1ဂုဏ်သိက္ခာယောက် ပြေ့စုံသဘန်း လေးစားသထှာဘင်း သော်ဖိလုခင်ဗျား၊ အလေသမီဆာတာတ်လောကဘေ ဘုရားရှာန်အွန်နီဘင်း အမှုတော်တေဒေ 2အစမှာဟက် ကတုံန်ရီဘင်းဆိတ်တာတ်ယောက် အမှုတော်ဆောင်တာတ် ဟောသကာရီဘင်းအတိုင်း သမီဆာကလောင်းတုံန်းတာတ်ကား ရေသဘန်း ကာကြီးရီမှာ။ 3အမှာတွာတ် အလေကား ထှာရီဘင်းနာဆွန်ကွန်းတေ ဂရုတစိုက်လေ့လာ စုံစမ်းဒီဘန်း 4ဟနိမ်ဆွောန်ဒီဘင်းနာတေကား ချီမှတ်မှာငှေါဘင်းနာတေ မိန်းရှာတ်ခါစိန်းကာတ်တေ အနိမ်အစီစဉ်တကျ ရေးတာန်ထှာမှာ။ 5ယုဒ‌ပြေဘေ ဟေရုဒ်ရှာန်းပလာန် အုပ်ချုပ်သမှါခ့်ခါ 'ဇာခရိ' ညယ်ကော်ဘင်းဂျူးပုရောဟိတ်c ကား အဘိယညယ်ကော်ဘင်းd ပုရောဟိတ်အဖွဲ့နောင်းဟက် ဟော်ဝါထှာမှာ။ ဟိန်အိတ် 'ဧလိရှဗက်' ‌ရီးဒါး အာရုန်ညယ်ကော်ဘင်း ပုရောဟိတ်မိသားစုဟက် ဆပ်နီဘင်းဆိတ် ထှာမှာ။ 6အန်တာတ်ကလိန်းဟူးကား ဘုရားရှာန် ပညက်တော်တေဒေ အမှားအဘိုညယ် လိုက်နာသကြီးရီဘင်းအတွာတ် ဘုရားရှာန်မန်းဘေ သမီဆာမလဲတေ ထှာကြီးမှာ။ 7ဧလိရှဗက်ကား မြုံသနင်းဘင်းအတွာတ် ဆာဆအိတ် အလူဟာညယ် အန်တာတ်ကလိန်းဟူးရီးဒါး ကွန်းထောင်သကြီးရီမှာ။ 8ရအာမှါခ့်ခါ ဇာခရိကား ဗိမာန်တော်ဘေ ရအာအွန်ထှာကူဘင်း အလှည့်ကျတာဝန်တေ အွန်နင်းမှါခ့်ခါ 9ပုရောဟိတ်တာတ်ပင်း ထုံးတမ်းတာတ်အွန်ဘင်းအတိုင်း ဗိမာန်တော်နောင်းဘေ သွန်းဘင်းနာတေသပ်ပန်းပူဇော်သဒင် မဲနုတ်ပန်း မယ်ကြီးမှါခ့်ခါ ဟိန်ကား မယ်လားခံသထှာမှာ။ 10အန်နိမ် ဇာခရိကား သွန်းဘင်းနာတေ‌ယောက် သပ်ပန်းပူဇော်သနင်းမှါခ့်ခါ သမီဆတာတ်ကား ဗိမာန်တော်ဝါမ်းနောင်းဘေ ဆုစိန်နင်းကြီးမှာ။ 11အန်၌မှါခ့်ခါ ဘုရားရှာန်တာတ်နာန်ဘင်း မဲဘင်းဟမန်းကား သွန်းဘင်းနာတေယောက် သပ်ပန်းပူဇော်သဘင်း ပလာန်fညာပါဘေ ဇာခရိတေ ကိုယ်ထာန်ကာဘန်း စပ်ပန်းနင်းဘင်းတေ 12ကတုံန်မှါခ့်ခါ ဟိန်ကား အကြီးကျယ်စါတ်ပန်း ဆာန်သဘန်းနင်းနာန်မှာ။ 13အန်၌မှါခ့်ခါ မဲဘင်းဟမန်းကား ဟိန်တေ "အစါတ်ဆာ ဇာခရိ။ နာန်ဆုစိန်ဘင်းနာတေ ဘုရားရှာန် သက်ပူမှာ။ နာန်အိတ် ဧလိရှဗက်ကား နာန်အတွာတ် ဆာဟော်ဝါပန်အီကူ။ နာန်ကား ဟိန်ဒေ ယောဟန်ညယ် နာမယ် အီထှာကူ။ 14အန်ဘင်းဆာ ပန်နီဘင်းအတွာတ် ဟနိမ် မွန်းကြီးထှာနိမ် တခြားဘင်းဆိတ်တာတ်ရီးဒါး မွန်းဘန်းနာ ပျော်သကြီးထှာကူ။ 15ယောဟန်ကား ဘုရားရှာန်မန်းဘေ အကြီးကျယ်မြင့်မြတ်သဘင်း ဆိတ်ထှာရီကူ။ ဟိန်ကား ဟာ၌မှါခ့်ခါစဲ စပျစ်ရှရှီဝလဲယောက်g အရာတ်တေဒေရီးဒါး အူကလားအချီရား။ ဟိန်အပန်ချီမှါခ့်ခါဟက် ဉာဏ်အလင်းတော်ကား ဟိန်ယောက်အတူတူ ငှါနင်းကူ။ 16ဟိန်ကား အစ္စရေးသမီဆာ ကလောင်းတုံန်းတာတ်ဒေ အန်တာတ်အပြစ်တေဟက် နောင်တတေလူစိန်းဘန်း အန်တာတ်အရှာန်ထှာဘင်း ဘုရားရှာန်ပါ ပန်းနူလှည့်သဟာန်းစိန်းကူ။ 17ယောဟန်ကား ပရောဖက်ဧလိယနိမ်h အခွါမ်းအာဏာယောက် တန်ခိုးတေငှါဘန်း ဘုရားရှာန်ဘင်း ရှေ့တော်ကာတ်ပင်းဆိတ်ထှာကူ။ ဟိန်ကား အမယ်အဝါယောက် ဆာဆအိတ်တာတ်အဆေင်တေ တည့်သစိန်းဘန်းနာ အသက်ခါဘင်းဆိတ်တာတ်တေဒေရီးဒါး ဆွောန်သကာကူ။ အမှာတွာတ် သမီဆတာတ်ကား အရှာန်ကြွဒီမှါခ့်ခါ အဆာန်တာန့်ထှာနင်းကြီးကူ" ညယ်ငှေါမှာ။ 18စီးမှါခ့်ခါ ဇာခရိရီးဒါး မဲဘင်းဟမန်းဒေ "အနိမ် ထှာရီကူငှေါဘင်းဒေ ငါဟာနိမ် မိန်းရှာတ်ခါရန်ကူတေ။ အလေအိတ်ဆာဟလားကလိန်းဟူးကား အကြီးကျယ်ကွန်းထောင်သနင်းဘန်း" ညယ်သပေါက်ခါန်မှာ။ 19အန်၌မှါခ့်ခါ မဲဘင်းဟမန်းရီဒါး ဟိန်တေ "ငါကား ဘုရားရှာန်မန်းဘေ ခစားသထှာဘင်း ဂါဗြေလထှာမှာ။ အနိမ် မွန်းထာတ်မဲဘင်းဆတာန်းတေ နာန်ပါဒီဘန်း ငှေါဒင်အတွာတ် ဘုရားရှာန်ကား ငါတေ တာတ်နီလားထှာမှာ။ 20အမှာတွာတ် ငါတူးတေ နာန်အယုံသဘင်းအတွာတ် အဘင်းအဖြစ်အပျက်တေ အထှာကျီ နာန်ကား တူးအသပေါက်ခါ အသဘန်းနင်းကူ။ ငါတူးကား အချိန်တန်သမှါခ့်ခါ ထှာရီကူ" ညယ်ငှေါမှာ။ 21ဇာခရိယောက် မဲဘင်းဟမန်းတာတ်ကား ဗိမာန်တော်နောင်းဘေ တူးသပေါက်ပန်း နင်းကြီးမှါခ့်ခါ ပြာန်ဘေငှါဘင်း သမီဆတာတ်ကား ဇာခရိတေ ဒဲဘန်းနင်းကြီးမှာ။ အန်တာတ်ကား ဗိမာန်တော်နောင်းဘေ ဇာခရိဟမာန်တွာတ် မှါခ့်ပန်းနင်းမှာငှေါဘင်းနာတေ မိန်းရှာတ်ခါဟွောပ်နင်းကြီးမှာ။ 22ဇာခရိ ပြာန်ပါပူရီမှါခ့်ခါ တူးအသပေါက်ရန်ဘင်းအတွာတ် ဗိမာန်တော်နောင်းဘေငှါနင်းမှါခ့်ခါ ဇာခရိကား နိမိတ်လက္ခဏာစားနူစားနာ ကတုံန်ရီမှာညယ် သမီဆတာတ်ကား နားလည်သကြီးရာန်မှာ။ ဟိန်ကား တူးအသပေါက်ရန်ဘန်း သမီဆတာတ်တေ သဟူးတေ တာတေယောက်၌ဆာ ဆာတ်သဘန်း ကာနင်းမှာ။ 23စီးမှါခ့်ခါ ဇာခရိကား ဗိမာန်တော်ဘေ အွန်ထှာကူဘင်းအမှုကိစ္စတေဒေ အွန်စီးမှါခ့်ခါ ဟိန်ကျေမ်းပါ လာန်ဟာန်းဘဲမှာ။ 24အချိန်အစစ်ဆာမှါတ်မှါခ့်ခါ ဇာခရိဘင်းအိတ် ဧလိရှဗက်ပေ ပုတ်ကာန်ရီဘင်းအတွာတ် ဟိန်ကား ဟာဆတားမှါခ့်ကွန်း သမီဆတာတ်ကြားဘေ အလာန်ညယ် အဟာညယ် နင်းမှာ။ 25ဟိန်ကား "ဘုရားရှာန်ကား ငါတေ ဆာလူကွန်းအွန်အီဘန်း၊ ဟိန်အလိုတော်အနေယောက် ငါတေ သမီဆာတာတ်ကဲ့ရဲ့ အထာန်စစ်ပင်းဟက် ကယာစိန်းဘန်း" ညယ်ငှေါနင်းမှာ။ 26ဧလိရှဖက်ပုတ် ဟုတ်ဆတားငှါမှါခ့်ခါ ဘုရားရှာန်ကား မဲဘင်းဟမန်း ဂါဗြေလတေi ဂါလိလဲပြေဘေငှါဘင်း နာဇရက်မြို့ပါတာတ်နာန်ဘန်း 27မာရိညယ်ကော်ဘင်း မန်းဆာဟော်ဝါပါလာန်ဘန်း အန်ဘင်းဆတာန်းတူးတေ ငှေါစိန်းယုတ်မှာ။ မာရိကား ရှာန်းပလာန် ဒါဝိဒ်မျိုးရိုးဟက်ဆပ်နီဘင်း ယောသပ်ယောက် လာန်ဖတ်ထုပ်တာန်သပဲဘင်း ဆိတ်ထှာမှာ။ 28မဲဘင်းဟမန်းကား နှုတ်ဆက်တာန်ဘန်း မာရိတေ "ဘုရားရှာန်ကား နာန်ယောက်အတူငှါဘန်း ဟိန်ဘင်းတုံန်းဘင်းမေတ္တာတော်ဒေ နာန်စေါက်ပေ ပိုသောကာအီဘန်း" ညယ်ငှေါမှာ။ 29အန်နိမ်စါန်းငှေါဒီ မာရိကား အန်ဘင်းတူးဒေ သက်ပူမှါခ့်ခါ အကြီးကျယ်အဆေင်ရှုတ်သလာန်ဘဲဘန်း မဲဘင်းဟမန်းငှေါဘင်းတူးကား ဟမာန်တေငှေါကာတ်မှာငှေါဘင်းနာတေ စဉ်းစားသဘန်းနင်းမှာ။ 30စီးမှါခ့်ခါ မဲဘင်းဟမန်းကား ဟိန်တေ "အစါတ်ဆာ၊ မာရိ။ ဘုရားရှာန်ကား နာန်နင်း မန်းအီဘန်း။ 31နာန်ကား ဆာလူရီဘန်း ဆာဟော်ဝါတေ ပန်ထှာကူ။ ဟိန်နာမယ်တေ ယေရှုညယ် ကော်ထှာကူ။ 32ဟိန်ကား မြင့်မြတ်သဘင်းဆိတ်ထှာရီဘန်းနာ အမြင့်မြတ်ဆုံးထှာရီဘင်း ဘုရားရှာန်ဘင်း ဆားတော်ညယ်ကော်ကြီးကူ။ ဟိန်အုတ်တာတ်ထှာဘင်း ရှာန်းပလာန်ဒါဝိဒ်နိမ် ဟိန်သမီဆာအမျိုးတာတ်တေ အုပ်စိုးသရန်ဘင်းအခွါမ်းတေ ဘုရားရှာန်ကား ဟိန်တေအီကူ။ 33ဟိန်ကား အစ္စရေးသမီဆာတာတ်တေ ရှာန်းပလာန်အနေယောက် အမြဲတမ်းအုပ်ချုပ်သဘန်း ဟိန်နန်းဆာတ်ရီးဒါး ဟာ၌မှါခ့်ခါစဲ တူရာန်ကလားအချီရား" ညယ်ငှေါမှာ။ 34အန်၌မှါခ့်ခါ မာရိကား "ငါကား မန်းဆာရှာဟော်ဝါထှာဘင်းအတွာတ် အန်ဘင်းနာကား ဟာနိမ်ညယ်ထှာရန်ကူတေ" ညယ်မဲဘင်းဟမန်းတေ ငှေါမှာ။ 35မဲဘင်းဟမန်းရီဒါး "ဉာဏ်အလင်းတော်ကား နာန်ပါဆပ်နီဘန်း ဘုရားရှာန်ဘင်းတန်ခိုးတော်ရီးဒါး နာန်စောက်ပေ အုပ်မိုးသဘန်းနင်းကူ။ အမှာတွာတ် နာန်ပန်ကူဘင်းဆာရီးဒါး ဘုရားရှာန်ဘင်း မြင့်မြတ်သဘင်းဆားတော်ညယ် ကော်လားခံသထှာကူ။ 36နာန်အမျိုးထှာဘင်း ဧလိရှဗက်ကား ကွန်းထောင်ဒီဘင်းအတွာတ် သမီဆတာတ်ကား ရှာဆာအလူရန်နားညယ် ထာန်သနင်းကြီးဒီဒါး ပုတ်နောင်းဘေ ဆာငှါဘန်းနင်းလားကား ဟုတ်ဆတားငှါနင်းဘန်း။ 37ဘုရားရှာန်ကား အအွန်ရန်ဘင်းဟမာန်ကဆဲအဘိုဝါး" ညယ်ငှေါမှာ။ 38အန်၌မှါခ့်ခါ မာရိကား "ငါကားဘုရားရှာန်ဘင်း အစေခံဟော်ဝါထှာမှာ။ နာန်ငှေါဘင်းတူးနိမ် ငါစောက်ပေ ဘုရားရှာန်အလိုတော်ငှါဘင်းအတိုင်း ထှာစိန်း" ညယ်ငှေါမှာ။ စီးမှါခ့်ခါ မဲဘင်းဟမန်းရီးဒါး မာရိဟက်ပူလာန်ဘဲမှာ။

