Lucas 20
20
Nahuata naca i'imari Jesús huacára'ajeri yucuna hue'epícana. Riyucuna marí:
(Mt 21.23-27; Mr 11.27-33)
1Apú huacajé Jesús i'imari piño Tupana ñacaré chu. Re rehuíña'ata ina'uqué Tupana nacú. Tupana i'imataca ina'uqué capichácajo liyá yucuna ri'imá najló. E'iyohuá que sacerdótena huacára'ajeño, Tupana puráca'alo nacú jehuíña'atajeño, peñahuilana, quele iphaño rinacu. 2Nemá rijló:
—Chuhua pimá huajló, na puráca'alo aú ca pila'á nacaje. ¿Na quemari pijló, pila'acáloje ricá penaje?
3Jesús quemari najló:
—Ñaqué caja nuquejá'ajica iliyá nacaje yucuna, i'imacáloje nojló riyucuna penaje. Eco ja'ajipá nojló. 4¿Na puráca'alo aú chi Juanmi chu la'aqueri bautizar ina'uqué, ina'uqué puráca'alo aú ca'ajná, Tupana puráca'alo aú ca'ajná?
5Raú napura'ó pajhua'atéchaca necámica que. Nemá pajlocaca:
—¿Meque huemájica rijló? Huemáquela rijló, “Tupana puráca'alo aú que”, rimajla huajló: “¿Naje chi uncá jema'alá ra'apiyá i'imacá?” que. 6Eyá huemaquela rijló: “Ina'uqué puráca'alo aú rila'á nacaje” que, aú maare i'imacaño yúcha'añojla huachá. Naca'ájla jipa huachá rijimaje. Tupana puráca'alo ja'apátajeri Juanmi chu i'imacá, que napechu rinacu —que napura'acó pajhua'atéchaca necámica que.
7E nemá Jesusjlo:
—Capí. Uncá huahue'epila na puráca'alo aú ca Juanmi chu la'aqueri bautizar ina'uqué.
8—Ñaqué uncá caja numalaje ijló na puráca'alo aú ca nula'acá nacaje —que Jesús quemacá najló.
Jesús i'imari apú hua'até sápajeño yucuna, rehuíña'atacaloje necá chapú nala'ajícare ricá nacú raú penaje.
9E Jesús i'imari najló yucu, rehuíña'atacaloje necá raú penaje. Rimá najló:
—Pajluhuaja ina'uqué ejáchiyari cajmú caje ri'icacapere e'iyá. Jepepí inarí cajmú i'imichaca. Quéchami riyuríchaca rijhua'até sápajeño naquiyánajlo ri'icacapere, namácaloje rijló ricá penaje. E caja ri'ijichá ajopana te'eré ejo. Ri'ijichaca yámona rimicha najló: “Chuhua nu'ujichaca. Eco amá ricá palá. Cajmú naquiyana no'ojé ijló rihuemí, amaca nojló ricá huemí”, que rimíchaca najló. “Je” que. E ri'ijichá ya'ajnaje. Júpija ri'imichaca ya'ajnó. 10E caja richa ña'acana iphíchari rená chojé. Aú paminá huacári'ichari rijhua'até sápajeri richa ña'acana rijló penaje. E ri'ijichá rejo, iphíchari nanacu. Eta, rimena amájeño i'icachíyaño rihuilá. Ejomi nahuacári'icha ripa'acó majopeja. 11Rejomi paminá huacári'ichari piño apú rijhua'até sápajeri rejo. Ñaqué caja nali'ichaca ricá. Chapú huani nali'ichaca ricá, ne'ecachiya rihuilá. Ejomi nahuacári'icha ripa'acó majopeja caja. 12Ejomi paminá huacári'ichari piño apú rejo. Ñaqué caja nali'ichaca ricá chapú. Quehuí nali'ichaca rinacu. Quéchami naqui'ichaca ritami rimena yámojo. 13Raú paminá pechu i'imá: “¿Meque nula'ajica? Palani ca'ajná nuhuacára'acajla rejo nu'urí, íqui'ija nuhuátacare. Ricá ja'apí ca'ajná nephajla”, que ripechu i'imichaca. 14Raú rihuacári'icha ri'irí rejo. Rimena amájeño amíchaño ricá huaíchaca a'ajnareje cha que, nemícha pajlocaca: “Ilé ri'irí huaícha. Rijló rara'apá yuréjeri rimena. I'ijná huenóchachi ricá, rimenami yurícoloje huajló penaje”, que nemíchaca pajlocaca. 15E caja riphicha nanacu. Eta napachiya ricá; naji'ichá ricá rimena yámojo. Re nenocha ricá —que Jesús i'imacá yucu najló.
E Jesús quemari najló:
—Marí que paminá la'ajica rimena amájeño. 16Riphaje nacapichátaje. Quéchami ra'ajica ajopánajlo rimena, ramájeño penaje —que rimacá najló.
Raú ripuráca'alo jema'ajeño quemaño Jesusjlo:
—Ri'imaniya ilé que huajló.
