San Juan 2
2
Got' to wishagna' yella' le Caná
1Na' biyoṉ lla got' to wishagna' yella' le Caná daa llia gana' mbani Galileana', na' na' len xṉa' Jesúza'. 2Na' ḻekzka' goxgake' Jesúza' na' beṉ'ka' nakgake'ne' txen. 3Na' shlak chak lṉina' bibill vino c̱he'ka', na' goll xṉa' Jesúza'ne':
―Ba bibill vino c̱he beṉ'ki.
4Na'ch che' Jesúza'ne':
―¿Berac̱he nazo' nad' ka'? Biṉ' gaḻ' gon' daa llia bia' gon'.
5Per xṉeena' golle' wen mandadka':
―Ḻi gon kon bin iṉe' le'.
6Na' na' zoa x̱op yes' xen de yaj, dii choll nis, diika' chon llin kat' beṉ' Israelka' chixi chiyechgake' kon ka na ley c̱he'ka'. Na' to to yes'ka' chollan ka do shoṉ yid nis. 7Na' che' Jesúza' wen mandadka':
―Ḻi kaa nisa' ḻoo yes'ki.
Na' wda'gake'n ax̱t ka billa'chagakan. 8Na'ch che' Jesúza' ḻegake':
―Ḻi gash' lataan ṉaa na' ḻi lljeen beena' ngoo lo neen.
Na' bengake' ka golle'. 9Na' beena' ngoo lo neen bnix̱e' nisa' daa biyak vino, ni bi ṉezile' ga wza'n. Tochga wen mandadka' ṉezgakile', ḻa' ḻegaken' wdaagake' nisa'. Na'ch beena' ngoo lo neen goxe' bi'na' chshagna', 10chi'eb':
―Yog' beṉ' zigaate chdie' vino wenna', na' kat' ba weej beṉ'ka' len lṉina' dii zil, na'ch chdie' daa bi naktek wen. San li', ba bzagoo vino wenni na' ax̱t ṉaach chdio'n.
11Yeḻ' waki dga ben Jesúza' yell Canána' daa llia gana' mbani Galileana', ḻennan' bene' dii nech. Na' ka' bli'e yeḻ' wak c̱he'na' nape', na'ch beṉ'ka' nongake' ḻe' txen benḻilall'gake'ne'.
12Na' ka wde, biyaje' Capernaúma' len xṉeena', len beṉ' bisheeka' na' len beṉ'ka' nakgake'ne' txen, na' wzoagake' na' to c̱hop shoṉ lla.
Bishesh Jesúza' beṉ'ka' chit' chde lesh' chyoodo'na'
(Mt. 21:12-13; Mr. 11:15-18; Lc. 19:45-46)
13Na' ka ba zoa gaḻ' lṉi Paskwa' daa chon beṉ' Israelka', wyaj Jesúza' Jerusalénna'. 14Na' ka blline' lesh' chyoodo'na', ble'ile' lle' beṉ' chit'gake' gooṉ, xil', na' palom, na' ḻekzka' na' chi' beṉ'ka' chisha' mecha'. 15Na' ka ble'ile' ka chak, bene' to do tashj, na' kon ḻen bisheshile' yog'ḻoḻe' lesh' chyoodo'na' lente gooṉka' na' xil'ka'. Na' bzaḻee xmech beṉ'ka' chisha' mecha' lo yona' na' bishi'e mes c̱he'ka'. 16Na' beṉ'ka' chit' palomka', golle' ḻegake':
―¡Ḻi yishesh baki ni! ¡Bi gonzle lill X̱a'na' ka lao yaa!
17Na'ch beṉ'ka' nakgake'ne' txen jadingakile' Cho'a Xtill' Chioza' gana' nan: “Daa ḻe chakid' lill xḻatjo'na' ḻen wlliayi'n nad'.”
18Na'ch beṉ' Israelka' lle' na' che'gake' Jesúza':
―¿Bi yeḻ' wak gono' dii wli'n napo' yeḻ' wṉabia' kwenc̱he chono' diiki?
19Na' che' Jesúza' ḻegake':
―Ḻi yic̱hinj yoodo'ni na' lo shoṉə llazə yiyona'n.
20Na'ch che' beṉ' Israelka' ḻe':
―X̱opiyon yiz bengake' yoodo'ni, na' li' nazo' shoṉə llazə yiyono'n.
21Per daa goll Jesúza' ḻegake' ka', kwerp c̱he'nan' bsaklebile' yoodo'na'. 22Na'ch ka biban Jesúza' ladj beṉ' wetka', jadini beṉ'ka' nakgake'ne' txen daa wne', na' wyajḻe'gake' Cho'a Xtill' Chioza' na' dill'ka' be' Jesúza'.
Nombia' Jesúza' yic̱hjlall'do' yog'cho
23Na' shlak zoa Jesúza' lṉi Paskwa' Jerusalénna', beṉ' zan wyajḻe'gake' c̱he' daa ble'gakile' yeḻ' wakka' bene'. 24Per Jesúza' bi bx̱enilallee ḻegake', ḻa' nombi'e yic̱hjlall'do' yog'ḻoḻ beṉ'. 25Aga byalljile' no yee ḻe' nakan nak beṉec̱ha', ḻa' kwasḻoḻ nombi'e yic̱hjlall'do'eka'.
Voafantina amin'izao fotoana izao:
San Juan 2: zad
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2011, Wycliffe Bible Translators, Inc. All rights reserved.