ยฮ 4
4
ลอง เฌา เยซู กาลาง โฆรห ดี อีบึณ แคง อืง ซามารี
1เฆ ดา ตาง แคง พึง พารีแซ กอ นับ, เฆ ดูอี อี ตัห ดี เฌา เยซู แตห อัน จึบ เฆ แคง อึม, แตห เฆ แบน ดีแบ อัน, เฆ กืน หลึอม ดีแบ ดา ซารา อายอฮาน ตึอน. 2มาแล, อาว มูห เฌา เยซู อี จึบ ดูอี แคง อึม, อึณ มูห ดีแบ เฌา เยซู อี โบง ปาย ตี. 3ดอ นับ เฌา เยซู ลอง พึง พารีแซ ตึอน, อัน วี เลห อืง ยูดา, วี ฮาว อืง ฆาลีเล.
4ดอ ฮาว อัน โดบ อึณเตณ อัน โลว กาโลห อืง ซามารี. 5อัน ตัห ฌัม แคง มืง ซีดา. มืง ตี กอย แคง อืง ซามารี. อึณ กอย กาตัด กาดาย ปี ดัว อาโกบ ดี ฆอน อัน อี จืร อาโยว. 6โดง กอย อัน ตี, อึณ มึห อึม คึม อี ดึอม มูห อึม คึม อาโกบ ตึอน. เฌา เยซู แฮะ นูน ดี ฮาว โดบ อึณเตณ. โคว, อัน ฮาว ตูต ดี โคบ อึม คึม ตี. ดอ อัน ตี แฮะ ฌัม กาแต ซีแง. เฆ ดีแบ อัน แฮะ ฮาว ลึบ แคง มืง ตึอน, ฮาว จึห ปี ดี โฮม เฆ.
7-8อึณ ยี มึห อีบึณ อู วี, อัน มูห ดูอี อาโมยว ซามารี. อัน ตัห ต็อห ดี ต็อะ อึม. เฌา เยซู ต็อห ดี อัน, “แตห โอว เดียง อึม คอ อี แจก.” 9อีบึณ ตึอน วี ต็อห ดี อัน, “โอว มูห อีบึณ อาโมยว ซามารี. แม ยี มูห ดูอี อาโมยว ยูดา. เหมา อึณ ปาย ปี หมาณ แม แตห โอว ดัว อึม ดี แม?” (เฆ ดูอี อายูดา ตู ตา ซีลัยะ ปี ตา ดูอี ซามารี).
10ปัน ตี เฌา เยซู วี ต็อห, “เซ แม นับ ปี ดี ดัว เฌาพรา ดี อี, เซ แม บอ นับ อาเซ โอว มูห อี หมาณ แม ดัว อัน เดียง อึม, แม ดี บอ วี หมาณ ดี อัน. แฮะ ฮอต อัน ดี วี ดัว ดี แม อึม อี แตห อาซาก ดี อี.”
11อีบึณ ตึอน วี ต็อห, “ซารา, แม ตู มึห ดี โฆ็ง ปูง เฆ วัน ดี ต็อะ อึม. บอ อึม คึม ตี แฮะ ลึก. แม ดี บอ ดึห ดี เหมา อึม อี ดัว อาซาก ดี อี ตี? 12อึณ มูห ฆูณ ดัง เอ, อี จืร อาโกบ, อัน แฮะ ดึอม ฆึห กาเดา อึม คึม ตี. บอ อัน บอ โดว ซัดดาวา อัน บอ ฆอน อัน แฮะ ดึอม เดียง อึม นี. ปี ต็อห แม ดอ ตี นี, อึณ ปี, แม ต็อห แม ตาง หลึอม ดา อาโกบ ตึอน.”
13ปัน ตี เฌา เยซู วี ต็อห ดี อัน, “ดอน อี อี เดียง อึม ตี, อัน ดี วี กาปราณ. 14อาเซ ยี เดียง อึม ปี ดัว โอว ดี อัน, อัน ตู วี กาปราณ ดอ เหมา. ปี ดัว โอว ดี อี, อึณ ดี แบน ปี อึม คึม อี กอย แคง น็อห ดูอี เซเซ, อี แตห ดูอี กอย รึม โดบ เฌาพรา เซเซ.”
