Andinin-tSoratra Masina malaza indrindra nalaina tao amin'ny San Mateo 5

Hizara

Ni na túun ñu̱ꞌu̱, ta köo chíkaa sěꞌe na ya ini iin ñaꞌa. Sundi chínuu sukun na ya, saa síndiyeꞌe ya nuu ndiꞌi na ndóo ini veꞌe. Saa ndóꞌo̱, koo ndo tá kuꞌva kúni Ndioxi, ta saa kuchiñu ndiyeꞌe ndo tá kuꞌva ndíyeꞌe ñu̱ꞌu̱ xaꞌa ñaꞌa ya vaꞌa íkan ndo, ta saa kuni naꞌa ya íkan ndo ta kaꞌan vaꞌa na xaꞌa Iva yo Ndioxi ta xaa kaꞌnu na ra ―káchi Jesús xiꞌin na.

’Nda tá íin ñu̱ꞌu̱ ya ndítuun na, saa íin ndo nuu na ñuu ivi yóꞌó. Iin ñuu ya íyo nuu xiki sukun, ta küvi koo sěꞌe ya.

’Vaꞌa ni kée ndo tá tu ndinuꞌu ni ini ndo kúu ndo naꞌa, na kúu mií nima vaꞌa nuu Ndioxi, chi vaxi iin kivi ta kuni ndo Ndioxi.

’Vaꞌa ni kée ndóꞌo̱ íin tá íin naꞌa, na káꞌun ini án ndóꞌo̱ íin tá íin naꞌa, na íchi tikuii. Xaꞌa ya kúni ndo ikan ndo ya vaꞌa nuu Ndioxi, chi vaxi kivi ta taxi Ndioxi ya koo vaꞌa ni ini ndo xiꞌin ra.

Sundi yeꞌe káꞌan xiꞌin ndo, kuꞌvi ini ndo kuni ndo na sáa ini xíni ndóꞌo̱, ta kaꞌan ndo xiꞌin Ndioxi ná chikaa ra ya vaꞌa na távi chiꞌña ndóꞌo̱.

―Vaꞌa ni kée ndo tá tu kúndaa ini ndo ya kúndáꞌvi ni ndo, ta xíniñuꞌu ni ndo Ndioxi, chi ndóꞌo̱ ku ndo kúu mií ichí koo ndo nuu xáꞌnda chiñu Ndioxi.

’Vaꞌa ni kée ndo tá tu ndáꞌva ndo kuachi xiꞌin naꞌa, na káni taꞌan, saa chi vaxi kivi ta kunani ndo seꞌe Ndioxi.

’Vaꞌa ni kée ndo tá tu xáku ni ndo, saa chi vaxi kivi ta sindiko Ndioxi ini ndo.

’Vaꞌa ni kée ndo tá tu íyo naꞌa, na xáa ndikuu xiꞌin ndo xaꞌa ya kúni ndo ikan ndo ya vaꞌa, ya ndaa, chi ndóꞌo̱ ku ndo ndíkun ichí nuu xáꞌnda chiñu Ndioxi.

’Vaꞌa ni kée ndo tá kúndaꞌvi ni ini ndo xíni ndo inka naꞌa, chi saa kundaꞌvi ni ini Ndioxi kuni ra ndóꞌo̱.

’Vaꞌa ni kée ndo, tá íyo naꞌa kánaꞌa xiꞌin ndo, sítixuꞌvi na ndóꞌo̱, ta káꞌan kini na xiꞌin ndo, xaꞌa ya ndíkun ndo yeꞌe. ’Tá ndóꞌo̱ ndo saa, tíxuꞌvi ndo, ta ná koo vaꞌa ni ini ndo, kusini ni ndo, saa chi chee ni koo ya vaꞌa taxi Ndioxi ndaꞌa ndo nuu ndivi. Saa ndo̱ꞌo nda ndi̱kaꞌan ndoso tuꞌun yuꞌu Ndioxi xi̱ndoo xi̱naꞌa, ndi̱xuꞌvi ni nda ―káchi Jesús xiꞌin na.

’Vaꞌa ni kée ndo tá tu vita ni ini ndo ta kusini ni ndo, saa chi vaxi kivi ta siniꞌi ndiꞌi Ndioxi ñuu ivi yóꞌó nuu ndo.

Saa káꞌan tuku Jesús xiꞌin nda ítaꞌan xiꞌin ra, káchi ra saa: ―Tá káa iín ya uꞌva táan yo xiꞌin ñaꞌa xíxi yo, saa íin ndóꞌo̱ nuu na ñuu ivi yóꞌó. Iín ya köo uꞌva, ta köo xáa uꞌva ka ya ñaꞌa, ni väꞌa ka ya, yakan kuaꞌan naꞌa xáta na ya yuꞌu ichí nuu yáꞌa naꞌa, ta xáñu ndoso na ya.

Xaꞌa ya ñaa kua ná koo ndo naꞌa, na ndaa ini, tá kuꞌva íyo Iva yo Ndioxi ra i̱í, ra ndaa ini ―káchi Jesús xiꞌin na.

Tá kivi káꞌan ndo xaa súvi ndo chiñu káchi ndo, ta xaa súvi ndo ya, tá káꞌan ndo xäa súvi ndo ya káchi ndo, ta xäa súvi ndo ya. Köo xíniñuꞌu kaꞌan ndo inka tuꞌun ya kandixa naꞌa ndóꞌo̱, chi tá chínuu ndo inka tuꞌun káꞌan ndo ta ya káku xiní kiti nǎꞌa ku tuꞌun ikán ―káchi Jesús.

Saa ndi̱kaꞌan tuku Jesús xiꞌin na, káchi ra saa: ―Xa xi̱ni soꞌo ndo ya ndi̱kaꞌan nda maestro xinaꞌa, káchi nda saa: “Tá íyo iin naꞌa sítikueꞌe na nduchi nuu inka na, ta saa vaꞌa sitikueꞌe na nduchi nuu na ikán. Saa ni tá íyo iin naꞌa si̱ndikava na iin nuꞌu inka na, tá kuꞌva si̱ndikava na nuꞌu na ikán. Saa ná sindikava na nuꞌu mií na i̱kan saa”, káchi ya ta̱a nda maestro ikán. Ta yeꞌe káchi saa xiꞌin ndo, ndïko koo ndo ikan ndo saa xiꞌin naꞌa, na íkan ndá ka ñaꞌa xiꞌin ndo. Tá ndá naꞌa ka̱ni xaꞌnda iin ñaꞌñu nuu ndo, ta käni taꞌan ndo xiꞌin na, vaꞌa sindiko koo ndo inka ñaꞌñu nuu ndo ná kani na ndóꞌo̱.

Xaꞌa ya ñaa kua káꞌan i xiꞌin ndo, tá tu xiꞌin nduchi nuu kuáꞌá ndo ku ya kuakiꞌvi ndo kuachi, ta vaꞌa tava ndo ya sikana ndo. Vaꞌa ka kua ná ndiꞌi xaꞌa iin ñaꞌñu ikin kuñu ndo, süvi ka vi ya ndiꞌi vaꞌa xaꞌa ndo kuꞌun ndo ndaya. Tá tu ndaꞌa kuáꞌá ndo kua táxi ichí ya kiꞌvi ndo kuachi, ta vaꞌa ka kaꞌnda ndo ya, tava ndo ya mií ndo, vaꞌa ka kua ná ndiꞌi xaꞌa iin ñaꞌñu ikin kuñu ndo, süvi ka vi ya ndiꞌi xaꞌa ndiꞌi ikin kuñu ndo kuꞌun ndo ndaya ―káchi Jesús.