Lukas 6
6
Anaguhuꞌino Yesus detobhe gandum ne oleono Sabat
6:1-5
Mat 12:1-8; Mrk 2:23-28
1Ne oleono Sabat tangasano Yesus nolalo weo kaampono gandum, anaguhuꞌino detobhemo wunano gandum, tadokokiꞌao limando maka dohumaaꞌe. 2Tamaka seemie hodua miendo Farisi dopugau ambado, “Noafa melempagiꞌaoꞌomu faliano oleono Sabat?” 3Tamaka Yesus notobhoosida ambano, “Miinaꞌo basaeꞌomu gahaꞌa nehabuno Omputo Daud wakutuuno wutono bhe mie mangkafie doꞌahomo? 4Ingka nopesua weo Lambuno Lahataꞌala, nealamo roti kapopanga so Lahataꞌala maka nohumaaꞌe bhe nowaꞌandae dua mie mangkafie. Weo tubhono agamantoomu roti anaꞌa o falia dohumaaꞌe mie sigaoꞌano, mpahinomo imamu.” #1Sam 21:1-6 5Ambano toha Yesus, “Anano Manusia Ompunomo dua oleono Sabat, nokokuasa namotantu atorano Sabat.”
Yesus nefekaꞌosa mie ne oleono Sabat
6:6-11
Mat 12:9-14; Mrk 3:1-6
6Seꞌoleono dua Sabat Yesus nopesuamo weo lambu kasambaheaꞌa maka nofofoinaꞌu. Ne itu nandoo seemie mokepeno limano sembali, o suanano. 7Pande-pande Kitabi bhe miendo Farisi dokaꞌo-kaꞌondo Yesus bhahaꞌi kaowu namekaꞌosa mie amaitu ne oleono Sabat, somo tingkuno damoꞌalae. 8Tamaka Yesus nopandeꞌaane fekihindo, maka nopugaumo ne mie mokepeno lima maitu ambano, “Mai, meehe-ehe te wise ini.” Mie anaꞌa noehemo. 9Pada aitu Yesus nopugaumo ne andoa ambano, “Ameenakoomu, weo tubhono agamantoomu nembali dehabu ae ne oleono Sabat? Habu metaa kaa habu modai? Dafofodadi kaa dafopongko?” 10Pada aitu Yesus nofolili matano ne andoa maitu, maka nopugau ne mie mokepe naꞌa ambano, “Fonsoho limamu!” Mie anaꞌa nofonsoho limano, gahaꞌa noꞌosamo.
11Miendo Farisi naꞌa nohehe bhakendo lasao dopugau-gau sapada-pada andoa bhahaꞌi damafaꞌiane Yesus maitu.
Yesus nesaliꞌi rasuluno ompulu hoduano
6:12-16
Mat 10:1-4; Mrk 3:13-19
12Wakutuu anaꞌa Yesus nofonimo te kabhawo maka kosealoꞌae nosambahea ne Lahataꞌala. 13Nomentae nosaliꞌimo anaguhuꞌino dahumatoe maka nepili ne olotando andoa maitu doompulu hodua. Andoa maitu nokonadamo rasulu. 14Neaꞌindo: Simon nekonando dua Petrus, Andreas kakutaꞌano Simon, Yakobus bhe Yohanes, Filipus bhe Bartolomeus, 15Matius bhe Tomas, Yakobus anano Alfeus, Simon miendo Zelot, #6:15 Miendo Zelot naꞌa dokopatudhu damobebasi witeno Israel maiꞌao ne kafopahintaꞌano Roma. 16Yudas anano Yakobus bhe Yudas Iskariot. Yudas Iskariot ini hato pandano nembalimo mowano Yesus ne limano kaewa.
