John 5
5
Tadizꞌai-un Bethesda huwhútni, ꞌet Jesus ꞌilhoghun dune soo náꞌyinla
1Njan ꞌoh te neꞌwhustꞌen-un hukwꞌelhꞌaz ꞌet Lizwifne budzenis whuti ꞌet wheni Jesus Jerusalem tsꞌe whinya. 2Nyo Jerusalem ꞌet ꞌusbai ba dádintan-i hoonli, ꞌet la whenghoh tádizꞌai-un whuzꞌai. Njan tádizꞌai-un, ꞌet Hebrew kꞌunꞌa Bethesda huwhútni, ꞌet whunat-un kwulat-un bun tsilh tꞌah whuzdla. 3Nyo bun tsilh tꞌah ꞌet tube lhane ndudane ꞌet husdla. Whulohne hoos̱ꞌenne, ꞌinkꞌez whulohne bodinꞌaíne, ꞌinkꞌez whulohne cha délhdusnine. ꞋEnne ndi too nótitnah-un, ꞌet huba hilhꞌih. 4Soo nenaóodudzuk leꞌ whutꞌih totsuk la, lizas ndus de ha dúdoh ꞌinkꞌez tadizꞌaí-un, ꞌet too nunáhuyilnaih. Mbe la soo ꞌudechoo toot tayaih-un, ntsꞌoh dantꞌi-i dada be nduda, ꞌet hoontsꞌi soo naꞌutꞌih. 5ꞋIlhoghun dune tat whunizyat ꞌon ꞌat lhkꞌu dit yus kꞌut naóodizut, ꞌen ꞌet ndidaꞌ. 6ꞋEt sulhti whe Jesus yunilhꞌen. Tꞌewhunínzun tube saꞌ ꞌet ilhteꞌ. ꞋEt uyúlhni, “Soo náꞌtantnelh hukwaꞌ ninzun eh?”
7ꞋEt ꞌaho dune nduda-un ꞌutni, “Ndi too nakhitnaih te, ꞌaw dune tasóolhtelh-un hooloh. ꞋAwhuz whutsꞌun húkwa ꞌustꞌen whe ꞌuyoon whusayaih ꞌinkꞌez stso tayaih.”
8Jesus ꞌet uyúlhni, “Dudinyaih, kwꞌusintí-i ilhchoot, ꞌinkꞌez ninya!” 9ꞋAho dune ndudá-un soo náꞌuja. Yukꞌustí-i yílhchoot, ꞌinkꞌez tizya. Lizwifne nahulyis-un ꞌet dzin ꞌet ꞌuhóoja.
10Ndun dune soo náꞌuja-un, ꞌen la Lizwifne ꞌuhuyúlhni, “ꞋAndit dzin nahulyís-un ꞌuhoontꞌoh. ꞋAw ookwꞌusintí-i nónꞌaꞌ huba lheꞌhóotꞌoh!”
11ꞋEt ubúlhni, “Mbe la soo náꞌsinla-un, ꞌen ꞌusúlhni, ‘Kwꞌusintí-i ilhchoot ꞌinkꞌez ninya,’ sulhni.”
12ꞋInka huyoodulhkut, “Mbe whe ꞌuntꞌoh ndun ookwꞌusintí-i ilhchoot ꞌinkꞌez ninya nyulhni?”
13ꞋEt ndun dune dichꞌoh cha ꞌaw tꞌeinúzun mbe ꞌuyinla soo náꞌyinla-un. Tube lhane dune tadizꞌaí-un, ꞌet ꞌuhutꞌen whe Jesus whuꞌih tsꞌe whenya, ꞌet huwa ꞌaw tꞌelhihinízil.
14Njan ꞌet ndúhooja-un hukwꞌelhꞌaz lugliz whucho ꞌet Jesus ndun nayilhti ꞌinkꞌez ꞌuyulhni, “Hadih, ꞌandit ꞌawet soo náꞌinja. Lubeshi ꞌilhꞌen-un ꞌetsul ꞌoneh, doo ka la ꞌon nus ꞌuwhultsiꞌ-un ꞌet nghá holtsꞌit!” 15ꞋEt ndun dune whenája ꞌinkꞌez Lizwifne ubudániꞌ Jesus ꞌen ꞌuyínla soo náꞌyinla.
16ꞋEt huwa Lizwifne Jesus dzoh nahídilhdzut ꞌinkꞌez hituzilhghelh ꞌet hukwa húnuta. Njan nahulyis-un dzin ꞌet ꞌoh te neꞌustꞌen ꞌet hukwa. 17ꞋEt hoontsꞌi Jesus ubúlhni, “SBá ꞌahoolhyiz ꞌutꞌen, ꞌinka si cha ꞌustꞌen.” 18ꞋEt hukwa Lizwifne ꞌon nus hituzilhghelh-un hukwa hunuta. ꞋAw nahulyis dzin kꞌonínyuz ꞌet huwa za iloh, ꞌinkꞌez cha Yakꞌusda ꞌen duBá yulhni. ꞋEt ndutni whula gha tsꞌe Yakꞌusda bulh húlhgha ꞌuntꞌoh ni, ꞌet huwa hituzilhghelh-un hukwaꞌ huninzun.
