Lúkạ̃ 20
20
Tã ạ̃jú-ꞌbá-ãzí Yésũ kâ ꞌdĩ ꞌbá yî drí tı̣̂ ânyázó Yésũ bê
drı̣́-ãcê gólâkâ rî tãsĩ rî
(Mãtáyõ 21.23-27; Márãkõ 11.27-33)
1Kậyı̣̂ ãzâ sĩ, Yésũ õtírĩ rĩî tã pẽlé jó ạ́ngı̣́ Ôvârí kâ ꞌdĩ ꞌá rî, drı̣̃-ꞌbá ạ́ngı̣́ Yúdạ̃ yí kâ rî ꞌbá yî gõꞌdá lãꞌbí îmbá ꞌbá yí bê, rî ĩyî trá Yésũ rî îjílí tã îjî-îjî sĩ kĩ nĩ rî, 2“Ãꞌdî ꞌbã nî rĩꞌá tã pẽlé jó Ôvârí kâ nõ ꞌá rî nĩ yã? Ãꞌdî fẽ drı̣́-ãcê ní drí tã ꞌdî ꞌbá yî ꞌẽzó rî nĩ yã?” 3Yésũ lôgõ tã-drı̣̃ trá gólĩyî drí nõtí, “Má lẽ trá ãnî îjílí tã îjî-îjî sĩ nõtí, 4ãꞌdî ꞌbã Yõwánĩ rĩꞌá bãbãtízĩ ꞌẽlé õjílã drí rî nĩ yã?”
5Gõꞌdá drı̣̃-ꞌbá Yúdạ̃ yí kâ ꞌdĩ ꞌbá yî îcá ĩyî úlı̣́ Yésũ kâ ꞌdĩ võ lâ lôgõlé kô. Gólĩyî ı̣̂sũ tã trá kĩ nĩ rî, õzõ yĩ ãâtâ gólâ drí kĩꞌá nĩ rî, Ôvârí ĩꞌdî rî, Yésũ âꞌdô lôgõꞌá lâ ĩyî drí kĩ nĩ rî, ngã ãꞌdô kpá ĩtí rî, gólĩyî ró úlı̣́ Yõwánĩ kâ kô ãꞌdô tãsĩ yã? 6Õzõ gõꞌdá yĩ ãâtâ kpá âꞌdó Ôvârí ĩꞌdî kô rî, õꞌbí ãmbá rĩ ꞌbá ĩtí ꞌdĩ ꞌbá yî âꞌdô ꞌdẽꞌá kpá ĩyî drı̣̃ı̣̂ ĩyî fũlı̣́, tãlâ gólĩyî lẽ ĩyî tã-drı̣̃ trá kĩ nĩ rî, Yõwánĩ ĩꞌdî tã ậngũ ꞌbá Ôvârí kâ. 7Gõꞌdá âꞌdô bê ĩtí rî, drı̣̃-ꞌbá Yúdạ̃ yí kâ ꞌdĩ ꞌbá yî gã ĩyî trá dó tã-drı̣̃ lôgõlé, gólĩyî drí tã âtázó Yésũ drí kĩ nĩ rî, yĩ nı̣̃ı̣́ kô.
8Gõꞌdá Yésũ âtâ trá gólĩyî drí kĩ nĩ rî, “Õzõ ãꞌdô ĩtí rî, má lẽé kpá kô âꞌdálâ ãnî drí kĩ, ãꞌdî ꞌbã mâ nĩ tã pẽlé yã rî.”