17Aú Jesús yacá'aro nachaje, rimá najló:
—Marí que Tupana puráca'alo lana'aquéjami quemacá nunacu i'imacá:
Pajluhuaja ina'uqué i'imajeri.
Ne'iyajena quemájeño rinacu: “Uncá ina'uquélari ricá” que.
E'iyonaja ricá i'imajeri ajopana chaje, que rimacá nunacu.
18Necá, uncá jema'alaño no'opiyá, capichájeño Tupana liyá. Chapú huani ri'imajica najló. Uncá huátalaño nucá, amájeño chapú caje yajhué nupuráca'alo aú —que Jesús quemacá najló.
19Ejéchami sacerdótena huacára'ajeño, Tupana puráca'alo nacú jehuíña'atajeño, quele huátaca Jesús patacana. Yucu ri'imá najló i'imacá. E'iyonaja nahue'epí rimacá nanacu raú meque la'ajéñoca necá. Ñaquele nahuata ripatacana, nahuajácaloje ricá penaje. E'iyonaja calé naquero'ó ina'uqué piyá marí la'acana aú. 20Raú nahuacára'a riquejíla'ajeño rejo rijhua'até pura'ajó. Chapú rinacu péchuruna ne'emacá. E'iyonaja calé nala'á necó palájne'equena que caja rijló. Nahuata Jesús liyá yucu jema'acana, nema'acáloje méqueca rimájica apojó ne'emacana liyá penaje. Aú nahuata rijña'acana ne'emacana ejo, rihuajácaloje ricá penaje.
Liñeru na'acare ne'emacánajlo yucuna naquejá'aca Jesús liyá yucuna marí:
(Mt 22.15-22; Mr 12.13-17)
21E caja riquejíla'ajeño iphaño rinacu. Nemá rijló:
—Huehuíña'atajeri, huahue'epí quehuácaje pipuráca'alo. Quehuaca nacaje pehuíña'atacare nacú. Picá hue'epiri méqueca ina'uqué pechu i'imacá. Re huahuacára'ajeño naquiyana, uncá paala najló pipuráca'alo. E'iyonaja uncá pa'alá necá pinacojó. Pajimato pehuíña'ataca ina'uqué Tupana huátaca que la'acana nacú. 22Chuhuata pimá huajló méqueca pipechu marí nacú. Naquejá'a hualiyá liñeru, na'acáloje ricá hue'emacana Césarjlo penaje. Romano naquiyana ricá. ¿Meque chi pijló ricá? ¿E chi hua'acajla najló liñeru, naquejá'acare hualiyá hue'emacánajlo? ¿Echi palani hua'acajla najló ricá ca'ajná, uncá ca'ajná?
23Jesús hue'epiri na penájeca naquejá'aca riyucuna, nemacáloje rinacu: “Pu'uhuaré rimíchaca huajló,” que penaje. Aú rimá najló:
—¿Naje ihuata numacá ijló nacaje nacú, imacáloje nunacu: “Pu'uhuaré rimíchaca huajló”, que penaje. 24Iya'atá nojló liñeru naquejá'acare iliyá i'imacánajlo, nomachi ricá.
Aú naya'atá rijló ricá. E rimá najló:
—¿Na jenami chi cari liñeru nacú? ¿Na ií cari lana'aquéjami rinacu?
Nemá rijló:
—Hue'emacana César jenami rinacu. Rií caja rinacu —que nemacá rijló.
25Jesús quemari najló:
—A'á Césarjlo quele liñeru rihuátacare. Ila'á caja Tupánajlo nacaje rihuátacare —que rimacá najló.
26Marí que naquejá'aca riyucuna ajopana ina'uqué e'iyá. Marí que rimacá aú uncá meño'ojó nemalá: “pu'uhuaré rimíchaca pinacu” que ne'emacánajlo. Raú namanúma'o. Napechu i'imá: “¡Meque capechú huani rimíchaca huajló!”
Caja taca'acaño macápo'oco yucuna naquejá'a Jesús liyá. Riyucuna marí:
(Mt 22.23-33; Mr 12.18-27)
27Quéchami saducéona naquiyana i'ijnacá piño Jesús amaje. Necá quemaño caja taca'acaño nacú: “Uncá namacápo'olajo.” Ñaqué i'imacale ne'ejná Jesús chaje rijhua'até pura'ajó. E nemá rijló:
28—Huehuíña'atajeri, marí que Moisesmi chu puráca'alomi lana'aquéjami quemacá: “Apú ca'ajná taca'añari riyajalo mayaniqueru. Palani re'ehuemi ra'apiyajé huá'acacojla riyajálomi hua'até, re'ehuemi chu yanimínami yurícoloje rapumí chojé raú penaje”, que ripuráca'alomi lana'aquéjami quemacá. 29Ñaqué ricá. Pajluhua ina'uqué i'imari. Iyamá cuhuá'ata quele ne'emacá rejena hua'até. Pe'ejí ri'imacá huá'acaro. Ejomi ritaca'á mayaniqueru. 30Rejomi ra'apiyajé i'imacá huá'acaro riyajálomi hua'até. Ñaqueja caja ricapichaco ruliyá mayaniqueru caja. 31Raú re'ehué pe'iyorí huá'acaro piño rujhua'até. Ricapichó caja ruliyá mayaniqueru caja. Ají que iyamá cuhuá'ata quele necá huá'acaco rujhua'até i'imacá. Caja queja nacapichaco ruliyá mayaniquéruja. 32Caja penaje nayajálomi capichayo nápumi chu. 33Eta, Tupana macápo'otajica piyuque ina'uqué caja taca'acaño huacajé, ¿na yajalo chi ruyuríjico rejéchami? Iyamá cuhuá'ata quele ina'uqué yajálomi ru'umacá —que nemacá Jesusjlo.