<br> 39အမှါခ့်ကျီ မာရိကား အဆာန်တာန့်အွန်ဘန်း ဇာခရိနင်းဘင်း ယုဒပြေဘင်း ကယာစေါက်ပင်းမြို့တစ်မြို့ပါ ခပ်မြန်မြန်လာန်မှာ။ 40ဟိန်ကား အန်ဘင်းဘေထုတ်မှါခ့်ခါ ဇာခရိကျေမ်းနောင်းဘေဆာန်ဘန်း ဇာခရိအိတ်ထှာဘင်းဧလိရှဗက်တေ နှုတ်ဆက်တာန်မှာ။ 41မာရိ နှုတ်ဆက်သဘင်းတူးတေ ဧလိရှဗက်သက်ပူမှါခ့်ခါ ချတ်ချန်း ဟိန်ပုတ်နောင်းဘင်း ရှာဆာကားလှုပ်လှုပ်လက်လက်အွန်နီဘန်း ဧလိရှဗက်ရီးဒါး ဉာဏ်အလင်းတော်ယောက် အကြီးကျယ်မွန်းဘန်း ဘုရားရှာန်တေချီးမွမ်းသမှာ။ 42ဧလိရှဗက်ကား မာရိတေ "ဘုရားရှာန်ကား တခြားအီးရှီတေထာတ် နာန်တေပိုသောမာန်းဂလာငှါစိန်းဘန်း နာန်ပန်နီကူဘင်း ရှာဆာရီးဒါး မာန်းဂလာငှါမှာ။" 43အရှာန်မယ်တော်ကား ဟမာန်တွာတ် ငါပါဘေထုတ်ရီထှာတေ။ ဟမာန်တွာတ် အနိမ်အခွါမ်းကား ထုတ်အီထှာတေ။ 44နာန်ဘင်း နှုတ်ဆက်သဘင်းတူးတေ သက်ပူမယောက် ငါပုတ်နောင်းဘင်းရှာဆာကား မွန်းဘန်းရွသနင်းမှာ။ 45ဘုရားရှာန်ဘင်း တူးကား အဟုတ်မလတ် ထှာရီကူညယ် နာန်ယုံကြည်သဘင်းအတွာတ် နာန်ကား မာန်းဂလာငှါမှာ" ညယ်ဟာတ်ပန်းငှေါမှာ။ မာရိကား ဘုရားဂုဏ်တော်ဒေချီးမွမ်းသဘင်း 46စီးမှါခ့်ခါ မာရိရီးဒါး "ငါကား ဘုရားရှာန်ဘင်း ဂုဏ်ကျေးဇူးတော်တေ ချီးမွမ်းသမှာ။ 47ငါအဆေင်ဝိညာဉ်ကား ကယ်တာန်ရှာန်ဘုရားဘေ ပျော်မွေ့သမှာ။ 48ငါကား အရှာန်ဘင်း နိမ့်ကျသဘင်း အစေခံထှာဒီဒါး အရာတ်ဟက်စသဘန်း နောင်လာနောက်သားမျိုးဆာတ်တာတ်ကား ငါတေ ကောင်းချီးတေအီခံသထှာဘင်းဆိတ်ညယ် ကော်ကြီးကူ။ 49တန်ခိုးတေယောက် မြင့်မြတ် ပြည့်စုံသဘင်းဘုရားရှာန်ကား အလေစောက်ပေ မြင့်မြတ်သဘင်းနာတေထုတ်အီစိန်းဘန်း။ 50ဘုရားရှာန်ကား ခေတ်အဆက်ဆက် ဟိန်တေ ယုံကြည်ကိုးကွယ်သဘင်း ဆိတ်တာတ်တေ ကြီးမြတ်သဘင်း မေတ္တာတော်တေဒေ အမြဲတမ်း ထာန်ထာန်ရှားရှားကာမှာ။ 51ဘုရားရှာန်ကား မာန်မာနထောင်လွှားသဘင်းဆိတ်တာတ်တေ ဟိန်ဘင်းဘုန်းတန်ခိုးတော်ယောက် ကယာစိန်းယုတ်မှာ။ 52ဘုရားရှာန်ကား အုပ်ချုပ်သဘင်းဆိတ်တာတ်တေ အန်တာတ်ပလာန်စေါက်ဟက် တွန်းအက်ပန်း နိမ့်ချသဘင်းဆိတ်တာတ်တေဒေ အရေးပါသဘင်းဆိတ်တာတ်ထှာစိန်းမှာ။ 53ဘုရားရှာန်ကား ယုတ်တင်အဘိုဟွန် ယုတ်ခေါ့ပ်နင်းဘင်းသမီဆာတာတ်တေဒေ မဲဘင်းတေဒေအီဘန်း ဆွာမ်းဘင်း ဆိတ်တာတ်‌တေဒေ ဟမာန်ကဆဲ အအီညယ် တာတ်ခါန်းမှာ။ 54ဘုရားရှာန်ကား ဟိန်ဘင်း ကြီးမြတ်သဘင်းမေတ္တာတော်ဒေ ဆတီးလူဘင်းအနေယောက် အမှုတော်ဒေအွန်ဘင်း အစ္စရေးသမီဆာတာတ်တေ စောင့်ရှောက် ကယ်တာန်သဘန်း။ 55ဘုရားရှာန်ကား ငါဘင်း အုတ်တာတ်အတော်တာတ်ထှာကြီးဘင်း အာဗြဟံမျိုးရိုးတာတ်တေ ကတိအီပဲဘင်းအတိုင်း အမြဲတမ်းစောင့်ရှောက်သဘန်းနင်းမှာ" ညယ်ဘုရားရှာန်ဘင်း ဂုဏ်ကျေးဇူးတော်တေ ချီးမွမ်းသမှာ။ 56စီးမှါခ့်ခါ မာရိကား ဧလိရှဗက်ယောက် ဆွန်းဆတား နင်းမောက်ကြီးဘန်းနာ မာရိကား ဟိန်ကျေမ်းပါ လာန်ဟာမ်းဘဲမှာ။ ယောဟန်ပန်ဘင်းယောက် နာမယ်အီဘင်းနာ 57စီးမှါခ့်ခါ ဧလိရှဗက်ကား ဆာပန်ကူဘင်း မာန်းရာတ်ထုတ်မှါခ့်ခါ ဆာဟလောဝါရှာတေပန်မှာ။ 58ဟိန်ကျေမ်းပိုက်ပင်းဆိတ်တာတ်ယောက် အမျိုးတာတ်ရီဒါး ဟိန်စေါက်ပေ ဘုရားရှာန်ဘင်းမေတ္တာတရား တုံန်းဘင်းနာတေ မိန်းရှာတ်ခါပဲကြီးဘင်းအတွာတ် ဟိန်ယောက်အတူ အန်တာတ်ရီးဒါး မွန်းကြီးမှာ။ 59ရှရှာပန်စီးဘန်း ကောင်ရာတ်မှါခ့်ခါ ရှရှာဘင်းဆလေပိုင်းရှရှာတေတွပ်ပင်း ဓလေ့နိမ် အွန်ဒင်ဝတ္တရားတေဒေ အွန်ဒင်အတွာတ် ဒီကြီးမှါခ့်ခါ အန်တာတ်ကား အန်ဘင်းဟလောဝါရှာတေ ဟိန်အဝါထှာဘင်း ဇာခရိ နာမယ်တေလာဘန်း