Yòhánà 13
13
Yèésù wɛ ɛsɛ̀ fú ɔmatsɛ́‐ɛ̀ ŋa, tsí ń ɖíre kíbí à nákó wà tse fú ara-ŋa gbà#á
1Ó bɔ ilɛ̀ kó má, tsí ká dzɛ ɔɖɔ̃́-Àɖádzɔ̀ɔ́†. Tsí Yèésù ti mà ní ìwèrè tó fú òŋu ní òŋu kó ǹɖe ńǹtalɛ̀ yèé, tsí lɔ ńɖi-Ɔ̀ɖáyé Boba. Ó nɛ́ àmúɖɔ̃̀ fú atɛ̀náànyì‐ɛ̀ ŋa ńǹtalɛ̀ bí, tsí ó nɛ́ àmúɖɔ̃̀ fú ŋa gbo títí lɔ ńǹtã̀ntã́.
2Báàyí#ɛ́, Yèésù òŋu ɔmatsɛ́‐ɛ̀ ŋa wà dzɛ dzídzɛ-alɛ́. Tsí Yúɖà, ɔma-Sìmɔ́nì Sìkàrìyɔ́tì, òŋu gbo wà náàŋírĩ-ŋa. Tsí Ètsù† ti mú ìsérè-íbàɖí si néwo fúu ní kó ta Yèésù. 3Yèésù òŋu ká‐ɛ̀ mà ní Boba-òŋu mú iŋɛ́ ɔ̀kã̀lɔ́ɔ̀kã̀ kpó bɔwɔ́-òŋu. Ó mà gbo ní ńɖi-Ɔ̀ɖáyé ní òŋu ti#ɛ́, tsí ńɖɔ̀‐ɛ̀ ké ní òŋu nákó sɛ̃̀ lɔ#ɛ́. 4Tsí ó ǹɖe nára-kpɔ̃rɔ̃#ɛ́, tsí bɔ́ ìwɔ̀ra-ìgbèrí‐ɛ̀ si nákpálà-kã̀, tsí kɛ́ atsɔ-kã̀, tsí ń ró néèrèɖé. 5Tsí ó tsomi si náàwò-kã̀, tsí kpé ɛsɛ̀-ɔmatsɛ́‐ɛ̀ ŋa wíwɛ̀ ɔ̀kã̀kã̀, tsí mú atsɔ#ɛ́, tsí wà ń nɔ̀ɔ́ fú ŋa.
6Ńbɛ̀ɛ́, ó tó ńǹtá-Sìmɔ́nì Òkúta. Tsí òŋu wà wí fú Yèésù ní: Ɔlá-wa, kí yàá, o wɛ ɛsɛ̀ fú miì? Láyé!
7Tsí Yèésù wà wí fúu ní: Iŋɛ́ yèé òŋu wà tse#ɛ́, kàkó nyáa gbɔ́ òkpì‐ɛ̀ báàyí wòná. Ó ɖi, nákó wáa gbɔ́ òkpì‐ɛ̀ náànyìwà.
8Tsí Òkúta ní: Láyé, láyé, kàkó wɛ ɛsɛ̀ fú òŋu.
Tsí Yèésù ní: Bí òŋu kò wɛ̀ɛ́ fúu#ɛ́, ìɖì kò wà fúu ńɖɔ̀-òŋu.
9Tsí Sìmɔ́nì Òkúta ní: Ɔlá-wa, bí ó dzɛ́ bɛ́ɛ̀ ná, ni kó tédzú wɛ éwo òŋu akpá ŋa kpó fú òŋu. Kó máa wɛ ɛsɛ̀ sɔ̃́ŋú gé fú òŋu.
10Tsí Yèésù wí fúu ní: Ɛnɛ yèé wɛ̀ dzálɛ̀ kpó#ɛ́, òŋu ti má si, tsí kò bèrè ní kó wɛ̀ ró. Ó bɔ kó tsã ɛsɛ̀ gé ni. Ó ɖi, àŋa òŋu, à má si. Tsí kò sì tsi àŋa kpó ní má#á. 11(Ìɖéǹɖè#ɛ́, Yèésù ti ma ɛnɛ yèé bòkó tàá#á. Ńnɛ̀ ní ó wà fɔ̀ ní: Kò tsi àŋa kpó ní má#á.)
12Kíbí ó wɛ ɛsɛ̀ fú ŋa tã́ kpó#ɛ́, ó sɛ̃̀ kɛ́ ìwɔ̀ra‐ɛ̀ wɔ̀, tsí káà dzokó nára-kpɔ̃rɔ̃#ɛ́ ró, tsí wà bèrè ŋá ní: À gbɔ́ òkpì-iŋɛ́ yèé òŋu tse fú ŋa ńǹsɛ̃̀ɛ̃́#ɛ́ɛ̀? 13Ó ɖi, bí à bòkó wíìnyɛ̀ fú òŋu#ɛ́, à náa kpe òŋu ní Akɔ́nɛ nàmí Ɔlá-wa. Bí à wà kpe òŋu bɛ́ɛ̀#ɛ́, à fɔ̀ɔ́ rere. Akɔ́nɛ òŋu Ɔlá-ŋa ní òŋu dzɛ́#ɛ́. 14Kíbí òŋu yèé dzɛ́ Ɔlá-ŋa, tsí dzɛ́ akɔ́nɛ gbo fú ŋa#á, òŋu wà wɛ ɛsɛ̀ fú ŋa#á, ó wà ní náàŋírĩ-ara-ŋa, ká wà wɛ ɛsɛ̀ fú ara-ŋà ŋa. 15Òŋu tse ìsàwé-kã̀ fú ŋa, tsí ká rí, tsí àŋa gbo ká wà tse fú ara-ŋà ŋa kíbí òŋu tse fú ŋa gbà#á ni. 16Ó ɖi, òŋu wà wí fú ŋa ní fee, arú-kã̀ kpókpó kà láre olówó‐ɛ̀, tsí adzítsɛ́-kã̀ gbo kà tsonùgbó-ɛnɛ yèé bɛ̀ɛ́#ɛ́ láyé. 17Báàyí#ɛ́, à ma iŋɛ́ yèé òŋu tse#ɛ́. Ó ɖi, bí à múu tsitsɛ́ tse, à wɛ éwo-ire.
18Kò tsi ti nára-àŋa kpó ní òŋu wà wíìnyɛ̀#ɛ́. Ɛnɛ yèé òŋu tsã̀ ŋa#á, òŋu ma iŋɛ́ yèé ɛnɛ kṹnukṹ dzɛ́#ɛ́. Ó ɖi, Ìwé-Ɔ̀ɖáyé† ní: “Ɛnɛ yèé wà mɔ́wɔ́ bɔ̀ náàwò ɔ̀kã̀ntso bá mi#ɛ́, ɖi ɔ̀tɛ̀-mi.”#13:18 Ìwé-Orĩ ŋa 41:10 (Psaumes 41:10) Ńbɛ̀ɛ́, ó kpã́dzú ní afɔ̀ nyɛ̀ŋɛ̀ kó tsɛ ìɖéǹɖè. 19Báàyí#ɛ́, òŋu wà wíi fú ŋa tsúwádzú tã́ná kó wáa tsɛ bɛ́ɛ̀. Àtsùgbée ńǹwèrè yèé nákó tsɛ bɛ́ɛ̀#ɛ́, ni ká karalé ní òŋu dzɛ́ ɛnɛ yèé òŋu wà fɔ̀ ní òŋu dzɛ́#ɛ́. 20Ó ɖi, òŋu wà wí òtítɔ́ fú ŋa ní fee, bí ɔ̀nyà-kã̀ gba ɛnɛ yèé òŋu bɛ̀#ɛ́, ɛnɛ nyɛ̀ŋɛ̀ gba òŋu ká-òŋu gbo ńnɛ̀ɛ́. Tsí bí ɔ̀nyà-kã̀ gba òŋu#ɛ́, ó gba ɛnɛ yèé bɛ òŋu wá#á gbo.
