Luke 24
24
Jesus dunadija
1ꞋEt ꞌawet ndi lisman ꞌudechoo dzin ꞌuhoontꞌoh. Bundada ꞌudaꞌ, tsꞌekoo ꞌinkꞌez ꞌuyoonne cha bulh tsꞌun kꞌuz tsꞌe hutizdil. Yoo sooltsun-i lhahídinla-i cha hitizdla. 2Tse ꞌudaꞌ ꞌudun dizꞌai whe hotilhꞌen. 3ꞋEt dahúnindil ꞌinkꞌez Jesus oozi hooloh. 4Buba wheꞌ hooja hooyoh ꞌet dáhooja whusuba ꞌuhoontꞌoh. ꞋEt khuntsul nane dune buzih huzyin. Bunaih tube busaoolkalh. 5ꞋInkꞌez ndunne tsꞌekoo tube whe hunuljut whe yun nacháhunilya. Ndunne ꞌubuhutni, “ꞋEt di ha yaidlane toh khuna-un, ꞌen ookunáhtah? 6ꞋAw njan hooloh, dunadija whe ꞌuntꞌoh! ꞋAwhuz Galilee ꞌutꞌen whe, daja nohulhni-un, whunalhni. 7Nóhulhni, ‘Yinka Dune Yeꞌ, ꞌen lubeshi ꞌulhꞌenne tlꞌa hitilhtelh ꞌinkꞌez tulalhgus kꞌehúyitalhtelh. ꞋInkꞌez whulh tat dzin dunadutádalh.’” 8ꞋInkꞌez highuni hinalni.
9ꞋEt tsꞌun kꞌuz ha náhidil, ꞌet ndi tsꞌiyawh whunizyane ꞌon ꞌat ꞌilhoghun, ꞌinkꞌez ꞌonghohne cha bubodániꞌ. 10Mary Magdala whutꞌen-un, Joanna cha, Mary James ooloo cha, ꞌinkꞌez ꞌuyoonne tsꞌekoo bubulh ꞌutꞌenne, ꞌenne ꞌuhuja ndunne whelꞌaꞌne bubodániꞌ. 11ꞋEt hoontsꞌi nyoonne ꞌantsꞌi ꞌoh neꞌhuduniꞌ whula ꞌuhutni ubonínzun ꞌinkꞌez ꞌaw buba ꞌalhaꞌ lheꞌhudusnih. 12ꞋEt hoontsꞌi Peter dudinya ꞌinkꞌez tsꞌun kꞌuz tsꞌe oolhgai. Yoleꞌ ꞌuja ꞌinkꞌez tsa kꞌet whunilhꞌen. ꞋEt naih diztiꞌ-i za ꞌet ꞌusdla whe yutilhꞌen. ꞋEt duyoh tsꞌe whe naja. ꞋEt howu nuní nuzut ꞌinkꞌez ooba hooncha dahooja whusuba ꞌuhoontꞌoh.
Jesus nane yugha hodulꞌehne bunalhtsꞌet hainya
13ꞋEt dzin keyoh whuyaz, Emmaus tsꞌoutni, nane dune whuz hitiꞌus. Jerusalem whutsꞌun 7 miles atꞌen ꞌuhoontꞌoh. 14Whuz hiꞌus whe dahóotꞌen la ꞌoh howu yahulhduk. 15ꞋEt howu yahulhduk dahóotꞌen la neꞌwhustꞌen-un, Jesus bughu ninya ꞌinkꞌez bubulh tizꞌaz. 16Hinilhꞌen ꞌet hoontsꞌi ꞌaw butlꞌa lhúhooꞌal ꞌet huwa ꞌaw tꞌelhihinízil.
17ꞋInkꞌez ꞌubulhni, “ꞋOh whuya ahꞌus whe, ndet wheꞌ whudahni? Stabe huwun nohdzi unduda whe howu yalhduk?”
18ꞋIlhoghun, Cleopas huyulhni, ꞌen ꞌuyulhni, “ꞋAw nyun za iloh eh ntsꞌoh te ꞌandit neꞌwhustꞌen-un, ꞌaw eh tꞌewhunuzínzun. ꞋAw Jerusalem whutꞌen-un lhinloh whe laꞌ dini?”
19ꞋEt ubúlhni, “Ndet wheꞌ whudahni?” ꞋInkꞌez ꞌuhuyulhni, “Jesus Nazareth whutꞌen-un, ꞌen ooghun dahooja la. Nus hooꞌen-un ꞌuntꞌoh. Yakꞌusda ꞌinkꞌez dune cha bunalh hoolhtus whe neꞌústꞌen ꞌinkꞌez hoolhtus whe cha yáilhduk.