19ꞋEt Jesus ubúlhni, “Soo tsꞌihꞌun unꞌa nohdúsni, ooYeꞌ ꞌaw dichꞌoh hukwaꞌ ninzun te neꞌutꞌen ꞌaítꞌoh. OoBá ntsꞌoh la neꞌútꞌen yunilhꞌen, ꞌet whuz unꞌa za ooYeꞌ neꞌútꞌen. 20OoBá duYeꞌ yukꞌensiꞌ ꞌinka tsꞌiyantsuk be ꞌutꞌen kꞌoh whínulhtun. Ndet la whunalhꞌen-un, ꞌet ꞌon nus ꞌutꞌen kꞌoh hooncha-un, ꞌet whuyúntilhtun. ꞋI be la tube nohba hocha. 21OoBá ntsꞌenꞌa la yaidlane dunabudile ꞌinkꞌez ꞌilhiz huye khúna-i bughaꞌaih, whuz unꞌa za ooYeꞌ, mbene la bukaꞌ ninzunne, ꞌenne ꞌilhiz huye khúna-i bughaꞌaih. 22OoBá ꞌen ꞌaw dune ba nahiyilh íloh, kꞌus OoYeꞌ ꞌen dune ba nahooyeh-un, ꞌet yutlꞌa hónꞌai. 23ꞋEt huwa la ooYeꞌ dune tsꞌiyanne ꞌen hidólhtiꞌ ntsꞌenꞌa la ooBá hidílhtiꞌ hukwꞌunꞌa. Mbe la ooYeꞌ lhidílhtiꞌne ꞌaw ooBá ꞌen cha lhuhidílhtiꞌ, ꞌinkꞌez ꞌen ꞌuyinla duYeꞌ whusayálhꞌaꞌ inleꞌ.”
Mbene la sghuni ílhchoot ꞌinkꞌez ndun whuz de sútilhꞌaꞌ-un, ꞌen ghun buba ꞌalhaꞌ ꞌuntꞌohne, ꞌenne ꞌilhiz huye khúna-i huyutꞌi
24Soo tsꞌihꞌun unꞌa nohdúsni, mbene la sghuni ílhchoot ꞌinkꞌez ndun whuz de sútilhꞌaꞌ-un, ꞌen ghun buba ꞌalhaꞌ ꞌuntꞌohne, ꞌenne ꞌilhiz huye khúna-i huyutꞌi. “ꞋAw buba nahoodeh ꞌaítꞌoh, ꞌudaꞌ be datsꞌutsaih-i huye nghoozdil ꞌinkꞌez ꞌilhiz huye khúna-i, ꞌi huyutꞌi. 25Soo tsꞌihꞌun unꞌa nohdúsni, ndet la whuz de whúdizulh-un ꞌandit ꞌawet ꞌet néwhultsꞌut. ꞋAndit ꞌet ꞌawet yaidlane Yakꞌusda ooYeꞌ ooghuni hidutátsꞌo, ꞌinkꞌez mbene la yudántsꞌone, ꞌenne huhutinalh. 26SBá ꞌen dichꞌoh huye khúna-i yutꞌi. ꞋEt whuz unꞌa za duYeꞌ, ꞌen cha be khútna-i dichꞌoh yutꞌi, ꞌet yugha óoninꞌai ꞌet huwa. 27ꞋInkꞌez tsꞌiyanne ba ndó ootꞌeꞌ-un, ꞌet cha yugha óoninꞌai ꞌinkꞌez tsꞌiyanne dune ba nahutiyeh huba ꞌuhoontꞌoh. Yinka Dune Yeꞌ unli, ꞌet huwa.
28Daja nohdúsni la ꞌaw nohba hocha junih! ꞋAwet whuz de whúdizulh, ꞌet la tsꞌun kꞌut yaidláne highuni hidutatsꞌo, 29ꞌinkꞌez la dunáhudódilh. Mbene la ꞌutꞌen unzoo-i ꞌalhꞌénne, ꞌenne dunábudutálelh ꞌilhiz wheni huhutinalh ha, ꞌinkꞌez mbene la hoontsiꞌ tuneꞌ ꞌústꞌenne, ꞌenne cha dunábudutálelh ꞌilhiz wheni dzoh notizut ha buba nahutiyeh. 30ꞋAw sichꞌoh ndúhoontꞌoh-un ꞌuhoosꞌen ꞌaítꞌoh. ꞋAw sichꞌoh hukwaꞌ nuszun te neꞌóostꞌen ꞌaítꞌoh. Ntsꞌoh tula sBá stsꞌu húkwaꞌ ninzun ꞌoh te za neꞌústꞌen. ꞋEt huwa dune ba nahutisyeh de, sBá súlhni, ꞌet whuz unꞌa za dune ba nahusyeh-un, ꞌet tsꞌihꞌun unꞌa ꞌuhoontꞌoh.
