ยฮ 10
10
ลอง ดูอี เฮียง มาบู
1เฌา เยซู วี ต็อห, “โอว ต็อห อาคาคัร ดี เบ. เซ อึณ มึห แวง มาบู, เซ อึณ บอ มึห ดูอี ลึบ แคง แวง ตี, เซ อัน ตู ลึบ ดี มาโลห, เซ อัน ฮาว โฮะ โล็ง ปอ อู โปละ, ดูอี ตี มูห ดา ปรา, ดา โฌน. 2อาเซ ยี ลึบ ดี มาโลห, อัน มูห ดูอี อี เฮียง มาบู ตี. 3เซ อึณ มึห ดูอี บัร มาโลห, อัน ดี วึห มาโลห, แตห ดา อี เฮียง มาบู ตึอน วี ลึบ. มาบู มืร โนว โฆรห อัน. อัน ดี บอ แดะ จืร เฆ มาบู อัน, แตห เฆ เลห แคง แวง. 4เซ มาบู แฮะ ฮอต เลห, ดา อี เฮียง เฆ, อัน ดี วี แยต ดี อาต เฆ. เฆ มืร นับ ดี โดบ อัน โกบ โนว เฆ โฆรห อัน. 5เซ อึณ ยี มูห ดูอี ปี ตู นับ เฆ มาบู, เฆ ตู โดบ อัน ดอ เหมา. เฆ ดี เตา ตัะ อัน โกบ ตู ดึอม เฆ โฆรห อัน.” 6เฌา เยซู กาลาง อูพามา ตี ดี เฆ ดา ตาง ยูดา ตึอน. เฆ ยี ตู นับ ลอง มาเซ ปี กาลาง อัน.
7โคว, เฌา เยซู วี กาลาง ปอ อู เฌณ. อัน ต็อห, “โอว กาลาง อาคัร ดี เบ. โอว ปี มาโลห แวง, แตห มาบู ปึอน ดี ลึบ. 8ดอน อี อี แฮะ ตัห อาต ตัห โอว, เฆ ปี ดา ปรา เฆ ดา โฌน. เฆ มาบู ยี ตู โทม โดบ โฆรห เฆ.
9โอว ปี มาโลห แตห อี ลึบ โดง กอย เฌาพรา. อาเซ ลึบ แคง มาโลห ตี, โอว ดี บอ คยอด อัน. อึณ ปี, อัน ดี ฮาว ลึบ ลึบ เลห เลห แคง แวง, แตห อัน ปึอน ดี โฮม เปต. 10เซ อึณ มูห ดา ปรา, อัน ตัห, แตห อัน ปึอน ดี ปรา, ปึอน ดี ง็อห เฆ มาบู, แตห เฆ ชึม. โอว ยี ตัห, แตห โอว ดัว อาซาก กามาย ดี ดูอี อี ปี มาบู, แตห อึณ บอด, แตห อึณ หมึอม ดี เฆ.
11โอว ปี ดูอี เฮียง มาบู อี หมึอม. ดูอี เฮียง มาบู ตี, อัน ดี คัม ดี ยัม กาดาง มาบู อัน. 12เซ อึณ ยี มูห อี ฌาง ดี บัร มาบู, อัน โลว บัร มาบู อี เฮา อี ตู มูห มาบู อัน. อัน ฮี ยึร มาโซว แปร ตัห, อัน ดี บอ นับ ดี เตา แวน มาบู ตี. ปัน ตี มาโซว แปร ตี ตัห โบง แตห มาบู ดืน กาย็อห. 13ดูอี อี ฌาง ดี บัร มาบู อี, อัน ดี เตา โกบ มูห อัน ดูอี ฌาง. อัน ตู กาเว มาบู ตี.