Yesus nofofoinaꞌu bhe dobhahi mie nefekaꞌosano
6:17-19
Mat 4:23-25
17Pada aitu dosisampu-sampuꞌamo maiꞌao te kabhawo maka dofetumpu we potateꞌano. Ne itu dobhahi sepaliꞌa mie mangkafie dohompumo bhe dobhahi dua mie sigaoꞌano. Andoa maitu domaiꞌao ne kosekaꞌewaꞌae kadieno Yudea, domaiꞌao we Yerusalem, bhe domaiꞌao dua we kadieno Tirus bhe Sidon we wiwino teꞌi. 18Kamaiꞌando dametingkeꞌao pugauno bhe so daoꞌosaꞌao ne sakindo. Mie nepesuakino seetani nofekaꞌosada dua. 19Kosasawindo mie humatono naꞌa doꞌulei lalondo damedampa Yesus, kapaꞌamo nandoo kuasa lumimbano ne Anoa sampe kosasawindo nofekaꞌosada.
Wambano dawua bhe balaa
6:20-26
Mat 5:1-12
20Pada anaꞌa Yesus noꞌondomo anaguhuꞌino bhe nopugau ambano,
“Kodawua mpuu, hintimiu ngkumaasi-asino,
hampano hintimiumo so mehapino Kafopahintaꞌano Lahataꞌala.
21Kodawua mpuu hintimiu moꞌahono ampa aitu,
hampano mada kaowu damekaweꞌikoomu.
Kodawua mpuu hintimiu moꞌaeno ampa aitu,
hampano namada kaowu mutaaꞌomu.
22Kodawua mpuu ane dabansikoomu mie bhaimiu, ane dagumihasikoomu tawa dabihidhingikoomu bhe dasumambili neamiu ne modaiꞌano hampano mangkafiomu Anano Manusia.
23Ne wakutuu anaꞌa fowulaomu lalomiu bhe manariꞌaoꞌomu kaꞌia, kapaꞌamo sakotuꞌuno nobhala ponambomiu kumantaa-ntaano te surugaa. Ingka pedamo dua aitu habundo awuaꞌindo ne ana-anabii dhamani wawono.
24Tamaka balaamoomu, hintimiu mohangkaeano,
hampano weo kahangkaeamiu itu poꞌawaanemoomu kalawesino lalomiu.
25Balaamoomu, hintimiu moweꞌino ampa aitu,
hampano mada kaowu moꞌahoomu.
Balaamoomu, hintimiu mutaano ampa aitu,
hampano mada kaowu mopeaꞌomu bhe moꞌaeꞌomu.
26Balaamoomu, ane kosasawindo mie damudhikoomu,
hampano pedamo dua naꞌa habundo awuaꞌindo ne mie mpahaana-anabiino.”
Moasiꞌao kaewamu
6:27-36
Mat 5:38-48
27“Ampamo kaowu hintimiu metingke kanau itu, amohatokoomu, moasianda kaewamu, habu metaa ne mie bansiko, 28mesaloomu kabarakati so mie bhatataꞌiangko, sambaheaꞌandaomu mie meꞌawutiko. 29Ane dotofa bhagamu, fodoliane dua bhagamu sewetano. Ane doala bhetamu #6:29 Sakotuꞌuno: dhubamu . waꞌanda dua bhe bhadhumu. 30Ane bhe mie nokonisalo ne hintu, waꞌanda. Ane fehebuaꞌamu doalaemo mie bhaimu, koise suli mesaloe. 31Bhahi-bhahiꞌae kapoindalomu so nehabundo mie bhaimu ne hintu, habue dua ne mie bhaimu.
32Ane moasiꞌao kaowu mie moasiangko, o ae gahaꞌa so tipudhiꞌano? Ingka mahingga mie kodhosa doasiꞌao dua mie moasianda. 33Ane humabu metaa kaowu ne mie humabu metaano ne hintu, o ae gahaꞌa so tipudhiꞌano? Ingka mie kodhosa dohabu dua peda naꞌa. 34Ane konifoada kaowu ne mie bhaimu mbaꞌinomo posahunaꞌao damosuliangkoe, o ae gahaꞌa so tipudhiꞌano? Ingka mie kodhosa dofoada dua mie kodhosa sigaoꞌano, patudhundo sumuli daꞌumawae napototo kabhahino. 35Tamaka hintimiu, moasianda kaewamu, habu metaa ne andoa. Fofoada tamaka koe posahunaꞌao sumuli umawae, maka meꞌawa ponambo bhahi. Hintimiu membaliomu anaꞌino Lahataꞌala foliuno kuasa, kapaꞌamo Lahataꞌala netaa dua lalono ne mie tapa mepandeꞌaono katumpuno lalo bhe mie modai. 36Mobhelaanda lalo mie bhaimu pedamo dua Amamu nofomobhelaꞌao lalo.”
