Luke 22
22
Jesus yoo yo whútsul hikunúta hituzilhghelh ha
1ꞋEt ꞌawet lhes lhuntulhdoh-i, ꞌi naꞌhititꞌulh, ꞌawet whenghoh hoozulh. ꞋEt butus lhuseya-un dzin huwhútni. 2ꞋInkꞌez ꞌudedo lubretne, ꞌinkꞌez Moses be ꞌudustlꞌus ꞌukꞌu nunáguzne, Jesus whe hituzilhghelh-un, ꞌet hukwa hunuta. ꞋEt dunene bube hunuljut ꞌet huwa whunistꞌi be néꞌhutꞌen. 3ꞋEt Satan Judas ye yínya. ꞋEn Iscariot huyulhni. Whunizyane ꞌon ꞌat nane, ꞌenne butoh ꞌilhoghun ꞌuntꞌoh. 4ꞋEt lubret bumoodihne ꞌinkꞌez saldanne bumoodihne cha butsꞌu whinya ꞌinkꞌez bubulh hukwꞌu nótilhyeꞌ ntsꞌenꞌa la Jesus butlꞌa itilhtelh. 5ꞋInkꞌez huhóostꞌet whe tsꞌihꞌun huyúlhni whuninꞌai ꞌinkꞌez sooniya higha tíꞌalh huyulhni. 6ꞋAwet Judas butsꞌu náhizya ntsꞌenꞌa la dune chꞌoh butlꞌa itilhtelh, ꞌet hukwunúta.
Jesus yugha hodulhꞌehne butus lhuséya-un bubulh naꞌtitꞌulh lhahoduleh
7ꞋAwet lhes lhuntildoh-i, ꞌi naꞌhititꞌulh dzin whusahóoltsꞌut. ꞋEt butus lhuseya-un ꞌet whunahilni whe ꞌusbai kꞌus unzoo-i hituzilhghelh. 8ꞋInkꞌez ꞌet Jesus, Peter ꞌinkꞌez John bulh whe balhꞌaꞌ ꞌinkꞌez ꞌubulhni, “Ahꞌus ꞌinkꞌez neba lhaoodahleh butus lhuseya-un ꞌet naꞌuztitꞌulh-un.”
9ꞋInkꞌez ꞌuhuyúlhni, “Ntsꞌe hukwaꞌ ninzun mba lhatsꞌódutileh-un?”
10ꞋInkꞌez ꞌubulhni, “Whunulhꞌen keyoh whuti nenáhꞌaz de, dune nohdudutáyalh. Too be sulhdzo-i naꞌa. Ndet yoh danátidalh tsꞌe budánohꞌas. 11ꞋInkꞌez yoh whumoodih ꞌen la ꞌudóhniꞌ, ‘Whuneodulhꞌeh-un njan ndúnyulhni, ndet ꞌuhoontꞌoh nyoh dune ꞌilhodulh-un ꞌuhaꞌalh wheni? ꞋEt sgha hodulꞌehne butus lhuseya-un bubulh náꞌtistꞌulh.’ 12ꞋInkꞌez la dohyo hooncha-un lhaoodintꞌoh-un whunóhnoolhtun. ꞋEt lhaoodahleh.”
13ꞋInka whe hánꞌaz whe soo ntsꞌenꞌa la ubudániꞌ, whuz unꞌa nahahoonꞌai. ꞋEt butus lhuseya-un wheni lhaháduja.
Jesus ꞌudekꞌez naꞌutꞌalh-un
14ꞋAwet ꞌoh whuya whudizulh-un whusahóoltsꞌut, ndunne whunizyane ꞌon ꞌat nane whelꞌaꞌne bubulh natlꞌa didaꞌ. 15ꞋInkꞌez ꞌubulhni, “Dzoh nutiszut-un whutso sdzi ndulcho-i be njan butus lhuseya-un ꞌet nohbulh náꞌtistꞌulh tube hukwaꞌ nuszun. 16ꞋAlhaꞌ nohdusni, Yakꞌusda whe lerwe unli-un, ndi butus lhuseya-un lhaoodutaneh, ꞌet whutsꞌun, ꞌaw ꞌon ꞌat oosꞌalh ꞌaitꞌoh.”