Tã Yésũ drí tã îmbázó íꞌdígówá sĩ, drı̣̃-ꞌbá õrĩ íyíkâ kâ rî ꞌbá yî âꞌdô íyî gãꞌá dó rî
(Mãtáyõ 21.33-46; Márãkõ 12.1-12)
9Yésũ âtâ íꞌdígówá trá drı̣̃-ꞌbá Yúdạ̃ yí kâ ꞌdĩ ꞌbá yî drí kĩ nĩ rî, “Ãgô ãzâ ꞌwã ạ́mvú íyíkâ trá, gólâ drí fê õzõ âlâꞌbâ kâtí gólâ rĩzó õdrá ꞌẽlé lõꞌwâ lâ ꞌásĩ rî ı̣̂ꞌdı̣́zó ꞌá lâ. Ạ́mvú lı̣́pı̣̂ ꞌdĩ drí gõzó ạ́mvú ꞌwã ꞌbá ãzâ ꞌbá yî ꞌbãlé rĩꞌá lôsĩ ꞌẽlé ạ́mvú íyíkâ ꞌdĩ ꞌá, tãlâ gólâ ꞌẽꞌá nĩlí rĩlí ꞌbạ̃drı̣̃ ãzâ ꞌá jẽjẽ ró ạ́mvú íyíkâ ꞌdĩ rú sĩ. Drílâ gõzó tã âtálé ạ́mvú ꞌwã ꞌbá ꞌdĩ ꞌbá yî drí kĩ nĩ rî, ‘Õzõ fê ạ́mvú ꞌá ꞌdĩ õꞌwâ trá rî, nĩ trõ lõꞌwâ lâ ũrûkậ ꞌbá yî ãnî drí, nĩ gõ ró ạ̃mbúkũ lâ âfẽlé má lı̣́pı̣̂ lâ drí.’ 10Gõꞌdá fê lõꞌwâ ꞌdĩ kâ trá ạ́mvú ꞌwã ꞌbá ꞌdĩ ꞌbá yî drí ôkízó lâ. Ạ́mvú lı̣́pı̣̂ drí gõzó lãjóꞌbá íyíkâ âjólé ânĩꞌá fê lõꞌwâ íyíkâ ró rî trõlé. Ạ́mvú ꞌwã ꞌbá ꞌdĩ ꞌbá yî drí lãjóꞌbá ạ́mvú lı̣́pı̣̂ kâ ꞌdĩ rũzó cãlé drõlé vólé, drílĩyî gãzó dó fê lõꞌwâ ꞌdĩ fẽlé ạ́mvú lı̣́pı̣̂ ꞌdĩ drí. 11Ạ́mvú lı̣́pı̣̂ ꞌdĩ drí kpá lãjóꞌbá ãzâ âjózó. Ạ́mvú ꞌwã ꞌbá ꞌdĩ ꞌbá yî drí rũzó lâ kpá cãlé. Gólĩyî ꞌê tã ãnyĩ kâ trá ãmbá lãjóꞌbá ꞌdĩ drí, gõꞌdá kpá gólâ rî lôꞌdázó drõlé gõlé vólé. Lôgâ ĩyî fê lõꞌwâ ꞌdĩ kpá dó fẽlé. 12Ạ́mvú lı̣́pı̣̂ ꞌdĩ drí gõzó lãjóꞌbá nâ lâ jõlé, drílĩyî kpá cãzó lâ, lôꞌézó lâ rõô. Fẽé ĩyî fê lõꞌwâ ꞌdĩ ạ́mvú lı̣́pı̣̂ drí kpá kô.
13“Ạ́mvú lı̣́pı̣̂ ꞌdĩ drí tã ı̣̂sũzó kĩ nĩ rî, ‘Má âꞌdô ꞌẽꞌá lâ nõ ángô tí ró yã? Má lẽ gõꞌdá trá drẽ ámâ mvá má drí lẽlé kôrô rî jõlé ĩꞌdî. Ãzângá sĩ, gólĩyî âꞌdô gólâ rî rõꞌá, drílĩyî ngá ámákâ ꞌdĩ âfẽzó.’ Gõꞌdá mvá ꞌdĩ drí nĩzó ạ́mvú ꞌálâ.
14“Gõꞌdá ạ́mvú ꞌwã ꞌbá ꞌdĩ ꞌbá yî õtírĩ ạ́mvú lı̣́pı̣̂ ꞌdĩ mvá lâ rî ndrẽê rî, âtâ ĩyî tã trá ĩyî lãfálé ꞌásĩ kĩ nĩ rî, ‘Nõô rî ạ́mvú lı̣́pı̣̂ rî mvá ĩꞌdî, mã rû gólâ fũlı̣́ vólé, tãlâ ạ́mvú nõ õrî ró bê ãmângá ãmâ drí.’ 15Gólĩyî lôkô ạ́mvú lı̣́pı̣̂ rî mvá trá, sẽlâ vólé ạ́mvú ꞌásĩ gõꞌdá nĩꞌá fũlı̣́ vólé.”
