Mateo 5
5
1Alisi aho wagavonaga mavuto ga vanhu, walinaga ku lugulu na wikalaga; na vahemba vakwe vamwegelaga. 2Na wavukizaja kuvahembeka, uhaya,
3Velukilwa vapina mu moyo, kwisi vutemi wʼilunde vuli kuwavo.
4Velukilwa venavo valisaya, kwisi vakuhulikiwa.
5Velukilwa vadekanu, kwisi vakulisalika liwelelo.
6Velukilwa venavo vali na nzala na nota ya kupiwa vugololoku, kwisi vakwigutiwa.
7Velukilwa venavo vali na kisa, kwisi vakuvonelwa kisa.
8Velukilwa venavo vali na moyo gwa pe, kwisi vakumuvona Mulungu.
9Velukilwa vaswanya, kwisi venavo vakwitanwa vana va Mulungu.
10Velukilwa venavo validukiwa kunguno ya vugololoku, kwisi vutemi wʼilunde vuli kuwavo.
11Mwelukilwa inwe ulu valimufusa na valimuducha na valimulembekezya inwe mihayo mivi ya vulamba kunguno yane. 12Mudehage na mwihalalage, kwisi vusyokeziwa winwe vuliho vuhanya mwilunde, kwisi syenisyo vavadukaja vafumbuzi hovene vamutongelaga inwe.
13Inwe muli munyu gwa liwelelo. Alisi ulu munyu gwasukile, gutulilweki kigele guvele? Gukavile na mupango hangi, sumbwa gutagilwe hanze na gupandagilwe na vanhu. 14Inwe muli lumole lwa liwelelo. Kaya hoyene yili higulya na lugulu yikakovolilwe kuviswa. 15Ninga kuduhu munhu alivacha tala na kuyikundikizya nʼisyelo, alisi aliyitula higulya nʼifiga, na sisyo yilivezya vose valimo mu numba. 16Sisyo lumole lwinwe luvake hambele na vanhu, kigele vayivone milimo yinwe misoga, na vamukumuche Vava winwe homwene ali mwilunde.
17Muleke kwiganika ati nizaga kuzizimangucha ngʼhama ninga vafumbuzi, nkizile kuzizimangucha sumbwa kuzimazya. 18Kwisi loleyene ndimuwila inwe, kusika ilunde na liwelelo gakuzimanguka ninga kalumeho kado ninga kabado kamo mu ngʼhama kuzimanguka ngʼo kusika gose gafikilile. 19Haho uyo homwene aliguvinza ninga gumo gwa mikumo yeniyi mido na alivahembeka vanhu syenisyo, akwitanwa mudo mu vutemi wʼilunde; alisi uyo homwene aliyimazya na aliyihembeka, akwitanwa muhanya mu vutemi wʼilunde. 20Kwisi ndimuwila inwe ati, ulu vugololoku winwe vukakilile wenuvo wa vamanicha fitabu na Vafarisayo, inwe kwingila ngʼo na hado ngʼo mu vutemi wʼilunde.
21Mwigilwe kitisi va kale vawilagwa, Ukavulage ngʼo, alisi homwene alivulaga akutemelwa kitanga. 22Alisi nene ndimuwila inwe, Homwene alimukilwa muduguye vuduhu nguno, akutemelwa kitanga; na homwene alimuwila muduguye: Raka, yilimudima kuyangulwa hʼivanza; na homwene aliyomba: Veve mufwizilwa, yilimudima kutagilwa mu moto gwa hanahana. 23Ulu haho ulifumya kalumbilo kako hakuhozezya na ulizukila ati muduguyo ali na muhayo kwigulya naʼho, 24uleke kalumbilo kako hakuhozezya na uje hambele kukikondela na muduguyo, na haho usyoke na ufumye kalumbilo kako. 25Wikondele wangu na mukandi wako utali uli nawe mu nzila, kwigela ngʼo mukandi akufumye ku muyanguzi, na muyanguzi akukufumya ku mulugaluga na ukutagilwa mu kifungo. 26Loleyene ndikuwila, veve kufuma ngʼo na hado ngʼo kusika walinaga ipesa lya mhelo.