17ꞋEt lubot yilhchoot ꞌinkꞌez duBá musi yulhni ꞌinkꞌez ꞌutni, “Ulhchoot ꞌinkꞌez tsꞌiyawh ꞌalhgoh ꞌahtnai. 18ꞋAlhaꞌ nohdusni, Yakꞌusda whe lerwe unli-un, ꞌet whusaootiltsꞌulh ꞌet whutsꞌun, ꞌaw ndi mai tooꞌ oosnaiꞌ ꞌaitꞌoh.”
19ꞋInkꞌez lhes yilhchoot. ꞋInkꞌez duBá musi yulhni, taídanyuz ꞌinkꞌez butainínla, ꞌinkꞌez ꞌubulhni, “Ndi yustꞌe ꞌuntꞌoh. Nohba huwalti. Ndahtꞌen de, ꞌet whe snaoolhnih.”
20ꞋUhanꞌal hukwꞌelhꞌaz whuz unꞌa za lubot yílhchoot ꞌinkꞌez ꞌutni, “Ndi lubot ꞌi suzkaiꞌ be ꞌandidi khuni nohba lhadúsdla-i, ꞌi ꞌuntꞌoh, nohni nohba nadútiltꞌih. 21ꞋInkꞌez whunulhꞌen, whuꞌizyaz dune chꞌaz ditni-un, ꞌen njan lutab ba sulh usda. 22ꞋAlhaꞌ hoontꞌoh Yinka Dune Yeꞌ, ntsꞌenꞌa ooba ꞌet néwhultsꞌut, ꞌet whuz unꞌa ꞌet ꞌuwhutánelh. ꞋEt hoontsꞌi ndun dune mbe la whuꞌizyaz dune tlꞌa itilhtelh-un ndun dune dáwhultsiꞌ-un ootsꞌu hóoltsꞌulh!” 23ꞋInkꞌez didutchꞌoh dutoh lhoohoodulkut, “Kꞌus mbe suba yulhni, mbe ꞌutinelh whe ꞌutni?”
Yugha hodulꞌehne butoh, kꞌus mbe suba ꞌukꞌenus ꞌuntꞌoh-un ooleꞌ?
24ꞋEt didutchꞌoh lhdulhyoh ꞌuhudutni kꞌus mbe suba ꞌukꞌenus ꞌuntꞌoh-un ooleꞌ? 25ꞋInkꞌez Jesus ꞌubulhni, “ꞋUdun Keyoh whulerwe dune kꞌuneꞌ hulꞌen-un ꞌuntꞌoh. ꞋInkꞌez buba ndo ꞌuntꞌohne, nohtsꞌun unzoone ꞌuhintꞌoh hubuhútni. 26ꞋEt hoontsꞌi nohni nohtoh ꞌe dóhtꞌeꞌ junih! Kꞌus nohtoh mbe ꞌukꞌenus ꞌuntꞌoh-un ooleꞌ-un, ꞌen ꞌudekꞌoh-un kꞌunꞌa ooleꞌ. Mbe la nohtso whudilhdzulh-un, nohba neꞌútꞌen-un ooleꞌ. 27Daja nahzun? Mbe ꞌukꞌenus ꞌuntꞌoh-un ꞌuntꞌoh? Ludab kꞌusda ꞌutiꞌulh ha, kꞌus yuba neꞌútꞌen-un? ꞋEt hoontsꞌi nohni nohtoh nohba neꞌútꞌen-un usdli. 28Nohni ꞌahtꞌoh dzoh nususzut-un, ndulyiz whe sulh ꞌíhtꞌeꞌ. 29ꞋInka sBá stlꞌa hónꞌai whe lerwe usdli-un, whuz unꞌa nohni cha lerwe tihleh-un nohgha hónꞌai. 30ꞋEt whe lerwe usdli-un, ꞌet slutab kꞌut sulh ꞌutihꞌulh ꞌinkꞌez sulh utihtnelh. Kwꞌutsꞌuzda cho diztiꞌ-i, ꞌet hukwꞌu dutálhtsꞌilh ꞌinkꞌez whunizyat ꞌon ꞌat nat-un Israel ootsꞌu hainzutne bulh didowhne buba nahutihyeh.”
