ཡུ་ཧན་ན། 17

ཡི་ཤུ་ག་སྨོན་ལམ།

1ཡི་ཤུ་གི་ ཨོ་ཐ་བ་གསུངས་ཉི་ཆུམ་དེན་གེ་ ཞིང་ཁམས་ག་ཏཱན་གཟིགས་ཐཱན་ གསུངས་མ་ལ་ ཨ་པ་ དུས་ཙུན་རེན་པ༌ཅ། ནཱན་གི་ ན་ག་ཟ་ག་ གཟི་བརྗིད་གནང༌ཤོ། ཧང་ཡ་དག་ནེ་ལ་ ཟ་གི་ན་ག་ གཟི་བརྗིད་ཕུལ་བེ་རེ་ཆེན། 2ནཱན་གི་ རོ་ཀ་ཏཱན་གནང་ཁཱན་ སོ་ངོ་ཐམས་ཅན་ག་ ཚེ་མ་འགྱུར་བརྟན་པ་བིན་ཆེན་དག་པ་གི་ སོ་ངོ་ཐམས་ཅན་ག་ཐུང་ཀ་ ནཱན་གི་ རོ་ཀ་དབང་ཚད་གནང༌མ། 3ཚེ་མ་འགྱུར་བརྟན་པ་ག་དེན་ཐ་ཤོ་ དཀོན་མཆོག་ངོ་མ་ ནཱན་ཐུར་ཤ་གི་ཁཱན་ཁེ་པ་ གུམ་ཡེ་ལེ་ཁེ༌ལེ། ཉི་ནཱན་གི་ཀུན་ཏི་ཁཱན་ ཡི་ཤུ་ཁིརིས་བུ་ གུམ་ཡེ་ལེ་ཁེ༌ལེ། 4ནཱན་གི་ ཇ་ག་གནང་ཁཱན་ལའི་ ཐམས་ཅན་རང་ ཇི་གི་འགྲུབ་ཕ་ཨ་དེན་གེ་ ཇི་གི་འཛམ་གླིང་ག་ ན་ག་གཟི་བརྗིད་གེན་མ༌ཅ། 5ཉི་ཨོམ་ཨ་པ་ ན་ག་སྐུན་མདུན་ག་ ནཱན་གི་ ཇ་ག་གཟི་བརྗིད་གནང༌ཤོ། འཛམ་གླིང་མ་བཀོད་པེ་ གོ་མ་གེ་རང་ ནཱན་ཀབ་ཉི་ཆོ་ཁཱན་ ཇ་ག་གཟི་བརྗིད་ཁེ་པ་ ནཱན་གི་ཇ་ག་གནང༌ཤོ།

6འཛམ་གླིང་གེ་ ནཱན་གི་ ཇ་ག་ཏཱན་གནང་ཁཱན་བ་ཀ་ ཇི་གི་ནཱན་གེན་ཉི་ཆུ་མ༌ཅ། རོག་ཏེ་བ་ཤོ་ ན་ག་གི༌ལ། ཉི་ནཱན་གི་ རོག་ཏེ་བ་ ཇ་ག་ཏཱན་གནང༌མ། རོག་ཏེ་བ་ཀི་ ན་ག་གསུང་ག་ ཆ་གནས་ཐ་ཝ༌ཅ། 7ཉི་ཨོམ་ ནཱན་གི་ ཇ་ག་གནང་ཁཱན་ ཐམས་ཅན་རང་ ནཱན་གེ་ཨ་ཉི་ཨུན་ཅ་གི་ལ་དག་ཉི་ རོག་ཏེ་བ་ཀི་སེན༌ཅ། 8ཧང་ཡ་དག་ནེ་ལ་ ནཱན་གི་ ཇ་ག་གནང་ཁཱན་གསུང་ག་བ་ ཇི་གི་ རོག་ཏེ་བ་ཀ་བི༌ཝ། ཉི་རོག་ཏེ་བ་ཀི་ ཨོ་ཉ་གསུང་ག་ཆ་ཐ༌ཝ། ཇང་ཤོ་ ན་ག་སྐུན་མདུན་གེ་ ཨོ་ཕ་གི་ལ་དག་ཉི་ རོག་ཏེ་བ་ཀི་ ཏེན་ཏེན་ཨ་ཉི་རང་ སེ་ཝ༌ཅ། ཉི་ནཱན་གི་ ཇང་ཀུན་ཏི་ཝ་གི་ལ་དག་ཉི་ རོག་ཏེ་བ་ཀི་ དད་པ་ཨ་ཝ༌ཅ།

