Luku 24
24
Jisọsu shi l'ọnwu teta; nọdu ndzụ
(Mát. 28:1-10; Mak. 16:1-8; Jọn. 20:1-10)
1O rwulewho l'ishi ẹnyangge mbọku mbụ l'idzu bụ iya bụ mbọku chọchi, ụnwanyi ono wota mmanụ-mbeleke ono, whẹ kwakọwaru gẹ l'ọo-dụ ono, gude iya jeshia l'ilu Jisọsu. 2Ọo ya bụ, whẹ rwudeshia e swifuwaa ẹwhuru ọbu, e gude swichia ọnu ilu ono. 3Whẹ bahụ iya l'ime, whẹ ta awhụ iya odzu Onye-Nwe-Ọha, bụ Jisọsu. 4Whẹ kfụru l'ẹka ono arịkashi iwhe ono. Ọ tụfu whẹ ẹhu. Whẹ bya l'eledeshia ẹnya, unwoke labọ yegeeru uwe l'egbu zaa-zaa bya akfụkube whẹ. 5Whẹ tsụlahaa egvu, whẹ wogeeru iwhu kpube l'alị. Unwoke ono sụ whẹ: “Ọo gụnu meru iwhe unu l'achọ onye nọ ndzụ l'ẹka ndu nwụhuru anwụhu nọ? 6Ọ tọ nọhedu l'ẹka-o, o tetaakwaru nọdu ndzụ ọdo. Unu nyatakwa iwhe ono, o kfuru unu nteke ọ nọ lẹ Gálili sụ lẹ 7yẹbe Abụbu-Ndiwhe bẹ l'ee-seru ye l'ẹka ndu l'eme iwhe-dụ-ẹji, whẹ akpọpyabe iya l'oswebe, o belewho ujiku ẹto iya, ya eteta nọdu ndzụ ọdo.”
8Ẹnya rwua whẹ l'okfu ono. 9Whẹ shi l'ilu ono lwatashia bya eje akọoru iya ụmadzu iri lẹ nnanụ whọ mẹwaro ndu ọwhu gẹ whẹ ha. 10Ụnwanyi ọbu bụ Méri Mágudala mẹe Jowána mẹe Méri ne Jémusu mẹwaro ụnwanyi ọdo tso whẹ nụ. Whẹ kọoru ndụ-ishi-ozhi iwhe ono. 11Iwhe ono dụ whẹ lẹ nchị g'ọo okfu eswe, whẹ te ekweta l'ọo ezhi-okfu. 12Pyita zhilihu gbagbụa ọso jeshia l'ilu ono. O rwua bya ewhuzeta ewhuzeta nyoo ime ilu ono. Iwhe ọ whụru nwẹkiya bụleruwho ẹkwa-odzu ono. Ọ dakọbe ọ bụru iya ụla. Iwhe ono meru nu kpụbe iya ọnu okfu.
Ndu l'edzu idzu eje Eméyọsu
(Mak. 16:12-13)
13Mbọku onowho bẹ ụmadzu labọ lẹ ndu l'etso ụzo iya lị eje mkpụkpu ọbu l'eekuje Eméyọsu. Wata lẹ Jerúsalẹmu jeye l'ẹka ono bụlewho manyịru ẹsaa. 14Whẹ l'edzulekwawho idzu nke iwhe lile ono, meru nụ. 15Whẹ gudekwadu idzu ono, l'ẹka edzu, aghakashịkwawho iwhe ono, Jisọsu l'onwiya byakfuta whẹ, whẹ l'iya lịchia. 16Ọle e kpuchiru whẹ ẹka l'ẹnya, whẹ ta ahụbe iya ama. 17Ọ sụ whẹ: “?Ọo ẹgube idzu gụnu bẹ unu l'edzuzhia tsoru echi-ụzo nno?”
Whẹ bya akfụshita nkele áwhụ jiru whẹ obu. 18Onye lanụ l'ụmadzu labọ ono, ẹwha iya bụ Kulíyopasu sụ iya: “?Ọ zhia ghu whọ bụ onye byarụ abyabya lẹ Jerúsalẹmu, l'ẹte amaa iwhe ono, nwụru l'ẹka-a l'idzudzu-a?”
19Ọ sụ whẹ: “?Ọ bụ-zhiaru ẹgube iwhe gụnu?”
