If you would like a copy of this version please contact info@davaraudiobibles.org

Sirmouri New Testament, CC-BY-SA-4.0, The Love Fellowship. Sirmouri New Testament Audio Bible, CC-BY-SA-4.0, Davar Partners International, The Love Fellowship, 2022.

Sirmouri New Testament

Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.

“चौकश रौया! तुऐं आदमी खै दिखाणौ कारिए भोल़ै काम नै कौरेया, ना तौ तुऐं आपणै स्वर्गीय पिता कैईंदा किछै बै इनाम ना पांदै।
इथकारिए जौल़ौ तू दान कौरे, तौ बौड़ा दिखावा नै कौरेया, जैशैखै कपटै लोग, यहूदी सभा-घोरो औरौ बाटो पुंडा कौरौ, ताकि लोग तिनकै बौड़ाए कौरौ। हांव तुऔं खै साचौ बुलू कै तिनुऐ आपणा इनाम पाए पा। पौरौ जौल़ौ तू दान कौरे, तोबै लोगौ मुंजी कोसी कै बै तिथका पौता नै चालौ। ताकि तैरा दान गुप्‍त रौंव, तोबै तैरा पिता ताखै गुप्‍त दा दैखला, औरौ ताखै इनाम दैला।”


“जौल़ौ तू प्रार्थना कौरला, तौ कपटी कै जैशणै नै बोणिया जिथुकै लोग तिनु दैखैयो तिनकै तारीफ कौरौ, जिथुखै तिनु यहूदी सभा-घोरो औरौ शोड़कै कै मोड़ो दै खौड़ै हौयौ प्रार्थना कौरणै आछै लागौ। हांव तुऔं खै साचौ बुलू कै तिनुऐ आपणा इनाम पाए पोवा। पौरौ जौल़ौ तू प्रार्थना कौरे तौ आपणै कोठरी दा जा औरौ दवार बन्द कौरेयौ आपणै पिता शै प्रार्थना कौर; ताकि तैरै प्रार्थना गुप्‍त रौंव; औरौ तोबै तैरा पिता जू ताखै मेसो दैखौए सै ताखै इनाम दैला।
प्रार्थना कौरदै बैई बैगानै यहूदी लोगौ कै जैशणै बैकार कै शोब्दो कै बार बार नै बौलेया सै ऐशैखै सौमझौ कै अमारै बौहितै बौल़ाणौ लैई शौणै जांदै। इथकारिए तुऐं तिनकै जैशणै नै बौणैया, जिथु तोंवारा पिता तोंवारै मांगणौ दो आगै जाणौ कै तुऔं का-का जौरुरत औसौ।” “तुऔं ऐशैखै प्रार्थना कौरणै चैंई:
‘ओए रै अमारै पिता, तू जू स्वर्ग दा औसौ; तैरौ नांव पवित्र राखौ जांव।’
‘तैरा राज्य आंव। तैरै इछा जैशणै स्वर्ग दै पूरी हौंव, तैशैखैई धोरती पांदी बै पूरी हौंव।’
‘आमु कै रौज सैजौ खाणौ कै दै जू आमु रौज कै दूसौ कारिए चैंई।’
‘औरौ जैशैखै आमै आपणै अपराधियों कै माफ कौरे राए, तैशैखैई तू बै अमारै पापौ खै माफ कौर।’
‘औरौ आमुखै परीक्षा दै नै पोड़णो दैया, पौरौ दुष्ट शैतान कैईंदै बौचा; (जिथुखै राज्य औरौ शौकतै औरौ महिमा सौदा तैरै औसौ।’” आमीन)
“इथकारिए जै तुऐं आदमी कै पाप माफ कौरलै, तौ पौरमेशवर जू तोंवारा स्वर्ग का पिता औसौ सै बै तोंवारै पाप माफ कौरदा। औरौ जै तुऐं ओकी कै पाप माफ ना कौरलै, तौ तोंवारा पिता बै तोंवारै पाप माफ ना कौरदा।

जौल़ौ तुऐं उपवास कौरौ, तौ कपटी कै जैशणै तोंवारै मुं पांदी उदासी नै हौणै चैंई, जिथुखै सैजै लोगौ शै तारीफ पाणौ कारिए उदास बौणैयौंदे रौंव, ताकि लोग तिनुखै उपवासी जाणौ हांव तुऔं खै साचौ बुलू, तिनुऐ आपणा इनाम पाए पोवा। पौरौ जौल़ौ तुऐं उपवास कौरौ तौ आपणै मुंडो पांदी तेल मोल़ेया औरौ मुं धोया। ताकि लोग नै पौरौ तैरा पिता जू गुप्‍त दा औसौ, ताखै उपवासी जाणौ। औरौ तोबै तैरा पिता जू गुप्‍त दा दैखौए सै ताखै इनाम दैला।