Gõꞌdá íꞌdígówá ꞌdĩ vósĩ rî, Yésũ îjî tã trá drı̣̃-ꞌbá Yúdạ̃ yí kâ ꞌdĩ ꞌbá yî tı̣́ kĩ nĩ rî, “Gõꞌdá ạ́mvú lı̣́pı̣̂ ꞌdĩ âꞌdô ꞌẽꞌá lâ ángô tí ró yã? 16Tã pạ̃tı̣́ı̣̃ ró, ạ́mvú lı̣́pı̣̂ âꞌdô ânĩꞌá ạ́mvú ꞌwã ꞌbá õnjí ꞌdĩ ꞌbá yî ûfúlı̣́, drílâ gõzó ạ́mvú ꞌwã ꞌbá ãzâ ꞌbá yî ꞌbãlé ĩꞌdî ạ́mvú ꞌdĩ ꞌá.” Gõꞌdá õꞌbí ãmbá rĩ ꞌbá ĩtí ꞌdĩ ꞌbá yî drí tã âtázó kĩ nĩ rî, “Tã ĩtí ꞌdĩ ꞌbá yî îcá rû ꞌẽlé kô.”
17Yésũ âꞌdâ õjílã ꞌdî ꞌbá yî lı̣̃fı̣́ lâ trá drı̣́-mbílí sĩ kĩ nĩ rî, “Nĩ nı̣̃ úlı̣́ tã ậngũ ꞌbá Ôvârí kâ drí âtálé kĩꞌá nĩ rî,
‘Ậjû nyãányâ gólâ jó ꞌdı̣̃ ꞌbá yî drí gãlé dó rî, âꞌdô gõꞌdá trá ậjû tã lâ drí lâzélé rõô jó kâ ró rî ĩꞌdî.
Tã ꞌdî rĩꞌá Ôvârí drı̣́gạ́ sĩ, gõꞌdá gólâ rî nyãányâ ꞌê nĩ. Ãmâ tı̣̂ ậꞌdı̣̂ trá tã ꞌdî drí sĩ.’
Lôngó 118.22
18“Ĩtí rî, õzõ õjílã ãzâ ũsı̣̃ íyî pá trá jó ậjû ꞌdĩ rú rî, gólâ rî pá âꞌdô ŋõꞌá. Gõꞌdá õzõ jó ậjû ꞌdĩ ãâꞌdê õjílã rî ꞌdĩ drı̣̃ı̣̂ rî, âꞌdô gólâ rî ôŋõꞌá cĩnyí-cĩnyí.”#20.18 Úlı̣́ ꞌdĩ ꞌbá yî, tã ífí lâ kĩ, õjílã gólĩyî Yésũ rî gã ꞌbá dó rî, lâŋõ õnjí tẽtẽ âꞌdô ꞌdẽꞌá gólĩyî drı̣̃ı̣̂.
19Gõꞌdá nĩngá sĩ, drı̣̃-ꞌbá Yúdạ̃ yí kâ ꞌdĩ ꞌbá yî lẽ ĩyî trá Yésũ rî trõlé nĩꞌá fũlâ, tãlâ gólĩyî nı̣̃ trá Yésũ rî íꞌdígówá âtálé ꞌdĩ ĩyî rú. Nĩngá sĩ rî, gólĩyî îcá ꞌẽlâ kô, tãlâ gólĩyî rô õꞌbí ãmbá ꞌdĩ ꞌbá yî ạ̃wạ̃lạ̃kạ̃ lâ yî ĩꞌdî.