Whẹ sụ iya: “Mbụ nke Jisọsu onye Názaretu bụ onye nkfuchiru Chileke, mbụ onye shi l'iwhe l'oome eme, mẹe okfu o kfuru l'ọnu goshi l'iwhu Chileke mẹe l'iwhu ọha g'ike nkiya habe shii. 20Sụ: mẹe gẹ ndu ishi ndu l'agbajẹ ẹja nụ Chileke mẹe ndu ishi anyi whẹ gude seru iya ye nma iya ikpe ọnwu, kpụta iya kpọpyabe l'oswebe. 21Mbụkwa onye-e anyi shi ele ẹnya iya l'ọo ya l'a-bya agbata Ízurẹlu-a. T'a gụfukwaro ono, ntanụ-a kweekwa abalị ẹto iwhe ono meru. 22Ọwhu kanụ bụru l'ụnwanyi anyi lẹ whẹ l'atụ ọli harụ bya ekfulekwawho iwhe tujiru anyi ẹka. Ụnwanyi ono bẹ gude ọnmewa ụtsu je l'ilu ono. 23Whẹ rwua, whẹ ta awhụ odzu iya. Whẹ lwa bya asụ lẹ whẹ whụ-gekwaru whụa awhụ, woo: ọ bụru ndu ojozhi-imigwe bẹ whẹ whụru, woo ojozhi-imigwe ono sụ whẹ lẹ Jisọsu nọduakwa ndzụ. 24Sụ: tọ dụ iya bụ lẹ ndu anyi lẹ whẹ l'anọje abya aharu jee l'ilu ọbu l'ẹka ono. Whẹ rwua ọ bụleruwho g'ụnwanyi ono kfuru iya bụ lẹge ọ dụ, ọle onye ọbu whẹ chọru jee bẹ whẹ l'ẹte awhụkwa-a nụ.”
25Jisọsu sụ whẹ: “Oowa! Unu bụbukwa ndu eswe, mbụ unubẹ ndu ono l'akpụ onwunu akpụkpu okweta iwhe ndu nkfuchiru Chileke kfuru. 26To rwubedu Kuráyisutu erwube l'o jefutaje iwhe-ọtsulanu tẹmenu ya abahụ l'ẹka l'ee-goshi ugvu Chileke kwabẹru iya.” 27Jisọsu bya eshizhiawho l'ẹkwo Mósisu g'ọ ha mẹe ẹkwo ndu nkfuchiru Chileke, shi iya ishi lanụ tọkashiaru whẹ iwhe e deru l'okfu ẹhu iya l'ẹkwo Okfu Chileke nnanụ nnanụ.
28Whẹ rwukubedelewho mkpụkpu ono, whẹ l'eje, o melahaa umere gẹ ya l'aghata atụgbubaa. 29Whẹ sede iya sụ iya: “Byanụ t'anyi radụ g'ọochi l'abyawaa, ike gvụwaa ụboku ẹgube-ẹ.” O tsoru whẹ bahụ tẹ whẹ je aradụ. 30Ọo ya bụ whẹ byalẹwho l'eri nri, ọ bya ewota buredi ono bya ekele Chileke ekele wajashịa ya nụ whẹ. 31Ẹnya kosahu whẹ nteke ono, whẹ bya ahụbe iya ama. O mihu, whẹ whụ-beru iya. 32Whẹ kfude l'ime onwowhe sụ: “?Ọ kwa l'iwhe ono, o shi ekfu shi awhụ whẹ sasasa l'obu nteke ono o shi ekfuru eyeru whẹ l'ụzo, mbụ nteke ono l'ọotokashiru anyi iwhe e deru l'ẹkwo Okfu Chileke?”
33Whẹ zhilihulekwawho nteke ono, gbawhu azụ lẹ Jerúsalẹmu. Whẹ rwudeshia ndụ-ishi-ozhi ono whẹ iri lẹ nnanụ dọkobewaa l'ẹka lanụ mẹe ndu whẹ lẹ whẹ nọ. 34A bya ekfuru ụmadzu labọ ono lẹ Onye-Nwe-Ọha tetaakwaru l'ezhi, lẹ Sáyịmonu whụakwaru iya.
35Whẹbedua bya akọo iwhe meru nụ l'ụzo, kọkwaawho gẹ whẹ gude hụbe iya ama nteke ọ wajarụ buredi.