15อีบึณ ตึอน วี ต็อห, “แม ซารา, แตห แม ดัว อึม ฌึร ตี ดี โอว, แกวะ ฮู แตห โอว วี กาปราณ, แกวะ ฮู แตห โอว โลว ตัห โดง กอย อึม คึม นี.”
16เฌา เยซู วี ต็อห, “แม ฮาว แดะ อีมาย แม, แตห บาย วี ตัห โดง กอย โอว.”
17อีบึณ วี ต็อห, “โอว ตู มึห อีมาย.”
18เฌา เยซู วี ต็อห, “แฮะ หมาน ปี ต็อห แม. แม ตู มึห อีมาย. แม แฮะ ดึอม มึห อีมาย พัน วี. บอ อีมาย อี กอย รึม โดบ แม ดอ ตี นี, อาว มูห อีมาย แม.”
19ปัน ตี อีบึณ วี ต็อห, “ซารา, โอว แฮะ นับ, แม มูห ดูอี อี บยาน โฆรห เฌาพรา. 20ฆูณ ดัง เย แฮะ ดึอม กรึบ เฌาพรา แดง นอน ดอย. เบ ดูอี อายูดา ยี ต็อห, โลว กรึบ เฌาพรา แคง มืง เยรูซาแลม.”
21เฌา เยซู วี ต็อห, “แตห แม หณึม โฆรห โอว นี. อึณ ดี ฌัม อาคราว ดอ ตู กรึบ เบ เฌาพรา บอ อา โปละ. บอ แดง นอน ตี บอ แคง มืง เยรูซาแลม เบ ตู กรึบ อัน เฌา. 22เบ ดูอี อาโมยว ซามารี เบ กรึบ อัน เฌา ปี ตู นับ เบ. เย ยี กรึบ อัน เฌา ปี นับ เย. โคว, อึณ มูห ดูอี อาโมยว ยูดา อี นับ ลอง เฌาพรา คยอด ดูอี, วี แตห บอ อี เฮา นับ. 23-24อาคราว อัน ดี ตัห, มาแล อัน แฮะ ฮอต ตัห ดอ ตี นี. ดอ อัน ตี อึณ มูห น็อห พึอม เฌาพรา อี แตห อี นับ ลอง เฌาพรา อี มูห ฆูณ เอ. อัน ดี แตห ดูอี กรึบ เฌาพรา ดอน นา ดอน โปละ. เฌาพรา ตู มึห โดว โบ็ง, อัน ยี มูห มี น็อห พึอม. โคว, อาเซ บอ กรึบ เฌาพรา, อัน โลว แตห น็อห พึอม เฌาพรา ลึบ แคง น็อห อัน, แตห อัน กอ นับ นา หมาน. แฮะ ฮอต อัน ดี บอ ปึอน ดี กรึบ เฌาพรา. บอ เฌาพรา ซี แตห ดูอี ฌึร ตี กรึบ อัน.”
25อีบึณ ตึอน วี ต็อห, “โอว นับ, อึณ ดี มึห ดูอี ปี ร็อห ปี ตึย เฌาพรา. เฆ ดี แตห อัน จืร ดา อี คยอด ดูอี. เซ ดูอี ตี ดี ตัห, อัน ดี มาโนว เย, แตห เย นับ ดอน โมยว.”
26เฌา เยซู วี ต็อห ดี อัน, “อึณ มูห โอว, อี กาลาง โฆรห ดี แม, โอว ดี คยอด ดูอี.”
ลอง ปี ดี โฮม เฌา เยซู
27ดอ กาลาง อัน ปาย ตี, เฆ ดีแบ อัน วี ตัห แคง มืง. เฆ มืร อาม โกบ กามวน อัน ดี อีบึณ อู วี. ยี ตู มึห อาเซ อี ดีหมอด อัน ต็อห, “มาเซ ปี โบง แม, เหมา อึณ ปาย ปี โฆรห แม ดี อีบึณ ตี?”