Jesus Peter ꞌulhni, “Tꞌesunuzínzun dutanelh”
31ꞋInkꞌez neMoodihti ꞌutni, “Simon, Simon, soo zilhtsꞌai! Satan tube nkadaniꞌ. Tlꞌo maiꞌ lhtah ha nyununtidlih. 32ꞋEt hoontsꞌi mba tenadisdli whe mba ꞌalhaꞌ ꞌustꞌoh-un, ꞌet ꞌaw nla kꞌéha hooltsꞌit ꞌaitꞌoh. ꞋInkꞌez ndet la stsꞌu naóozinja de, nyulhutsinke hilhtus ubolhtselh.”
33ꞋEt hoontsꞌi ꞌuyulhni, “SMoodihti lhadústꞌoh nyulh tisyalh, ꞌadutisꞌalh ꞌinkꞌez nyulh datísah.”
34ꞋEt ꞌuyulhni, “Nyudusni Peter, ꞌandit dzin lugok dune ꞌudutinelh whutso, tat, ‘ꞋAw ndun tꞌenuzuszun,’ dutanelh.”
Tsꞌiyawh lhawhúdoneh hubaꞌ hoontꞌoh
35ꞋInkꞌez ꞌubulhni, “ꞋOh daꞌ whenóhisꞌaꞌ whe, sooniya zus, lhookꞌez cha, ꞌinkꞌez neketlꞌa whulh tlꞌoo-i tsꞌiyawh ooyit. ꞋAw eh hoonliyaz lhundunuzáhdzit?” ꞋInkꞌez, “Gak!” huyulhni.
36ꞋInkꞌez ꞌubulhni, “ꞋEt ꞌandit sooniya zus ꞌutꞌi-un, whute yólhchoot. ꞋInkꞌez whuz unꞌa za bé neꞌuge-i cha ólhchoot. ꞋInkꞌez mbe la saluzti lhitꞌiꞌ-un, duluglok ye ꞌóket ꞌinkꞌez saluzti ꞌilho oket. 37ꞋEt huwa ꞌunohdusni Yakꞌusda ooghuni kꞌut si sghun ꞌukꞌu núsguz-i, ꞌi tsꞌiyawh lhawhúdoneh hubaꞌ hoontꞌoh. Ndiz unꞌa njan duwhutni, ‘Ndunne ꞌukꞌú nulheꞌustꞌenne bubun ndultꞌoh hudooniꞌ,’ ni. ꞋEt huwa si sghun ꞌukꞌuneꞌ ꞌusguz-un lhawhúdoneh hubaꞌ hoontꞌoh.”
38ꞋInkꞌez ꞌuhuyulhni, “NeMoodihti njan whunilhꞌen nanki saluzti ꞌet ꞌusdla.” ꞋInkꞌez ꞌubulhni, “ꞋAwet soo ꞌúltsuk.”
