Athpariya 2023 WBT (NT) Non-Dramatized

Athpariya 2023 WBT (NT) Dramatized

हिट्‌नुङ् सैतानङा येसुङाना जाँच ओचोगुवाक् नुङ् सेङ्‌सेङ्‌ना हाङ्‌साङा उन् साक्‍चा उयुङ्‌निना डेन्‌ङि खाट्‌टुए॥ उन् चालिस लेम्‍बा हिट्‌नुङ् चालिस युसा उपासा युङे, हिड्‌डेउङ् उन्‍ङाना आड्‌डिक् टुक्‍लोक् ओसाॽवासे॥ हिट्‌ना बेला सैतान उन् सोरि टायाउङ् लोडुए, “छेम्‍बा डोक्, खान् माङ्‌हाङ् छा भोने, नागा लुङ्‌गेॽवाचि चालेपा उलियाक् नुङ् आग्‍याँ चोगु॥”
टरो येसुङा हिट्‌ना लोडुए, “धारमाछाप्‍लाङि नाड्‌डे छेप्‍टेसे– ‘याप्‌मि चामा-ठुङ्‌माङा एडोक् हिङ्‌निना, टरो माङ्‌हाङ्‌ङा माट्‌टुना सोरोक् रिङ् गाड्‌डे चोगे भोने हिङ्‌युक्॥’”
हिट्‌नुङ्‌ना सैतानङा येसु सेङ्‌सेङ्‌ना खालाङ्‌गाङि खाट्‌टुए, हिट्‌नुङ् माङ्‌ठाना ओछोम्‍बोङि खाट्‌टुए हिट्‌नुङ् उन् लोडुए, “खान् माङ्‌हाङ् छा भोने लु नाहिलाम्‍मा यो आम्‍सा, पोङ्‌भोने धारमाछाप्‍लाङि नाड्‌डे छेप्‍टेसे–
‘माङ्‌हाङ्‌ङा खान् लोङ्‌सा माङ्‌हाङ् रिङ् काउग्‍बाचि पाङ्‌सुचिचि,
हिट्‌नुङ् कालाङ् लुङ्‌गेॽवाङि ओटोक्‌नि चा नुङ् हिट्‌नागाँ खान् उन्‌चि मुक्‌ङि माटाक्‌युक्॥’”
येसुङा हिट्‌ना लोडुए, “धारमाछाप्‍लाङि नाड्‌डे चा छेप्‍टेसे, ‘खान्‍ङा कामाङ्‌हाङ् टाङ्‌बाङाना उनिङ्‌ग्‍वा छिक्‍माना टोॽवा चोगुन्॥’”
फेरि सैतानङा उन् ठिक् केना झोन्‍झोबाङि खाट्‌टुउङ् नाराङिगा ख्‍वाप्‍पा मुलुक्‌चि हिट्‌नुङ् हिट्‌निगा सोब्‍बे माक्‍फेन्‍सुबेन् निमेट्‌टुए, हिट्‌नुङ् उन् लोडुए, “खान् गुङ् आचोग्‌युङ् आङा स्‍या याङ्आमेट्‌टाङे भोने, नागा ख्‍वाप्‍पा थोक्‌चि खान् पिनाँ॥”
येसुङा हिट्‌ना लोडुए, “हाउ सैतान, नाहिलाम्‍मा खाडालेट्‌टा! धारमाछाप्‍लाङि नाड्‌डे छेप्‍टेसे, ‘खान्‍ङा कामाङ्‌हाङ् डाङ्‌बा एडोक् स्‍या चोगु हिट्‌नुङ् उन्‍ङाना एडोक् सेवा चोगु॥’”
हिट्‌नुङ् सैतानङा येसु नाडुढोङ् खाडे हिट्‌नुङ् माङ्‌हाङ् रिङ् काउग्‍बाचि ओटायाउङ् उन् घुवार ओफाडुए॥