Yèésù ɖíre ɛnɛ yèé bòkó tàá#á
(Màtéwò 26:20-25; Mákò 14:17-21; Lúkà 22:21-23)
21Kíbí Yèésù wí bɛ́ɛ̀ tã́#á, inɔ́ wóo tsùtsùtsù, tsí ó yaá fú ŋa gãgã ní: Òŋu wà wí òtítɔ́ fú ŋa ní fee, ɛnɛ yèé bàkó ta òŋu#ɛ́, ó wà náàŋírĩ-ŋa bí.
22Kíbí ó wí bɛ́ɛ̀#ɛ́, ɔmatsɛ́‐ɛ̀ ŋa wà wo ara-ŋa kokoko. À kò ma ɛnɛ yèé ó wà bá fɔ̀#ɛ́. 23Ɔmatsɛ́‐ɛ̀-kã̀, àrínódzú‐ɛ̀ gìɖì gìɖì, dzokó gbèé si, 24tsí Sìmɔ́nì Òkúta tsɛ́dzú fúu ní kó bere Yèésù ní: Nɛ̀ɛ́ dzɛ́ ɛnɛ yèé ó wà bá fɔ̀#ɛ́ ná?
25Ńbɛ̀ɛ́, ɔmatsɛ́#ɛ́ mú arũ sɔ́má-Yèésù, tsí wà bèrèé ní: Ɔlá-wa, nɛ̀ɛ́ dzɛ́ ɛnɛ nyɛ̀ŋɛ̀ ná?
26Tsí Yèésù wí fúu ní: Òŋu nákó bu kpɔ̃́nɔ́, tsí ń kpã́ ɔbɛ̀. Ɛnɛ yèé òŋu nákó mú kpɔ̃́nɔ́#ɛ́ fú#ɛ́, ɛnɛ nyɛ̀ŋɛ̀ ní dzɛ́ ɛnɛ yèé òŋu wà bá fɔ̀#ɛ́.
Ńbɛ̀ɛ́, Yèésù bu kpɔ̃́nɔ́, tsí ń kpã́ ɔbɛ̀, tsí ń fú Yúɖà, ɔma-Sìmɔ́nì Sìkàrìyɔ́tì. 27Kíbí Yúɖà gba kpɔ̃́nɔ́#ɛ́ gé#ɛ́, Ètsù† wɔ̀ ńǹtá‐ɛ̀ gbòkã́. Tsí Yèésù wà wí fúu ní: Iŋɛ́ yèé ó wà wo kó tse#ɛ́, kó tseé gbòkã́.
28Ɛnɛ yèé ŋa wà bɛ̀, tsí wà dzɛŋɛ́ báa nára-kpɔ̃rɔ̃#ɛ́, ɔ̀nyà-kã̀ kpókpó náàŋírĩ-ŋa kò ma kí tse tsí ó wà fɔ̀ fúu bɛ́ɛ̀. 29Kíbí ó dzɛ́ ní Yúɖà ní náa banɛ́ àɖákà-owó#ɛ́, ɔ̀nyà kã̀ŋa ɖédzú Yèésù wí fúu ní kó lɔ káà ra iŋɛ́ yèé ŋa kpã́dzú fú ɔɖɔ̃́#ɛ́ nàmí kó lɔ káà kpɛ̃́ iŋɛ́ kã̀ŋa fú olákèmà ŋa ni. 30Ńbɛ̀ɛ́, Yúɖà gba kpɔ̃́nɔ́#ɛ́, tsí ń dzɛ gé, tsí fùɖá gbòkã́. Ńǹwèrè nyɛ̀ŋɛ̀#ɛ́, òruru ti ru.