Jesus Gethsemane ꞌet tenadudli
39ꞋEt ꞌawet tenánja whe whutsodaꞌ hukwꞌunꞌa shusyaz Olive ꞌi kꞌuz whe naja. ꞋInkꞌez yugha hodulꞌehne cha hiyuwhenándil. 40Whuz hoozdil whe ꞌet ꞌubulhni, “Tankꞌus úntihtꞌi-un whuchꞌa ténadahdli.” 41Tse nazdulhꞌus-un, ꞌet ꞌuwhuldzoh tsꞌe bughu nenínya. ꞋInkꞌez dugwutsi be nenínya ꞌinkꞌez tenadudli. 42ꞋEt ndutni, “ꞋUBá hukwaꞌ ninzun de, ndi be dzoh nutiszut-i sghu nahoolhchoot. ꞋEt hoontsꞌi ꞌaw si hukwaꞌ nuszun kꞌunꞌa iloh. Nyun hukwaꞌ ninzun kꞌunꞌa ꞌuhóneh!” 43ꞋEt ndus de yakꞌuz lizas be hoodiltsai. ꞋEn ulhtus náyulhtsi. 44Tube oodzi unduda whe ꞌon nus ulhtus whe tenadudli. ꞋUskaiꞌ kꞌunꞌa ootsꞌu halhdzilh whe yun nadúltꞌi.
45Tenadudli-un ꞌetsul ꞌudija ꞌinkꞌez dunadija whe yugha hodulꞌehne tsꞌodi kꞌet nahunistez whe bughu nanja, 46ꞌinkꞌez ꞌubulhni, “Di ha sahtez? Doo ka si tankꞌus nóohtꞌi dunadahdilh ꞌinkꞌez whuchꞌa tenadahdli.”
Jesus ꞌawet huyílhchoot
47ꞋAwhuz yalhduk whe khuntsul lhane dune whuz de údulh, Judas huyulhni, ꞌen butso uyalh. ꞋEn whunizyane ꞌon ꞌat nane bubulh ꞌilhoghun ꞌuntꞌoh. Jesus ye nghoh neninya naidutitsꞌoos ha. 48ꞋInkꞌez Jesus ꞌuyulhni, “Judas, Yinka Dune Yeꞌ nadutántsꞌoos ꞌi be eh whunistꞌi whe whutlꞌa tálhtelh?”
49Jesus oonat núdilhyane, dawhútanelh la honilhꞌen, ꞌet ꞌuhuyulhni, “NeMoodihti saluzti be eh lhtsꞌutigan?” 50ꞋInkꞌez ꞌilhoghun yuzih usyin-un, Lizwif lubret ꞌukꞌenus diztiꞌ-un be ꞌulhna-un nailhni tsꞌunkꞌus yudzo yutsꞌa habeꞌ yalhtꞌo.
51ꞋInkꞌez Jesus ubúlhni, “Njan dutísnelh, ꞌet stlꞌa wháhꞌaih.” ꞋInkꞌez nyoon oodzo yutꞌaiznai ꞌinkꞌez soo naꞌyinla.
52ꞋEt lubret bumoodihne, lugliz whucho whusaldanne bumoodih, ꞌinkꞌez butso whudilhdzulhne cha highu nindil, ꞌinkꞌez Jesus ꞌudubúlhni, “Di ha saluzti ꞌinkꞌez tutꞌoh cha nuhle ꞌundunustꞌih hukwꞌunꞌa ska tíhdil? 53Dzin totsuk lugliz whucho nohtoh susda whe, ꞌaw ꞌoh daꞌ sólhchoot hukwa lheꞌzahtꞌen inleꞌ. ꞋEt hoontsꞌi ꞌandit netsudule, tsalhgus yo usda-un nohmoodih tileh, ꞌawet nohba néꞌhunintꞌo.”
Peter ꞌutni, “Ndun dune ꞌaw tꞌenuzuszun”
54ꞋAwet Jesus huyilhchoot ꞌinkꞌez lubret ꞌukꞌenus diztiꞌ-un highu dáhinilhti. ꞋInkꞌez Peter yoo niz de yuniyalh. 55ꞋEt naniztlꞌoo bez tsꞌe whuniz kwun húdulhkꞌan ꞌinkꞌez ꞌalhgoh nátlꞌaꞌhudiltsꞌiꞌ. Peter ꞌen cha butoh usda. 56Kwun zih usda whe ꞌilhoghun ꞌustle-un tsꞌekeyaz yunin tsꞌe yunilhꞌen ꞌinkꞌez ꞌuyulhni, “Ndun dune ꞌen cha yulh ꞌutꞌen inleꞌ.”