20ꞋUdedo lubretne, ꞌinkꞌez wheni nemoodihne cha, ꞌenne Rome whutꞌenne hiba nahuhooyeh ha butlꞌa húyalhti, ꞌinkꞌez tulalhgus kꞌehíyilhti. 21ꞋEn úncha Israel ootsꞌu hainzutne nabootakulh ꞌuzninzun daꞌ. Ntsꞌoh te neꞌwhustꞌen whutsꞌun ꞌandit ꞌawet whúlh tat dzin ꞌuhoontꞌoh. 22A, ꞌalha ꞌuhoontꞌoh, ꞌinkꞌez whulohne tsꞌekoo ndulyiz whe nebulh ꞌítꞌenne, daja hutni-un, tube neba hooncha. ꞋUdaꞌ bundada tsꞌun kꞌuz hoozdil. 23ꞋAw hizi nálhilhtel. ꞋInkꞌez lizasne hanꞌen whe ꞌenne ꞌuhutni, ‘Khuna whe ꞌuntꞌoh!’ 24ꞋInkꞌez oolune nebulh ꞌutꞌenne cha tsꞌun kꞌuz nahúzꞌaz. Ntsꞌenꞌa la tsꞌekoo ꞌuhutni la, whuz unꞌa nahahoonꞌai. ꞋEt hoontsꞌi Jesus ꞌaw lhuhuyíꞌel.”
25ꞋEt Jesus ꞌubulhni, “Tube nohni whusnine ꞌahli! Ndet la tsꞌiyawh nus hooꞌenne daja hutni-un, tube saꞌ whe nohdzi be nohba ꞌalhaꞌ whuneh! 26ꞌalhaꞌ eh ꞌuhoontꞌoh Christ, ꞌen dzoh nutizut huba ꞌuhoontꞌoh ꞌinkꞌez ꞌet hukwꞌelhꞌaz whe diztiꞌ tsꞌu natidalh?” 27ꞋInkꞌez Moses be ꞌudustlꞌus ꞌukꞌu nunáguz-un ꞌinkꞌez nus hooꞌenne bubeꞌ ꞌudustlꞌus cha, ndai ꞌukꞌu nuhúyuzgus ꞌen ghun, ꞌi tsꞌiyawh Yakꞌusda ooghuni yúbunilhtan.
ꞋEt ꞌantsꞌiya hitánꞌen leꞌ huja ꞌinkꞌez nahuyóolhtsꞌit
28ꞋEt keyoh whuyaz hutizdil tsꞌe, ꞌawet whenghoh hidulh. ꞋInkꞌez Jesus njan keyoh whenghoh táyalh leꞌ ꞌutꞌen. 29Duzíh oodaꞌ hukwaꞌ huyulhꞌen, ꞌinkꞌez ꞌuhuyúlhni, “ꞋAwet sa naínꞌai, hulhgha ꞌuhoontꞌoh.” ꞋInkꞌez yoh bubúlh danántꞌaz buzih tidalh ha.
30ꞋEt natlꞌa hudiltsꞌiꞌ ꞌinkꞌez ꞌuhutiꞌulh. Jesus lhes yilhchoot ꞌinkꞌez Yakꞌusda musi yulhni. ꞋInkꞌez lhkídanyuz ꞌinkꞌez bugha íninꞌai. 31ꞋEt hitánꞌen leꞌ huja ꞌinkꞌez nahuyóolhtsꞌit. ꞋInkꞌez khuntsul hooloh nasdliꞌ. 32ꞋEt ꞌulhodutni, “Niz de ti nebulh yalhduk ꞌinkꞌez Yakꞌusda ooghuni daja ni whunenulhtun whe ꞌaw lawk nedzi dízkꞌun le lhéꞌtsꞌitꞌoh inleꞌ?”
33ꞋEt ꞌoh whuya ꞌuhunitꞌoh whe unahuditꞌaz ꞌinkꞌez Jerusalem tsꞌu náhoostꞌaz. ꞋEt whunizyane ꞌon ꞌat ꞌilhoghun ꞌinkꞌez bubulh ꞌutꞌenne, tsꞌiyawh ndet ꞌilhoh ꞌúhintꞌoh whe bughu nahuntꞌaz, 34ꞌet dilhtsꞌine ꞌuhutni, “ꞋAlhaꞌ neMoodihti dunadija whe ꞌuntꞌoh! ꞋInkꞌez Simon yunalh be hóodiltsai!” 35ꞋInkꞌez nyoonne nane ti dahooja la ꞌet huwun bubulh náhoohoolnuk ntsꞌenꞌa la Jesus lhes taídanyuz whe mbe unli nahuyóolhtsꞌit.
Jesus dichꞌoh buniz be hóodiltsai
36ꞋAwhuz howu yahalhduk whe, Jesus dichꞌoh buniz be hóodiltsai, ꞌinkꞌez ꞌubulhni, “Nohbulh sooꞌ hotꞌeꞌ.”
