Lukas 8
8
Hobhine umondofaono Yesus
8:1-3
1Miina naomponaa pada anaꞌa Yesus noliligimo kota bhe liwu nefolele Bhihita Metaa Kafopahintaꞌano Lahataꞌala. Weo kala-kalano naꞌa dopobhaiane anaguhuꞌino ompulu hoduano, 2bhe hobhineꞌi nefekaꞌosano nomaiꞌao ne kuasano seetani bhe ne sabhaha saki. Andoa naꞌa Maria nekonando dua Magdalena, pada nofolimbaane fitu bansa seetani mesuakie; 3Yohana hobhineno Kusa, Susana bhe hobhineꞌi sigaoꞌano. Kusa naꞌa mandeꞌaonomo kamalino kolaki Herodes. Hobhine andoa ini doꞌondofao kafaraluuno Yesus bhe sabhangkaꞌino dopake kanandoodo wutondo.
Kapalendano meꞌewino wine
8:4-15
Mat 13:1-23; Mrk 4:1-20
4Mie bhahi dosipumpu kansuhu ne Yesus domaiꞌao ne sabhaha kota. Dobhahi kaowu humompuno, nopugaumo nepakeanda kapalenda. 5Ambano, “Nandoo seemie mekaampono nokala neꞌewi wine. Tangasano noꞌewi wine maitu nandoo mondawuꞌano ne kaangkaꞌa, gahaꞌa doangka mie dofinda-findaꞌie bhe dopadae dohumaaꞌe kaꞌuhi lumola. 6Sigaꞌa nondawu ne kamoꞌali, hato notumbu lasao noleleu mbaꞌinomo miina naeꞌawa oe. 7Sigaꞌa nondawu ne wunta-wuntano kahoku kokihi notumbu nopoowa-owa, tamaka noꞌontiꞌie kahoku kokihi naꞌa ampa nomate. 8Sigaoꞌano dua nondawu ne wite menowu, hato nokobhake sampe moꞌono lentuꞌa kabhahino.” Pada nopugau peda naꞌa, Yesus nopugaumo nofekabhala suahano, “Ane dokotingala, tabeano dametingke!”
9Pada aitu anaguhuꞌino dofeenaꞌaomo maꞌanano kapalenda saꞌituini ne Yesus. 10Anoa notobhoosidamo ambano, “Hintimiu dowaꞌangkoomu kadawu so mandeꞌaoꞌomu rahasiano Kafopahintaꞌano Lahataꞌala, tamaka mie sigaoꞌano dofohatoda weo kapalenda, neanomo mahingga daꞌumondo-ondoe pae damohaea, mahingga dametingke pae dalumosangiea. #Yes 6:9
11Maꞌanano kapalenda saꞌituini peda aini. O wine naꞌa bhoasaono Lahataꞌala. 12Mondawuꞌano ne wiwino kaangkaꞌa maꞌanano mie metingkeno tamaka nomai Kafeompuꞌando seetani noala bhoasao anaꞌa maiꞌao weo totono lalondo keana doparasaea, keana dua dosalamati. 13Mondawuꞌano ne kamoꞌali, maꞌanano mie metingkeno bhoasaono Lahataꞌala naꞌa, lasao dotahimae bhe doꞌiaꞌane, tamaka miina nakopahakaa weo totono lalondo. Doparasaea sebantaha kaowu, sadeꞌawa kasabha dohunsa kaparasaeando kosowo-sowondo. 14Mondawuꞌano weo kahoku kokihi maꞌanano mie metingkeno bhoasaono Lahataꞌala tamaka nobhahi dofekihi so kadadiꞌando, so kahangkaeando bhe so kambakano namisindo. Kosasawiꞌae naꞌa nopesua weo totono lalondo maka noꞌontiꞌi bhoasaono Lahataꞌala sampe miina nakohasilia. 15Mondawuꞌano ne wite menowu maꞌanano mie metingkeno bhoasaono Lahataꞌala, dofekataaꞌe mpuu weo totono lalondo metaaꞌano. Andoa dopotaami kansuhu ampa dokohasili.”
Kapalendano kantalea
8:16-18
Mrk 4:21-25
16Nopugaumo toha Yesus ambano, “Miina bhe mesulano kantalea maka dosongkowiane bhengki tawa doteiꞌe we pandano kaodoꞌa. Tamaka ane desula kantalea dohunsae ne kangkailaoꞌano neanomo kosasawindo mie mesuano weo lambu damoha tilangano. 17Kapaꞌamo kosasawiꞌae tifebuniꞌano damotiumbae, sabhaha rahasia damekantaleaꞌie bhe damolelee ne mie bhahi. 18Dadiꞌanomo taꞌo tingalamu fekataa-taaꞌe! Laꞌae kokanandoono datumubhahiane; tamaka tapa kokanandoono, o ae maka dua nekonano kanandoono damalae.”