Tã drı̣̃-ꞌbá Yúdạ̃ yí kâ rî ꞌbá yî drí kõlõgbõ cãzó kpı̣̃ı̣̂,
Yésũ drí ꞌdẽzó zẽlé lâ ꞌá rî
(Mãtáyõ 22.15-33; Márãkõ 12.13-27)
20Drı̣̃-ꞌbá Yúdạ̃ yí kâ ꞌdĩ ꞌbá yî rî ĩyî trá Yésũ rî âdólé, úlı̣́ õnjí ãzâ ãâfõ ró bê gólâ sı̣́lı̣́ sĩ, yĩ ũrû ró gólâ bê. Jô ĩyî tã ngõ ꞌbá yî trá nĩlí Yésũ rî tı̣̂ lôtẽlé, ãâtâ ró úlı̣́ ãzâ bê ányâ ró, gólĩyî ãânĩ ró bê tã lâ ngõlé ĩyî drí. Gólĩyî drí kpá tã âtázó tã ngõ ꞌbá ꞌdĩ ꞌbá yî drí, gólĩyî õjâ ĩyî kpá ꞌbãlé õjílã tãndí ró tã îjî-îjî ãzâ ꞌbá yî îjílí Yésũ tı̣́, pávó lôndãzó gólâ rî rũzó, drı̣̃ lâ ãâꞌdê ró bê, gólĩyî ãâꞌdô kpá ícícíyá ꞌẽ ꞌbá ró Yésũ rú. 21Õjílã gólĩyî tã ngõ ꞌbá ꞌdĩ yî îjî ĩyî Yésũ trá kĩ nĩ rî, “Lı̣̃fı̣́ îcí ꞌbá, ní âtâ úlı̣́ tãndí trá, gõꞌdá ní îcî õjílã lı̣̃fı̣́ trá tã pạ̃tı̣́-pạ̃tı̣̃ Ôvârí kâ rî sĩ, õzõ õjílã ãmbá ꞌdĩ ꞌbá yî ãꞌdô ĩyî gbõ lé õmbã ró ní bê rî. 22Mã lẽ ní âtâ ãmâ drí tã mbı̣̂ ró, mã õgî ômbê ngá ãtrâ Rómã kâ drí ngã kô yã?” 23Yésũ nı̣̃ trá gólĩyî rî ꞌdĩ kõlõgbõ cãꞌá yí drí ꞌdẽzó, tãlâ yĩ ũrû ró yî bê.
Gólâ drí gõzó tã âtálé gólĩyî drí nõtí, 24“Nĩ âfẽ drẽ lãfâ ãnî drí rĩzó ômbê gĩlí ĩꞌdî sĩ lâ ꞌdĩ ãlô rî má drí, tãlâ má ndrê ró bê. Nõô ãꞌdî rî líndrí ꞌî ậdı̣̂ ífí nõ rú, gõꞌdá rú îgĩlí rú lâ ꞌá nõ bê yã?” 25Tã ngõ ꞌbá ꞌdĩ ꞌbá yî drí tã âtázó Yésũ drí kĩ nĩ rî, “Nõô rî kúmú Rómã kâ ꞌbãlé ãmâ drı̣̃ı̣̂ nõ líndrí lâ ĩꞌdî.”
Gõꞌdá Yésũ âtâ trá gólĩyî drí nõtí, “Õzõ ãꞌdô ĩtí rî, gólâ ĩꞌdî lãfâ ꞌdĩ lı̣́pı̣̂ lâ ꞌî, nĩ lôgõ lãfâ ꞌdĩ vólé gólâ drí ômbê gĩgĩ sĩ. Gõꞌdá ãnî rî gógó ífífí lâ ãnî lı̣́pı̣̂ rĩꞌá Ôvârí ĩꞌdî, nĩ fẽ ãnî nyãányâ gólâ drí tã gólâ drí lẽlé ãnî drí ꞌẽlé rî ꞌẽzó.” 26Nĩngá sĩ rî, tã ngõ ꞌbá ꞌdĩ ꞌbá yî trá ꞌdó lârõ-lârõ ró, tãlâ Yésũ lôgõ tã îjî-îjî gólĩyíkâ ꞌdĩ trá tã nı̣̃nı̣̃ sĩ. Gólĩyî îcá ĩyî úlı̣́ ãzâ âtálé Yésũ rî drı̣̃ rũzó rî kô. Gólĩyî gõꞌdá trá úlı̣́ ãzâ ãkó âtálé.
