajnaréngone jnese jne.–
Mu Moisés urusarane atatasórone, fariséode ore, ore chojningame raque iji dáyipiedie: "¿Gotique gu a uje jnacari tuté pota ujeta cháji Dupade charidi? Uje que toque múñi ujetiga ayorérique chĩro pisijnaringuéringo. Uje gusu Dupade uje chinoningase pisijnaringuéringo."
Mu Jesús chiraja udore ore áyipiedie quigode. Jecute chojningame ore:
–Chamáña uacáyipiedie quigode ome yu.–
Enga Jesús chojningápome ore rĩ:
–Que cucha piraque gotique ome yu ujetiga yĩro uté isijnaringuéringo. Jeoga yiqueta iji ejnarétigo. Ujetiga yojningame: "Ãriji iji bamochápi ga bo ga arique."–
Mu Jesús jno darai údi ga chojninga:
–Dupade utocaidi uyu a qué yetingarape yu jne ome uaque, ujetiga arajáyope to uje yajnei tu ujetiga yĩro pisijnaringuéringo iji de jnumi.–
Uje Jesús chejna daru iyiejnane udojo guesi ga jé u uje chojningame jnani poritai uté:
–Ãriji iji bamochápi ga ajna bamochápi uté aja baqui aja baguíjnarique.–
Jecute jĩrique jnani uté niji iji ayorébui ore ajei. Ga chisa damochápiode picho ga chijna aja dagúijnai. Ga nínapúsu re aja daqui ga tijapísa Dupade uje chiqueta. Mu chajuque ayoréode ore agutedie jnese uje a ca ore chimo cuchárique to gu ujetiga ate uté ome ore. Ga ore tijapísa Dupade to ome adode udore. Enga ore chojninga:
–Quene yoquimo pipesudode cuchadatéo udore iji udé deréjnai.–


Iji udojo quigade ga Jesús jnoji ore iguíjnai uté ga chimo ore eduguéjna cuchábi irótique uje i tu Leví uje utaidé ore iplátadie ome ore eduguéjnai. Ga chácariji impuéstos jogadi uté uje ayoréode uñane ore chisi ome plátadie ome. Mu Jesús chimo ga chojningame:
–Boji te, ga ajinama yu to.–
Jecute Leví uté cha dasagode jnese ga nóna Jesús to. Enga Leví jno Jesús údi aja daguíjnai ga pésu uraque dabose unéningo ome raque. Ga Leví ujórigo jnacare, ore eduguéjnai iróquegatérigo, ayoréode uñéngo ore chise ñane iji te, ga ore cháta rágaja ñane iji ore atigai gai. Moisés urusarane ojñasórone, fariséode ore chimo Jesús iji ore gari ga jé u uje ore dojnóngaja. Ga ore chojningame Jesús acadigode:
–Uacacadisṍri, uhuaque uacamácho uacayoguéode uje uacacho iji ayoré sijnángone ore gari. Uje gajnareque yocasutedie iróquegatéode ore adode múñi.
Mu Jesús chajnai udore ore uruode. Ga chojningame ore:
–Ayoré ejnaretade ore gajnei tu ujetiga piquetaque ore. Mu jé basa ga ayoré ijónique que áyipieraque déji dáringárique pipesute.–
Jesús chojningápome ore rĩ:
–Que yibaguiédode u uaque gotique uje uacacotáyo uágome yu. Mu yibaguiédode u ayoré ate gajnaréngone ujetiga ore chécãrape dáyipierigui quitígo ga ore cha bu date gajnaréngone.


Moisés urusarane atatasórone, fariséode ore qué ore dojnóngapója Jesús rĩ. Ga ore chojninga:
–¿Gotique gu a uje Juan acadigode cho dayágome raque ujetiga ore catecã́ri Dupade? Jé chopome fariséode ore uyoque rĩ. Mu bacadigode que isoca to go ujetiga ore cho dayágome raque.–
Mu Jesús chajnai udore ore uruode ga chojningame ore:
–¿Ga ayorérigo ore chorase dayaque ome raque a ujetiga ore ajñamítedatéi ipesungónique qué déji ore gari? Mu pisocai tu ujetiga ore ajñamítedatéi ipesungónique jnoji ore gari, ga jé cachodi tu ujetiga ore cho dayágome re.–
Enga Jesús pésu ejémplo, ga chacãra dacajnaquéode aja piguidé arímeraque aja piguidé icháraque. Enga chojninga:
–Que ayorérique doi enga chaquesu daguidé icháraque petique ujetiga chugája daguidé arímeraque. Chamáñaje a cucha bisidegue iguidé icha iji quigade gu. Mu que gusu udore, mu iguidé arime a úringai arime pijoguipise ome borapei ichai uje pugagája gai.–
Mu jé isocai tupo rĩ ome cucha otatique uje Jesús chacãra dacajnaquéode aja. Enga chojninga:
–A ca ayorérique chojne cucha otatígaja cucha ao ijarórique. Uje uacamóño uje cucha otadi ebié dajate ga jĩrique chejna cucha aoi tuté. Mu ore chaníraja cucha ao ichárique ujetiga ca ore chachia cucha otadi, jé aja cucha aoi. Jecute pisoca ueradi u ujetiga ójneño cucha otate ichai taja cucha ao ichárique. Ga e ore cho uñane ome detotiguéode ga jé u ujetiga añucho guio. Mu ujetiga gosi chóji cucha otate diyajmane enga que potapo ujetiga chóji ichai rĩ. Enga a chojninga: "Cucha otate diyajmane suépise ichai gai ome úringai unere."–

Mihaino ny Lúcas 5