आपी कारिए धोरती पांदी धन कौठौ नै कौरेया, जिथै कीड़ा औरौ काई बिगाड़ौ, औरौ जिथै चोर डाका पांव औरौ चुरांव। पौरौ भोलाए कौरेयौ आपी कारिए स्वर्ग दा इनाम कौठा कौरौ, जिथै ना तौ कीड़ा औरौ ना काई बिगाड़ौ, औरौ जिथै ना चोर डाका पांव औरौ ना ही चोरो। जिथु तोंवारा मन सौदा तिथै ही लागैयौंदा रौंदा जिथै तोंवारा धन-दौलत औसौ।

आखी शोरीरो कारिए दिवे कै जैशणी औसौ, इथकारिए तैरै आख साफ हौंव, तौ तैरा सारा शोरीर बै पेयाशला हौंदा। पौरौ जै तैरै आख बोरै हौलै, तौ तैरा सारा शोरीर बै इन्यारा हौंदा, इथकारिए सैजौ पेयाशो जू तांव दो औसौ औरौ सै इनारौ हौंव तौ सैजौ इनारौ केतरो बौड़ौ हौंदौ।”


“कुणिए बै आदमी दौ स्‍वामियो कै सेवा ना कौर सौकौ जिथुकै सै ऐकी आरी दुशमनी औरौ ओकी आरी प्यार कौरदा या ऐकी का आदर कौरला औरौ दूजै कै सै बैकार जाणदा: ऐशैखैई तुऐं ऐकी सौमय पांदी पौरमेशवर औरौ धन दु कै सेवा ना कौर सौकौ।
इथकारिए हांव तुऔं खै साचौ बुलू, कै आपणै जिन्दगी कारिए चिन्‍ता नै कौरेया, कै आमै का खांदै औरौ का पींदै; औरौ ना आपणै शोरीर कारिए कै का बाम्बदै, का जिन्दगी खाणै शै, औरौ शोरीर खोटणो शै बौड़ैबा ना आथी। गौयण कै चुड़कुल़ै खै दैखौ, सै ना तौ बौंव, ना ही काटो, औरौ ना ही कोठारो दै कौठै कौरौ, तौ बै तोंवारा स्वर्गीय पिता तिनुखै खियांव, पौरौ तुऐं तिनुदै बै जादा कीमती औसौ। तुऔं मुंजीदा कुण औसौ, जू चिन्‍ता कौरेयौ दैणिक लम्बे सौमय तौड़ी जियुंदै रौए सौकौ?
औरौ खोटणो कारिए काए चिन्‍ता कौरौ? मैदानो कै फूलो पांदी ध्यान कौरौ कै सै कैशैखै बौढ़ौ, सै ना तौ मैहनत कौरौ औरौ ना ही खोटणो बाणौ। तोबै बै हांव तुऔं खै बुलू, कै राजा सुलैमान बै आपणै सौबै ठाट-बाट मुंजी तिनु मुंजीदा कोसी कै जैशणा खोटणो बाम्बेयोंदा नै थी। इथकारिए जोबै पौरमेशवर मैदानो कै घास खै, जू ऐलो औसौ, औरौ दोतियो आगी मुंजी पाए जांदै, ऐशणी शोभा दैंव, तौ ओए रै कम बिशवाश कौरणौवाल़ै लोगौ पौरमेशवर जौरुर तोंवारै दैखभाल कौरदा।
इथकारिए तुऐं चिन्‍ता कौरेयौ ऐजौ नै बौलेया कै आमै का खांदै, या पींदै, या का बाम्बदै। जिथुखै बैगानै जाति कै लोग बै इनु सौबी चीज़ौ की खोज़ दै लागैयौंदे रौंव इथकारिए चिन्‍ता नै कौरेया, जिथु तोंवारा स्वर्गीय पिता जाणौए कै तुऔं इनु सौबी चीज़ौ कै जौरुरत औसौ। इथकारिए सौब दौ जादा जौरुरी ऐजौ औसौ कै तुऐं पौरमेशवर कै राज्य औरौ धार्मिकता शै जीवन जिणौ कै कौचिश कौरौ, तौ ऐजी सौबै चीज़ौ तुऔं खै भैट जांदी। इथकारिए दोतियो कै बारै मुंजी परवाह नै कौरेया, जिथु दोतियो आपणै परवाह आपी कौरदा, ऐलो कारिए ऐलो कै दुख लैखा औसौ।”

Mihaino ny मत्ती 6