Yoan 1
1
Ŋgeu to ipatooŋ ghiit pa saveeŋ ve ŋgar to Maaron, to izi inim taan ve inim tamtoghon
1Muuŋ kat, sawa to sambam ve taan tivot sone, ŋgeu to ipaghazoŋan ghiit pa saveeŋ ve ŋgar to Maaron ne inepneep. #1:1 Ila Grik aliŋadi, Yoan iwaat Krisi ighaze ye ‘logos.’ Saveeŋ ‘logos,’ pughu naol. Pughu eez, nene ‘saveeŋ.’ Pughu ite, nene ‘ŋgar.’ Pughu inim tol pani, nene mbeb to ikis mbeb tisob tineep deŋia ila inadi inadi. Ve ighaze tagham ŋgar pa Maaron aliŋa to timbooda, saveeŋ toni, nene ataam to ye ipatooŋ tau pait, ve ipaghazoŋan ghiit pa ŋgar toni. Ve saveeŋ toni, nene saveeŋ moghon maau. Saveeŋ toni, le tapiri. Ye isaav moghon, ve mbeb tisob tivot. Saveeŋ ‘logos’ pughu naol tonene tipaghazoŋan ghiit pa Krisi ve uraat toni. Ye ineep toman Maaron, ve ye Maaron. Mbnp 1:1; Yo 10:30, 17:5; Pil 2:6; 1Yo 1:1+; Syg 19:13
2Tovenen sawa to ivot muuŋ kat, ye inepneep toman Maaron. 3Maaron ighur mbeb tisob tivot ila ye nima. Mbeb eta ivot ila ataam ite paam maau. 1Kor 8:6; Kol 1:16+; Hib 1:2
4Ye to nepooŋ mata yaryaara pughu. Ve nepooŋ toni izi taan, tauto inim ghazooŋa pa tamtoghon. Yo 5:26, 8:12, 9:5, 12:46
5Ghazooŋa tonowen iyaryaar ila ndoroom lolo, ve ndoroom tapiri irau itatani maau. #1:5 Ataam ite to tatoor saveeŋ waaro tonene, nene vene: “Ghazooŋa tonowen iyaryaar ila ndoroom lolo, eemoghon yes to ndoroom ledi ghilalooŋ pani maau.”
6Maaron imbaaŋ ŋgeu eez inim, iza Yoan. 7Ye inim pa ipariaaŋ saveeŋ pa ghazooŋa tonenen. Leso igham ival tisob tighur ila toni. Mt 3:1
8Yoan, ye ghazooŋa tonenen maau. Ye inim pa ipariaaŋ saveeŋ to ŋgeu to ghazooŋa tau. Leso tamtoghon tighur ila toni. Yo 3:28+
9Tovenen ghazooŋa tau to iyaryaar pa ival tisob ve ipaghazoŋan di pa Maaron, tauto izi inim taan. Yo 8:12, 9:5; 2Kor 4:6
10Onoon, mbeb tisob to taan tivot ila ye nima. Eemoghon sawa to ye izi inim ve ineep izi taan, yes to titaghon taan ŋgara tighilaala maau. 11Ye ila ivot tau ndug toni, ve tamtoghon toni paam tighami maau. Tizuruni. Is 53:3; Yo 12:37+
12Eemoghon tamtoghon tisob to tighur ila toni ve tighami inim Tiina todi, nene ye igham ledi izadi pa tinim Maaron ndinatu. Yo 3:15; Ro 8:14+; Ga 3:26; 1Yo 3:1+
13Ndiran tonenen, siŋ to nditamandi ma nditinandi igham di tinim Maaron ndinatu maau. Ve tinim Maaron ndinatu itaghon ŋgeu eta to taan ŋgar toni ma lolo maau. Maaron tau, tauto igham di tinim ye ndinatu. Yo 3:3,5+; Tit 3:5+; 1Pe 1:23; 1Yo 5:1+
14Tovenen aghita. Ŋgeu to ipaghazoŋan saveeŋ onoon ve ŋgar to Maaron pait, tauto inim tamtoghon ve inim ineep ila sosood wa. Ye ipatooŋ Maaron tapiri ve poia toni ivot ighazooŋ, ve yei nighita pa matamai. Tauto nighilaala nighaze ye Maaron tau Natu ee moghon to ineep to Tama Maaron ve inim. Poia to Maaron toman ŋgar toni to isasavia saveeŋ onoon moghon, nene ivon ila to Natu tonowen. Pil 2:6+; Kol 2:9; 1Tim 3:16; Hib 2:14; 1Yo 1:1+
15Yoan ipariaaŋ tamtoghon pa tighur ila toni, ve isaav aliŋa tiina ighaze: “Muuŋ, you nasaav payam naghaze: ‘Ŋgeu eez pale inim muri payou. Ye iza ilib payou kat. Pasa, sawa to navot sone, ye ineep muuŋ wa.’ Nene ŋgeu tau tonene.”