9ཇི་གི་ རོག་ཏེ་བ་ཀ་དེན་གེ་ སྨོན་ལམ་ཏབ༌ཅ། ཇི་གི་འཛམ་གླིང་ག་དེན་གེ་ སྨོན་ལམ་ཏབ་ཅ་མང་གི། དག་པ་ཀབ་ཉི་ ནཱན་གི་ ཇ་ག་ཏཱན་གནང་ཁཱན་བ་ཀ་དེན་གེ་ སྨོན་ལམ་ཏབ་ཅ་གི༌ལ། ཧང་ཡ་དག་ནེ་ལ་ རོག་ཏེ་བ་ཤོ་ ན་ག་གི༌ལ། 10ཇ་ག་ཆོ་ཁཱན་ ཐམས་ཅན་རང་ན་ག་གི༌ལ། ཉི་ན་ག་ཆོ་ཁཱན་ ཐམས་ཅན་རང་ ཇ་ག་གི༌ལ། ཉི་ཇ་ག་གཟི་བརྗིད་ཁེ་པ་ རོག་ཏེ་བ་ཀ་ཐུང་ཀེ་ཨ་ཉི་གེན༌ཅ། 11ཇང་ན་ག་སྐུན་མདུན་ག་ཏཱན་ ཨོ་ཕ་ཨ་དེན་གེ་ ཇང་འཛམ་གླིང་ག་ ཨོ་ཐ་གེ་ལག་ཉི་ ཆོ་ལེ་མང་གི། དག་པ་ཀབ་ཉི་ རོག་ཏེ་བ་ཤོ་ འཛམ་གླིང་ནང་ཀ་རང༌ཅ། དམ་པའི་ཨ་པ་ ན་ག་མཚན་ག་སྟོབས་དབང་གི་ རོག་ཏེ་བ་ཀ་ སྐྱབས་ཨ་ཉི་གནང༌ཤོ། ཨུ་ཉུ་ཤོ་ ནཱན་གི་ ཇ་ག་གནང་ཁཱན་མཚན་གི༌ལ། ཧང་ཡ་དག་ནེ་ལ་ ཇང་དང་ ནཱན་ཐུར་ཆོ་ཝ་པུརུས་ཀིན་ཨ་ཉི་ རོག་ཏེ་བ་བུ་ ཐུར་རི་ལེ་རེ་ཆེན། 12ཇང་རོག་ཏེ་བ་ཀབ་ཉི་ ཆོ་ལེ་གང་ཀ་ ནཱན་གི་ ཇ་ག་གནང་ཁཱན་ མཚན་ག་ཐུང་ཀེ་ཨ་ཉི་ ཇི་གི་རོག་ཏེ་བ་ཀ་ སྐྱབས་ཨ་ཉི་ཐ༌ཝ། རོག་ཏེ་བ་ཀ་པོང་ཀེ་ མེ་པ་དི་ལེ་ཁེ་ཁཱན་ཐུར་མ་ཏོག་པ་ བཱརའ་ཨི་བི་རང་ མེ་པ་དི་ཝ་མཱན༌ཅ། ཉི་ཨུ་ཉུ་བུ་ གསུང་རབ་གེ་ཤོ་ཁཱན་ཁེ་པ་ དེན་ཐ་འགྲུབ་ཕེ་དེན་གེ་གི༌ལ།

