От Иоанна 6
6
Иисусым Ныӷыстилъҳа 5,000ның Сӣпңалӷӣның Югның
1Киңуңаның та̄м, Иисусым аӷвиқа̄ На̄йвақ Галилея, а̄тқылӷӣлъю Тивериадамың. 2Угляпихлъыҳӣм малихлъыӷа̄тка̄т қаюҳлъяк На̄лъҳуқӯлӷӣ қинуюгның алъя̄ҳлъюхўаҳтилъыҳқун. 3Ка̄лъютың Иисусылъю малихся̄ҳтыкулъҳӣт маюӷлютың на̄йӷамун ақумӯткат. 4Иудеит Пасхамун Нықынӷаҳқылъҳат ка̄сяҳтулӷӣ. 5Иисусым сивухлъюни ысҳақӣ юлӷутыҳлъягыт тагиляӷа̄лъҳӣт лъминун. А̄птыка̄ Филипп: «Накын тукфиӷинаяӷыста нықмың юлӷутыҳлъягнун ныӷьяҳқамың?» 6Таўатын а̄птыка̄ Филипп натын пилъыҳқа̄ ысҳаӷналюку, лӣсимакыӷңа̄ӷмигу лъми сялъыҳқани. 7Филиппым кӣмсиқа̄: «200 динарийелгуӷңа̄мта на̄маяҳқамың нықыңна̄нӷитукут, талўа сясқуҳаӷмың тунқуӷңа̄мтыки».
8Иляңалъю малихся̄ҳта таўанлыңуқ, Симон Петырым аңлыгутаңа Андрей. Андрейем пика̄ Иисус: 9«Ысҳа уна мыкылӷӣҳақ талъиматның нықыкшаңлъялъхақ, ма̄лӷуклъю иқалъюгык, иўырңа на̄мана̄нӷитут». 10Иисусым малихся̄ҳтыни пикӣ: «Югыт ақумӯтысқитыки». (Тама̄на выга̄ҳлъягулӷӣ.) Ынка̄м ынтақун 5,000ңӯт югыт ақумӯткат, кысюткыхпынаки аӷнатлъю, таӷнуҳа̄тлъю. 11Та̄хкын Иисусым тугулюки нықыкшагыт, игамсиқаюглюни Кияӷныӷмун, тунқуҳтыстыкӣ ақумӯткаҳлъягнун тама̄вык. Таўатыҳпигақ иқалъюгык пики, қамахлъютың ныӷӯткат кыпсюлъыӷмыхнун. 12Қамахлъютың кыпсю̄сята Иисусым малихся̄ҳтыни пикӣ: «Қырңуҳтыху тама̄на ныӷумаңилъкаңат, сякусӣқыхпынаки». 13Ынка̄м қырңуҳлъюки имиқӣт қуля ма̄лӷук сӣпнықлъюку корзинат сӣпныӷитның талъимат нықыкшагыт.
14Та̄на алъя̄ҳлъюхўаҳтилъық югыт ысҳапаглюку пикат: «Ипапыста̄қ уна ӯкналиқистыңӯқ тагияҳқа̄ника̄т нунамун». 15Иисусым лӣсимакыхкаңа югыт ақфалюку умӣлыңлъяӷнақуткынъақңукаңат, ынка̄м на̄йӷамун агляқақ лъңинаҳа̄налюни.
Иисус Пиюлӷӣ Мыҳқун
16Таўани иӷивгаӷми, Иисусым малихся̄ҳтыңи укикат На̄йвамун Галилеямун. 17Мамлыхтыкаңа, Иисусылъю паниның авӣлңуқ, ынка̄м малихся̄ҳтыңи аңьямун ӯҳқӯлъютың агляқат Капернаумымун иңлюңанилңуӷмун на̄йвам. 18Та̄хкын на̄йвақ имаҳлъюгуҳтыкақ қаюҳлъяк ануқлъиҳлъякаңа. 19Ӣўынлъю аңўа̄ӷмың на̄йвам қука̄нун лъӣӷақут, ысҳақа̄т Иисус мыҳқун пиюгмың тагилӷӣ аңьямун ынка̄м алиңрӯӷуткат. 20Иўырңа Иисусым пикӣ: «Алиңыхпынаси, Хўаңаңӯңа». 21Ынка̄м ӯхтысюка̄т аңьямун. Та̄хкын таўаниңинақ қӯтмун ка̄ткат такукамыхнун.