हिट्‌नुङ् बाप्‌टिस्‍मा कापि युहान्‍ना खाम्‍बाङ्‌ङि ठायाना रिङ् कोइङा येसु ओलोडुए हिट्‌नुङ् उन् गालिल छेट्‌रालेङ् नोक्‍टा खाडे॥ हिट्‌नुङ् उन् नासारात युक्‍ताम्‌ङि खाडे, हिट्‌नुङ् हान्‍डेङ् एङ्‌स्‍वालेङ् उन् नासारात युक्‍ताम् नाडुङ् काफारनाहुम युक्‍ताम्‌ङि खाडाउङ् हिट्‌नि युङे॥ ना युक्‍ताम्‌बाक् गालिल तालङाना नेहेट्‌टाङ् जाबुलुन लोक् नाप्‍तालि पुङ्‌लाङिगा याप्‌मिचिगा छेट्‌राङि डाना॥ नाड्‌डेउङ् यासैया माङ्‌काटाङा माट्‌टुना ना रिङ् युडे–
“खेम्‍सानुम्, जाबुलुन हिट्‌नुङ् नाप्‍तालिचिगा पुङ्‌लाङिगा छेट्‌राङिगा याप्‌मिचि, यारदान होङ् याहाँपारा हिट्‌नुङ् गालिल तालङिगा याप्‌मिचि,
हिट्‌नुङ् गालिल छेट्‌राङि आयुङिगा पानिछोङ्‌बाचि,
डुम्‍बारिक् डुम्‌ङि उयुङागा याप्‌मिचिङा ठेना व्‍हाङ् उनिसुटु॥
हिट्‌नुङ् मिरतुङाना डुम्‍बारिक् डुम्‌ङिना स्‍वाँराङि उयुङागा याप्‌मिचिङि ठेना व्‍हाङ् ओम्‍साइसे॥”
हिट्‌ना बेलालाम्‍मा येसुङा पारचार चोक्‍सा नाड्‌डे माट्‌टुए, “खानि पापलाम्‍मा काएल्-काबु लिसानिउङ् माङ्‌हाङ्‌लेङ् नोक्‍टानि, पोङ्‌भोने टोनालोग्‌ङिना मुलुक् नेट्‌टाङ् टाइसे॥”


ठिक् लेम्‍बा येसु गालिल तालङाना ओफेरो ओफेरो लाम्‌टियागोन्‍डाना बेला पाटरुस ओलोडुना सिमोन लोक् उन्‍झा आन्‍दरियास निसुचे॥ हिट्‌नागाचि इप्‍पाङ्‌ङा डोक् सामुन्‍दराङि चेल्‍ले लेप्‍टेएट्‌टाचुगा, पोङ्‌भोने हिट्‌नागाचि ङासा कालाब्‍बाचि डाचिगा॥ येसुङा हिट्‌नागाचि लोडुचे, “आङालोक् लाहाब् लिसाचि, हिट्‌नुङ् खान्‌चिङा ङासा आलाब्‍चुङ् आटाच्‍चु गाड्‌डे डोक् खोड्‌डे पारिक् याप्‌मिचि आङि टाप्‍माचिगा हिट्‌ना रिङ् हिसिक्‍नाँचि॥” ना रिङ् खेम्‍साचुना मे हिट्‌नागाचिङा उन्‌चि चेल्‍ले नाडाढाचुङ् येसु रोक् रिक्‍टाचुए॥
हिट्‌नुङ् हिट्‌नालाम्‍मा ओखाडागेट्‌टाना बेला उन्‍ङा जाब्‌दियाङाना इप्‍पाङ् उइछाचि याकुब लोक् उन्‍झा युहान्‍ना टुबुचे॥ हिट्‌नागाचि उन्‌चि पाबा जाब्‌दियालोक् नाउङि युङाचिउङ् चेल्‍ले फुएट्‌टाचुगा, येसुङा हिट्‌नागाचि चा छेम्‍डुचे॥ हिट्‌नुङ् हिट्‌नागाचि हिट्‌ना बेला डोक् उन्‌चि नाउ हिट्‌नुङ् उन्‌चि पाबा जाब्‌दिया पोक्‍टाचुङ् येसुङा ओएङ् लाहाब् लिसाचे॥


येसुङा याहुदि छुम्‍मापाङ्‌ङि सिकाँ चोक्‍सा माङ्‌हाङ् उमुलुक् बारेङि नुना खाबोर पारचार चोक्‍सा सोब्‍बे पारिक्‍ङागा रोगा लाहाब् उलिसागा हिट्‌नुङ् उटुगागा याप्‌मिचि नुमानिङ् चोगुचिउङ् गालिल छेट्‌रा टेप् लिन्‍डुए॥ नाड्‌डे लिसानाँ सिरिया छेट्‌रा टेप् उन्‍ङाना बारेङि याप्‌मिचिङा ओखेम्‍सुए, हिट्‌नुङ् याप्‌मिचिङा पारिक् पारिक्‍ङागा रोगाङा लाबुचिगा टुखाबाचि, ओचाफेन्‍ना रिमेट्‌ङा लाबुचिगा, हिट्‌नुङ् ठाप्‌चिलिङ् रोगाङा लाबुचिगा, हिट्‌नुङ् कुस्‍टा रोगिचि उन् सोरि ओटाडुचे॥ उन्‍ङा हिट्‌नागा ख्‍वाप्‍पा नुमानिङ् चोगुचे॥ जोम् याप्‌मिचिङा उन् रोक् उरिक्‍टुए॥ हिट्‌नागा याप्‌मिचि गालिल छेट्‌रा, ठिमेक् खालाङ्‌गा ओलोडुना डेकापोलिस, यरुसलेम खालाङ्‌गा, याहुदिया छेट्‌रा हिट्‌नुङ् यारदान होङ् याहाँ पारालाम्‍मा ओटाइसागा॥

Mihaino ny मात्‌ति 4