28ปัน ตี อีบึณ วี เบลห อูน กาโละ อึม อัน ดี โคบ อึม คึม ตึอน. อัน วี ลึบ แคง มืง, วี กาลาง ดี อี เฮา ต็อห, 29“เบ ตัห ยอด อีมาย อู วี. อัน แฮะ แค ดี โอว ลอง หมาบ ดอน โมยว แปะ แฮะ ดึอม โบง โอว. โอว ทาง, อัน มูห ดูอี ปี ร็อห ปี ตึย เฌาพรา แตห อัน คยอด ดูอี.” 30อัน แฮะ ฮอต กาลาง ปาย ตี, เฆ ดูอี กืน วี เลห แคง มืง, ฮาว โดง กอย เฌา เยซู.
31ดอ เวณ อีบึณ ตึอน, เฆ ดีแบ เฌา เยซู วี จัร อัน โฮม โบม. เฆ ต็อห, “ซารา, แตห แม โฮม.”
32อัน ยี ต็อห ดี เฆ, “เบ ตู นับ มาเซ ลอง ปี ดี โฮม โอว.”
33ปัน ตี ดีแบ อัน วี ลาย กาลาง, วี ต็อห, “อาเซ แฮะ ดัว ปี ดี โฮม ดี อัน?”
34เฌา เยซู ยี ต็อห ดี เฆ, “เฌาพรา แฮะ ตึย โอว ตัห ดี นี. เซ โอว โบง ฆาน ปี จัร เฌาพรา โอว โบง, เซ โอว บอ โบง แตห อึณ ฮอต โตต, โอว แฮะ ดาคึย. อึณ ปี โอว แฮะ แพ โบม. 35เบ บอ นับ ดี ต็อห, ‘อึณ โลว บอ พวน มาเฆียน, อึณ กอ ดี ฌัม อาคราว โซะ โหงว.’ โอว ยี ต็อห ดี เบ, แตห เบ ยอด ดูอี, แตห อึณ ปี เบ ยอด มาน เบ. ดอ ตี นี อึณ ปี โหงว แฮะ ฮอต ซีน, แฮะ ปึอน โซะ. 36อาเซ ยี โซะ โหงว, อัน ดี วี ปึอน รูห อัน. ดูอี โซะ โหงว ตี, เฆ ปี ดูอี อี กาลาง ดี อี เฮา ลอง เฌาพรา, แตห เฆ หณึม, แตห เฆ ปึอน ดี กอย รึม โดบ เฌาพรา เซเซ. ดอ อัน ตี บอ ดูอี อี บรัด โหงว บอ ดูอี อี โซะ โหงว แฮะ ดาคึย. 37เบ กาลาง โฆรห หมาน, เซ เบ ต็อห, ‘อู วี บรัด โหงว, ปอ อู วี โซะ โหงว.’ 38โอว ยี ตึย เบ, แตห เบ ปี ดูอี อี โซะ โหงว ปี ตู บรัด เบ. อึณ มูห อี เฮา, เฆ แฮะ ดึอม โบง ฆาน ปี เฆ ดูอี อี บรัด โหงว. เบ ยี ปี ดูอี อี โดบ ดี ปัน, จอย เฆ อี โบง ฆาน อู ซีณ ดอ โฆว อัน.”
ลอง เฆ ดูอี อาโมยว ซามารี
39เฆ ดูอี อี แฮะ เลห แคง มืง, ฮาว ฌัม โดง กอย เฌา เยซู, เฆ กืน แฮะ วี หณึม อัน. เฆ มูห ดูอี อาโมยว ซามารี. เฆ แฮะ ยึร โฆรห แปะ แฮะ แค อีบึณ ตึอน ดี เฆ. เฆ กอ หณึม โกบ แฮะ ต็อห อัน, “อีมาย ตึอน แฮะ ฮอต แค โตต ดี โอว ลอง หมาบ แปะ แฮะ ดึอม โบง โอว ดอน โมยว.” 40เฆ ดูอี อาโมยว ซามารี, อี แฮะ ตัห โดง กอย เฌา เยซู, เฆ วี หมาณ, แตห อัน กอย รึม โดบ เฆ. โคว, อัน กอย โดง กอย เฆ อาดา อา ซีแง. 41อึณ วี มึห ดูอี กืน, เฆ หณึม วาย โทม เฆ โฆรห เฌา เยซู.