Югыт Ивақаңат Иисус
22Юлӷутыҳлъягыт уныхтыкат иңлюңани на̄йвам, уна̄миңани пиялӷӣмың Иисус авӣтуқ. Лӣсимакыхкаңат ата̄сӣна̄лӷӣ аңьяқ ыснами. Иисус малигусимаңилңуқ малихся̄ҳтыминун аңьякун, лъңинаӷмың пика̄лӷӣт унилъюку. 23Та̄хкын иляңи аңьят ка̄тқӯткат Тивериадамың. Тамлякат туңаңакун юлӷутыҳлъягыт ныӷӯтфигитхун иӷивгақ. Ныӷыхка̄лӷӣт нықыкшаңлъямың, киңуңаның Иисусым игамсиқаюлъҳан. 24Юлӷутыҳлъягыт пиялӷӣмың Иисусылъю малихся̄ҳтыкулъҳӣт авӣтут, ынка̄м аңьянун ӯхлъыӷа̄лъютың Капернаумымун иваӷьяҳтуқа̄т Иисус.
Иисус Нықыкшаңлъя̄гуқ Уңувалъылитикаюк
25На̄лъкысямыхтыху Иисус а̄птыка̄т: «Апыҳтуӷиста, қавңақ ма̄вык ка̄син?» 26Иисусым кӣмсиқӣ: «Ипа уңипа̄тамси, иваӷаҳпысиңа қаюҳлъяк ныӷылӷӣси нықыкшаңлъямың кыпсюӷа̄ӷлюси. Иванӷитаҳпысиңа алъя̄ҳлъюхўаҳтилъҳынка апалъюқлъюки. 27Қыпҳа̄тыхпына̄н нықа мулюңигалңуқ. Йыӷлыги қыпҳа̄тақитыху нықа на̄вьяҳқа̄нӷилңуқ, кынлыңуна̄н уңувалъыңыстикаюк. Таўатылңуқ нықа Иӷныӷан Югым тӯньяҳқақа лъпысинун, қаюҳлъяк Кияӷныӷым Атам итагнақыхкақа̄ лъңа».
28Югыт а̄птыка̄т Иисус: «Сяңа̄ўат қыпҳақат Кияӷныӷым писқысюкӣ хўаңкунъун?» 29Иисусым кӣмсиқӣ: «Лъпысинун қыпҳақақ Кияӷныӷым писқысюка̄ ысҳа уна: ухпықысқылъюку та̄на ата̄сиқ Кияӷныӷым каяхтыка̄». 30Ынка̄м югыт а̄птыка̄т: «Сяңўа̄ алъя̄ҳлъюхўаҳтилъық пинаяҳсигу? Ысҳапагьяқумтыху ынңа̄талъ ухпықнаяӷамкын. Сянаяҳсин? 31Сивуныпут ныӷыхка̄гут маннамың килга̄ни. Акузитни Игақыхкани игақыхка̄гуқ хўатын: “Қилягмың памакын тӯныхкақӣ нықыкшаңлъямың ныӷысқылъюки”». 32Иисусым пикӣ: «Ипа уңипа̄тамси, қилягмың памакын Моисейеңунӷитуқ тӯникақ нықыкшаңлъямың. Қилягмың памакын Атакақа тӯникаюк нықыкшаңлъяпигмың лъпысинун. 33Кияӷныӷым нықыкшаңлъя̄ ысҳа та̄на ата̄сиқ укикақ қилягмың, тӯнилӷӣ уңувалъыӷмың нунам юганун». 34Югыт пика̄т: «Югунӣқ, ӣўлың тӯникут таўатылңуӷмың нықыкшаңлъямың».