Inano bhe bhahitieꞌino Yesus
8:19-21
Mat 12:46-50; Mrk 3:31-35
19Pada aitu dohatomo inano bhe bhahitieꞌino Yesus tamaka miina damoolia dapoꞌawaane hampano kabhahindo mie. 20Dofohatoemo mie ambado, “Inamu bhe bhahitieꞌimu deehe-ehe we simbali, gaondo dapoꞌawaangko!” 21Tamaka Yesus tanotobhoosi ambano, “Mie metingkeno bhe dhumalangino bhoasaono Lahataꞌala, andoamo ini inaku bhe bhahitieꞌiku.”
Yesus nefoonto kawea moꞌosa
8:22-25
Mat 8:23-27; Mrk 4:35-41
22Seꞌoleo Yesus bhe anaguhuꞌino dosawimo ne bhangka maka nopugauanda ambano, “Dopolimbaanaomu we sewetano!” Dadiꞌanomo dobhosemo. 23Tangasano dohela Yesus noodomo. Gahaꞌa tanosihatoꞌamo gahuha weo teꞌi naꞌa sampe bhangkando noiꞌi dewisekimo balaa. 24Anaguhuꞌino lasao dofowanue, ambado, “Guru, guru, dabinasamoomu.” Yesus nowanu lasao nobhoohai kawea bhe oe mamuhuno maitu, sampe dofeontomo. Oeno teꞌi suli nolinto. 25Ambano Yesus, “Ne amai gahaꞌa kaparasaeamiu?” Anaguhuꞌino doteꞌi bhe domente maka dopuga-pugau sapada-pada andoa ambado, “O mie ae bhahaa Anoa ini? Mahingga nepahintangi kawea bhe oe doangkafie!”
Yesus nefolimba seetani nomaiꞌao ne miendo Gerasa
8:26-39
Mat 8:28-34; Mrk 5:1-20
26Yesus bhe anaguhuꞌino dosedemo we liwundo miendo Gerasa we sewetano teꞌino Galilea. 27Safonino te wite nosumpuiꞌemo seemie moꞌane nomaiꞌao ne kota aitu. Mie anaꞌa nopesuakie seetani; nomponamo nelembi, miina naeate weo lambu tamaka neate ne tombuno lia kafokobuhuꞌa. 28Sanowoha Yesus nekei-keimo maka nosudhumo notaohao sombano bhe nopugau ampa kabhalano suahano, “O ae patudhumu ne idi ini, Yesus Anano Lahataꞌala foliuno kuasa? Aesalo mpuu koise fodee-dee kanaua.” 29Kapugauꞌano peda naꞌa mbaꞌinomo Yesus nopahintangi seetani naꞌa nalumimba namaiꞌao ne mie aitu. Seetani anaꞌa nentelamo nokuasai mie amaitu. Mbali nomudaꞌao dhaganiꞌano dohantee bhe dolangkee, tamaka katapuno naꞌa nopadae nobhotulie maka nowowoꞌoe seetani we pada molinoꞌano. 30Yesus nofeenamo ambano, “Laꞌae gahaꞌa neamu?” Ambano, “Neaku Legion”, #8:30 Maꞌanano Legion setagua tantara. kapaꞌamo dobhahi seetani mesuakie. 31Pada peda naꞌa seetani maitu desalomo ne Yesus koise natumududa damesua weo ola tapa kotompa.
32Ne itu nandoo kawaindo wewi ⸤ nekanea⸥ tangasano doliwu te laano kabhawo. Seetani andoa naꞌa desalomo ne Yesus naꞌumundaꞌaanda damesuaki kawaindo wewi aitu. Yesus noꞌundapi kamesalondo. 33Dadiꞌanomo seetani lasao dolimba maiꞌao ne mie aitu maka dopesuaki kawaindo wewi naꞌa. Kosekawaindo wewi maitu dofilei we wiwino pimpi maka doꞌohofi wutondo weo teꞌi sampe dolomo.
