Andinin-tSoratra Masina malaza indrindra nalaina tao amin'ny Ohabolana 2

Hizara

Fa Jehovah no manome fahendrena; Avy amin’ny vavany no ihavian’ny fahalalana sy ny fahazavan-tsaina.

ANAKA, raha raisinao ny teniko, Ary raketinao ao am-ponao ny didiko, Ka atongilanao amin’ny fahendrena ny sofinao, Ary ampitandremanao fahalalana ny fonao; Eny, raha miantso ny fahalalana hianao Ary manandratra ny feonao hahazo saina, Raha mitady azy toy ny fitady volafotsy hianao Ary mikatsaka azy toy ny fikatsaka harena afenina: Dia ho fantatrao marina ny fahatahorana an’i Jehovah, Ary ho hitanao ny fahalalana an’Andriamanitra.

Izy mitahiry fanambinana ho an’ny mahitsy Sady ampingan’izay mandeha tsy misy tsiny; Ka dia mitandrina ny làlan’ny fahamarinana Izy Ary miambina ny làlan’ny olony masina.

Fa ny olona mahitsy no honina amin’ny tany, Ary ny tsy manan-tsiny ihany no ho sisa mitoetra ao; Fa ny ratsy fanahy kosa hofongorana amin’ny tany, Ary ny mpivadika hongotana.

Ary hamonjy anao amin’ny vehivavy jejo koa izany, Dia amin’ny vahiny janga izay mandrobo amin’ny teniny, Izay mahafoy ny vadin’ ny fahatanorany Sy manadino ny fanekeny teo amin’Andriamaniny.