San Lucas 22
22
Kjuathexin na̱ ixin kexreen rutse na̱ Jesús
(Mt. 26:1-5, 14-16; Mr. 14:1-2, 10-11; Jn. 11:45-53)
1Ko uchiaon ujuii thi kiai jine na̱ niuthja chundaꞌa thi nchegeꞌen nchoꞌo, ko mee thi diꞌin kiai pascua. 2Ngain nchaꞌon mee, kain xi daana baketuꞌan ngain icha xi daana ko kain xi tjaago ley kjuee na̱ kexreen naruguenxon xa Jesús, aro baxraguen xa ni rajna.
3Kuthimejan nchiijin bixiꞌin ngain anseen Judas Iscariote, naa thi theyoo chujni bakao Jesús. 4Ko Judas jiꞌi kjui bitsjeꞌe xi daana baketuꞌan ngain icha xi daana ko xi jinda ngain niꞌngo, ko binthekjuathexin ixin jeꞌe tsjaago thinoo rutsexin xa Jesús. 5Kain xa anto binthechee xa ko kjuathexin choo xa ixin sajon xa tumi ngain Judas. 6Ko Judas ndachro ixin nchao jii, ko ukuexiꞌin xraxaon kexreen sinchechieꞌen Jesús ngaa raa xa ko xruꞌin ni rajna rugikon.
Jesús binekaꞌo thi theyoo chujni bakao
(Mt. 26:17-29; Mr. 14:12-25; Jn. 13:21-30; 1 Co. 11:23-26)
7Ko juii kiai diꞌin pascua are baguen na̱ kuleko ixin banchendusen na̱ ngain Ndo Dio, 8ngain nchaꞌon mee Jesús ruaꞌan Pedro ko Juan ko ndachro ngain na̱:
—Thji ra dinchechjian ra thi sunthe na̱ ngain kiai jiꞌi.
9Jeꞌe na̱ ndachro na̱ ngain Jesús:
—¿Thinoo rinao sinthachjianxin na̱?
10Jesús ndachro ngain na̱:
—Are jaꞌa ra sigaꞌa ra ngain rajna, setan ra naa xii jidikao naa nchiixra jinda. Rueꞌe ra xa ngain nchia jeꞌe xa sixiꞌin xa, 11ko ndache ra thi nchianduꞌa: “Xi tjaago ndachro xa: ¿Thinoo jii nchia sinekianxin kiai pascua thi theyoo chujnina?” 12Kuthimejan jeꞌe tsjaguꞌa ra naa nchia jié jii nui. Nthi̱ꞌa̱ nchechjianxin ra thi sunthe ná.
13Kayui chujni mee sabinthekji na̱ ko bithja na̱ kain inchin ndachro Jesús. Ko nthi̱ꞌa̱ binchechjianxin na̱ thi binekaꞌo na̱ Jesús ngain kiai mee.
14Ko are ubithja hora, Jesús ko thi theyoo chujni bakao binthendajin na̱ nthanchaon. 15Kuthimejan Jesús ndachro ngain na̱:
—¡Anto binaꞌo ixin jaꞌin rujine ngajin ra ngain kiai jiꞌi ixin tangi sathua ko seꞌen na! 16Ko jaꞌan rindathjo ra irukjanꞌa na sine ngajin ra kiai jiꞌi, ko rukjan sunthe ná nthi̱ꞌa̱ ngajni, thi thetuꞌan Ndo Dio.
17Ko Jesús tse thi dixin ni vino ko kuexruxiꞌin Ndo Dio, ko ndachro:
—Tse ra ko dikoꞌo choo ra, 18ixin jaꞌan irukjanꞌa na siꞌi vino, tsija thi thetuꞌan Ndo Dio.
19Kuthimejan kuaa niuthja, kunchjenga nio ko kuexruxiꞌin Ndo Dio, ko bajon nio ngain na̱ ko ndachro:
—Jiꞌi ruchro nthauꞌna thi ruxrajon ixin jaꞌa ra. Ko are jaꞌan isariꞌa ngajin ra jaꞌin ncheꞌe ra ixin ruxraxaunxin ni ra.
20Ko are ujuexin bine na̱, Jesús kuaa thi dixin ni vino ko ndachro:
—Vino jiꞌi ruchro thi jnina singo ixin jaꞌa ra ko jiꞌi thi trato narua nthaꞌa ixin jaꞌa ra.