34Sadowoha kadhadhia aitu, dhagaꞌino wewi ⸤ kakanea⸥ naꞌa lasao dofilei defolele bhihita we kota bhe liwu-liwu momaꞌoꞌano. 35Dadiꞌanomo miendo liwu dofisilimba-limbaꞌamo daꞌumondo kadhadhia anaꞌa. Dohato ne Yesus, dowohamo mie nekadunsano seetani naꞌa nengkoha-ngkoha ne wiseno Yesus, nokopakeamo bhe nototomo. Andoa doteꞌi sepaliꞌa. 36Mie mohaꞌaono wuntano matano kadhadhia amaitu dofohatomo mie bhahi peda amai mie nepesuakino seetani maitu dofosalamatie. 37Pada naꞌa kosasawindo mie ne kadieno Gerasa maitu desalo ne Yesus nakumalamo napikihunsaꞌao liwundo, kapaꞌamo doteꞌi sepaliꞌa. Dadiꞌanomo Yesus nosawimo ne bhangka maka dahumela dasumuli kundodo. 38Gahaꞌa mie nehunsano seetani naꞌa nesalomo ne Yesus naꞌumundaꞌaane namangkafie. Tamaka Yesus notudue nakumala ambano, 39“Sulimo se lambumu maka metula-tulaꞌaomo sabhaha nehabuno Lahataꞌala ne wutomu.” Dadiꞌanomo mie aitu noliligimo kosekaꞌewaꞌae kota nopoleleꞌao sabhaha nehabuno Yesus ne wutono.
Yesus nofodadi anano Yairus bhe nefekaꞌosa seemie hobhine
8:40-56
Mat 9:18-26; Mrk 5:21-43
40Hato nosuli, mie bhahi doꞌia sepaliꞌa dosumpuiꞌemo hampano kosasawindo daanumo doanta-antagiemo. 41Gahaꞌa nomaimo seemie mandeꞌaono lambu kasambaheaꞌa, neano Yairus. Anoa nosudhu notaohao sombano nesalo ne Yesus nakumala se lambuno, 42kapaꞌamo anano hobhine kaenseemie tamateꞌano; umuhuno napeompulu haa taꞌumo. Weo kala-kalano dahumope se lambuno Yairus, mie bhahi dopoꞌua-ua ne sohihino Yesus.
43Gahaꞌa ne itu nandoo seemie hobhine, ompulu haa taꞌumo nomaiꞌie kansuhu wulano miina bhe katiehea. Tanopadamo kanandoono nopoagoane, tamaka bhe seemie miina bhe moolie. 44Hobhine aitu nomaꞌoti Yesus maiꞌao we kundo maka nodingku dhambeno dhubano. Gahaꞌa tanosimoꞌosaꞌamo, o hea nofetumpumo. 45Ambano Yesus, “Laꞌae gahaꞌa dumingku kanau?” Tamaka miina bhe mekapunano. Dadiꞌanomo nopugaumo Petrus ambano, “Guru, ingka wohada kabhahindo mie lumibuko bhe umua-uako!” 46Tamaka ambano Yesus, “Nandoo seemie dumingku kanau, kapaꞌamo anamisi bhe kuasa lumimbaꞌano maiꞌao ne wutoku.” 47Nopandeꞌaomo lalono gahaꞌa habuno maitu notipandeꞌaomo, hobhine maitu nodhulu te wise nogugue kateꞌino. Lasao nosudhu notaohao sombano ne Yesus maka netula-tula ne mie bhahi noafa katidingkuꞌano Yesus bhe peda amai tanosimoꞌosaꞌamo. 48Ambano Yesus ne hobhine anaꞌa, “Anaku, hampano kaparasaeamu ne Idi, osalamatimo. Kalamo weo katohopo.”
49Tangasano Yesus nopugau, nohatomo seemie katudu maiꞌao we lambuno Yairus bhe nopugau ambano, “Anamu nomatemo, koemo dua fekasabha Gurua.” 50Tamaka Yesus nofetingkee, tanopugau ne Yairus ambano, “Koe tikendaa, taparasaeamo ne Idi, anamu tetewei nasumalamati.” 51Sahatondo se lambuno Yairus, Yesus miina naꞌumundaꞌaanda damangkafie weo lambu, ampamo Petrus, Yohanes bhe Yakobus, poowa inano bhe amano anaꞌi anaꞌa. 52Kosasawindo mie dekangkoꞌae doꞌaefimo anaꞌi aitu. Tamaka Yesus tanopugau ambano, “Koise moꞌaeꞌomua, anaꞌi aini miina namatea tamaka noodo.” 53Gahaꞌa mie bhahi tadofuta-futaaꞌi Yesus kapaꞌamo anaꞌi aitu dopandeꞌaane nomatemo. 54Pada anaꞌa Yesus nointahamo limano anaꞌi aitu bhe nopugau ambano, “Anaku wanuꞌo toha!” 55Inawano anaꞌi aitu nosuli maka tanosiwanuꞌamo. Yesus notududamo damakandee. 56Kamungkulano anaꞌi anaꞌa domente sepaliꞌa, tamaka Yesus noꞌeleꞌaanda daetula-tulaꞌao kadhadhia aitu ne laꞌae maka dua.
Voafantina amin'izao fotoana izao:
Lukas 8: mnbSD
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2022, Wycliffe Bible Translators, Inc. All rights reserved.