San Lucas 24
24
Xechon Jesús
(Mt. 28:1-10; Mr. 16:1-8; Jn. 20:1-10)
1Domingo, thi nchaꞌon thexinxin semana, nduuyo kain nchrii kjan nchra ngain chinthiꞌi Jesús, ko bikao nchra ndaxrajni binchechjian nchra, ko kjui icha nchrii kai. 2Ko are binthegiji nchra nthi̱ꞌa̱ bikon nchra ixin dikingi xro jiree chinthiꞌi Jesús. 3Ko jeꞌe nchra binthegixiꞌin nchra chinthi mee, aro ibithjaꞌa nchra Jesús. 4Ko anto binthexraon nchra ko ibenueꞌa nchra keꞌe runcheꞌe nchra, are bikon nchra yoo xii tatengathjen ngaka nchra ko lunthue xa tedakima luntho. 5Ko jeꞌe nchra anto binthexraon nchra ko bisetaꞌa nchra nunthe, ko kayui thi xii binthendachro:
—¿Unda jaꞌa ra tethjee ra ngakjan ni ndadigeꞌen thi jichon jai? 6Jesús ikoꞌa nthiꞌi ixin jeꞌe xechon. Xraxaon ra kexreen ndathjo ra are jeꞌe xra beꞌe ngain nunthe Galilea. 7Are ndachro: Jaꞌan thi Xii juixin ngajni, rugunda sajon na na̱ ngaa raa chujni ncheꞌe jianꞌa, ko jeꞌe na̱ tsenganito na̱ ngain ntha cruz, aro ngain nchaꞌon ninxin ruxechon na.
8Kuthimejan xraxaon kain nchrii mee thi ndachro Jesús. 9Ko are kjanxin nchra ngain chinthi, kuekin nchra kain jiꞌi ngain thi thejngo chujni bakao Jesús, ko ngain icha chujni kai. 10Ko María Magdalena, Juana ko inaa María janee Jacobo ko ikanxin nchrii, ni teꞌi thi bikao juajna jiꞌi ngain thi thejngo chujni bakao Jesús. 11Aro chujni bakao Jesús bithikaonꞌa na̱ thi ndachro kain nchrii teꞌi.
12Aro Pedro bingathjen ko kuinga bitsjeꞌe chinthi. Ko are jeꞌe tsjeꞌe ngaxiꞌin chinthi, jeꞌo bikon thi manta besia Jesús. Kuthimejan sakjan ngain nchia ko anto xraxaon ixin thi kuꞌen jiꞌi.
Thi kuꞌen ngatja nthiꞌá Emaús
(Mr. 16:12-13)
13Ngain xrajeꞌo nchaꞌon mee, yoo chujni bagithikaon Jesús satethji na̱ ngain rajna diꞌin Emaús, ko inchin thejngo kilómetro kjínxin jikauxin rajna Jerusalén. 14Ko thinga tetjao na̱ ixin kain thi kuꞌen Jesús. 15Ko are jeꞌe na̱ tetjao na̱ mee, Jesús kunchieꞌen ko kuexiꞌin kjuao na̱ ko sabikao na̱. 16Aro jeꞌe na̱ maski bikon na̱, chroꞌa batsuan na̱ Jesús ixin xraa keꞌe jitauꞌen kon na̱. 17Kuthimejan Jesús banchiangi ngain na̱ ko ndachro:
—¿Keꞌe tethekin ra ngatja nthiꞌá?, ko, ¿unda techiꞌin ra?
18Ko thi diꞌin Cleofas ndachro:
—Nguixin nunthe nuꞌe thi kuꞌen nthi̱ꞌa̱ Jerusalén ngain nchaꞌon teꞌa. ¿Jeꞌo jaꞌa thi nuaꞌa keꞌe kuꞌen maski nthi̱ꞌa̱ riꞌi?
19Kuthimejan Jesús banchiangi:
—¿Keꞌe kuꞌen?
Ko jeꞌe na̱ ndachro na̱:
—Thi kuꞌen Jesús, thi juixin Nazaret, thi kjui naa thi bagayee juajnee Ndo Dio. Ko jeꞌe bechunda anto tsjé juachaxin ngathexin kon Ndo Dio ko ngathexin kon chujni ixin thi bancheꞌe ko thi banichja. 20Aro kain xi daana thetuꞌen icha xi daana ko kain xi thetuꞌan rajna binchechieꞌen xa Jesús ngain ni romano ixin naguenxon na̱ nganito ntha cruz. 21Jaꞌan ná chuan ná ixin jeꞌe thi rukjengijna chujni te ngain nunthe Israel. Ko jai uchunda nii nchaꞌon ndabeꞌen. 22Ko kanxion nchrii chrji ngajin ná, dinthekji nchra nduuyo ngain chinthiꞌi Jesús ko jaꞌan ná anto xraon na̱ 23ixin thi ndachjejin ná nchra, ixin binthegitjaꞌa nchra Jesús ngain chinthi ko ixin kai binthegikon nchra yoo angeel Ndo Dio ko ángel teꞌi binthendachro ixin Jesús jichon. 24Kuthimejan kanxion xi bakjiꞌan ná kjui xa ngain chinthi, ko ndua bikon xa inchin ndachro ni nchrii, aro binthegikonꞌa xa Jesús.
25Ko Jesús ndachro ngain kayui xii mee:
—¡Thinxinꞌa ra, ko anto tetunchrjaꞌan ra ixin sithikaon ra kain thi bindachro ni bagayee juajnee Ndo Dio! 26¿Anuaꞌa ra ixin Cristo rukuꞌen kain thi tangi jiꞌi, kuthimejan sarukji ngajni, nthi̱ꞌa̱ thi tsetuꞌan?