14โอว ยี ปี ดูอี อี เฮียง มาบู อี หมึอม. โอว นับ มาบู อี มูห โกรว โอว. บอ มาบู โอว เฆ ตี เฆ มืร นับ โอว. 15ปาย ตี, บอ เฌาพรา นับ โอว, บอ โอว นับ เฌาพรา. โอว มืร ดี คัม ดี ยัม กาดาง ดูอี อี ปี มาบู. 16โอว บอ มึห มาบู แบน โปละ แบน โปละ, อี ตู กอย แคง แวง นี. โอว โลว แดะ บอ เฆ แตห เฆ ตัห. บอ เฆ ดี โทม โฆรห โอว. แฮะ ฮอต, อึณ ดี มึห มี พึง มาบู อู พึง. บอ ดูอี อี เฮียง มาบู ดี มึห มี อู วี. 17โกบ คัม โอว ดี ยัม, ฆูณ โอว ร็อก โอว. โกบ ร็อก อัน ดี โอว, อัน ดี วี ดัว อาซาก ดี โอว. 18อาว มึห อาเซ ปึอน ดี ง็อห ยัม โอว เซ โอว ตู ควาง. โอว มึห ปวน ดี ควาง เฆ ง็อห อาซาก โอว. โอว บอ มึห ปวน ดี วี ยีต วี อีม. อึณ มูห ฆูณ โอว, อัน แฮะ จัร โอว โบง ปาย ตี.”
19เฆ ดา ตาง ยูดา วี โทม โฆรห ตี, อึณ วี แตห เฆ ตู ลาย โพรม ปอ อู เฌณ. 20เฆ กืน ต็อห, “อัน มึห กานัม กอย แคง โดว อัน. รึร, มืร อัน รึร. เหมา อึณ ปาย ปี โทม เบ โฆรห อัน?”
21มัง อี ต็อห, “โฆรห ปี กาลาง อัน ตู ปี โฆรห ปี กาลาง ดูอี อี มึห กานัม. เซ อึณ มูห กานัม, อัน ตู แป ดี โบง แตห ดูอี งาย อับ วี ยึร.”
ลอง ดูอี อี ตู หณึม
22ปัน ตี อึณ มูห อาคราว ดี โบง เฆ บลอย โหลห เฆ โฮว เฌาพรา, ดอ บาง เฆ เฌาพรา กอย นา แคง. ดอ โบง เฆ บลอย ตี, อึณ มูห อาคราว ฆัด เฆียด. 23ดอ อัน ตี เฌา เยซู ฮาว แคง แวง โฮว เฌาพรา. อัน กอย กาตัด เฌโรบ อี จืร เฌโรบ อาซาโลวโมว. 24เฆ ดูอี อายูดา วี ตัห โดง กอย อัน ต็อห, “อึณ ดี บอ เหลณ แคะ เหมา, แม กอ ดี แตห เย นับ ซีคยา อาเซ แม มูห? แตห แม กาลาง โฆรห ซืร ดี เย, เซ แม มูห ดูอี ปี ร็อห ปี ตึย เฌาพรา, อี ดี คยอด เย.”
25เฌา เยซู วี ต็อห, “โอว แฮะ ฮอต กาลาง ซืร ดี เบ. เบ ยี ตู หณึม โอว. อี หมึอม อาม กาเซา แปะ แฮะ โบง โอว แบน โมยว แบน โมยว, อึณ แตห เบ นับ ซีคยา ลอง โอว. อึณ มูห ปี จัร เฌาพรา โอว โบง. 26โกบ ตู มูห เบ มาบู โอว, เบ ตู หณึม ปี ดึอม กาลาง โอว ดี เบ. 27เซ อึณ มูห มาบู โอว, เฆ โนว โฆรห โอว. บอ โอว นับ เฆ. เฆ มืร โดบ โอว. 28โอว ดี บอ แตห เฆ กอย รึม โดบ เฌาพรา เซเซ. เฆ ตู ชึม ดอ เหมา. อึณ มืร ตู มึห อาเซ อี แป ดี ดึห เลห เฆ ดี โอว. 29ฆูณ โอว แฮะ ดัว เฆ ดี โอว. อัน แฮะ ตาง หลึอม โตต. อาว มึห อาเซ นับ ดี พาด เฆ ดี ฆูณ โอว. 30บอ ฆูณ โอว บอ โอว, ยาย ปี อู วี.”