13ཉི་ཨོམ་ ཇང་ན་ག་སྐུན་མདུན་ག་ཏཱན་ ཨུན༌ཅ། དག་པ་ཀབ་ཉི་ ཇ་ག་ཤོ་ནང་ཁེ་པ་ རོག་ཏེ་བ་ཀ་ནང་ཀ་ ཇོབ་ཇོབ་ཨ་ཉི་ཨུན་ཆེན་དག་པ་གི་ ཇང་འཛམ་གླིང་ག་ཆོ་ལེ་གང་ཀ་ ཇི་གི་ཨོ་ཐ་བ་ཡེག༌ཅ། 14ཇི་གི་རོག་ཏེ་བ་ཀ་ ན་ག་གསུང་བི༌ཝ། ཉི་འཛམ་གླིང་གི་ རོག་ཏེ་བ་ ཟེས་པུ་མཱན༌ཅ། ཧང་ཡ་དག་ནེ་ལ་ ཇང་འཛམ་གླིང་ག་ མང་གི་ཝ་པུརུས་ཀིན་ཨ་ཉི་ རོག་ཏེ་བ་བུ་ འཛམ་གླིང་ག་མང་གི། 15རོག་ཏེ་བ་ འཛམ་གླིང་གེ་ བསྣམས་ཅོ་དག་ཉི་ ཇི་གི་སྨོན་ལམ་ཏབ་ཅ་མང་གི། དག་པ་ཀབ་ཉི་ ངན་པ་ཆོ་ཁཱན་གེ་ སྐྱབས་ཨ་ཉི་གནང་ཤོ་དག་ཉི་ སྨོན་ལམ་ཏབ༌ཅ། 16ཇང་འཛམ་གླིང་ག་ མང་གི་ཝ་པུརུས་ཀིན་ཨ་ཉི་ རོག་ཏེ་བ་བུ་ འཛམ་གླིང་ག་མང་གི། 17རོག་ཏེ་བ་དེན་པ་གི་ཨ་ཉི་ དམ་པ་ཅོད་ཉི་གནང༌ཤོ། ཉི་ན་ག་གསུང་ཤོ་ དེན་པ་གི༌ལ། 18ནཱན་གི་ ཇང་འཛམ་གླིང་ནང་ཀ་ ཀུན་ཏི་ཝ་པུརུས་ཀིན་ཨ་ཉི་ ཇི་གི་བུ་ རོག་ཏེ་བ་ འཛམ་གླིང་ནང་ཀ་ཀུན་ཏིན༌ཅ། 19རོག་ཏེ་བ་ཀ་ཡོར་ཀེ་ ཇི་གི་ ཇང་ཏེན་བུ་ དམ་པ་ཅོད༌ཅ། ཧང་ཡ་དག་ནེ་ལ་ རོག་ཏེ་བ་བུ་ དེན་པ་ཨ་ཉི་རང་ དམ་པ་རིན་ཆེན༎

ཡི་ཤུ་གི་ སློ་མ་ཐམས་ཅན་ག་དེན་གེ་ སྨོན་ལམ་ཏ་པ༌ལ།

20ཇ་ག་སྨོན་ལམ་ཤོ་ རོག་ཏེ་བ་ཀ་དེན་གེ་ཤ་མང་གི་ དག་པ་ཀབ་ཉི་ རོག་ཏེ་བ་ཀ་ཆཱས་ག་ཐུང་ཀེ་ཨ་ཉི་ ཇ་ག་དད་པ་ཨ་ཁཱན་བ་ཀ་ དེན་གེ་བུ་གི༌ལ། 21ཇང་ན་ག་ནང་ཀ་དང་ ནཱན་ཇ་ག་ནང་ཀ་ བཞུགས་པ་པུརུས་ཀིན་ཨ་ཉི་ རོག་ཏེ་བ་བུ་ ཨ་ཧ་ནང་ཀ་ཆོན་ཆེན་དག་ཉི་ ཇི་གི་སྨོན་ལམ་ཏབ༌ཅ། ཉི་རོག་ཏེ་བ་བུ་ ཨ་ཆིང་ཀབ་ཉི་ཐུར་རིན་ཆེན། ཉི་ཤ་ ཇང་ནཱན་གི་ ཀུན་ཏི་ཝ་ལ་དག་ཉི་ འཛམ་གླིང་གི་ སེ་ལེ་རེ༌བེ།

22ཨ་ཆིང་ཐུར་ཆོ་ཝ་པུརུས་ཀིན་ཨ་ཉི་ རོག་ཏེ་བ་བུ་ ཐུར་རིན་ཆེན་དག་པ་གི་ ནཱན་གི་ ཇ་ག་གནང་ཁཱན་ གཟི་བརྗིད་ཁེ་པ་ ཇི་གི་ རོག་ཏེ་བ་ཀ་ བི་ཝ༌ཅ། 23ཇང་རོག་ཏེ་བ་ཀ་ནང་ཀ་དང་ ནཱན་ཇ་ག་ནང་ཀ་ ཧང་ཡ་དག་ནེ་ལ་ རོག་ཏེ་བ་ ཐམས་ཅན་རང་ ཐུར་རིན་ཆེན། ཉི་ཤ་ ཇང་ཤོ་ ནཱན་གི་ཀུན་ཏི་ཝ༌ལ། ཉི་ནཱན་གི་ ཇང་ཕང་པ་ད་བུ་རང་ རོག་ཏེ་བ་བུ་ཕང་པ་དག་ཉི་ འཛམ་གླིང་གི་སེ་ལེ་རེ༌བེ། 24ཨ་པ་ ནཱན་གི་ ཇ་ག་གནང་ཁཱན་བ་ ཇང་ཆོ་ས་ག་ ཇང་ཀབ་ཉི་ཆོན་ཆེན་དག་ཉི་ ཇ་ག་སེམས༌ཅ། ཉི་ཤ་ ནཱན་གི་ ཇ་ག་གནང་ཁཱན་ གཟི་བརྗིད་ཁེ་པ་ རོག་ཏེ་བ་ཀི་ ཐོང་མེ་རེ་ཆེན། ཧང་ཡ་དག་ནེ་ལ་ འཛམ་གླིང་མ་བཀོད་པེ་གོ་མ་གེ་རང་ ནཱན་གི་ ཇང་ཕང་པ༌ཅ།

25དྲང་པུ་ཆོ་ཁཱན་ཨ་པ་ འཛམ་གླིང་གི་ ནཱན་གུམ་མ་ཡེན་ཐཱན་རང་གི་ནེ་བུ་ ཇི་གི་ནཱན་གུམ་ཡེན༌ཅ། ཉི་ནཱན་གི་ ཇང་ཀུན་ཏི་ཝ་གི་ལ་དག་ཉི་ རོག་ཏེ་བ་ཀི་སེན༌ཅ། 26ཇི་གི་ རོག་ཏེ་བ་ཀི་ ནཱན་གུམ་ཡེ་ཝ་ཅོད་པ༌ཅ། ཉི་ཇི་གི་ ནཱན་གུམ་ཡེ་ཝ་ཅོད་ཉི་རང་ཆོ༌ལེ། ཧང་ཡ་དག་ནེ་ལ་ ན་ག་སྙིང་རྗེ་ ཇ་ག་དེན་གེ་ཆོ་ཁཱན་ཁེ་པ་ རོག་ཏེ་བ་ཀ་དེན་གེ་རིན་ཆེན། ཉི་ཇང་བུ་ རོག་ཏེ་བ་ཀ་ནང་ཀ་ ཆོ་ལེ་རེ་ཆེན་དག་པ་གི་གི༌ལ༎

Voafantina amin'izao fotoana izao:

ཡུ་ཧན་ན། 17: TNTB

Asongadina

Hizara

Dika mitovy