34Raú Jesús quemari najló:
—Marí eja'ahuá chu achiñana, inaana, quele huá'acaño pajhua'atéchaca. Eyá je'echú chu i'imajeño, uncá ñaqué calé ne'emajica rejo je'echú chu. 35Tupana macápo'otajeri ra'apiyá jema'ajéñomi chuna, ne'emacáloje je'echú chu penaje. Re uncá pajhua'atéchaca huá'acajeñomi calé ne'emajica. Uncá caja nahuá'acalajo piño pajhua'atéchaca re. Uncá caja na'alaje nayani, nahuá'acacoloje pajhua'atéchaca penaje. 36Re uncá natajnálajo. Ne'emajé Tupana hua'atéjena, je'echú chu i'imacaño, que caja. Uncá taca'alájeño penájena ne'emajé; Tupana yaní ne'emajé, Tupana macápo'otajicale necá. 37Ñaqué caja Moisesmi chu puráca'alomi lana'aquéjami quemacá caja taca'acaño macápo'oco nacú. Jíma'alami cára'aco e'iyayá Tupana quemari Moisesmi chujlo marí que i'imacá: “Abraham, Isaac, Jacob, quele pechu i'imá nochojé caphí”. 38Uncá meño'ojó caja taca'acaño pechu i'imalá Tupana chojé caphí. Necaja calé cajmuruna pechu i'imá richojé caphí. Cajmuruna, capéchuruna necá Tupana hua'até i'imacaño —que Jesús quemacá najló, nahue'epícaloje raú caja taca'acaño rijhua'atéjena i'imacá cajmuruna je'echú chu penaje.
39E Tupana puráca'alo nacú jehuíña'atajeño naquiyana quemaño rijló:
—Palá pimíchaca rinacu, Huehuíña'atajeri.
40Ejomi uncá ajopana quejá'alaño nacaje yucuna riliyá. Nahuó la'aró ra'apejé nacaje yucuna quejá'acana nacú.
Jesús i'imari najló ricá Tupana huacára'acare ina'uqué i'imatájeri penaje yucuna. Riyucuna marí:
(Mt 22.41-46; Mr 12.35-37)
41E Jesús quemari najló:
—Ricá, Tupana huacára'acare ina'uqué i'imatájeri penaje, nacú nemá: “Davidmi chu laquénami naquiyana ricá”. ¿Naje chi nemá ilé que rinacu? 42Papera Salmos chu, iná iphata méqueca Davidmi chu quemacá rinacu i'imacá. Marí que rimacá:
Ina'uqué huacára'ajeri huani Tupana. Ricá quemari Nuhuacára'ajerijlo marí que:
“Palá huani nupechu pinacu.
Pi'imá Nahuacára'ajeri nujhua'até.
43Maare pi'imajica nohua'á, nuchá'atajica chapú pinacu péchuruna ejená”, que rimacá.
44Jesús quemari piño:
—Davidmi chu quemari ricá Tupana huacára'acare ina'uqué i'imatájeri penaje nacú: “Nuhuacára'ajeri ricá” que. Ñaquele uncá Davidmi chu laquénami naquiyana huani calé ricá nemacare nacú —que rimacá najló.
Jesús aca'acá Tupana puráca'alo nacú jehuíña'atajeño maná yucuna marí:
(Mt 23.1-36; Mr 12.38-40; Lc 11.37-54)
45Jesús pura'aró nacaje nacú ra'apiyatéjena hua'até. Ajopana i'imaño re caja, jema'añó caja méqueca rimacá najló. Rimá najló:
46—Ihue'epínoja Tupana puráca'alo nacú jehuíña'atajeño. Ila'aniya nala'acá que caja. Huaphereni na'arumacá chu nahuata chira'acajo. Na'apaca le'ejepelaji ñacarelana e'iyohuá ee, nahuata ina'uqué ajalácaca necá palá. Ajopana chá'atajeño que nayá'aco nahuacáca'alo ñacarelana chu. Ñaqué caja nahuátaca ajopana tucumá yá'acano nale'ejé fiesta huacajé. 47Napajlaca caja ihuacajílomina hua'até, nata'acáloje naliyá nañacaré penaje. Uncá nephala na'apí. Eyá majopeja napura'acó júpija Tupana hua'até, palá ina'uqué pechu i'imacáloje nanacu raú penaje. Marí que nala'acare chona, ajopana chaje huani Tupana huajájica necá.
Voafantina amin'izao fotoana izao:
Lucas 20: ycn
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2011, Wycliffe Bible Translators, Inc. All rights reserved.