Matìyò 4
4
Satàn ə mwàm kòʼ Yesù
(Mâk 1.14-15; Lukâs 4.14-15)
1Zwàykə̀zwekiy dyaŋi nìy zù nə̀ Yesù a mbvə̀nə̀ kə̀sisi â Satàn ani mwàm kòʼ we. 2Abù ù dòʼò koŋə dzə̂ nəniy awote ntsukə mə̀vəm in kyàʼì nə̀ ù bamə kə idzwə nə̀ ntsukə nə̀ ntsə̀, dzoŋə kaʼ yə̀ ani zab we. 3Satàn ə dyaŋi bù dzày yə̀ a we nə, “Abu wò də nəniy Wà Kə̀zə̀, zəŋi tsə nə̀ atay yə̀ fə̀d kə kəba.”
4Yesù ə bə̀lì yə̀ we nə̀, “I twâ dòʼò anə ŋwàʼà k-a-zə̀ nə̀, ‘À kaʼi wày təŋ dzə kəba kə zəŋə wù nə̀ ù ki muə, ayiə yə Zə̀kìy dzîy nəniy àdzə̀m à zəŋə àghe wù nə̀ ù ki muə.’ ”
5Satàn ə dyaŋi nìy zù nə̀ Yesù a Yèlusalèm, inaʼ ì zwe yiy, nìy na fyi kwoʼ kə we anə lòʼo kə kə dâb tsìy fyi nəniy a ndàw Kə̀zə̀, 6Dzày yə̀ a we nə, “Abu wò ndzə̀m də Wà Kə̀zə̀ tǎ fyi tswi yə̀ a mbvə̀d, aŋwòə i twâ dòʼò anə ŋwàʼà k-a-zə̀ nə̀,
‘Zə̀kìy ki twum bə̂ tsə̀təndii tə we,
ghu ki fam kwi kə wô,
tə̀ wò ki də kə̀ tswâb byɛbi awuu yiə̀ yìy anə itay.’ ”
7Yesù ə bə̀lì kə a we nə̀, “I twâ dòʼò sòʼò anə ŋwàʼà k-a-zə̀ nə̀, ‘Kə̀ mwâm kòʼ dzə̀ Mwe ə̀ mbyi Zə̀ kiə̀ kìy.’ ”
8Satàn ə nìy kwoʼ yə̀ nə̀ Yesù anə ukàʼ ù dabə wiy, dè yə̀ nàʼà tə mbyi tə tə̀dzə̀m â Yesù nə̀ kwab tə ufyiə tə tə də nəniy ate. 9Satàn ə dzày yə̀ â Yesù a we nə, “Abu wò nyaʼa tsəə nəniy fwùlì tsə miə, mə ki nyiə̀ wò nə̀ ùfyiə wə ùdzə̀m.”
10Yesù ə bə̀lì kə a we nə, “Satàn! Ŋwòə a sə̀ ə̀ mìə̀. I twâ dòʼò anə ŋwàʼà k-a-zə̀ nə̀, ‘Ghà kwu ani fwùlì yə̀ kə Mwe ə̀ mbyi Zə̀ kəli, fàʼà yə̀ sòʼò â we kə.’”
11Yəə Yesù dzày dzə̂ aghii, Satàn ə nyəli màʼà tsə we, tsə̀təndii t-a-zə̀ tǐy bù nìy ìyèmì azoŋə̀ we.
Yesù ə kaʼ yə̀ fàʼ kə we a Galìlî
(Mâk 1.16-20; Lukâs 5.1-11)
12Abù Yesù zuw tsə nə̀ ghu mə kwe Dzwan a ndàw ntsaʼ, u ŋwò zù a Galìlî. 13Ù kə kə̀ doʼò dzə̂ a Nazalèt, ù kə zù mùə̀ dòʼò yə̀ a Kàpanùm, a kə̀lə̀ ìŋwù yə̀ i kə də nəniy anə inaʼ i Zebulùn nə̀ ìnaʼi Naptalì yìy. 14I bvami bù fyi kə kə anə ayiə yə wè ntwùm ə̀ Kə̀zə̀, Ìzayà kə dzây na zî bə̂ nəniy nə̀,
15“Mə dzəŋə̀ bə̀ nə̀ ghà, aghû yə̀ ghu muə nəniy a Zebulùn,
nə̀ Naptalì, bə̂d kə inaʼ kəli kiy də anə dzəd yə ì zè nəniy anə iŋwù,
a ŋgwùŋə̀ Dzwìy Dzudàn, nə̀ Galìlî, loʼo kə aghù yə̀ ghu də wày aghee Dzû
16Aghû yə̀ ghu muə an-a-ləm,
ghu mə kòʼ kaʼì tə̀ soŋə̀ tìy,
Aghû yə̀ ghu swəd dzə̂ anə ayiə̀ pfə yiy,
ghu mə kəli imuə̀ itsà yìy.”