35Иисусым пикӣ: «Хўаңаңӯқ нықыкшаңлъяқ уңувалъылитикаюк. Кина та̄на тагилӷӣ хўаңамнун алъямыңлъю игатаӷна̄нӷитуқ. Китум та̄м ухпықыхкумиңа алъямыңлъю мықсюгна̄нӷитуқ. 36Иўырңа сивунӷани уңипа̄тылъымтун пӣмси, ысҳақақаҳпысиңа иўырңа сялин ухпықигатаҳпысиңа. 37Кина алңунак Атам тагивақа̄ тагияҳқа̄гуқ хўаңамнун. Иҳсяксяҳқақынӷитақа кина алңунак тагилӷӣ хўаңамнун, 38қаюҳлъяк укика̄гуңа қилягмың атуқналюку пиюкылъҳа Каяхтистыма. Хўаңа пиюкылъқа пияҳтӯнӷитақа. 39Каяхтистыма ифлъӣсюнӷита̄ңа та̄куның тагивақаминың, талўа ата̄сиҳақ. Итупилъ хўаңамнун уңуваҳтысқысюўӣ киңулиӷми аӷныӷми. 40Уна Атама Пиюкылъқақа: китум алңунак ысҳаӷлюку Иӷнықа ухпықыхкумигу кынлыңилңуӷмың уңувалъыңылъықуқ. Ынка̄м уңуваҳлъықақа киңулиӷми аӷныӷми».
41Иудеит уңьюпҳутка̄т Иисусым хўатын пилъҳа: «Хўаңа нықыкшаңлъя̄гуңа укикақ қилягмың». 42Пикат: «Иисусыңӯқ, Иосифым иӷнықа̄, лӣсимакаҳпут атаңалъю, на̄ңалъю. Сяңами хўатын пӣ: “Укика̄гуңа қилягмың?”» 43Иўырңа Иисусым пикӣ: «Уңьюпыҳтыхпынаси. 44Атаңӯқ каяхтикақ хўаңамның. Кина алңунак тагина̄нӷитуқ хўаңамнун ўыткуқун Атам тагистыкумигу хўаңамнун. Ынка̄м уңуваҳлъықақа киңулиӷми аӷныӷми. 45Ӯкналиқистыт игақыхкақа̄т уна: “Кияӷныӷым апыҳтуӷьяҳқақӣ қамахлъюки югыт”. Тамаҳаӷми нагалъҳӣ, лӣлъҳӣ Атамың тагикаюгӯқ хўаңамнун. 46Сюмыҳтаӷаҳпынаси китумун алңунак ысҳа̄манилюку Ата. Кияӷныӷмың тагикам лъңинаҳаӷми ысҳақақа̄ Ата.
47Ипа уңипа̄тамси, лъңа та̄на ухпықилӷӣ кынлыңилңуӷмың уңувалъылгӯқ. 48Хўаңа нықыкшаңлъя̄гуңа тӯникаюк кынлыңилңуӷмың уңувалъыӷмың. 49Сивуныси ныӷыхка̄гут маннамың килга̄ни, иўырңа паниның туқуляӷа̄тка̄гут. 50Иўырңа уна нықыкшаңлъяқ укикақ қилягмың, китум алңунак ныӷыхкумигу туқуна̄нӷитңўа̄ҳтуқ. 51Хўаңа уңувалъылитикаюгӯңа, нықыкшаңлъяқ укикақ қилягмың. Китум алңунак ныӷыхкумигу та̄на нықыкшаңлъяқ, кияҳсяҳқа̄гуқ қӯнпырухлъяк. Та̄на нықыкшаңлъяқ кымыкшакақа, тӯнақыхкыхка нунам юги уңувалъыңысқылъюки».