27Gõꞌdá Sạ̃dúsı̣̃ ãzâ ꞌbá yî âcâ ĩyî trá Yésũ rî ûjũlı̣́. Gólĩyî rî ĩyíkâ õjílã lı̣̃fı̣́ îcílí kĩ nĩ rî, Ôvârí îcá kô õjílã îngálé õdrã ꞌásĩ. 28Gólĩyî âtâ trá Yésũ drí nõtí, “Lı̣̃fı̣́ îcí ꞌbá, ãmâ ạ́ꞌbı̣́yạ́ Músạ̃ îgĩ tã trá ãmâ drí kĩ nĩ rî, ‘Õzõ ãgô ãzâ õdrã cú ĩtí mvá tı̣̃ ãkó rî, gólâ rî ậdrúpı̣̃ yî âꞌdô gólâ rî õkó ꞌdĩ trõꞌá mvá tı̣̃zó gólâ drí.’ 29Ngbãângbânõ rî, mã âtâ drẽ íꞌdígówá ãzâ ní drí. Ãgô ãzâ rĩꞌá mvá bê njı̣̂-drı̣̃-lâ-rı̣̃ ꞌdó ĩyî ágó ró. Gõꞌdá mvá sı̣́sı̣́ rî drí õkó gĩzó, drílâ drãzó õkó ꞌdĩ âyélé tı̣́ ĩyî mvá õkó ꞌdĩ bê kô. 30Ậdrúpı̣̃ lâ ãzâ drí trõzó lâ ạ̃yı̣́zı̣́ ró, tı̣́ ĩyî mvá kpá kô, drílâ kpá drãzó. 31Ậdrúpı̣̃ ãzâ drí kpá ạ̃yı̣́zı̣́ ꞌdĩ trõzó, tı̣́ mvá kpá kô, drílâ kpá drãzó. Ậdrúpı̣̃ ãzâ drí kpá ạ̃yı̣́zı̣́ ꞌdĩ trõzó, tı̣́ mvá kpá kô, drílâ kpá drãzó, ndrĩ gbõ ꞌdó ĩtí té ạ̃dũkũ lâ mvá ạ̃dũ ró rî, drílâ ạ̃yı̣́zı̣́ ꞌdĩ trõzó nĩ, tı̣́ ĩyî mvá kpá kô. Mvá ạ̃dũ ꞌdî drí kpá drãzó. 32Õkó ꞌdĩ drí kpá drãzó. Gõꞌdá ní âtâ drẽ tã lâ ãmâ drí. 33Ị̃zạ́tú ãngó nõ ꞌá rî, õzõ Ôvârí ĩîngâ õjílã ôdrã ꞌbá rî yî trá lédrẽ-lédrẽ ró rî, ậdrúpı̣̃ gólĩyî njı̣̂-drı̣̃-lâ-rı̣̃ ꞌdó õkó ꞌdĩ trõ ꞌbá ndrĩ ꞌdî ꞌbá yî ꞌásĩ rî, õkó ꞌdĩ âꞌdô ꞌbãꞌá ángô rî õkó lâ ró yã?” Gólĩyî âtâ tã ꞌdî ĩtí ꞌdĩ, tãlâ Yésũ rî rúꞌbạ́ ônjâ ró bê tã ányâ lôgõlé ĩꞌdî.
