ดอ โฆว 6
6
ลอง ฆอน เฌาพรา ฆาย ฆอน ดูอี
1อึณ ยี มึห ดูอี กืน แดง กาดาย. เฆ บอ วี มึห ฆอน อีบึณ กืน. 2ดอ อัน ตี อึณ ยี มึห เฆ อี จืร ฆอน อีมาย เฌาพรา, เฆ วี ยึร, ฆอน อีบึณ ดูอี แฮะ ชีด กาเซา. แฮะ ฮอต, เฆ วี ลาย ลาย, แตห เฆ แบน อีบึณ เฆ, แตห เฆ ปึอน ดี โบง แคะ ปี อึง เฆ. 3ดอ ยอด เฌาพรา ลอง อัน ตี อัน วี ต็อห, “พึอม โอว อี ดัว อาซาก ดี อี, โอว ฮู แตห อึณ กอย ดี เฆ เซเซ. โอว ดี แตห อาซาก ดูอี กอย อาดา อู มาย็อห ดี อา ฆึร ซีนัม.”
4อาคราว บาน ดอ อัน ตี อึณ มึห ดูอี โดว ดีโต็ง ดีตาง อี กอย แดง กาดาย. ดอ ลาย เฆ ฆอน เฌาพรา ดี ฆอน อีบึณ ดูอี, เฆ แฮะ มึห ฆอน ดีโต็ง ดีตาง ฌึร ตี. ฆอน เฆ ตี, เฆ แฮะ แบน ดา โบว ตาง บอ มึห โปลม กืน. เฆ มืร มูห ดา ตาง อี มึห ซาเร อาคราว ดอ มึอน.
5เฌาพรา ยี ยอด, ดูอี อี กอย แดง กาดาย บอกาเฆลียด, เฆ แฮะ ฮาย แฮะ มืก. ปี เฌณฌา เฆ อี เลห แคง น็อห เฆ บอ ปี โบง เฆ ดอน โมยว, อึณ ตู หมึอม โตต ดอน โมยว. อาว มึห อี หมึอม มาเซ. 6โกบ ยึร เฌาพรา ลอง อัน ตี, อัน มืร มึห น็อห กลึร. อัน กาพา, อัน แฮะ กาลึบ ดี โบง ดูอี. 7อัน เฌา วี ต็อห, “โอว ดี ปยาต แวน ดูอี แปะ แฮะ โบง โอว. โอว อาว ฮู แตห เฆ กอย แดง กาดาย นี. บอ เฆ ดูอี, บอ เฆ โดว ซัดดาวา อี กอย แดง กาดาย, บอ มาซีม อี กอย แคง ฆางหราว, โอว ดี แวน โตต เฆ ดอน โมยว. น็อห โอว แฮะ กาพา, โอว แฮะ กาลึบ ดี โบง แตห เฆ มึห.” 8อึณ ยี มึห ดา อู วี, อัน จืร อาโนว. เฌาพรา แฮะ ต็อห, อัน มึห น็อห ซืร น็อห หมาน.
9คา นี ฮาว, ดี วี กาลาง ลอง อาซาก อาโนว.
ดอ กอย อาโนว แดง กาดาย นี, อัน มึห น็อห ลูย. อาว ปึอน กาลาง อี ตู หมึอม ลอง อัน. อาโนว โดบ ซีคยา เฌาพรา. 10อัน มึห ฆอน อีมาย โอย วี. เฆ จืร อาเซม, อาฮาม บอ อายาเพด.
11ดอ อัน ตี กาดาย อาว อัห. เฆ ดูอี อี กอย แดง กาดาย, เฆ อาว หมึอม. เฆ โบง อี จีจีว เซเซ. 12เฌาพรา ยี ยอด กาดาย บอ ยึร เฆ ดูอี แดง กาดาย. เฆ บอกาเฆลียด ตู หมึอม. เฆ อี กอย แดง กาดาย, เฆ บอกาเฆลียด ตู โบง นา บอด นา หมึอม. 13โคว, เฌาพรา วี กาลาง โฆรห ดี อาโนว ตึอน. อัน ต็อห, “โอว แฮะ ฮอต ซูงพยาด ดี โบง, แตห อี กอย แดง กาดาย นี, ลึร ชึม โตต ดอน โมยว. โกบ อึณ มึห มี นา ตู หมึอม แดง กาดาย นี, โอว ดี ปยาต แวน บอ เฆ ดูอี บอ กาดาย. โอว ดี โบง, แตห อึณ ลึร โตต. 14แม ยี โลว โบง รึร ซังโพว, แตห แม ตา เฮ โฆวพา. นา แคง, แม โลว โบง แบน โฮง แบน โฮง. บอ นา แคง บอ นา เรต, แม โลว พ็อห แฆร. 15แม ยี โลว โบง รึร ซังโพว ตี, แตห โต็ง อัน โอย มาย็อห กานีห. แตห นา เตียม อัน พัน ฆึร กานีห, นา จา อัน โอย ฆึร กานีห. 16แม บอ โลว ตับ รึร ตี, แตห อึณ โลง หลึอม อู บลาก อู กานีห. อู บลาก แม โลว โบง มาโลห. นา แคง, แตห อึณ มึห โอย คร็อง. อึณ โลว มึห อู คร็อง นา ครึม, อู คร็อง นา กาแต, ปอ อู คร็อง นา แดง. แม โลว โบง รึร ซังโพว ตาง ตี ปาย ตี. 17โอว ดี แตห อึณ ฆลาย กืน แดง กาดาย, แตห อึม ปูน โตต กาดาย. ปาย ตี โอว ดี ปยาต แวน โตต ดอน โมยว อี มึห พึอม, อี มึห อาซาก. อาเซ อี กอย แดง กาดาย, อัน ดี ยัม โตต. 18โอว ยี ดี ดัว กาดีก ซัดฌา ดี แม. แม อาโนว, แม โลว ลึบ แคง รึร ซังโพว ตาง ตี. บอ แม บอ ฆอน แม บอ อีบึณ แม เฆ เอา แม, เบ ดอน อี โลว ลึบ. 19อึณ มึห บอ โดว ซัดดาวา ดอน โมยว อี มึห อาซาก, แม โลว ดึห เบลห เฆ แคง รึร ซังโพว ตี, อู โมยว อู ฆู, แตห เฆ กอย รึม โดบ แม, แกวะ แตห เฆ ชึม. 20อึณ บอ มึห อาโมยว มาซีม ดอน โมยว บอ มึห อาโมยว โดว ซัดดาวา แบน โมยว แบน โมยว, บอ อาโมยว โดว ซัด อี มึอน ฮาว แดง กาดาย, เฆ ดอน โมยว โลว ลึบ แคง รึร, อู โมยว อู ฆู, แตห อาโมยว เฆ ลอด, แกวะ แตห เฆ ยัม. 21แม ยี โลว ดึห ตัห ปี ดี โฮม ดอน โมยว, แตห แม กาฌูะ อูน แคง รึร, แตห แม มึห ปี ดี โฮม. บอ แม, บอ เฆ โดว ซัดดาวา ดอน โมยว, แตห เบ มึห ปี ดี โฮม.”
22วาย อัน ตี อาโนว ตึอน วี โบง โตต แปะ แฮะ ดัม อูน เฌาพรา ดี อัน.
Voafantina amin'izao fotoana izao:
ดอ โฆว 6: pce
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2021, Wycliffe Bible Translator, Inc. All rights reserved.