Naiˍ htangˍ 6
6
Changˉ cetˍ hu na cheˉ yuˉ jiˉ
1Hingˉ nyamˍ hkaoˍ veu ta peˍ uiˍ byaˍ laˉ yao, Heˍlaˍsaˆ tangˍ ciˍ naeˍ Yuˉdaˆ changˉ uiˉ nae Heˍbraeˉ tangˍ ciˍ naeˍ Yuˉdaˆ changˉ uiˉ hteng lang jiˉ. Aˉ mae yao nae baoˇ cu nuing caˍ keungˍ peungˍ naeˍ hkaoˉ veu, yawng beu Heˍlaˍsaˆ tangˍ ciˍ naeˍ mae maiˉ ba uiˉ aˍ caˍ keungˍ baˍ ya nae pa yaˇ. 2Haeˉ mae beu, naiˍ htangˍ htiˍ cheˍ nyiˍ hu uiˉ aˍ ta peˍ hkaˉ hko laˉ hko uiˉ na haoˉ chawnˉ yao ha biˍ jiˍ. Gu Hpaˍcaoˍ beu kanˉ na paek nga saˍ yao caˍ keungˍ tangˍ kawˉ peungˍ naeˍ uiˉ kanˉ na vaˍ naeˍ ningˉ ngaˍ baˍ yaˍ. 3Hingˉ pa nae, yaˍ changˍ mawngˉ namˉ yawng veuˉ, nawng hkaoˉ veu ang maengˉ maenˍ naeˍ Ang hkawˍ laˉ kanˉ muiˉ, pingˍ nyaˍ muiˍ htiˍ puing nae ca naeˉ changˉ cetˍ hu na nawng cheˉ yuˉ voˍ. Yawng na kanˉ ningˉ htiˍ ceuˍ gu piˉ vaˍ naeˍ nae ha biˍ jiˍ. 4Gu aˍ ang buinˉ paˉ yao ang buinˉ tangˍ maˍ naeˍ kanˉ ningˉ na aˉ lawˍ beu muiˉ vaˍ naeˍ nae ha biˍ jiˍ. 5Yawng ciˍ nae na changˉ ang muˉ uiˉ hkaˉ hko laˉ hko nuing ba capˆ yao changˉ hingˉ uiˉ na cheˉ yuˉ jiˉ. Yumˉ naeˉ uiˉ nae Ang hkawˍ laˉ ang seungˍ sangˉ htiˍ puing nae ca naeˉ Saˍteˍhpanˍ htiˍ hu nae, Hpiˆliˆpuˆ, Pawˉhkawˍ, Niˆkaˍnawˍ, Tiˉmonˍ, Paˍmeˍnaˆ nae Yuˉdaˆ ang liˍ yuˉ naeˉ Anˍtiˉokˆ vengˍ changˍ Niˆkawˆlaˆ yawng na cheˉ yuˉ jiˉ. 6Naiˍ htangˍ uiˍ tawngˍ naˍ veu yawng na chiˉ yao, naiˍ htangˍ uiˍ ang buinˉ paˉ yao yawng htaˍ veu laˍ puˍ boeˉ nga biˍ jiˍ.
7Hingˉ pa nae Ang suingˉ Hpaˍcaoˍ beu ang buinˉ tangˍ yangˍ pya aengˉ yao ta peˍ uiˍ a Yeˍruˆsaˍlaemˍ vengˍ veu ang byaˍ ta yao laˉ jiˉ. Yit pa rawˉ hek ang kaeˍ ang byaˍ hu uiˉ naˉ yuˉ yao yumˉ laˉ jiˉ.
Saˍteˍhpanˍ na chu jiˉ
8Saˍteˍhpanˍ nawˍ, ang buinˉ htiˍ puing nae tanˉ hkoˉ htiˍ puing ca yao, changˉ yaˍ uiˍ mae nuing suiˍ huˍ veu naˍ mek laek hkaˍ naˍ uiˍ nae manˍ kyaˍ uiˍ na ha jiˉ. 9Haeˉ mae beu, changˉ htiˍ baˍ uiˍ hta laˉ yao Saˍteˍhpanˍ na hteng lang ga jiˉ. Yawng ngaˍ caeˉ naeˉ uiˉ changˉ nae ha naeˉ Yuˉdaˆ changˉ ceuˉ hpawm lang kyaˉ na chaˍ lang naeˉ changˉ uiˉ aˍ, Kuˆreˍneˍ changˍ, Aˍleˍsaˍdraˉ changˉ, Kiˉliˉkiˆ changˉ nae Aˍsiˆ meungˉ changˉ uiˉ yaˇ. 10Hta yao muiˉ Saˍteˍhpanˍ nawˍ Ang hkawˍ laˉ piˍ jiˍ bae naeˉ uiˉ pingˍ nyaˍ nae ciˍ yao, yawng ngaˍ yang na baˍ hteng kaˍ yaˍ taw. 11Haeˉ mae beu, yawng changˉ uiˉ na hkaoˍ sing lang yao, piˉ ciˍ jiˍ yang ningˉ mae, Changˉ ningˉ maˇ Moˉseˍ na muiˉ, Hpaˍcaoˍ na muiˉ baˍ saˍ baˍ nyamˍ maˍ manˉ nae na gu ya kyaˍ byaˇ nae piˉ ciˍ jiˍ. 12Yawng ngaˍ ang meungˉ changˉ htiˍ baˍ ang huiˍ ang kaeˍ yaˍ mangˍ uiˍ nae, Camˉ lik ang hkiˍ saˍ laˉ uiˉ na htuing nga lae biˍ yao, Saˍteˍhpanˍ na hpui peunˉ lae yao, aˉ muˍ tatˆ naeˉ uiˉ tawngˍ naˍ veu yang na suiˍ aengˉ jiˉ. 13Yawng ngaˍ, tiˍ keˍ keˍ yao sak seˍ hkamˉ naeˉ uiˉ changˉ htiˍ ba na haoˉ yao chiˉ lang jiˉ. Sak seˍ hkamˉ naeˉ uiˉ changˉ uiˉ, Changˉ niˉ maˇ cawngˉ ang huiˍ ang seungˍ sangˉ na nae ang liˍ ang kawngˍ na muiˉ baˍ saˍ baˍ nyamˍ nae ciˍ yao ca naeˉ nae ha biˍ jiˍ. 14Naˍzaˍraet changˉ Yeˍsuˆ ningˉ maˇ, cawngˉ ang huiˍ ningˍ na tiˍ kangˍ yao, Moˉseˍ gu na piˍ saˍ laˍ jiˍ ang liˍ ang kawngˍ htiˍ baˍ ningˍ uiˉ na penˉ na naˇ nae yang ciˍ naeˍ na gu ya kyaˍ byaˇ nae yawng ciˍ jiˍ. 15Haeˉ mae beu, aˉ muˍ tatˆ naeˉ ang muˉ hkaoˉ veu ca naeˉ uiˉ changˉ ngaˍ Saˍteˍhpanˍ na hu chawk chawk yao hu beu, yang beu mae kaˍ hingˍ ngaˍ buingˍ htaˍ naiˍ htangˍ mae kaˍ lawˍ hpeuˍ naeˍ na ya myangˉ jiˉ.
Voafantina amin'izao fotoana izao:
Naiˍ htangˍ 6: pyy
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2022, Wycliffe Bible Translators, Inc. All rights reserved.