ဇာခရိညယ် နာမယ်ကော်ကာတ်ကြီးမှာ။ 60အန်နိမ်စါန်းငှေါဒီ ရှရှာအမယ်ကား ‌"ဟိန်တေ ယောဟန် ညယ်ကော်ထှာကူ" ညယ်ငှေါမှာ။ 61သမီဆာတာတ်ကား ဟိန်တေ "ဟနိမ်အမျိုးနောင်းဘေ အန်နိမ်နာမယ် အဘိုဝါး" ညယ်ငှေါကြီးမှာ။ 62အမှာတွာတ် အန်တာတ်ကား ရှရှာအဝါ ဇာခရိတေ သဟူးတေတာတေယောက်ကာဘန်း ဟာနိမ်နာမယ်တေ အီကာတ်တေညယ် စိန်ယူကြီးမှာ။ 63ဇာခရိကား ကျောက်ဆန်ပုံးကာတ်မှာတေ စိန်ငါန်ဘန်း ဟိန်ဆာဘင်းနာမယ်ကား ယောဟန်ထှာမှာညယ် ရေးတာန်ဘင်းအတွာတ် ကတုံန်ဘင်းသမီဆာတာတ်ရီး မာန်ဒါတ်မိသနင်းကြီးရာန်မှာ။ 64စီးမှါခ့်ခါ ချတ်ချန်းတုံန်း ဇာခရိကား ပြန်သဘန်း တူးသပေါက်ခါန်းရန်ဘန်းနာ ဘုရားရှာန်ဘင်း ဂုဏ်ကျေးဇူးတေ စသဘန်း ချီးမွမ်းသမှာ။ 65ကျေမ်းထန်ကစက်တာတ်ယောက် အမျိုးတာတ်ကား အန်ဘင်းအဖြစ်ပျက်တေ ကတုံန်ကြီးမှါခ့်ခါ စါတ်ပန်းနင်းကြီးရာန်မှာ။ သမီဆတာတ်ကား အန်ဘင်းဆတာန်းဒေ ယုဒပြေ ကယာစောက်ပင်း နေရာ၌တိုင်းဘေ ငှေါနင်းကြီးမှာ။ 66အန်ဘင်းဆတာန်းတေ သက်ပူကြီးဘင်းဆိတ်တာတ်ရီးဒါး "အန်ဘင်းရှရှာတုံန်းရီမှါခ့်ခါ ဟာနိမ်သမီဆာထှာရီကူသမား" ညယ်ယူရှီရှီဆာ ငှေါနင်းကြီးမှာ။ ဘုရားရှာန်ဘင်းတန်ခိုးတော်ကား ရှရှာယောက် အတူတူငှါဘန်းနင်းမှာ။ 67စီးမှါခ့်ခါ ညဏ်အလင်းတော်ကား ဇာခရိစောက်ပေ ထုတ်ပန်း ဟိန်ကား 68"အစ္စရေးသမီဆာအမျိုးတာတ် အရှာန်ထှာဘင်း ဘုရားရှာန်ဘင်း ဂုဏ်ကျေးဇူးတော်တေ ချီးမွမ်းသမှာ။ ဟိန်ကား ဟိန်သမီဆာအမျိုးတာတ်တေ ကယ်တာန်သဒင် ကြွသပိန်။ 69ဘုရားရှာန်ကား ဟိန်အစေခံထှာဘင်း ဒါဝိဒ်ဟက် ဆပ်နီဘင်း တန်ခိုးအာဏာတုံန်းဘင်း ကယ်တာန်ရှာန်တေ အလေနင်း အီရီဘန်း။ 70မာအယ်ဟက် ဘုရားရှာန်ကား မြင့်မြတ်သဘင်း ပရောဖက်တာတ်‌တေ မိန့်သည်ဘင်းအတိုင်း 71အဘင်းတန်ခိုးတုံန်းဘင်း ကယ်တာန်ရှာန်ကား အလေနင်း