16Onoon kat. Ŋgar popoia naol tivon ila to Maaron Natu, ve ye irei poia toni pa iit tasob. Tovenen poia to Maaron to aazne iza toit, nene tiina kat. Ilib pa poia toni to muuŋ ipatooŋa pait. 17Onoon, Maaron ivotia tutuuŋ toni pait ila Mose avo. Eemoghon Yesu Krisi, tauto inim ataam pa poia to Maaron iza toit, ve ipaghazoŋan ghiit pa saveeŋ onoon. #1:17 Ataam ite to tatoor saveeŋ waaro tonene, nene vene: “Eemoghon Yesu Krisi, tauto inim ataam pa poia to Maaron iza toit, ve igham saveeŋ mbuaaŋ to Maaron anoŋa ivot.” 18Tamtoghon eta to taan ighita katin Maaron nagho pa eta sone. Natu moghon to ipatooŋ Maaron nagho ve ŋgar toni pait. Pasa, ye Maaron, ve ineep Tama dige, ve Tama lolo ineep toni kat.
Yoan ŋgeu rughuzaaŋa ipariaaŋ tamtoghon pa tighur ila to Yesu
[Mt 3:1-12; Mk 1:1-8; Lu 3:1-18]
19-20Sawa eez, daba to yes Yuda to tineep Yerusalem ne, timbaaŋ ndiran pida to watooŋrau toman ŋginiiŋa pida to Rumai Tiina tila to Yoan, ve tighasoni tighaze: “Laak, yom sa ŋgeu, to ughamgham uraat tonene?”
Yoan isaav ghazooŋa padi ighaze: “You tonene, Mesia maau.” Yo 3:28
21Tovenen tighasoni muul: “Ighaze venen, avaat yom propet Ilia tou?” Mal 4:5; Mt 11:14
Ye ipamuul aliŋadi ighaze: “Maau.”
Tovenen tighasoni muul tighaze: “Wai, vene yom avaat propet tiina to nisasaŋani ne? #1:21 Ilia, ye propet ariaŋa to muuŋ ivotia Maaron aliŋa pa yes Israela. Yes Yuda tigham ŋgar pa saveeŋ to ineep ila Malakai 3:1, 4:5-6, tauto matadi iŋgal tighaze Maaron pale imbaaŋ Ilia ila ivot padi muul, leso igharaat ataam pa Mesia. Ve tighaze Maaron pale imbaaŋ propet tiina eez padi, itaghon saveeŋ to Lo 18:15-19. Pida tighaze propet tonowen pale Mesia. Ve pida tighaze ye pale igham uraat to propet moghon. Taum tonene?”
Eemoghon ye ipamuul aliŋadi muul ighaze: “Maau.”
22Tovenen tighasoni muul tighaze: “Wai, ighaze venen, yom sei kat? Upaghazoŋan taum payei lak! Leso nipaesia ghom pooi pa yes to timbaaŋ ghei ninim.”
23Tovenen Yoan isaav padi ighaze: “You ŋgeu to muuŋ, propet Isaia isavia ne ighaze:
Ŋgeu eez imboboob izi ndug balim ighaze: ‘Apasaluŋgan ataam pa Ŋgeu Tiina le deŋia moghon.’ ” Is 40:3
24-25Yes to tila tighita Yoan, ndiran tutuuŋa pida tila toman di paam. Tilooŋ Yoan aliŋa tonene, ve tighasoni muul tighaze: “Ighaze yom Mesia maau, ve yom Ilia maau, ve yom propet tiina to nisasaŋani ne maau, pughu vena to ururughuuz tamtoghon?”