27Mwigilwe ati yayombilwe, Ukasihye ngʼo. 28Alisi nene ndimuwila ati, Homwene alimwikomya mukima na kumutamanilwa, wamalaga kukenagula nawe mu moyo gwakwe. 29Alisi ulu linso lyako lya mulila lilikuvonya, ulifumye na ulitage, kwisi yilikuvelela ulu kimo cha fivalango fyako kilizimila, kukila muvili gose gutagilwe mu moto gwa hanahana. 30Na ulu kukono kwako kwa mulila kulikuvonya, ukubute na ukutage, kwisi yilikuvelela ulu kimo cha fivalango fyako kilizimila, kukila muvili gwako gose gutagilwe mu moto gwa hanahana.
31Hangi yayombilwe: Homwene alimuleka muke wakwe amupe cheti cha kumuleka. 32Alisi nene ndimuwila inwe, Homwene alimuleka muke wakwe sumbwa kunguno ya vusihya duhu alimwingizya mu vuyanzwa, na mwenuyo alimutola mukima atavulilwe alisihya.
33Hangi mwigilwe kitisi va kale vawilagwa: Ukalahile ngʼo mulahi gwa vulamba, alisi uyimazye kumwa Mulungu milahi yako. 34Alisi nene ndimuwila inwe, Mukalahile ngʼo ninga hado ngʼo, ninga ngʼo kwilunde, kwisi lili isumbi lya Mulungu. 35Ninga ngʼo ku nsi, kwisi yili hakutulila magulu gakwe; ninga ngʼo ku Yerusalema, kwisi yili kaya ya mutemi muhanya. 36Ninga ukalahile ngʼo ku mutwe gwako, kwisi ukakovolile kuvezya luzwili lumo kuvi lwa pe ninga lwa pi. 37Alisi mihayo yinwe yive: ahene, ahene, ngʼo, ngʼo; alisi yose hoyene yilikila yeniyi yili ya kavi.
38Mwigilwe ati yayombilwe: Linso ku linso na lino ku lino. 39Alisi nene ndimuwila inwe, Mukiyanilizye ngʼo na kavi, alisi homwene alikutula kwitama lya mulila, umugalulile na lya vuvili. 40Na mwenuyo homwene alikova kutongana naʼho hʼivanza na kusola nhanzo yako, 41umulekele nʼikoti lyene. Na homwene alikukungilizya kuja nawe maili yimo, uje nawe maili ivili. 42Umupe mwenuyo alikulomba na ukamufutatile ngʼo mwenuyo alikova kukopa kuwako.
43Mwigilwe ati yayombilwe: Umutogwe mwiyo na umugaye mwanisi wako. 44Alisi nene ndimuwila inwe, Muvatogwe vanisi vinwe na muvadosaje venavo valimufwizila inwe; muvitilage kasoga venavo valimugaya inwe; muvalombelage vanavo valimusatya na valimuducha inwe, 45kigele muve vana va Vava winwe homwene ali mwilunde; kwisi alifumya limi lyakwe kwigulya na vavi na vasoga, na alitwinya mbula kwigulya na vagololuku na vigomu. 46Kwisi ulu mulivatogwa venavo valimutogwa inwe, vusyokeziwa ki muli navo? Kinahe, 47ninga vʼihongo vakavile kwita syenisyo? Na ulu mulivagisya vadugu vinwe duhu, mulivavitaki vangi? Kinahe, ninga vapagani vakavile kwita syenisyo savasava. 48Sisyo muve vasondo kitisi Vava winwe wa mwilunde ali musondo.
Voafantina amin'izao fotoana izao:
Mateo 5: Nym51
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Nyamwezi New Testament © Bible Society of Tanzania, 1951.