31โกบ กาลาง อัน โฆรห ตี, เฆ ดูอี อายูดา วี ดึห มาว ต็อห ดี วึณ ดี เฌา เยซู, แตห อัน ยัม. 32เฌา เยซู วี ต็อห ดี เฆ, “ฆูณ โอว แฮะ ฮอต แตห โอว โบง นา หมึอม แบน โมยว แบน โมยว แตห เบ ยึร. อึณ มูห โกบ นา หมึอม โมยว เหมา เบ ต็อห ดี ดึห มาว วี วึณ ดี โอว แตห โอว ยัม?”
33เฆ ดูอี อายูดา วี ต็อห, “อาว มูห, เย วึณ แม โกบ โบง แม นา หมึอม. เย วึณ แม โกบ กาลาง แม โฆรห อี แคณ เฌาพรา. อึณ ปี, แม ซี แบน เฌาพรา.”
34เฌา เยซู วี ต็อห, “แคง บับ ดารา เบ แฮะ แดม อูน ลอง เฌาพรา ต็อห ปาย นี, ‘โอว แฮะ ดึอม ต็อห, “เบ แฮะ แบน เฌาพรา.”’ 35โฆรห เฌาพรา ตี อี แดม อูน แคง บับ เฌาพรา อาว ปึอน แวน. อัน เฌา แฮะ ฮอต ต็อห, เฆ ดูอี อี โทม โฆรห เฌาพรา ดี วี แบน เฌาพรา. 36เซ อึณ ปาย ตี, เซ โอว ต็อห, โอว มูห ฆอน เฌาพรา, เหมา อึณ ปาย ปี ต็อห เบ, โอว กาลาง โฆรห อี แคณ เฌาพรา? อึณ มูห โอว, ฆูณ โอว แฮะ แตห โอว แบน ดูอี อี ซีงา บอด, แตห โอว โลง แดง กาดาย. 37เซ โอว ตู โบง แคะ ปี จัร ฆูณ โอว, เบ ตู โลว หณึม โอว. 38เซ อึณ ยี หมาน, โอว โบง ปี จัร ฆูณ โอว, เบ ซัะ หณึม โอว, เบ แฮะ โลว หณึม นา หมึอม อาม กาเซา แปะ แฮะ โบง โอว. ปัน ตี อึณ ดี บอ ลึห ดี น็อห เบ, เบ ดี บอ นับ, บอ เฌาพรา บอ โอว กอย กาโดบ, อาว ปึอน กาย็อห.” 39ปัน ตี เฆ ต็อห ดี เหมต อัน ปอ อู เฌณ. อัน ยี เลห ฮาว.
40เฌา เยซู วี กาโลห แบลง ยอดาน, ฮาว ฌัม โดง ดึอม กอย ดา ซารา อายอฮาน ตึอน ดอ จึบ อัน ดูอี แคง อึม. อัน บอ กอย ดี ตี, 41อึณ วี มึห ดูอี กืน ตัห โดง กอย อัน. เฆ วี ต็อห, “ดา ซารา อายอฮาน ตู ดึอม โบง นา หมึอม อาม กาเซา. แคะ ปี กาลาง อัน ลอง ดูอี นี, ดอน โมยว แฮะ หมาน แฮะ มูห.” 42โดง กอย อัน ตี, อึณ มึห ดูอี กืน อี หณึม เฌา เยซู.
Voafantina amin'izao fotoana izao:
ยฮ 10: pce
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2021, Wycliffe Bible Translator, Inc. All rights reserved.