Mataio 11
11
1Emetu Iesu mer tigri abara kaimeg giz tuelf le, ege E adem bakeamulu abele utebelam, a ereuerem pako etomeret uiaba utebim.
2Ege Ioane asoli abele audubare meta ge Keriso ra dorge, epe E abi namarida neis abara kaimeg giz,
3A abim kega, Nako mama le tabarki, a nako keriba ko naokaili nerute le?
4Ege Iesu uiabi daratager, kega, Ua bakeamulei a etomeret Ioaneim a gaire lu uaba asoli, pako dasmerei:
5Gaire le pone asadamer bakaerti, uader le ibibi nakasiri, a lepera idigir, pako grip batapili a asoli, uader le eumid ko eded akaida, a etomeret abele debe mer uiabim gaire lu kak le.
6E gaire debe lu nagri abele le, nole kari asared kak.
7Uiaba bakeamulei, ege Iesu uiabim marau le lakub Ioaneialam, Nalugem uaba bakeuare a dasmerare abele sumez ge? Nako abele mebud uag demali?
8Nalugem uaba bakeuare a dasmerare? Nako abele le am uali gebegeb uali? Dasmerare, uiaba am uali gebegeb am uali, bameri opole ra meta ge.
9Nalugelam uaba bakeuare dasmerare? Nako perofeta? Ageakar kaka uabi detagerare, E aule tumem perofeta.
10Abelelam E pedali, mer detali abim, Dasmer, kaka namarid kara merkem mara opem, E paret mara gab mara opem.
11Ageakar kaka uabi detagered, Nole nerute le tekuei a esmelu kosker giz, aule tumem Ioane Bapataiso, epe abele le kebi kale abele kotor baselaia, E aule tumem abim.
12Ditimedlu Ioane Bapataiso ra kerker a bakedid peirdi, kotor ra baselaia gaire le etager, a uiaba saserim le etager ais.
13Abelelam gaire perofeta giz mer detautarare, pako abele gelar giz bakedid Ioaneim.
14Ese uaba lagelag abi egared, a Elia pedali, E emeretalam naokaili ko tabarki.
15Abele le grip nagri asoli, debele E asoli.
16Nalu kara mer babisdarie abele nosik le? Mokakalam kebile giz, uiaba bamer abele zegur uteb ge, uiaba darabgerare uiaba kaimeg,
17Kega, Keriba uabi burar diberi, a uaba nole ginar keribim; a keriba uabi ebazuer, a uaba nole ebazoli op detapili keribim.
18Abelelam Ioane tabarki E nole eroli a nole eri, ege uiaba mer abim, E nagri demoni abi dog.
19Ege Le la Uerem ko tabarki E eroli a eri, ege uiaba mer abim, Dasmer, E au leuer lag, a au lagelag uaina eri, a telona ra kaimeg pako uit le giz! Epe nei atker abele pardale barkak tonar abara omasker.
20Ege E dauersili gaire uteb ikerare gaire abara adigir, abelelam uiaba nole obazgeda kak.
21Korasina ae; kaka au nasenase marim! Betesaida ae; kaka au nasenase marim! abelelam, ese ikerare gaire adigir Turo a Sidonaim emeretlam, uiaba obazgeda abele zegerzeger uali pako abele bi.
22Peike kaka uabi detagerare, Kebikebi Turo a Sidona abele gerger itimer uabim.
23Mama Kaperenauma, ko agisilu bakedid kotor ge, a ma ko abi batauered muige abele seol; abelelam ese ikerare Sodomaem gaire adigir mari dog, E mena niai tekuei bakedid peirdi.
24Peike kaka uabi detagerare, Kebikebi abele ged Sodoma abele gerger itimer marim.
25Peike abele haua ge Iesu abi detager, kega, Kaka marim esoao, kara Baba ae, kotor Opole pako geseb ge, abelelam ma ispi gaire lu ike gaire pardale le giz pako umele le, a ma etomeret gaire lu ike uiabim gaire uerem giz:
26Peike kara Baba ae, abelelam mara lag mokakalam.
27Kara Aba kari nakuarare gaire lu uridili; nole le erdali abele Uerem, epe abele Aba; a nole le erdali abele Aba, epe Uerem tepteb, pako nerute le Uerem lagelag abi etomeret.
28Ua karim tabakeuare uaba au asiasi, a peper lu baguarare, a kaka uabi ikuar sagim kak.
29Uaba baguare kara lu bao, a pako uaba kari ereuerem; abelelam kakanali le gebgeb nerkep a mapodan: iaueakai uaba lamar nagri nerezili utebe ge.
30Abelelam kara lu bao nole peper kak, a kara lu nole sagim kak.
Voafantina amin'izao fotoana izao:
Mataio 11: ulk1902
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Published by the British and Foreign Bible Society in 1902.