34Yésũ drí tã âtázó Sạ̃dúsı̣̃ ꞌdĩ ꞌbá yî drí kĩ nĩ rî, “Ãngó ꞌá nõngá rî, ãgô rî õkó gĩlí. 35Gõꞌdá võ Ôvârí ngálâ ûrú ꞌálâ rî ꞌá rî, âꞌdó kô õkó gĩzó ĩꞌdî ꞌbãzó ãyĩkõ ró, õjílã tı̣́ mvá kô, 36gõꞌdá õjílã drãá kpá kô. Õjílã âꞌdô ꞌbãꞌá ꞌdó ndrĩ õzõ mãlãyíkã kâtí, drãá ĩyî gõꞌdá kô. Gólĩyî âꞌdô ꞌbãꞌá Ôvârí rî mvá ró, tãlâ Ôvârí îngâ gólĩyî trá õdrã ꞌásĩ. 37Ãnî Sạ̃dúsı̣̃ yî, tã ı̣̂sũ ãníkâ âꞌdó kô mbı̣̂. Ãmâ ạ́ꞌbı̣́yạ́ Músạ̃ îgĩ tã trá âyélé ãmâ drí, kậyı̣̂ tíbê Ôvârí drí úlı̣́ âtázó yí drí fê ngbũkpũ-ngbũkpũ rĩ ꞌbá kõlé lạ̃sı̣́ ró ĩtí ꞌdĩ ꞌásĩ kĩ nĩ rî, ‘Mâ cé ĩꞌdî Ôvârí tíbê Ãbãrãyámã drí rĩꞌá rõlâ rî, mâ kpá ĩꞌdî Ôvârí tíbê Ĩsákã drí rĩꞌá rõlâ rî ĩꞌdî, kpá Ôvârí Yãkóbã drí rõlé rî ĩꞌdî.’ Ôvârí õtírĩ tã âtá Músạ̃ drí rî, Ãbãrãyámã, Ĩsákã gõꞌdá Yãkóbã yî drã ĩyî trá. 38Îcá gõꞌdá kô ãvõ drí Ôvârí rî rõzó, gõꞌdá ngbãângbânõ rî, Ãbãrãyámã, Ĩsákã, Yãkóbã gõꞌdá trá lédrẽ-lédrẽ ró Ôvârí ngálâ.”
39Lãꞌbí îmbá ꞌbá ãzâ ꞌbá yî drí tã âtázó Yésũ drí kĩ nĩ rî, “Yésũ, ní lôgõ tã-drı̣̃ Sạ̃dúsı̣̃ ꞌdĩ ꞌbá yí kâ trá tãndí ró.” Gólĩyî âtâ tã ꞌdî ĩtí ꞌdĩ, tãlâ gólĩyî lẽé ĩyî Sạ̃dúsı̣̃ yî kô.
40Gõꞌdá nĩngá sĩ, lãꞌbí îmbá ꞌbá ꞌdĩ ꞌbá yî õjílã gólĩyî sı̣́sı̣́-lésĩ rî yí bê rô ĩyî Yésũ trá, îjí ĩyî gõꞌdá gólâ óꞌdí kô, tãlâ gólĩyî îcá gõꞌdá tã ãzâ ı̣̂sũlı̣́ Yésũ rî drı̣̃ rũzó ꞌá lâ kô. Tã lôgõ-lôgõ Yésũ kâ rî lậvũ gólĩyî trá tã nı̣̃nı̣̃ sĩ.
Tã ꞌdíyî pã ꞌbá rî tãsĩ
(Mãtáyõ 22.41-46; Márãkõ 12.35-37)
41Gõꞌdá Yésũ kĩ drı̣̃-ꞌbá Yúdạ̃ yí kâ ꞌdĩ ꞌbá yî drí rî, “Nĩ ı̣̂sũ drẽ tã mãnísĩ tã ꞌdíyî pã ꞌbá kâ tãsĩ. Íîgĩ trá búkũ Ôvârí kâ ꞌá kĩꞌá nĩ rî, ꞌdíyî pã ꞌbá gólâ Ôvârí drí ꞌẽꞌá âjólâ nõ rĩꞌá kúmú Dạ̃wúdı̣̃ rî ózõwá ꞌî. 42Gõꞌdá má kĩ, kúmú Dạ̃wúdı̣̃ rî gógó âtâ trá lôngó ãzâ ꞌá nĩngá kĩ nĩ rî, ꞌdíyî pã ꞌbá gólâ Ôvârí drí ꞌẽꞌá âjólâ nõ ãâꞌdô ꞌbãꞌá kúmú íyíkâ ró. Dạ̃wúdı̣̃ âtâ trá nõtí,
‘Ôvârí âtâ tã trá Kúmú ámákâ drí, gólâ õrî yí bê võ ãlô ꞌá cú drı̣́-ãcê bê ãngó nõ rũlı̣́ yí bê.