26-27Yoan ipamuul aliŋadi ighaze: “Nene you narurughuuz tamtoghon pa ya. Eemoghon ŋgeu eez inepneep ila lolomim, ve yam aghilaala maau. Ye inim muri payou, eemoghon ilib payou kat. Uraat sorok inimale polaaŋ waar to duduuŋa to aghe, nene paam, you poiag irau to nagham pani maau.”
28Mbeb tonenen tisob tivot izi ndug Betania to ineep ya Yordan paŋa vena we. Pasa, Yoan irurughuuz tamtoghon izi tonowe.
Yesu, ye sipsip to Maaron
29Mboŋ le ndugizau muul, ve Yoan ighita Yesu ilaagh ŋarua inim. Tovenen isaav ighaze: “Aghita. Nowe sipsip to Maaron. Ye inim pa ireu sosor to tamtoghon to taan. Igham 12:3+; 1Kor 5:7; 1Pe 1:19; Syg 5:6
30Ŋgeu tonene, to muuŋ nasavia payam naghaze: ‘Ŋgeu eez pale inim muri payou. Eemoghon ye ilib payou kat. Pasa, ye ineep muuŋ wa, ghoro you navot.’ #1:30 Muuŋ kat ve inim, Yesu inepneep toman Tama Maaron izi ndug sambam. 31Muuŋ, you paam naghilaala maau. Eemoghon you nanim ve narughuuz tamtoghon pa ya, leso nagharaat ataam pani, ve navotia pa yes Israela.”
32Yoan ighaze ipariaaŋ di pa tighur ila to Yesu. Tovenen ipaes padi ighaze: “Taug naghita Maaron Avuvu ipul sambam, ve izi inim inimale man mbaluuz, ve ineep izala ŋgeu tonene pogho. Mt 3:16
33Muuŋ, you paam naghilaala maau. Eemoghon Ŋgeu to imbaaŋ ghou nanim pa narughuuz tamtoghon, ye isaav payou ighaze: ‘Sawa eta, yom pale ughita Avuvu Patabuaŋ izi inim, ve ineep ila to ŋgeu eta. Ŋgeu tonenen, to pale irei Avuvu Patabuaŋ pa tamtoghon.’ Mk 1:8; Yo 14:16; Mbaŋ 2:1+
34Ve alooŋ. You naghita katin mbeb tonenen pa taug matag wa. Tauto nasaav ghazooŋa payam. You naghur ila naghaze ŋgeu tonene ye Maaron tau Natu.” #1:34 Ataam ite to tatoor saveeŋ waaro tonene, nene vene: You naghur ila naghaze ŋgeu tonene, Maaron isia ve ighuri pa uraat toni. Mt 3:17
Andreas yesuru Simon Petrus tinim taghoniiŋa to Yesu
[Mt 4:18-22; Mk 1:16-20; Lu 5:2-11]
35Mboŋ ndugizau, ghoro Yoan iyondyood muul toman taghoniiŋa toni ru. 36Yoan mata ila le ighita Yesu ilaagh ila. Tovenen isaav padi ighaze: “Aghita. Nowe sipsip to Maaron.” Yo 1:29
37Taghoniiŋa toni ru tonenen tilooŋ Yoan isaav tovene ve yesuru tipul Yoan, ve tila titaghon Yesu. 38Yesu mata imuul, ve ighita di titaghoni tinim. Tovenen ighason di ighaze: “Yamru akaal sa?”
Yesuru tipamuul aliŋa tighaze: “Rabi, yom unepneep sine?” (Saveeŋ ‘Rabi,’ pughu tovene: ‘Patoŋaaŋ.’)