21’Aro thi sajon na ngain thi chujni rutse na̱ jaꞌan, jeꞌe rinekiꞌan nthiꞌi ngain nthanetaxin ni. 22Ixin jaꞌan, thi Xii juixin ngajni, rugunda seꞌen na inchin jitaxin ngain Xruen Ndo Dio, aro ¡anto tangi tsuꞌen thi rundache chujni ixin rutse na!
23Kuthimejan thi theyoo chujni bakao Jesús kuexiꞌin na̱ banchiangiꞌi choo na̱ ixin kensen runcheꞌe jiꞌi.
Tetjao na̱ ixin kensen thi icha renthe
24Kuthimejan thi theyoo chujni bakao Jesús suji kjuao na̱ ixin kensen icha tsurenthe ngayee na̱. 25Aro Jesús ndachro ngain na̱:
—Ngain nunthe jiꞌi, kain rey thetuꞌan inchin jeꞌe rinao ko ndachro xa ixin anto jian ncheꞌe xa. 26Aro jaꞌa ra rugundaꞌa sincheꞌe ra jañaa, ixin thi sigeꞌe icha renthe ngayaꞌa ra, mee thi icha rentheꞌa seꞌe ngajin ra. Ko thi tsetuꞌan ngayaꞌa ra, yaa thi icha tsjengijna ra. 27Ndachjejin ni ra, ¿kensen icha renthe, a thi deꞌe jine ngain nthanetaxin ni o thi ncheꞌe xra ixin dikaan thi jine thi jii ngain nthanetaxin ni? ¿A jeꞌa thi jii ngain nthanetaxin ni, mee thi icha renthe? Aro jaꞌan nthiꞌi riꞌi ngayaꞌa ra inchin naa thi ncheꞌe xra.
28’Aro jaꞌa ra binthe ra ngajin kainxin nchaꞌon are tangi bathua. 29Mexinxin jaꞌan richjaꞌa ra juachaxin tsetuꞌan ra, inchin juachaxin chjana Ndudana, 30ixin sinthe ra ko siꞌi ra ngain nthanetaxin ni, are jaꞌan tsetuꞌan, ko sinthe ra ngain ntha xintaon ixin sincheꞌe ra jie̱ ngain chujnii thi theyoo xeꞌen Israel.
Pedro rundachro ixin chunxinꞌa Jesús
(Mt. 26:31-35; Mr. 14:27-31; Jn. 13:36-38)
31Ko kai ndachro Jesús:
—Simón, Simón; Satanás banchia juachaxin ixin tangi tsuꞌan ra, ko tsuntsjenga ra inchin katrigo. 32Aro jaꞌan ubinthatsaan ñao Ndo Dio ixin jaꞌa, ixin rutjañaꞌa ixin jaꞌa chunthia. Ko are jaꞌa rukjan ngajin na inaa, thjengijna icha chujni dithikaon ixin sithikaon na̱ kainxin nchaꞌon.
33Simón Pedro ndachro ngain Jesús:
—Nchana, jaꞌan rinaꞌo tsji ngajin, maski siaxinna inchin suixin, ko thi senxin suixin kai jaꞌan nthi̱ꞌa̱ senxin na.
34Jesús ndachro ngain Pedro:
—Pedro, jaꞌan rindathjo ixin xrarutsjeꞌa kunthaxichia ko jaꞌa unii nthiꞌa rundachro ixin chunxinꞌa na.
Ujuii nchaꞌon are Jesús tangi tsuꞌen
35Kuthimejan Jesús banchiangi ngain chujni bakao ko ndachro:
—Are jaꞌan kuetuꞌan ra ixin bindache ra chujni thi jian juajnee Ndo Dio, ko ndathjo ra ixin rukjuioꞌa ra thi tamexin ni ko tumi ko kathe, ¿ako chrujan binthechundaꞌa ra?
Jeꞌe na̱ ndachro na̱:
—Kain binthechunda ná.