ရန်သူတာတ်ခက် ကယ်တာန်သလားဆာအချီ အလေတေ အလိုသဘန်း ယူနီဘင်းဆိတ်တာတ်ဟက်ရီးဒါး လွောပ်သစိန်းကူ။ 72ဘုရားရှာန်ကား တုံန်းဘင်းမေတ္တာတော်ယောက် အလေဘင်းအုတ်တာတ် အတော်တာတ်နင်း အီရီဘင်း ဟိန်ကတိတော်တေ တည်သစိန်းကူ။ 73ဘုရားရှာန်ကား အလေအုတ်တာတ် အတော်တာတ်ထှာဘင်း အာဗြဟံတေ ကတိအီရီဘင်းအတိုင်း 74အလေတေ ဘေးရန်ထှာကွန်း အွန်ဘင်းဆိတ်တာတ်ဟက် ‌လွောပ်သစိန်းဘန်းနာ အလေရီးဒါး အဆာတ်စားနင်းဘင်း ကာလပတ်လုံး စါတ်ထှာဘင်းအဆေင်တေ ကယာစိန်းဘန်နား ဘုရားရှာန်ဘင်းအမှုတေဒေ အွန်ကြီးရန်ကူ။ 75အလေရီးဒါး ဟိန်မန်းဘေ ဖြောင့်မတ်စင်ကြယ်ဘန်း ကျန်သဘင်းဘဝတေ ဆွန်စိန်းကူ" ညယ်ဘုရားရှာန် ဂုဏ်ကျေးဇူးတော်တေ ချီးမွမ်းသမှာ။ 76စီးမှါခ့်ခါ ဇာခရိကား ဟိန်ဆာရှာတေ "ငါဆာရှာ၊ နာန်တေ အမြင့်မြတ်ဆုံးထှာဘင်း ဘုရားရှာန်ဘင်း ပရောဖက်ညယ် ကော်ဘန်း ချီးမြင့်သကြီးဘန်းနာ အရှာန်ဘင်းလမ်းတေ ကြိုတာန်သဘန်နား ပြာန်ဆာန်သဘန်း ပဲကူဘင်းဆိတ် ထှာကူ။ 77ဘုရားရှာန်ကား သမီဆာတာတ်အမဲဘင်းအပြစ်တေဒေ ခွါမ်းလွှတ်သဘန်း ကယ်တာန်သဘင်းအခွါမ်းတေ အီကူငှေါဘင်းနာတေ နာန်ကား သမီဆာတေဒေ ငှေါကာထှာကူ။ 78ဘုရားရှာန်ဘင်းကရုဏာ၊ မေတ္တာတော်တေကား ဟမုခ်စောက်ဟက် စမိတ်တုံန်း အကြီးကျယ်ရားဘန်းနင်းနိမ် အလေစေါက်ပေ ရားဘန်း၊ 79အမဲဘင်းအကျန်းတေယောက် အဆာတ်စားနင်းကြီးဘင်း သမီဆာတေဒေ အမဲဘင်းအပြစ်တေဟက် လွောပ်သဘန်း ငြိမ်းချမ်းသဘင်းဘဝပါ လမ်းကာဘန်းနာ ဆာတ်အီကူ" ညယ်ငှေါမှာ။ 80အရာတ် ယောဟန်ကား အရွယ်လူရီဘန်း အကျန့်သီလယောက် ပြေ့စုံသဘင်းဆိတ်ထှာရီမှာ။ ဘုရားရှာန်ကား ဟိန်တေ အစ္စရေးသမီဆာတာတ်မန်းဘေ အမှုတော်တေ စသဘန်းအွန်စိန်းကာတ်ပင်း မာန်းရာတ်ထုတ်ကွန်း ဟိန်ကား သမီဆာထုတ်လား စစ်ပင်းအရပ်ပေနင်းရီမှာ။

Mihaino ny Luke 1