27Ko jeꞌe kuexiꞌin ndache na̱ keꞌe ruchro kain thi jitaxin Xruen Ndo Dio thi jinichja ixin Jesús; kuexinxin ngain Xruen Moisés, kuthimejan ngain Xroon dikji̱n kain ni bagayee juajnee Ndo Dio.
28Are biji na̱ ngain rajna satethji na̱, Jesús xraa bincheꞌe ixin sarukji icha kjín. 29Aro jeꞌe na̱ anto binchetseꞌen na̱ ñao ixin sithuꞌe ngain na̱, ko ndachro na̱:
—Dithuꞌa nthiꞌi ngajin ná ixin undajitunaxin xeꞌe.
Ko Jesús bixiꞌin nchia ko bithuꞌe ngain na̱. 30Ko are jeꞌe utabeꞌe ngain na̱ ngain nthanetaxin ni, kuaa niuthja ko binchenchaon nio. Kuthimejan kunchjenga nio ko bajon nio ngain na̱. 31Kuthimejan Ndo Dio chjee na̱ juachaxin ixin batsuan na̱ Jesús aro jeꞌe ndabitjaan ngathexin kon na̱. 32Ko ndache choo na̱:
—Anto chrjuin kunuꞌe ansean ná are jeꞌe jinichjaa ná ngatja nthiꞌá ko jindathjo ná thi jitaxin Xruen Ndo Dio.
33Ko bingathjenbeꞌo na̱ ko sakjan na̱ Jerusalén. Nthi̱ꞌa̱ bithjaxin na̱ thi thejngo chujni bagakao Jesús kunixin icha ni bagakao na̱. 34Ko ndachro na̱:
—Jaan, ndua xechon Jesús, ixin kununxin ngain Pedro.
35Kuthimejan yui thi xii ndachro xa thi kuꞌen ngatja nthiꞌa, ko kexreen batsuan xa Jesús are jeꞌe kunchjenga niuthja.
Jesús kununxin ngain chujni bakao
(Mt. 28:16-20; Mr. 16:14-18; Jn. 20:19-23)
36Xra tetjao na̱ ixin jiꞌi, are ukununxin Jesús ngayee na̱ ko bajon juajna ngain na̱ ko ndachro:
—Dio tekoꞌo ra.
37Jeꞌe na̱ anto binthexraon na̱ ixin xraxaon na̱ ixin bikon na̱ nthancheen naa ni ndadigeꞌen. 38Ko Jesús ndachro ngain na̱:
—¿Unda anto texraon ra? ¿Unda xra dithikaonꞌa ni ra? 39Tsjexin ra ngain rana ko ngain ruthena thi bincheniꞌi na̱. Kathe ni ra ja̱ rinao ra, ko sikon ra ixin jaꞌan Jesús na, ixin nthanchaꞌan chundaꞌa nthao ko nthaluro inchin thi jaꞌan richunda jaxon.
40Are jeꞌe ndachro jiꞌi, jeꞌe kjuaago raa ko ruthee thi bidoꞌo chia nthi̱ꞌa̱ nganito ntha cruz. 41Aro jeꞌe na̱ nchin xraon na̱ ko nchin chee na̱ xraa chroꞌa bithikaon na̱ thi jidikon na̱, ko Jesús ndachro ngain na̱:
—¿A jii thi sinexin ni?
42Kuthimejan chjee na̱ Jesús rioꞌo kuchee dichjan ko rioꞌo tsjeen kurmeena. 43Ko Jesús juine ngathexin kon na̱. 44Kuthimejan ndachro:
—Jiꞌi ndathjo ra are jaꞌan xra bariꞌi ngajin ra, ixin rugunda rukuꞌen thi bikunna inchin jitaxin ngain ley bayée Moisés ko ngain Xroon dikji̱n ni bagayée juajnee Ndo Dio ko ngain salmo.
45Kuthimejan jeꞌe bajon juachaxin kuinxin na̱ thi jitaxin ngain Xruen Ndo Dio, 46ko ndachro ngain na̱:
—Jaꞌin jitaxin ngain Xruen Ndo Dio ixin Cristo rugunda ndaseꞌen, ko nchaꞌon ninxin jeꞌe ruxechon. 47Ko kai kunixin juachaxiin Jesucristo tsjiꞌo ra juajna, ko tsexinxin ra Jerusalén kuthimejan nguixin nunthe. Ko rundache ra chujni ixin rukjan na̱ ngain Ndo Dio ko jeꞌe sinchetjañeꞌe na̱ kain thi jianꞌa ncheꞌe na̱. 48Ko jaꞌa ra bikon ra kain thi kunna. 49Ko jaꞌan ruruaꞌan ngajin ra thi ndachro Ndudana. Ko tadinthe ra nthiꞌi Jerusalén ixin sayéꞌe ra thi juachaxin tsixin ngajni.
Jesús sakjui ngajni
(Mr. 16:19-20)
50Kuthimejan Jesús bachrjekaꞌo na̱ ko sakjui na̱ ngain rajna Betania, ko nthi̱ꞌa̱ jeꞌe tsiin raa ko binchenchaon na̱. 51Ko are xrajinchenchaon na̱, ngayee na̱ sakuajinxin ko sakjui ngajni. 52Ko jeꞌe na̱ binchesayeꞌe na̱ Jesús, kuthimejan sakjan na̱ Jerusalén, ko anto chee na̱. 53Ko kainxin nchaꞌon jeꞌe na̱ binthe na̱ ngain niꞌngo icha jié ixin banchesayeꞌe na̱ Ndo Dio. Jañaa tsuꞌen.
Voafantina amin'izao fotoana izao:
San Lucas 24: plsNT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2017, Wycliffe Bible Translators, Inc. All rights reserved.