52Та̄хкын Иудеит а̄ҳтӣра̄ӷусягуткат лъмыхның. Пикат: «Натын ӯм югым кымыкшани тӯнақагу ныӷысқылъюку?» 53Иисусым пикӣ: «Ипа уңипа̄тамси, Иӷныӷан Югым кымыкшага ныӷьяҳқақаҳси, а̄ўалъю мыӷьяҳқақаҳси. Таўатын пинӷилъкуфси, уңувалъыпигитуси илюхпысини. 54Китум алңунак ныӷыхкумигу кымыкшака, мыӷыхкумигу а̄кўа, кынлыңилңуӷмың уңувалъылгӯқ, уңуваҳлъықақалъю киңулиӷми аӷныӷми. 55Кымыкшака нықыҳпига̄гуқ, а̄кўалъю мыӷьяҳқапӣгӯқ. 56Китум алңунак ныӷыхкумигу кымыкшака, мыӷыхкумигу а̄кўа, кияҳтыңъӯқ хўаңамни, хўаңа Кияҳтыңӯт лъңан илюңани. 57Атам уңувастикаюгым каяхтыкақа̄ңа, хўаңалъю уңувастақа̄ңа. Ынка̄м китум алңунак ныӷыхкумиңа уңувалъықуқ хўаңа апалъюқлъюңа. 58Сивунымта ныӷыхкӣстун нықыкшаңлъястун аюқынӷитуңа. Ныӷыхка̄гут нықыкшаңлъямың иўырңа паниның туқуляӷа̄тка̄гут. Нықыкшаңлъя̄гуңа укикақ қилягмың. Кина алңунак ныӷыхкуми та̄хкын нықыкшаңлъямың кияҳсяҳқа̄гуқ қӯнпырухлъяк». 59Иисусым тама̄на қамахлъюку а̄пқа̄ апыҳтуӷиңулюни синагогаңани Капернаумыми.
Апыҳтӯся̄ Кынлыңилңӯм Уңувалъҳым
60Иисусым малихся̄ҳтыңита нагалъюку алъюлъютың пикат: «Уна апыҳтӯсяқ пияқнапихтуқ, китумңам тугуклъиҳлъықагу?» 61Уңипа̄тыстыңъунани Иисусым лӣсимакыхкаңи малихся̄ҳтыни уңьюпҳулъҳӣт таўатын, ынка̄м пикӣ: «Та̄м апыҳтулъҳым ӣлъқаюхтыстисӣ? 62Сямыңʼңам пинаяӷыстык ысҳаӷьяқуфсигу Иӷныӷа Югым маюлӷӣ ныксяқыминун сивунӷани? 63Таӷныӷак уңувалъылитикаюгӯк, иўырңа ю̄к уңувалъылитина̄нӷитуқ. Акузитынка лъпысинун таӷныӷа̄гутлъю уңувалъҳӯтлъю. 64Иўырңа иляхпыси ухпықигатӣт акузитынка». (Иисусым лӣсимакыхкаңи килъю ухпықинӷилңӯт. Лӣсимакыхкаңи има пӣнлиӷьюхўа̄лъыӷмың. Талўа лӣсимакыхкаңа кинаңутаңа увыҳпагутияҳқақ лъминың.) 65Иисусым пикӣ: «Иляхпыси ухпықинӷитылъҳа апалъюқлъюку хўатын пика̄гуңа: “Атам тагисныӷилъкумигу ю̄к хўаңамнун, тагина̄нӷитңўа̄ҳтуқ”».
66Киңуңаның Иисусым таўатын пилъҳан угляпихлъыҳӣм малихся̄ҳтыңан унитка̄ малихся̄ӷнаниқа̄т. 67Иисусым а̄птыкӣ қуля ма̄лӷук сӣпнықлъюку малихся̄ҳтыт: «Лъпысилъю аӷуляқсюгыстык?» 68Симон Петырым кӣмсиқа̄: «Атанық, китумунңам пилъықыста? Лъпык акузитыхпык а̄пҳақа̄ натын алъхыӷутылъыҳқақ кынлыңилңуӷмың уңувалъыӷмың. 69Хўаңкута ухпықамкын, лӣткақамкын лъпык Аглыӷналӷӣка̄тын Кияӷныӷым».
70Та̄хкын Иисусым пикӣ: «Накмикыхкақақа қуля ма̄лӷук сӣпнықлъюку малихся̄ҳтыкаҳқақ, лъпысиңӯт. Иўырңа налиҳси ата̄сиқ туӷныӷа̄гуқ». 71Иисусым акузиткыңъукаңа Иуда, иӷныӷа Симон Искариотым қаюҳлъяк та̄кўаниңани увыҳпагусяҳқақыхкаңа. Иуда илякыхкаңат та̄кут қуля ма̄лӷук сӣпңалӷӣт малихся̄ҳтыт.
Voafantina amin'izao fotoana izao:
От Иоанна 6: ess2
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2022, Wycliffe Bible Translators, Inc. All rights reserved.