36Kuthimejan ndachro Jesús ngain na̱:
—Ko jai ijeꞌa jamee, jai thjiꞌo ra thi tamexin ni ko tumi, ko xro techundaꞌa ra chia taade, nchekji ra lunthua ra ixin thenanxin ra chia. 37Ko jaꞌan rindathjo ra ixin rugunda tsuꞌen ngajin inchin jitaxin ngain Xruen Ndo Dio, thi ndachro: “Ko jeꞌe beꞌen inchin chujni ncheꞌe jianꞌa.” Ixin kain thi jitaxin ixin jaꞌan rugunda tsuꞌen.
38Kuthimejan jeꞌe na̱ binthendachro na̱:
—Nthiꞌi jii yoo chia taade.
Ko Jesús ndachro:
—Jaꞌa ra thinxinꞌa ra.
Jesús nichjee Ndo Dio ngain Getsemaní
(Mt. 26:36-46; Mr. 14:32-42)
39Kuthimejan bachrje Jesús inchin bancheꞌe kain nchaꞌon ko sakjui ngain jna diꞌin Ntha Olivo, ko chujni bakao ruee na̱ jeꞌe. 40Ko are ubiji na̱ nthi̱ꞌa̱, Jesús ndachro ngain na̱:
—Nichjeꞌe ra Ndo Dio ixin tsjengijna ra ndo ko sitaꞌa ra sincheꞌe ra thi jianꞌa.
41Kuthimejan Jesús kunkjínxin ni baruee, inchin kjínxin tjaxin ni naa xro, ko nthi̱ꞌa̱ bethuxin ko nichjee Ndo Dio. 42Ko ndachro:
—Suixin Ndudana, ja̱ rinao, tanchrjandaꞌa na sathua thi anto tangi tsunna, aro tsuenꞌa inchin jaꞌan rinaꞌo, nchutsuꞌen inchin Suixin rinao.
43Kuthimejan kununxin naa angeel Ndo Dio ngain Jesús ixin binchesuji anseen jeꞌe. 44Ko jeꞌe icha kuaa juachjaon anseen, ko icha nichjee Ndo Dio, ko ndachjiin Jesús kjan inchin jni ko binthji ngain nunthe.
45Ko are juexin nichjee Ndo Dio bingathjen ko kjui ngain chujni bakao, ko jeꞌe na̱ utatejua na̱ ixin ikuxinꞌa na̱ ixin juachjaon. 46Kuthimejan jeꞌe ndachro ngain na̱:
—¿Unda tatechrin ra? Dingathjen ra, ko nichjeꞌe ra Ndo Dio ixin tsjengijna ra ko xruꞌin thi jianꞌa sitaꞌa ra.
Tse na̱ Jesús
(Mt. 26:47-56; Mr. 14:43-50; Jn. 18:2-11)
47Jesús xra jinichja jañaa are ujuii anto tsjé chujni. Ko thi biꞌin Judas, naa thi theyoo chujni bakao Jesús, jeꞌe mee thi jitaon nthiꞌá, ko kunchieꞌen ngain Jesús ixin kuetuxin. 48Kuthimejan Jesús ndachro ngain Judas:
—Judas, ¿akuetuxin na ixin kjuaago ixin jaꞌan thi Xii juixin ngajni?
49Ko ni bakao Jesús, are bikon na̱ jiꞌi, ndachro na̱ ngain jeꞌe:
—¿Atsjaaya ná kunixin chia taade?
50Ko naa ni bakao Jesús bincheniꞌi naa xi ncheꞌe xree xi daana icha renthe, ixin kunchrijiꞌin ndatsjon rajianxin xa. 51Aro Jesús ndachro ngain ni bakao:
—Tanchrjanda ra xa, ithetuꞌa ra.
Kuthimejan Jesús kathe ndatsjuen xii mee ko binchetsexin ndatsjon ko kuxrueꞌen ndatsjon. 52Kuthimejan nichja Jesús ngain xi daana baketuꞌan ngain icha xi daana, ko xi bagenda ngain niꞌngo ko xi thetuꞌan ngain rajna ixin juii xa biruee xa, ko jeꞌe ndachro:
—¿Ajuiꞌi ra biruena ni ra kunixin chia taade ko nthaa xraa ja̱ rukji naa thi cheꞌe? 53Kain nchaꞌon bariꞌi ngajin ra ngain niꞌngo, ko xruꞌin nchaꞌon tse ni ra. Aro jai utsuꞌen jiꞌi ixin unaxin xeꞌe ko nchiijin thi thetuꞌan jaxon.