17Nìy ŋwò tsə a sòŋə̀ fə ghà fə̀, Yesù ə kaʼ yə̀ ani nàʼà nə̀, “Ghà kyemì ŋwô bə̂ anə bɛb təli, aŋwòə fəkəmə̀ Zə̀kìy bû kaʼ ani saʼ aghee we.”
Yesù ə twoŋə tsə tsə̀təndii tə səsə tiy
(Mâk 1.16-20; Lukâs 5.1-11)
18Yəə Yesù bwìy tsìy yə̂ nəniy anə iŋgwùŋə i ŋwù i Galìlî, u kòʼ tsə aghê àbè ghu kə də awizə̂ yìy, Simùn ghu kə tyoŋə we nə̀ à də̀ Pità, we nə̀ àzə̀ ə̀ we ghu kə tyoŋə we nə̀ à də̀ Andùlù, ghu kwi nəniy tsitiy anə təwè anə iŋwù. Fàʼ kə ghu kiy kə də̀ tsə̀ ani kwi tətsi. 19Yesù ə dzày yə̀ a ghu nə, “Dzwùmi bə̀ nənìy miə, tə̀ mə ki tyi dê bə̂ ghà nə̀ àyiə yə ghà də ani zəŋi tə̀ aghê dzwumì bə̂ Kə̀zə̀.” 20Ghu dyaŋi nasə tsə wee tə ghu, ŋwò dzwùmì yə̀ Yesù.
21Abù ù kàm soŋ fəli yə̂ isə, u kòʼ tsə aghê liy àbè ghu kə də awizə̂, Dzɛ̂m nə̀ Dzwan awa Zebedì, ghu də nəniy an-a-mfə̀n, ghu zwubə̀ wee tiy. Yesù ə toŋə tsə sòʼò ghu. 22Ghu dyaŋi nasə tsə sòʼò tè ghu an-a-mfə̀n ŋwò dzwùmì yə̀ we.
Yesù ə tyi dè àyiə, zəŋi tsə sòʼò àghè dzaŋə ghu taw kə
(Lukâs 6.17-19)
23Yesù ə bwìy tsìy yə̀ mbwòʼ ə̀ Galìlî ì dzə̀m, tyi dè yə̀ àyiə, anə ndaw tə udzəŋə tə aghě Dzû, nìʼà yə̀ sòʼò ntwùm ìdzòŋə̀ yìy kwùmə̀ yə̀ nə̀ yəə Zəkìy kî saʼa aghê ate. U zəŋi tsə sòʼò aghù yə̀ ghu kə dzaŋə̀ le tə tədzàŋ tìy, ghu taw dòʼò bə̀. 24Ùzòŋ u we wiy foŋ tsìy yə̀ bwòʼò Silìyà ì dzə̀m, aghee màŋə̀ nyəŋə bə̀ nə̀ le tə ghè dzaŋə tiy awò Yesù, u zəŋə tsə, ghu taw kə. À yuu ghu zəə nəniy, nə̀ à yuu ghu fwabə nəniy, nə̀ à yuu nsìy mə̀bɛbə̀ mìy kə fyimə nəniy ghu, nə̀ à yuu ghu kə bvwə̂ nəniy bvwə̀kìy, nə̀ à yuu ghu pfə doʼò nə̀ ìkwe yiy, nə̀ à yuu ghu kə pfə doʼò nə̀ ìfwe yiy, Yesù ə zəŋi tsə ghu taw mà kə àdzə̀m. 25Ŋwàâ kə ghù kìy ə màŋə̀ kwùə̀ kyabə tsə̀ adzəmə̀ we. À yuu ghu fyi kə a Galìlî, nə̀ à yuu ghu ŋwô bə̂ anə nàʼà tə̀ ìvəm tə doʼò dàŋ fyi yə̂ a ŋgùŋə̀ Galìlî ì lìy yìy, nə̀ à yuu ghu ŋwô bə̂ nəniy a Yèlusalèm, nə̀ àghě Dzùdiyà, nə̀ àghě ŋgùŋə̀ Dzwìy Dzudàn ì lìy yə̀.
Voafantina amin'izao fotoana izao:
Matìyò 4: isu
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra