San Juan 2
2
Eluchia nú unga eyeche Caná
1Bichia rriuna, unga tucu eluchia eyeche Caná nú nchiucuꞌ lu iliu Galilea. Nu leꞌca nzu naꞌ Jesuse zeꞌe, 2nu leꞌca uzeneꞌ bee bene Jesuse cuna bee beneꞌnu nu uya beella lu eluchia zeꞌe. 3Chenu ulaxu biñu, che uni naꞌ Jesuse lunu:
―La lucuaꞌ beella biñu.
4Nu ucuaqui Jesuse:
―¿Xinu rnilu nucuaꞌ lua naa? Lascaꞌ riña hora nú riꞌá lunú riala nú riꞌá.
5Pero María naꞌ Jesuse chu unilla lubee bene enu rriꞌi elietsa zeꞌe:
―Uriꞌihua ye nú ninu luhua.
6Nu zeꞌe nucuaꞌa xuꞌcu etsu quiee, nú riucheꞌ inza rquiꞌña bee bene Israel para nú lecaxi naa beei tucu nú neca costumbreꞌ beei, nu riuꞌu como tucu ayuꞌu litro inza liñi cada tucua bee etsu zeꞌe. 7Chequie uni Jesuse lubee bene enu rriꞌi elietsa zeꞌe:
―Uriꞌichehua bee etsuquieꞌ inza.
Nu chenu uchela bee etsu, 8uni Jesuse lubeei:
―Nee uhuahua lleꞌnae, udeꞌteꞌhua lubee bene enu nuyaꞌ cuendaꞌ eliñi.
Nu scua uriꞌi beei.
9Nu bene enu nuyaꞌ cuenda eliñi zeꞌe uriꞌilla preo inza nú unga biñu, nu lá riꞌilla beyaꞌ cá enza uchiuꞌe, nediyaꞌtsia bee bene enu rriꞌi elietsa zeꞌe nucuaꞌ, xne liꞌibeei uya chiyaꞌbeeii, che ubixia bene enu nuyaꞌ cuenda eliñi zeꞌe niyu enu xia, 10nu unilla lui:
―Ye bee bene rluti rritsiꞌbeei biñu nzeꞌca, nu chenu ungueꞌla bee bene huaxi biñu cuaꞌ, cheelá rritsiꞌbeei biñu nú la neca nzeꞌca. Pero liꞌilu uduꞌcheꞌelu biñu nzeꞌca quieꞌ para nú rritsiꞌlue hasta neelá.
11Nucuaꞌ neca milagro rluti nú uriꞌi Jesuse, uriꞌinu milagro quieꞌ eyeche Caná nú nchiucuꞌ lu iliu Galilea, scua ulubeꞌnu poder nú rluꞌcunu nu uchili arquiꞌ bee beneꞌnu liꞌinu.
12Chenu ulaxu nú unga nucuaꞌ che nzanu eyeche Capernaum, cuna naꞌnu, cuna bee bichinu cuna bee beneꞌnu, nu zeꞌe ucuaꞌa beella chiucu chuna bichia.
Utiliacaꞌ Jesuse bee bene labe eleꞌyaꞌ indu llene Jerusalén
(Mt. 21:12-13; Mr. 11:15-18; Lc. 19:45-46)
13Lunú axula nzu baxcu eliñiꞌ bee bene Israel, che uya Jesuse eyeche Jerusalén. 14Nu labe eleꞌyaꞌ indu llene Jerusalén zeꞌe ulañiꞌnu bee bene enu ruti bee uꞌnaꞌ, cuna bee sanchi, cuna bee paloma, cuna bee bene enu nucuaꞌa lu mexa xiꞌla dimiꞌ bee bene. 15Chenu ulañiꞌ Jesuse nucuaꞌ, che urecheꞌnu tucu chicuete nú neca tuu para nú uhuanu ye bee bene cuna bee uꞌnaꞌ beella, cuna bee sanchiꞌ beella ruꞌu eleꞌyaꞌ indu zeꞌe, nu utsiꞌquinu dimiꞌ bee bene enu xiꞌla dimi, nu utelletanu mexaꞌ beei. 16Che uninu lubee bene enu ruti bee paloma:
―¡Uhuahua bee nucuaꞌ caꞌa! ¡La riꞌihua niꞌi paa xi neca tucu iꞌya!
17Chequie ulluꞌcu arquiꞌ bee beneꞌnu lu ichiꞌ Stichiaꞌ Diose elu rni: “Hasta nú atia la tsana arquia nú recanua niꞌlu.”
18Che uni bee bene Israel lu Jesuse:
―¿Xi milagro lubeꞌlu luru para nú riꞌiru beyaꞌ nú rluꞌculu nu rnibiyaꞌlu nú rriꞌilu scua?
19Nu ucuaqui Jesuse lubeei:
―Uchilahua induquieꞌ, nu lu chunatsia bichia recheꞌ zecane.
20Chequie uni bee bene Israel zeꞌe lunu:
―Cuarenta y seis lana uleꞌ bee bene nú urecheꞌe beei indu quieꞌ, ¿nu liꞌilu rnilu nú lu chunatsia bichia recheꞌ zecalue la?
21Pero liꞌinu rninu lu cuendaꞌ cuerpoꞌnu chenu uninu lu cuendaꞌ indu zeꞌe. 22Enzeꞌe chenu uhuañi zeca Jesuse nú ungutinu, ulluꞌcuꞌ arquiꞌ bee beneꞌnu lunú uninu, nu uchili arquiꞌbeella stichiaꞌnu nu leꞌca uchili arquiꞌ beella lunú niquie lu ichiꞌ Stichiaꞌ Diose.
Nuꞌlu Jesuse ye bee bene
23Diqui nú nzucu Jesuse eyeche Jerusalén eliñi baxcu, huaxi bee bene uyalí arquiꞌ liꞌinu chenu ulañiꞌ beei bee milagro nú uriꞌinu. 24Pero la chili arquiꞌ Jesuse lunú rnibeei, xne nuꞌlu nzeꞌcanu xa neca elliebacuꞌbeei. 25La quiꞌñanu nú nuꞌ enu ni lunu nú xa neca bee bene, xne liꞌinu nuꞌlu nzeꞌcanu xa neca elliebacuꞌ ye bee bene.
Voafantina amin'izao fotoana izao:
San Juan 2: zpl
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2010, Wycliffe Bible Translators, Inc. All rights reserved.