57ꞋEt hoontsꞌi yutsꞌoo dildlai ꞌinkꞌez ꞌuyulhni, “Tsꞌeke, ndun dune ꞌaw tꞌenuzuszun.”
58ꞋEt hukwꞌelhꞌaz ꞌatsulyaz inleꞌ whe ꞌet ꞌuyoon cha ꞌuyulhni, “Nyun cha bubulh ꞌilhoghun ꞌintꞌoh.” ꞋEt hoontsꞌi Peter ꞌutni, “ꞋAwundooh!”
59ꞋEt doo cha ꞌilho sadzi hukwꞌu hoonistꞌo ꞌet ꞌuyoon cha ꞌuyulhni, “ꞋAlhaꞌ hoontꞌoh ndun ꞌen cha yulh ꞌutꞌen. Galilee whutꞌen-un ꞌuntꞌoh ꞌet huwa.”
60ꞋEt Peter ndun dune ꞌuyulhni, “ꞋAw daja dini-un tꞌewhunuzúszun!” ꞋAwhuz yalhduk whe lugok dune ꞌudija. 61ꞋEt neMoodihti Peter tsꞌu nálhꞌa ꞌinkꞌez yunin tsꞌe yunalhꞌen. ꞋEt Peter ꞌaho neMoodihti yughuni yunalni daja yudaniꞌ inleꞌ whe ndúyulhni, “Lugok dune ꞌudutinelh whutso tat tꞌesunuzínzun dutanelh.” 62ꞋEt Peter ꞌaz whinya ꞌinkꞌez tube intse.
Lhugánne Jesus highu núwhulhya
63Ndunne dune Jesus yilhchootne, highudloh ꞌinkꞌez huyoolhchis. 64ꞋInkꞌez hina kꞌúnaꞌuzguz ꞌinkꞌez huyoonukat ꞌinkꞌez huyoodulhkut, “Neba nus hóoꞌen nedini mbe ꞌunyinla nyunízkuk?” 65ꞋInkꞌez lhat-un hoontsiꞌ whe hichꞌaz yalhduk.
Jesus nahiyilhne bubut nehinilhti
66ꞋAwet yulhkai ibulh dune tso whudilhdzulhne, ꞌudedo lubretne ꞌinkꞌez Moses be ꞌudustlꞌus ꞌukꞌu nunáguzne cha, ꞌenne ꞌilhuhozdil ꞌinkꞌez buba nahíyilhne but nehinilhti. ꞋInkꞌez ꞌuhuyúlhni, 67“Nyun Christ inli de, nedíni!” ꞋEt ꞌubulhni, “Nohdasniꞌ de, ꞌaw nohba ꞌalhaꞌ doosniꞌ ꞌaitꞌoh.
68Si cha hoonli nohooduskut de, ꞌaw sudóhniꞌ ꞌaitꞌoh ꞌinkꞌez ꞌaw sla nadoohtnih ꞌaitꞌoh. 69ꞋAndit whutsꞌun Yinka Dune Yeꞌ nailhni tsꞌe Yakꞌusda whelhtus-un tidalh.”
70ꞋInkꞌez tsꞌiyawh ꞌuhutni, “Nyun Yakꞌusda ooYeꞌ eh ꞌintꞌoh?” ꞋEt ꞌubulhni, “Tsꞌihꞌun ꞌudahni si, ꞌen ꞌustꞌoh.”
71ꞋInkꞌez ꞌuhutni, “ꞋAw ꞌon ghun hoonli highun nedóniꞌ hukwa lheꞌtsꞌunízun. Whenichꞌoh ooze whuzdántsꞌo.”
Voafantina amin'izao fotoana izao:
Luke 22: crx
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2019, Wycliffe Bible Translators, Inc. All rights reserved.