43Gõꞌdá yí âꞌdô gólâ rî ạ̃jú-ꞌbá-ãzí yî ꞌbãꞌá âꞌdólé áyábálá ró gólâ rî pá zẽlé.’ ”
Lôngó 110.1
44Gõꞌdá Yésũ âtâ tã trá drı̣̃-ꞌbá Yúdạ̃ yí kâ ꞌdĩ ꞌbá yî drí úlı̣́ mãnĩgõ sĩ kĩ nĩ rî, “Âꞌdô âꞌdóꞌá ángô tí ró, ꞌdíyî pã ꞌbá gólâ Ôvârí drí ꞌẽꞌá âjólâ rî drí ꞌbãzó kúmú ró Dạ̃wúdı̣̃ drı̣̃ı̣̂, gõꞌdá kpá âꞌdólé Dạ̃wúdı̣̃ rî ózõwá ró yã?” Yésũ âtâ tã ꞌdî ĩtí, tãlâ gólâ lẽ gólĩyî drí nı̣̃lâ dódó, ꞌdíyî pã ꞌbá ꞌdĩ rî âꞌdô ꞌbãꞌá õjílã mvá ró, kpá õzõ Ôvârí rî ífífí tí.
45Gõꞌdá nĩngá sĩ, Yésũ âtâ tã trá tã ârí ꞌbá íyíkâ rî drí, gõꞌdá õꞌbí ãmbá ꞌdĩ ꞌbá yî ârî ĩyî gólâ kpá trá, tã âtâ rĩꞌá nõtí, 46“Nĩ ꞌbã ãnî drı̣̃ı̣̂, ạ̃dũkũ lâ ró, nĩ õzó ꞌbãâ kô õzõ lãꞌbí îmbá ꞌbá ꞌdĩ ꞌbá yî tí. Lãꞌbí îmbá ꞌbá rî ꞌbá yî gólĩyî rî ĩyíkâ ítá ãcê-ãcê sõlé ĩꞌdî kạ́trạ́-kạ́trạ́ vũdrı̣́ sĩ, ĩyî âꞌdázó bê lı̣̃fı̣́ îcí ꞌbá ró. Gõꞌdá kpá rĩzó ậcı̣́ tõlé lómbé-lómbéwá sĩ gõcẽ-gõcẽ võ ngá gĩ kâ ꞌásĩ, õjílã õrî ró bê nî-bê-yã fẽlé ĩyî drí tã rõrõ sĩ. Gõꞌdá gólĩyî nĩ bê rãtáã ꞌẽlé jó tã ârî kâ ꞌálâ rî, gólĩyî drí té kı̣́tı̣̃ ạ́ngı̣́ ạ́ngı̣́ sı̣́sı̣́ ꞌálâ rî ꞌbá yî zĩzó ĩꞌdî rĩzó drı̣̃ lâ. Õzõ gólĩyî õcâ trá võ kãrámã kâ ꞌá rî, gólĩyî drí ĩyíkâ rĩzó zãâ ĩyî ífífí ꞌbãlé âꞌdólé sı̣́sı̣́ rĩlí kı̣́tı̣̃ ạ́ngı̣́ ạ́ngı̣́ drı̣̃ı̣̂, kı̣́tı̣̃ gólĩyî kó ꞌbãlé cé ũmú gólĩyî ãmbâ-ãmbâ drí rî yî drı̣̃ı̣̂. 47Gõꞌdá óꞌbã gólĩyî bê rĩꞌá ngá ꞌẽlé õkó gólĩyî ágó lâ yî drí ôdrãlé rî vó lâ yî ndrẽlé rî, gólĩyî rî ĩyîngá cé lãfâ õkó ꞌdĩ ꞌbá yí kâ ꞌdĩ îzãlé ĩꞌdî. Gõꞌdá gólĩyî rî trá rĩꞌá rãtáã ꞌẽlé kárá Ôvârí drí, gbórókõ ãmbá sĩ ngbạ́lạ́-ngbạ́lạ́, õjílã ãzí lı̣̃fı̣́ drı̣̃ ꞌá. Gõꞌdá nĩngá sĩ rî, gólĩyî rĩꞌá tã õnjí bê tákányĩ ĩyî pı̣̃pı̣̂sı̣́lı̣́ ꞌá. Tã lâ rĩꞌá nõtí, Ôvârí âꞌdô lâŋõ fẽꞌá gólĩyî drí lậvũlı̣́ kôrô.”
Voafantina amin'izao fotoana izao:
Lúkạ̃ 20: avu
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
©Wycliffe Bible Translators 2002