Pedro ndachro ixin chunxinꞌa Jesús
(Mt. 26:57-58, 69-75; Mr. 14:53-54, 66-72; Jn. 18:12-18, 25-27)
54Ko tse na̱ Jesús ko sabikao na̱ ngain nchianduꞌa xi daana icha renthe. Ko Pedro kjín jiruexin. 55Nthi̱ꞌa̱ ngain patiue nchia mee kjuaaga na̱ naa xruꞌi ko bixindajin na̱ ixin xixruꞌe na̱. Ko kai Pedro tabeꞌe ngayee na̱. 56Kuthimejan naa nchri nchexree xi daana mee, are bikon nchra ixin Pedro tajixixruꞌe ngandeꞌe xruꞌi, tabetsjeꞌe nchra jian ko ndachro nchra:
—Kai xii jiꞌi beꞌe xa ngain Jesús.
57Aro Pedro ndachroꞌa ixin jaan, ko ndachro:
—Jaꞌan chunxinꞌa xii mee.
58Kuthimejan inaa chujni bikon Pedro, ko ndachro:
—Kai jaꞌa naa chujni bakao Jesús.
Aro Pedro ndachro:
—Naꞌi, jaꞌan jeꞌa chujnii jeꞌe.
59Batho inchin naa hora, kuthimejan inaa chujni kjan ndachro:
—Jaan ndua, xii jiꞌi bakao xa Jesús, ixin jeꞌe xa kai Galilea rajnee xa.
60Ko Pedro ndachro:
—Jaꞌan nunaꞌa keꞌe rinichja jaꞌa.
Ko are xra jinichja Pedro, tuinxion tsje kunthaxichia. 61Ko Jesús ngaria tsjeꞌe Pedro, ko Pedro xraxaon ixin Jesús undachro: “Jai jaꞌa rundachro nii nthiꞌa ixin chunxinꞌa na ko tuinxion rutsje kunthaxichia.” 62Kuthimejan Pedro bachrjexin nthi̱ꞌa̱ ko anto bincheniꞌi thi bincheꞌe ko tsjanga.
Xi soldado tjanua xa Jesús
(Mt. 26:67-68; Mr. 14:65)
63Xi soldado tenda Jesús kjuanua xa ko xrangii xa nthaa. 64Kai kuejeꞌe xa jmakon Jesús ko xrangii xa thon ngakon ko ndachro xa:
—¡Datsueꞌen kensen bintja!
65Ko jeꞌe xa anto chrjuinꞌa ndache xa Jesús.
Jesús gueꞌen jie̱
(Mt. 26:59-66; Mr. 14:55-64; Jn. 18:19-24)
66Ko are ubingasaan xrathe kain ni joon thetuꞌan ngain rajna, kain xi daana thetuꞌan ngain icha xi daana ko kain xi tjaago ley. Ko nthi̱ꞌa̱ banchiangixin xa Jesús, ko ndachro xa:
67—Nthiꞌi ndachjejin ni ra, ¿ajaꞌa thi Cristo?
Ko jeꞌe ndachro ngain xa:
—Ja̱ rundathjo ra ixin jaan, sithikaonꞌa ni ra. 68Ko ja̱ sanchiangiꞌa ra chrujan, jaꞌa ra satheꞌa ra ko tsanchrjandaꞌa ni ra satsji. 69Aro jai jaꞌan, thi Xii juixin ngajni, usariꞌi ngain rajianxiin Ndo Dio, ndo chunda kainxin juachaxin.
70Kuthimejan kainxin xa banchiangiꞌi xa Jesús ko ndachro xa:
—Mexinxin, ¿ajaꞌa thi Xeꞌen Ndo Dio?
Jesús ndachro:
—Jaan, jaꞌan, inchin jaꞌa ra ndachro ra.
71Kuthimejan binthendachro xa:
—¿Unda tsjee ná icha chujni runichja ixin thi ncheꞌe Jesús, ja̱ jaꞌan ná ukuiꞌin ná thi jianꞌa ndachro xii jiꞌi?
Voafantina amin'izao fotoana izao:
San Lucas 22: plsNT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2017, Wycliffe Bible Translators, Inc. All rights reserved.