39Yesu isaav padi ighaze: “Yamru anim toman ghou, ghoro aghita.” Tovenen yesŋa tila tighita ruum to ye inepneep pani. Sawa tonenen, rabrab izi wa. Ndag anunu igham paaŋ ma venen. Yesuru tineep toman Yesu le mboŋ izi. 40Ndiran ru to tilooŋ Yoan aliŋa ve titaghon Yesu, eez nene Andreas to Simon Petrus tazi. 41Tinepneep le isob, ghoro Andreas imundig, ve malmali ila ikaal togha Simon muuŋ. Ila indeeŋa, ve isaav pani ighaze: “Ulooŋ. Yei nighita Mesia wa.” (Saveeŋ ‘Mesia’ ve ‘Krisi,’ nene pughudi ee moghon.) #1:41 Saveeŋ ‘Mesia,’ nene Hibru aliŋadi. Ve saveeŋ ‘Krisi,’ nene Grika aliŋadi. Ila saveeŋ English tighaze ‘anointed.’ Saveeŋ waaro ru tonene, pughudi ee moghon: ‘Ŋgeu to tiliŋ ŋgoreeŋ izala pogho.’ Yes Israela tighamgham tovene pa yes to tighur di pa ghamuuŋ uraat tiina pa Maaron, inimale kinik todi, yes propeta, ve ndiran to watooŋrau. 42Tovenen Andreas igham togha Simon, ve yesuru tila to Yesu. Yesu ighita Simon, ve isaav pani ighaze: “Yom Simon, Yoan natu. Muri pale tiwaat izam tighaze Kepas.” (Pisis ‘Kepas,’ yes Grika tiwaata ila aliŋadi tighaze ‘Petrus.’) #1:42 Kepas, nene yes Aramea aliŋadi. Ve Petrus, nene yes Grika aliŋadi. Pisis ru tonene, pughudi ee moghon. Nene ‘yaam.’ Mt 16:18
Yesu ipoi Pilip yesuru Natanael paam tinim taghoniiŋa toni
43Mboŋ ndugizau muul, ghoro Yesu mata iŋgal ighaze ila pa taan suruvu to Galilaia. Ilaagh ivot to ŋgeu eez, iza Pilip, ve isaav pani ighaze: “Yom unum utaghon ghou.” 44Pilip ndug toni, nene Betsaida. Pilip, Andreas, ve Simon, yes tol, ndug todi ee moghon. 45Ghoro Pilip ila ikaal ita ite Natanael le indeeŋa, ve isaav pani ighaze: “Ulooŋ. Ŋgeu to muuŋ Mose imbood saveeŋa ila tutuuŋ toni, ve propeta pida timbood saveeŋa paam, tauto aazne nighita wa! Ye iza Yesu. Ye ŋgeu to ndug Nasaret, ve tama iza Yosep.” Mt 2:23
46Eemoghon Natanael isaav pani ighaze: “Wai, mbeb poia eta irau ivot ila ndug Nasaret?”
Pilip ipamuul aliŋa ighaze: “Unum tala, ve taum ughita pa matam!” Tovenen timundig ve tila.
47Yesu ighita Natanael iŋarua inim, ve isaav ighaze: “Aghita. Ŋgeu to inim ne, ye Israel tau. Ŋgar kaarom eta ineep ila lolo maau.” Mbo 32:2; Ro 2:28, 9:6+
48Tovenen Natanael ighason Yesu ighaze: “Yom uwatag ghou vena?”
Yesu ipamuul ghasoniiŋ toni ighaze: “Pilip isavia ghou payom sone, ve you naghita ghom unepneep izi ai fik paroŋania.”
49Natanael ilooŋ saveeŋ tonene, ve ighaze: “Rabi, yom Maaron Natu. Yom moghon to kinik to Israel.” Mt 2:2, 16:16, 27:42; Yo 12:13
50Yesu ipamuul aliŋa ighaze: “Natanael, vena? Saveeŋ tiou to naghaze naghita ghom uneep izi ai fik paroŋania, tauto igham ghom ughur inim tiou ne? Ulooŋ. Muri, yom pale ughita mbeb tintina pida to tilib pa mbeb tonene.” 51Ve Yesu isaav padi muul ighaze: “You nasaav payam: Onoon kat, muri yam pale aghita sambam ikaak, ve aŋela to Maaron tiipip taghon Tamtoghon Natu tizizi ve tizaza.” #1:51 Sawa to Yakop ighau pa togha Esau, vibiiŋ eez ivot pani, ve ighita mbeb inimale ndeet to iyoon izi taan, ve izala pa sambam. Ve aŋela to Maaron tiip taghon ndeet tonowen tizizi ve tizaza. (Ughita Mbnp 28:12.) Mbeb tonenen ipatooŋ ghiit pa Yesu. Pasa, ye pale ilup Maaron to sambam ve iit tamtoghon to taan, inimale ndeet tonenen. Ve ye pale inim pughu pa lupuuŋ toni, inimale Yakop inim pughu to yes Israela. Mbnp 28:12
Voafantina amin'izao fotoana izao:
Yoan 1: tucONT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2011, Wycliffe Bible Translators, Inc. All rights reserved.