Lokas 3
3
Nangaral hi Howan Mamiminyag
(Matiyo 3:1-12; Markos 1:1-8; Howan 1:19-28)
1-2Na-abot ya ikalabinliman ta-on nin pamomo-on ni Tibiryo Sisar ya pinakamatag-ay ya arì; hi Ponsyo Pilato ay gobirnador ha probinsyan Hodiya; hi Hirodis ay gobirnador ha probinsyan Galiliya; boy hi Pilipi ya patel ni Hirodis ay ampamo-on ha dogal ya sakop nin Itorya boy Tarakoniti; hi Lisanyas ay ampamo-on ha dogal ya an-ingaten Abilinya. Hi Anas boy hi Kaypas ay parihon pinakapo-on nin pawparì nin Hawhodiyo. Hin habayton pana-on, hi Howan ya anak ni Sakariyas ay anti ha powiray dogal. Bayro ay minandawan ya nin Diyos nin mangaral ha tawtawo. 3Kayà hi Howan ay antomalà nin mangaral ha tawtawo ha dawdogal nin mitaligmang balah nin Hordan ya hay an-i-aral na ay ombayri: “Maghehe kawo ha ginawà moyoy kawkasalanan boy pabinyag kawo emen kawo patawaren nin Diyos.” 4Hin hato, inholat ni propita Isayas ha libro na ya ombayri:
“Ma-in mihay tawoy ampibobolyaw ha powiray dogal nin ombayri: ‘Homandà kawo ha panlomateng nin Pangino-on nin bilang ha ampangihandà nin daan ya kowinta pagdanan na emen ayin maka-abalà kona. 5Ha pangihandà moyo ay emen kawo ha ampanaphon nin manga-aypà ya dawdogal, boy ampanobà nin bawbakil boy bawbakilbakil. Emen kawo simpri ha ampanoynong nin dawdaan ya mangatikò boy ampamantay nin dawdaan ya nikakokol-ong. 6Ha ombayro, hay pangilibri nin Diyos ay makit nin kaganawan tawo.’”
7Ombayri ya anhalita-en ni Howan do ha tawtawoy ampakarani kona nin pabinyag: “Hikawo ay bilang ha aw-otan ya ampagsikap nin mog-alih ha dawdikot ya angkapo-olan. Warì makalibri kawo ha lomateng ya iparosa komoyo nin Diyos no hay paghehe moyo ay ha halità bongat? 8Gaw-en moyoy bawbagay ya makapapteg nin hikawo ay nagheheyna ha kawkasalanan moyo. Agmoyo halita-en nin makalibri kawo nin banà ta hikawo ay aw-inalalak ni Abraham. Anhalita-en ko komoyo ya ha bawbatoy habayti, hay Diyos ay makagawà nin aw-inalalak ni Abraham. 9Hay payakol ay naka-a-awag ana nin pamoton po-on kayo. Kaganawan po-on kayo ya ahè ampamonga nin maganda ay potohen ta itapon ha apoy. Ombayri ya panonosga komoyo nin Diyos.”
10Hapa-eg, nagpastang baytoy tawtawo koni Howan, “Anya, awod,” wanla, “ya dapat nawen nin gaw-en?”
11Hay intobay konla ni Howan ay ombayri: “Hinoman komoyo ya ma-in loway baro, hay miha ay igwà do ha ayin. Hinoman komoyo ya ma-in pamamangan ay mambi do ha ayin pamamangan.”
12Hapa-eg, ma-in nilomateng ya ongnoy tawoy manininon bo-ih ta pabinyag. Nagpastang hila koni Howan, “Apo,” wanla, “anyay dapat nawen gaw-en?”
13Tinombay konla hi Howan, “Agkawo manino nin ma-igit ha an-ipahino komoyo nin gobirno.”
14Hapa-eg, ma-in ongnoy hondalò ya nagpastang itaman koni Howan, “Hapa hikayi,” wanla, “anyay dapat nawen gaw-en?”
Hinalità konla ni Howan, “Agkawo,” wana, “mangwan sintimos ha tawtawo nin powirsawan boy agkawo mamarà nin ayin kaptegan. Mag-in kawon kontinto ha ansowildowen moyo.”
15Hatoy tawtawo ay an-omasa nin tampol lomateng hi Kristo ya impangakò nin Diyos. Kayà an-ihipen la nin hi Howan ay maka hi Kristo ya impangakò nin Diyos. 16Piro hinalità ni Howan bayro ha kaganawan tawo, “Hiko,” wana, “ay ampaminyag ha lanom, piro ma-in anlomateng ya mas makapangyariyan dinan hiko. Maski mangokà sintas nin sapatos na ay alwa kon karapatdapat. Hiya ya mangibinyag komoyo nin Ispirito nin Diyos boy manobok komoyo ha pangiparanas na komoyon kadya-dya-an nin bilang ha an-iparaan ha apoy. 17Hiya ay bilang ampamalohboh ta hay pali ya malinis ana ay ikamalig, piro hay aw-apah ay ipo-ol na ha apoy ya ahè maparè.”
18Ombayri ya pangaral ni Howan nin Mahampat ya Balità ha tawtawo, boy malakè et ya inwawali na konla. 19Piro hi Hirodis ya gobirnador ha probinsyan Galiliya ay pinaghalita-an ni Howan nin makhit, ta pinag-ahawa na hi Hirodiyas ya ayro na, boy malakè et ya anggaw-en nay mangala-et. 20Napahanan et ya kala-etan ni Arì Hirodis ta hi Howan ay impapiriso na.