Yèésù ní ɔmatsɛ́-òŋu ŋa kàkó nyáa tɛ̀ náànyì-òŋu wòná
31Kíbí Yúɖà fùɖá lɔ#ɛ́, Yèésù wà wí fú ɛnɛ-àtíbɔ̀ ŋa ní: Ɔ̀nyà ŋa bòkó rí lílákṹ-òŋu, Ɛnɛ yèé ɔ̀nyà bí#ɛ́† ńǹkɛ̀ɛ́. Tsí gbà ńǹtá-òŋu, Ɛnɛ yèé ɔ̀nyà bí#ɛ́, à nákó rí lílákṹ-Ɔ̀ɖáyé gbo. 32Bí òŋu, Ɛnɛ yèé ɔ̀nyà bí#ɛ́, òŋu mú lílákṹ-Ɔ̀ɖáyé ɖíre fú ɔ̀nyà ŋa, Ɔ̀ɖáyé òŋu ká‐ɛ̀ gbo nákó mú lílákṹ-òŋu ɖíre fú ɔ̀nyà ŋa. Ńǹsɛ̃̀ɛ̃́ gìɖì gé ní nákó tseé#ɛ́.
33Tsí ó ní: Ɔma-mi ŋa, ó ɖi, òŋu nákó wà náànyì-ŋa si fú àsòkò tsígíɖí-kã̀ gé ni. Náànyì-bɛ́ɛ̀#ɛ́, à nákó wo òŋu. Iŋɛ́ yèé òŋu wí fú onùgbó-ɔma-Ìyúɖà† ŋa wáa lɔ#ɛ́ ní òŋu wà wí fú àŋa gbo báàyí#ɛ́. À kàkó nyáa lɔ ńbí òŋu làkóò#ɛ́. 34Òŋu wà fɔ̀ fú ŋa ní ká tse iŋɛ́ titɔ̃-kã̀. Iŋɛ́#ɛ́ ní dzɛ́ ní náàŋírĩ-ara-ŋa#á, ɛnɛ kṹnukṹ kó nɛ́ àmúɖɔ̃̀ fú enìkéèdzì‐ɛ̀. Kíbí òŋu nɛ́ àmúɖɔ̃̀ fú ŋa gbà#á, ká nɛ́ àmúɖɔ̃̀ fú ara-ŋà ŋa bɛ́ɛ̀. 35Ó ɖi, bí à nɛ́ àmúɖɔ̃̀ fú ara-ŋà ŋa bɛ́ɛ̀#ɛ́, ɔ̀nyà kpó nákó mà ní à dzɛ́ ɔmatsɛ́-òŋu ŋa.
Yèésù fɔ̀ ní Òkúta nákó sɛ̃́ ní òŋu kò ma òŋu
(Màtéwò 26:30-35; Mákò 14:26-31; Lúkà 22:31-34; Yòhánà 13:36-38)
36Ńbɛ̀ɛ́, Sìmɔ́nì Òkúta wà bèrèé ní: Ɔlá-wa, ńbisí ò làkóò?
Tsí Yèésù wà wí fúu ní: Ńbí òŋu làkóò#ɛ́, kàkó nyáa tɛ̀ náànyì-òŋu wòná. Ó ɖi, nákó wáa tɛ̀ náànyì-òŋu náànyìwà.
37Tsí Òkúta sɛ̃̀ wà bèrèé ní: Ɔ̀gá-mi! Ó ɖi, kí tse tsí òŋu kàkó nyáa tɛ̀ náànyì‐ɛ̀ báàyí? Òŋu kpaɖí si ní òŋu kó mú ikú-òŋu tà náàtsùgbé‐ɛ̀ nɔ̀!
38Tsí Yèésù dzɔ́ŋù fúu ní: Ó ní òŋu kpaɖí si ní òŋu kó mú ikú-òŋu tà náàtsùgbé-òŋuù? Òŋu wà wí òtítɔ́ fúu ní fee, nákó sɛ̃́ gbà mɛ́ɛta ní láyé òŋu kò tì mà òŋu tã́ná àkìkɔ kó kɔ.
Voafantina amin'izao fotoana izao:
Yòhánà 13: ngl
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© (Active), Wycliffe Bible Translators, Inc. All rights reserved.