31Sichꞌoh sghun nohdúsni de, ꞌaw la nohba ꞌálhaꞌ lheꞌhóstꞌeꞌ. 32ꞋEt hoontsꞌi ꞌuyoon ꞌuntꞌoh-un, ꞌen si sghun tsꞌiyanne dune whúbunulhtun ꞌinkꞌez si sghun daja ni, ꞌalha ꞌuhoontꞌoh ꞌet tꞌewhunúszun.
33ꞋEt nohni ꞌuyoonne, ꞌenne John tsꞌun whébilhꞌaꞌ, ꞌet daja ni la, ꞌet khuni ꞌalhaꞌ ꞌuntꞌoh-i be ubudániꞌ. 34ꞋAw dune si sghun daja ni la, ꞌet huwa za iloh, njan ndúhoontꞌoh-un huwun nohdúsni, ꞌet huwa la whedóohjih ꞌinka ꞌunohdúsni. 35John ꞌen la too dízkꞌun ꞌinkꞌez be hóotꞌen-i ootsꞌu ha yándi ꞌet ndántꞌeꞌ. ꞋAtsulyaz wheni ndi be hóotꞌen-i, ꞌi be whunúlhni inleꞌ.
36ꞋEt hoontsꞌi John si sghun ꞌuyoonne whúbunilhtan-un, ꞌon nus ꞌuwhulchó-un, ꞌet whustꞌi. Ndi ꞌutꞌen ꞌi sBá stlꞌa yánꞌai lhadóosdleh wheni, ꞌi ꞌutꞌen ꞌaw ꞌi za ooghásna, ꞌi gha la ꞌuyoonne tꞌehonózin, sBá ꞌen whuz de sútilhꞌaꞌ. 37ꞋInkꞌez sBá, mbe la whuz de sútilhꞌaꞌ-un, ꞌen didutchꞌoh si sghun tsꞌihꞌun unꞌa whulhtsi. ꞋAw yalhduk whe lhduzúhtsꞌo, ꞌinkꞌez dantꞌóh-un unli ꞌaw lhuzihꞌen. 38ꞋInkꞌez ooghuni ꞌaw lhóohtun. Mbe whuz de yútilhꞌaꞌ-un ꞌaw nohba ꞌalhaꞌ lheꞌítꞌoh, ꞌet huwa ooghuni ꞌaw nohyo lhdiꞌoh. 39Yakꞌusda ooghuni ꞌukꞌu nusgúz-i, ꞌi be ꞌilhiz huye khúna-i ahtꞌi nahzun, ꞌinka ꞌáhtꞌen soo cho bodulhꞌeh, ꞌinkꞌez ndi khuni ꞌukꞌu nusgúz-i, ꞌi si sghun za ꞌuntꞌoh. 40Si sgha la ꞌilhiz ooleꞌ huye khúna-i oohtꞌeꞌ, ꞌet hoontsꞌi ꞌaw stsꞌu tóohdilh hukwa lheꞌnáhzun.
41ꞋAw dunene ye súdilhtiꞌ-i óschoot ꞌaítꞌoh, 42ꞌet hoontsꞌi nohni nohghun tsꞌiyawh tꞌéoonúszun. Nohyo tsꞌe dahtꞌoh whe ꞌaw Yakꞌusda ookꞌelháhsiꞌ ꞌet tꞌéwhunúszun. 43SBá ꞌen booziꞌ gha whusásya, ꞌet nohni ꞌaw ska lheꞌnáhzun, ꞌet hoontsꞌi ꞌuyoon te didutchꞌoh dudooziꞌ gha whusaínya de, ꞌet de daꞌ ꞌen ookaꞌ noohzin. 44Nohnichꞌoh nohtoh lhudúlhtiꞌ. ꞋEt hoontsꞌi, ndai la be ꞌúzdilhtiꞌ-i Yakꞌusda didutchꞌoh ootsꞌu haídiltsꞌut-i, ꞌi ꞌaw ookúlhnuzahtoh, ꞌet huwa ntsꞌenꞌa nohba ꞌalhaꞌ whutatꞌelh?
45SBá ꞌen oobut la nohkꞌéhosꞌalh khun te noohzin junih! ꞋUtsꞌun unꞌa cha hoonli. Yakꞌusda neba lhúhizyeꞌ-un, ꞌi Moses ꞌen yutlꞌa ídanꞌai ínleꞌ, ꞌi ootꞌa nínuhtan hoontsꞌi, ꞌi la nohkꞌéhoꞌalh. 46Ndi Moses ꞌukꞌu néyuzguz-i, nohba ꞌalhaꞌ ꞌuntꞌoh de, ꞌet de si sghun cha daꞌ nohba ꞌalhaꞌ ꞌuhótꞌeꞌ, Moses si sghun ꞌukꞌu néyuzguz-i ꞌuntꞌoh ꞌet huwa. 47ꞋEt hoontsꞌi ndi Moses ꞌukꞌu néyuzguz-i ꞌaw nohba ꞌalhaꞌ lheꞌyítꞌoh ꞌet huwa ntsꞌenꞌa suba si sghuni ꞌi nohba ꞌalha ꞌootꞌeꞌ,” Jesus ndubulhni.
Voafantina amin'izao fotoana izao:
John 5: crx
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2019, Wycliffe Bible Translators, Inc. All rights reserved.