37ꞋEt hoontsꞌi bugha ꞌúnjaz ꞌinkꞌez tube hunílhjoot. Dune dazsai-un tsin hanꞌen huninzun. 38ꞋInkꞌez ꞌubulhni, “Dahoontꞌoh huwa whénulhjut? ꞋInkꞌez dahoontꞌoh huwa nohdzi yo whe nohba nawh ꞌuhoontꞌoh? 39Sla ꞌinkꞌez ske cha nulhꞌen. Si ꞌustꞌoh. Stꞌa íhnaih ꞌinkꞌez sunulhꞌen! Syustꞌe cha hoonli ꞌinkꞌez stsꞌun cha. Dune tsin ꞌaw ndúlhitꞌoh, ooyustꞌe ꞌinkꞌez ootsꞌun cha hooloh, tsꞌiyawh bulh ꞌustꞌoh.”
40ꞋEt ꞌet ndudániꞌ whe, dula ꞌinkꞌez duke cha bunalhtsꞌet neyuzdla. 41Huhóontꞌiꞌ ꞌinkꞌez huwáꞌ hiꞌen ꞌet hoontsꞌi ꞌawhuz buba ꞌalhaꞌ lheꞌhootꞌoh. ꞋInkꞌez ꞌubulhni, “ꞋAw njan ꞌutꞌalh-i lhahtꞌih?” 42ꞋInka lho sutꞌe-i ꞌinkꞌez tsꞌihna dutlꞌuz ye ꞌulhꞌen-i, ꞌi yooꞌalha higha híninla. 43ꞋI yílhchoot ꞌinkꞌez bunalh yanꞌal.
Jesus whubunulhtun Yakꞌusda ooghuni daja ni
44ꞋInkꞌez ꞌubulhni, “ꞋAwhuz nohbulh ꞌústꞌoh daꞌ ndi khuni ꞌi daꞌ be nohbulh yasduk-i, tsꞌiyawh lhaoodoneh Moses be ꞌudustlꞌus kꞌunusguz-i, ꞌinkꞌez nus hooꞌenne, ꞌinkꞌez Yakꞌusda ooghuni Shun eꞌdustlꞌus kꞌut cha si sghun ꞌukꞌu nusguz.”
45ꞋEt bubeni tꞌehonoozeh ha butlꞌa hónꞌai Yakꞌusda ooghuni tꞌehinoozeh ha. 46ꞋInkꞌez ꞌubulhni, “Ndi ꞌi ꞌukꞌu nusguz whe ꞌet ndutni, Christ, ꞌen dzoh nozut, ꞌinkꞌez whulh tat dzin dunadíjaꞌ hubaꞌ hoontꞌoh, 47ꞌinkꞌez booziꞌ gha tsꞌiyanne dulubeshi chꞌa dudeni naháhundunooleh, ꞌinkꞌez bulubeshi buba úntukuk cha, ꞌohwhi ghun booziꞌ gha tsꞌiyanne dóhniꞌ hubaꞌ hoontꞌoh. ꞋEt njan Jerusalem ꞌet cho wheꞌ dohtꞌen. ꞋEt hukwꞌelhꞌaz de ꞋUdun Yun Kꞌut Whutꞌenne whubodoolhꞌeh. 48Nohni dune whúntilhtunne ꞌahli whé ꞌahtꞌoh. 49ꞋInkꞌez soo zulhtsꞌai, ndi sBá nohtsꞌu yoozi-i, ꞌi nohtsꞌo tlꞌa dutisꞌalh. ꞋEt hoontsꞌi yakꞌuz ndus de whelhtus-i, ꞌi nohkꞌedútaltsꞌulh ꞌet whutsꞌun, Jerusalem ꞌet za dólhtsꞌiꞌ.”
Jesus ndo yakꞌuz whenálti
50ꞋEt ꞌawet Bethany whuz naboozdla. Dula do ꞌuyinla ꞌinkꞌez Yakꞌusda yoodulhkut butsꞌun oozooꞌ ha. 51ꞋAwhuz Yakꞌusda yoodulhkut butsꞌun oozooꞌ ha, buchꞌa nasdzut ꞌinkꞌez ndo yakꞌuz whenálti. 52Hitsꞌun teniꞌ nalhdzin, ꞌinkꞌez tube huhóontꞌiꞌ whe Jerusalem tsꞌe náhoosdil. 53ꞋInkꞌez ꞌahoolhdzin lugliz whucho hudilhtsꞌi whe Yakꞌusda hidilhtiꞌ ꞌinkꞌez daldzooꞌ whe ꞌuntꞌoh hutni. ꞋEt ndo honeh.
Voafantina amin'izao fotoana izao:
Luke 24: crx
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2019, Wycliffe Bible Translators, Inc. All rights reserved.