Juan 2
2
Jesupa pania uvaba papida
1Ewari ũpeaɨde arapá miak'ãipataɨ ewari oosidama Caná p'uurude, Galilea ĩjũane. Jesú nae ichiaba mãma basima. 2Jesú mãɨnepa chi ichi ome p'ɨrrɨapataɨrã mãɨ arapá miak'ãipataɨ ewari oo p'anɨmá t'ɨ̃ p'anasidama. 3Mãɨya p'anɨne uvaba jõna pẽra chi naepa Jesua jarasima:
—Uvaba jõsima.
4Mãɨne Jesupa jarasima:
—Nae, ¿k'ãre k'orea pɨa mɨá mãɨya jara bɨma? Mɨ ewari waidi ará pawẽma.#2:4 Mɨ ewari. Chi eda waapẽarãmá Jesupa jara basima ichi peadai k'orea wa chi ichia unupida chi Tachi Ak'õrepa K'aripaparí teai jarada k'orea.
5Maamina Jesú naepa chi ne jeda p'anɨa jarasima:
—Ichia jararut'a ãarea oot'ɨ.
6Mãɨne chok'o mawara ooda sei arí p'anasidama. Judiorãpa mãɨ chok'o mawara ooda mãɨya oopatama, Tachi Ak'õre pae pia awara bɨdamẽrá. Chok'ocha cincuenta wa setenta pot'eya wãpatama.#2:6 Cincuenta wa setenta pot'eya. Waapẽarã k'art'ade bɨ bɨma: ochenta wa cien litro. Griego pedeade nãɨya bɨ bɨma: metreta ume wa ũpea. 7Mãɨne Jesupa uvaba jeda p'anɨa jarasima:
—Chok'orãne paniapa ipirut'ɨ.
Ara mãɨne ipiru t'ɨk'oa nɨbeepisidama. 8Maapae Jesupa jarasima:
—Naapae awara ãpia joedak'ari chi arapaapataɨ ewari ooparia ateewãt'ɨ.
Ara mãɨya oosidama. 9Maapae chi arapaapataɨ ewari ooparipa mãɨ pania pada ajorosima. Piarã uvaba tosima, maamina ichia atua basima sãmãɨpa t'ɨsidat'a. Abapuru chi uvaba jeda p'anɨrãpa mãɨ k'awa p'anasidama. Chi arapaapataɨ ewari ooparipa chi ɨmɨk'ĩra wẽra atai bɨt'a t'ɨ̃k'ari nãɨya jarasima:
10—Ãareaɨrãpa chi uvaba piipará bɨt'a naa jedapatama. Maapae chi t'ɨ̃k'oadaadapa minachia todak'ari, chi uvaba neena bɨt'a jedapatama. Maamina pɨa chi uvaba chi piipará bɨt'a mẽra uru bada naapae jedapiruma.
11Mãɨ ẽpẽerãpa ne p'ue oodak'apɨ́ naa ooda Jesupa Caná p'uurude Galilea ĩjũane oosima. Mãɨnepa chi ichi minachia atepe bɨt'a unupisima. Mãɨya ichi ome p'ɨrrɨapataɨrãpa ichide piarã ĩjãasidama.
12Mãɨya nak'ari Jesú Capernaum p'uurudea wãsima. Ichi nae, ichi ũpẽarã mãɨnepa ichi ome p'ɨrrɨapataɨrã ichi ome wãsidama. Mãma tãaraa p'ananaé pasima.
Jesupa ne netopataɨrã ãyá jerek'oada
Mateo 21:12-13; Marco 11:15-18; Luca 19:45-46
13Judiorã Egitodepa wãnana k'ɨ̃risiapataɨ ewari k'ait'a pa bada pẽra#Éxodo 12:1-27. Jesú Jerusalenea wãsima. 14Mãma Tachi Ak'õre te eda unusima p'ak'a, oveja mãɨnepa p'aloma netopataɨrã. Ichiaba chi erreara tau tua awaraɨdepema k'ãpiapataɨrã mãma suak'abari p'anɨt'a unusima. 15Mãɨya unuk'ari, Jesupa soa jɨ̃k'ara ook'ari, ãarea tajatá jerek'oasima ãchi p'ak'a, oveja ome.#2:15 Mãɨ ewaride judiorã tua awaraɨdepemarã Jerusalenea chepachidama ne paateapidai k'orea Tachi Ak'õre tede. Mãma chi te edaria ãnimara atapachidama chi p'aarerãpa paadamẽrá. Chi erreara tau tua awaraɨdepema k'ãpiapataɨrã erreara tau jeeda k'oet'aak'ari, ãchi nek'opataɨ jãwarik'oak'ari, 16maapae chi p'aloma netopataɨrã́ mãɨya jarasima:
—Nãɨ ãarea ãyá ateewãt'ɨ. Mɨ Ak'õre te ne netopataɨ te papirãt'ɨ.
17Mãɨne ichi ome p'ɨrrɨapataɨrãpa k'ɨ̃risiasidama Tachi Ak'õre pedeade nãɨya bɨ bɨt'a: «Mɨa pɨ te minachia k'ɨ̃ria bɨ pẽra mɨ peapidaipɨ».#2:17 Griego pedeade nãɨya bɨ bɨma: Pɨ te minachia bɨ mɨa minachia k'ɨ̃ria bɨ pẽra mɨ paaipɨ. Salmo 69:9.
18Mãɨya bɨde p'aarerã chi chaarearã arí p'anasidama. Mãɨrãpa Jesua jarasidama:
—Taiyá unupise Tachi Ak'õrepa pɨá jãɨya oopi bɨt'a.
19Jesupa p'anoosima:
—Nãɨ te minachia bɨt'a ãrinaipɨra, mɨa ewari ũpeaɨde mãicha ooipɨ.
20Mãɨne chi p'aarerã chaarearãpa jarasidama:
—Nãɨ Tachi Ak'õre te minachia bɨ 46 ãyo mimiasidama mãɨ jõma oodai k'orea. Mãɨ pɨa ¿sãmaasã́ ewari ũpeaɨde jõma ooyade a bɨma?
21Jesupa nãɨ te minachia bɨade aside ara ichi k'ak'ua k'oreapuru pedea basima. 22Ichi chok'ae p'irabarik'ari ichi ome p'ɨrrɨapataɨrãpa ichia mãɨya jara badat'a k'ɨ̃risiasidama. Mãɨne ãchia Tachi Ak'õre pedeade bɨ bɨt'a mãɨnepa Jesupa jarada piarã ĩjãasidama.
Jesupa ẽpẽerã sãmaasã́ be k'awada
23Judiorã Egitodepa wãnana k'ɨ̃risiapataɨ ewaride Jesú Jerusalene basima. Mãɨne minachia ẽpẽerãpa ne p'ue oodak'apɨ́ ichia ooside chok'araɨrãpa ichide ĩjãasidama. 24Maamina Jesupa ãareaɨrã k'ɨ̃risia k'awa bɨ pẽra ĩjãaé pasima ãchia ichide piarã ĩjãa p'anɨt'a. 25Ãareaɨrã sõ k'awa bɨ pẽra mi ãpia pida ichiá ẽpẽerã sãmaasã́ be jaradaiwẽa p'anasidama.
Voafantina amin'izao fotoana izao:
Juan 2: tdc
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© (Active), Wycliffe Bible Translators, Inc. All rights reserved.