Jisọsu l'egoshi ndu l'etso ụzo iya onwiya
(Mát. 28:16-20; Mak. 16:14-18; Jọn. 20:19-23; Ndu. 1:6-8)
36Whẹ kpụkwaduru-a iwhe ono l'ọnu ekfu, Jisọsu ọbu kfụwaru l'echilabọ whẹ sụ whẹ: “Unu buru guu.”
37Whẹ dabirihu. Meji tọfu whẹ. Whẹ nọdunu g'ọo maa bẹ whẹ whụru. 38Ọ sụ whẹ: “?Ọo gụnu meru unu l'atsụ egvu? ?Ọo gụnu mekwaruwho iwhe unu l'abọ obu ẹbo.” 39Woo whẹ: “Unu lee ẹka mu mẹe ọkpa mu. Unu marụ l'ọo mu gẹdegede. Unu mee mu ẹka, unu awhụwaro nkele maa te enwejekwa anụ-ẹhu mẹe ọkpu g'unu l'elenua lẹ mu nweru-a.”
40O kfugelewho nno, ọ bya egoshi whẹ ẹka iya goshi whẹ ọkpa iya. 41Ẹhu-ụtso mẹe akpa-jiijii iya mee whẹ, whẹ te ekweta ọkpobe ekweta. Ọ sụ whẹ: “?O nwezhiaru iwhe l'eri eri, unu nweru l'ẹka-a?” 42Whẹ bya alabata ẹma, a hụru ahụ nụ iya. 43Ọ nata iya nọdu whẹ l'iwhu l'ẹka ono taa. 44O sụ whẹ: “Iwhe-e bẹ bụ-gezhia iwhe mu kfuhawaru unu nteke mu l'unu nọ, sụ unu l'iwhe lile, e deru l'okfu ẹhu mu l'ẹkwo iwu Mósisu mẹe lẹ nke ndu nkfuchiru Chileke mẹe l'ẹkwo Egvu-ọma bẹ vụkotaje lẹge e deru iya.”
45Ọ bya emee ọriri rwua whẹ ọhu-ẹwho nke ọwhu iwhe e deru l'ẹkwo okfu Chileke l'e-do whẹ ẹnya. 46Ọ sụ whẹ: “E deru sụ lẹ Kuráyisutu ọbu jefutaje iwhe-ọtsulanu, ya anwụhu, o -belewho lẹ mbọku nke ẹto, ya eshi l'ọnwu teta nọdu ndzụ, 47sụ l'ee-gude ẹwha iya ryaa ya arya lẹ Chileke l'a-gụru madzụ nvụ l'iwhe-dụ-ẹji onye ọbu metagbaberu mẹe onye ọbu -dakwa onwiya ụta, haa ome iwhe-dụ-ẹji ọbu. Ee-shi iya aryarya lẹ Jerúsalẹmu gudezhia ya who mkpụrudumulanu ryagba iya mgboko-o mgburumgburu. 48Ọo unubẹdua l'e-kfuru ndu ọdo iwhe lile-e, unu gude ẹnya unu whụkota. 49Unu lekwawho lẹ mu l'e-zhilataru unu iwhe ono, Nna mu kweru unu ụkwa iya. Ọle t'unu nọpyabelekwawho l'obodo-o jeye nteke Chileke l'a-tsụ unu ike iya ono, shi l'imigwe atsụtsu l'ẹhu, ya erikputa unu ẹhu.”
Jisọsu l'alawhu azụ l'imigwe
(Mak. 16:20; Ndu. 1:9-11)
50Ọo ya bụ, Jisọsu bya eduta whẹ dubekwaro Bétani. Ọ bya achilia ẹka iya eli gọlahaaru whẹ ọnu-ọma. 51L'ọogoru whẹ ọnu-ọma ono jeye ọ haa whẹ. Chileke wolia ya woba l'imigwe. 52Whẹ baarụ iya ẹja tụgburu lawhushia lẹ Jerúsalẹmu azụ. Ẹhu l'atsọ whẹ ụtso shii. 53Whẹ rwua bya anọlahaa l'eze-ụlo Chileke mgburumgburu ekele Chileke ekele.
Voafantina amin'izao fotoana izao:
Luku 24: Ezaa
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2014, Wycliffe Bible Translators, Inc. in cooperation with Abakaliki Literacy and Translation Trust