Pobhita-bhitahaki
6:37-42
Mat 7:1-5
37“Koise bhitahaki mie bhaimu, keana dua nobhitahakiko Lahataꞌala. Koise hukumu mie bhaimu, keana dua nohukumuko Lahataꞌala. Amponida mie bhaimu maka naꞌumamponiko dua Lahataꞌala. 38Waꞌanda mie bhaimu maka Lahataꞌala namaꞌangko dua, meꞌawa kaganta bhalano nefohuka bhe neꞌendu ampa napondawuti dasumungkaangkoe ne awimu. Kapaꞌamo kaganta nepakemu mbali mie bhaimu namaꞌangkoe dua Lahataꞌala so wutomu.”
39Yesus nofohatoanda dua sehonda kapalenda ambano, “Bhahaa naembali seemie kabunto naetonda kabunto? Ingka so kaowu daondawuꞌao weo ola kohoduando. 40Seemie anaguhu miina namoliuꞌea gurunoa, tamaka nopooli kaowu nepoguhuꞌaono nopototomo bhe guruno.
41Noafa bhahaa wohaꞌao kanenano habha weo matano bhahitiemu, gahaꞌa itu kakebhano sau weo matamu miina mandeꞌaanea? 42Peda ae dua pugauꞌao ne bhahitiemu, ‘Bhahitie, mai amaliangko kanenano habha weo matamu itu’, gahaꞌaitu kakebhano sau weo matamu miina mohaea. Hintu mie mehaaꞌulano! Alimo kadeki kakebhano sau weo matamu itu, so nentaleaꞌao umondo maka mali kanenano habha weo matano bhahitiemu.”
O sau bhe bhakeno
6:43-45
Mat 12:33-35
43“Sau metaa pae bhe kapoolia nakobhakeꞌao modaiꞌano, pedamo dua anaꞌa sau tapa metaaꞌano pae bhe kapoolia nakobhakeꞌao metaaꞌano. 44Sepuꞌu-sepuꞌu sau dopandeꞌaane ne bhakeno. Ingka bhakeno wohaꞌa miina daꞌumutae ne kahoku kokihi, tawa bhakeno angguru daꞌumutae ne daha-daha. 45Mie metaa nefolimba metaaꞌano nomaiꞌao ne kampebuniꞌano lalono metaaꞌano; mie modai nefolimba modaiꞌano. Kapaꞌamo tibhokaꞌano ne wiwi nolua nomaiꞌao weo totono lalo.”
Haa honda sandi
6:46-49
Mat 7:24-27
46“Noafa kona kanauꞌomu, ‘Ompu, Ompu’, gahaꞌaitu miina mangkafieꞌomu pugauku? 47Mie maino ne Idi maka nofetingke pugauku bhe noangkafie, amohatoangkoeꞌomu bhe laꞌae pototoꞌano. 48Anoa ini nopototo bhe seemie mefoeheno lambu. Mefoeheno lambu naꞌa neseli nofekandalo-ndaloe maka nofongkoha sandino ne kontu dempa. Gahaꞌa nonandoomo luano oe bhe mawa noangkai lambu aitu tamaka miina namoolie nogegohaane hampano katangkano katifoeheꞌano. 49Ampamo kaowu metingkeno pugauku tamaka miina namangkafiea, mie aitu nopototo bhe mie mefoeheno lambu te wawono wite melaa, miina nakosandia. Sanoangkaiꞌe mawa lambu anaꞌa lasao nosansa, kadaha maka kadaino.”
Voafantina amin'izao fotoana izao:
Lukas 6: mnbSD
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2022, Wycliffe Bible Translators, Inc. All rights reserved.