Hay paminyag koni Apo Hisos
(Matiyo 3:13-17; Markos 1:9-11)
21Hin ahè et napiriso hi Howan ay ampaminyag ya nin tawtawo. Hapa-eg hi Apo Hisos ay napabinyag itaman. Hin nayarì na yan bininyagan, mintras ampanalangin hi Apo Hisos, hay langit ay naglo-at 22ta hay Ispirito nin Diyos ya bilang kalapati ay nag-aypà nin nako kona, biha ma-in bosis ya nangibat ha katatag-ayan ha kama-inan nin Diyos ya naghalità nin ombayri: “Hika ya mimihay Anak koy pinakalabilabi ko ya ampakapakonsowilo kongko.”
Hay pinanlipi-an ni Apo Hisos
(Matiyo 1:1-17)
23Mangatatlompò ya ta-on ni Apo Hisos hin nag-ompisa yan nangaral. Hiya ay katanda-an ya anak ni Hosi.
24Hay tatay ni Hosi ay hi Ili.
Hay tatay ni Ili ay hi Matat;
hay tatay ni Matat ay hi Libi;
hay tatay ni Libi ay hi Milki;
hay tatay ni Milki ay hi Hana;
hay tatay ni Hana ay hi Hosi;
25hay tatay ni Hosi ay hi Matatiyas;
hay tatay ni Matatiyas ay hi Amos;
hay tatay ni Amos ay hi Nahom;
hay tatay ni Nahom ay hi Isli;
hay tatay ni Isli ay hi Nagi;
26hay tatay ni Nagi ay hi Mat;
hay tatay ni Mat ay hi Matatiyas;
hay tatay ni Matatiyas ay hi Simi;
hay tatay ni Simi ay hi Hosi;
hay tatay ni Hosi ay hi Hoda;
27hay tatay ni Hoda ay hi Hona;
hay tatay ni Hona ay hi Risa;
hay tatay ni Risa ay hi Sorobabil;
hay tatay ni Sorobabil ay hi Salatiyil;
hay tatay ni Salatiyil ay hi Niri;
28hay tatay ni Niri ay hi Milki;
hay tatay ni Milki ay hi Adi;
hay tatay ni Adi ay hi Kosam;
hay tatay ni Kosam ay hi Ilmodam;
hay tatay ni Ilmodam ay hi Ir;
29hay tatay ni Ir ay hi Hisos;
hay tatay ni Hisos ay hi Iliser;
hay tatay ni Iliser ay hi Horim;
hay tatay ni Horim ay hi Mata;
hay tatay ni Mata ay hi Libi;
30hay tatay ni Libi ay hi Simyon;
hay tatay ni Simyon ay hi Hoda;
hay tatay ni Hoda ay hi Hosi;
hay tatay ni Hosi ay hi Honan;
hay tatay ni Honan ay hi Ilyakim;
31hay tatay ni Ilyakim ay hi Milya;
hay tatay ni Milya ay hi Ma-inan;
hay tatay ni Ma-inan ay hi Matata;
hay tatay ni Matata ay hi Natan;
hay tatay ni Natan ay hi Dabid;
32hay tatay ni Dabid ay hi Dyisi;
hay tatay ni Dyisi ay hi Obid;
hay tatay ni Obid ay hi Bos;
hay tatay ni Bos ay hi Salmon;
hay tatay ni Salmon ay hi Nason;
33hay tatay ni Nason ay hi Aminadab;
hay tatay ni Aminadab ay hi Admin;
hay tatay ni Admin ay hi Arni;
hay tatay ni Arni ay hi Isrom;
hay tatay ni Isrom ay hi Paris;
hay tatay ni Paris ay hi Hoda;
34hay tatay ni Hoda ay hi Hakob;
hay tatay ni Hakob ay hi Isak;
hay tatay ni Isak ay hi Abraham;
hay tatay ni Abraham ay hi Tari;
hay tatay ni Tari ay hi Nakor;
35hay tatay ni Nakor ay hi Sirog;
hay tatay ni Sirog ay hi Rigan;
hay tatay ni Rigan ay hi Pilig;
hay tatay ni Pilig ay hi Hibir;
hay tatay ni Hibir ay hi Sala;
36hay tatay ni Sala ay hi Ka-inan;
hay tatay ni Ka-inan ay hi Arpasad;
hay tatay ni Arpasad ay hi Sim;
hay tatay ni Sim ay hi Nowi;
hay tatay ni Nowi ay hi Lamik;
37hay tatay ni Lamik ay hi Matosalim;
hay tatay ni Matosalim ay hi Inok;
hay tatay ni Inok ay hi Harid;
hay tatay ni Harid ay hi Mahalali-il;
hay tatay ni Mahalali-il ay hi Ka-inan;
38hay tatay ni Ka-inan ay hi Inos;
hay tatay ni Inos ay hi Sit;
hay tatay ni Sit ay hi Adan;
hay tatay ni Adan ay Diyos.
Voafantina amin'izao fotoana izao:
Lokas 3: sblNT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2005, Wycliffe Bible Translators, Inc. All rights reserved.