Mateo 3
3
Sa Pagpanunultul Hi Juan Ha Tagpamautismu
(Mateo 3:1-12; Marcos 1:1-8; Lucas 3:1-18; Juan 1:19-28)
1Duun taena ha panahun amin etaw ha tagngaranan ki Juan Ha Tagpamautismu ha nanunultul duun hu pinakabulung-bulung ha lugar diyà ta Judea 2ha tagyanaen, “Hinulsuli sa mga salà nuy ta madani en sa pagharì hu Dios kanuy.” 3Si Juan iyan su tagsubayen hi Isaias sa prupita ha tagyanaen,
“Amin etaw ha magkulahiay duun hu pinakabulung-bulung ha lugar ha magyanaen, ‘Andama sa ag-agiyan hu Ginuu daw tul-ida sa dalan.’”
4Sa pinaksuy hi Juan bulbul hu kamilyu daw anis daan sa bakes din. Sa kalan-enen din talangas daw degà. 5Madakel ha mga etaw sa namandiyà ta kandin ha nangapuun diyà ta Jerusalem daw duun hu alan ha mga banuwa diyà ta prubinsya ta Judea daw duun hu ubay ta Wahig ta Jordan. 6Insugid dan sa mga salà dan aman pigbautismuwan sidan hi Juan diyà ta Wahig ta Jordan.
7Ba su maahà hi Juan sa madakel ha mga Parisiyu daw mga Saduceo ha tagpabautismu kandin inikagiyan din sidan, “Sinyu sa mga bunsalagan, sin-u sa mig-ikagi inyu ha dumini kaw ta kanak? Abi nuy gid ha mapulaguyan nuy sa silut inyu hu Dios. 8Ku laus ha mighinulsul kaw en hu mga salà nuy ipaahà haena pinaagi hu maayad ha buhat. 9Harì kaw magsalig ha mga kaliwatan kaw hi Abraham ta ikagiyen ku inyu ha mahimu hu Dios buhata haini sa mga batu ha kaliwatan daan hi Abraham. 10Sa tagpamilay andam en hu pagpilay hu mga kayu. Sa kayu ha madaet sa bunga din agpilayen daw bigsuli.
11“Diyà a ta wahig agpamautismu inyu ha iyan timaan ha nahinulsulan nuy en sa mga salà nuy. Ba amin pa makadini ha labaw dì kanak ta bisan sa pag-uwit hu sapatus din kenà a gayed angayan duun. Sa kandin ha igbautismu iyan sa paulinan kaw kandin hu Balaan ha Ispiritu daw masunug sa madaet diyan ta inyu. 12Agkailing haena hu taggunas ha sa malinggas iyan din igtagù duun hu bugawan, ba sa ukap agbigsulan ha harì en mapedengan.”
Sa Pagbautismu Ki Jesus
(Mateo 3:13-17; Marcos 1:9-11; Lucas 3:21-22)
13Su kamulu pa tagpamautismu si Juan diyà ta Jordan nakauma si Jesus diyà ta kandin ha diyà napuun ta Galilea ta tagpabautismu daan. 14Ba harì ngaay agkabayà si Juan aman minikagi, “Harì mahimu ha bautismuwan ku ikaw ta iyan a ngaay angayan ha bautismuwan nu.”
15Ba tuminubag si Jesus, “Buhata haini ta kinahanglan matuman sa alan ha agkabayaan hu Dios.” Aman binautismuwan haena hi Juan.
16Su mabautismuwan en si Jesus guminaun haena. Dayun sagunà napuwaan sa langit daw naahà din sa Balaan ha Ispiritu ha sinugù hu Dios ha agkailing hu salapati ha migbulus diyà ta kandin. 17Amin lageng ha napuun diyà ta langit ha tagyanaen, “Iyan en haini pinalanggà ku ha Batà ha tigkabayà-bayà ku.”
Voafantina amin'izao fotoana izao:
Mateo 3: bkd
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2015, Wycliffe Bible Translators, Inc. All rights reserved.