42ปัน ตี เฆ วี ต็อห ดี อีบึณ ตึอน, “เย ตู หณึม โกบ กาลาง แม ลอง อัน ดี เย. เย แฮะ ฮอต โทม โฆรห อัน, เย มืร นับ ซีคยา, ดูอี ตี มูห อัน เฌา อี ดี คยอด ดูอี แดง กาดาย. อัน มูห อัน เฌา ปี ร็อห ปี ตึย เฌาพรา แตห อัน คยอด ดูอี.”
ลอง เฌา เยซู ปีแกน ฆอน ดา ตาง
43แฮะ ฮอต ปวน อา ซีแง ตึอน, เฌา เยซู วี เลห มืง ซามารี, วี ฮาว อืง ฆาลีเล. 44อัน วี กาลาง ลอง โดว บรีม อัน. อัน ต็อห, “เซ อึณ มูห ดูอี อี บยาน โฆรห เฌาพรา, เฆ ดูอี อี กอย แคง มืง บรีม อัน, เฆ ตู โรวเซ อัน.” 45ดอ ฌัม อัน แคง อืง ฆาลีเล, เฆ ดูอี แคง มืง ตี วี รวห อัน. เฆ นับ โตต แปะ แฮะ โบง อัน แคง มืง เยรูซาแลม ดอ ลึบ อัน ดี บลอย ตึอน. โคว, บอ เฆ แฮะ ฮาว ลึบ บลอย ตี.
46ปัน ตี เฌา เยซู บอ เวณ มืง คานา อี กอย แคง อืง ฆาลีเล. แคง มืง ตี, อัน แฮะ ดึอม โบง แตห อึม แบน อึม มางูน. อึณ ยี มึห อามาด คูนดีคัม อู วี. อัน มึห ฆอน อีมาย อี เซา กาเซา. อัน กอย มืง กาเปนารึม. 47อัน แฮะ ยึร อี เฮา ต็อห, เฌา เยซู แฮะ เลห อืง ยูดา วี ตัห ลึบ อืง ฆาลีเล. ปัน ตี อัน วี ฮาว โดง กอย เฌา เยซู, วี หมาณ, แตห เฌา เยซู ฮาว โดบ อัน, แตห เฌา เยซู ปีแกน ฆอน อัน, อี แฮะ รีน ดี ยัม ตึอน.
48เฌา เยซู ยี ต็อห ดี อัน, “เซ เบ ตู ปึอน ดี ยึร นา หมึอม อาม กาเซา แบน โมยว แบน โมยว, เบ ตู ซี หณึม.”
49อามาด คูนดีคัม ตึอน วี ต็อห, “ซารา, แตห แม ตัห โดบ โอว, อาต ยัม ฆอน โอว.”
50เฌา เยซู วี ต็อห, “แตห แม เวณ, ฆอน แม แฮะ แกน.”
ปัน ตี ดูอี ตึอน บอ หณึม โฆรห เฌา เยซู วี เวณ กาง อัน. 51ดอ ฮาว อัน โดบ อึณเตณ, แดเจณ อัน วี ตัห กาตูณ อัน ต็อห, “ฆอน แม แฮะ แกน.” 52ปัน ตี อามาด ตึอน วี ดีหมอด อัน ต็อห, “ดอ เหมา อัน แฮะ แกน?” เฆ วี ต็อห, “อาหมึร ดอ โนะ อู นารี วาย กาแต ซีแง, โดว อัน อาว ฮู กาฮัวะ.” 53ปัน ตี ฆูณ อัน ตึอน วี นับ, ฆอน อัน แฮะ แกน ดอ กาลาง เฌา เยซู, “ฆอน แม แฮะ แกน.” ปัน ตี บอ อัน บอ อึณ โฮม อัน, เฆ บอกาเฆลียด หณึม เฌา เยซู. 54ปาย ตี เฌา เยซู แฮะ โบง นา หมึอม อาม กาเซา ปอ อู โมยว วาย เลห อัน แคง อืง ยูดา วี ตัห ฌัม อืง ฆาลีเล, แตห อึณ แบน อา เฌณ คา นี.
Voafantina amin'izao fotoana izao:
ยฮ 4: pce
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2021, Wycliffe Bible Translator, Inc. All rights reserved.