Lucas 24
24
Jesús Ju̱'isiquëpi Huëise'e
(Mt 28.1-10; Mr 16.1-8; Jn 20.1-10)
1Du'ru macarepa co'amaña ne mu'se pa'i maca cui'naohua'ipi saë'ë, ta̱si daripë quë'rona nea hue̱'ñarepa huëo së̱ñe ne de'huase'ere sajë. Cui'ne yecohua'i nomiohua'i co̱ni saë'ë. 2Ja̱ maca ti̱'ajë ñajëna, quë̱na pë daripë si̱osicopi ti̱rore pa'iona, ti̱'ahuë. 3Ti̱'ani cacajë Ëjaë Jesús ca̱përe ti̱'ama'pë. 4Peoquëna, ai quëquëhuë, me nei'ni cajë. Ja̱je quëquëjë ñajëna, ja̱rote caya ë̱mëohua'i mia ju'i ca̱ña ju'icohua'ipi i̱ohua'i ja̱'re co̱ni nëcahuë. 5Ja̱je ña quëquëni yejare pana në me huesëjëna, ñajë ja̱ohua'ipi, cahuë:
“¿I̱quere co'eye'ni, ju̱'isicohua'i quë'ro? Tsoe huajëquëpi pa'iji. 6I̱ñore pa'ima'ë pa'iji. Tsoe huëji'i. Cuasajë̱'ë. Ja̱ yë'ta'a Galilea pa'ima'ca i̱ ca'ñere, 7ñeje: ‘Pa̱i Mamaquë co'aye yo'ocohua'i jë̱ñana i̱sisiquë pa'ija̱'quë api. Pa'ina, ja̱ohua'ipi que̱ja'cohua'i a'ë, so̱quë sarahuana. Ja̱je yo'osiquëta'a toaso̱ mu'seña pa'i maca huajëquë huëija̱'quë api.’ Tsoe ja̱re quëapi”.
8Ja̱je caëna, ja̱ maca Jesús ca'ñe cuasa ñajaë'ë. 9Ja̱ jeteyo'je daripë ñasicohua'ipi co'ini si'aye i̱ohua'i ñase'ere quëahuë, once soisicohua'ire cui'ne si'ahua'i i̱ti maca co̱ni pa'icohua'ireje̱. 10Iye coca i̱ soisicohua'ire sani quëasicohua'i cato paë'ë: María Magdalena, Juana, María, Jacobo pëca ja'co, cui'ne yequë nomiohua'i co̱ni. 11Ja̱je quëajëna, i̱ soisicohua'ipi ja̱ohua'i quëaye asani sehuoma'pë paë'ë, coa cuepejë cayeje̱ pa'ye nëina.
12Ja̱je nuñerepa cayë cuasama'quëta'a Pedropi etani huë'huëquë saji'i, ta̱si daripëre ñasi'i caquë. Sa ti̱'ani ñaquëna, i̱te ca̱'nesi ca̱ña ti̱rona ne saose'epi paji'i. Pa'ina, ñani ai cuasaquë saji'i, huë'ena.
Emaúsna Sai Ma'ana Yo'oye
(Mr 16.12-13)
13Ja̱re ja̱ mu'se caya ë̱mëohua'i Emaús daripëna saë'ë, Jerusalénpi once kilómetro sai hue̱'ñana. 14Saijë Jesús ayere cajë saë'ë. 15Ja̱je cajë saijëna, ja̱re i̱pi Jesús ja̱ohua'ire tsioja̱ji'i. Tsioja̱ni i̱ohua'i ja̱'re co̱ni saji'i. 16Saina, a'ri maña carapi, i̱ohua'i ña ti̱'are paye i̱te. 17Ja̱ maca sai Jesupi ja̱ohua'ire se̱ji'i:
“¿I̱quere sa̱'ñe cajë saiye'ni, ma'aja'a saini? ¿Me yo'ojë oicohua'i pa'iye'ni?”
18Caquëna, ja̱ohua'i aquë Cleofas hue'equëpi sehuopi, i̱te:
“Si'a yeja Jerusalén daripë iye mu'se yo'ose'e asayë. ¿Ja̱je pa'iquëta'are cui'ne më'ëse'e i̱ti hue̱'ña pa'inije asama'ë pani se̱quë?”
19Caquëna, ja̱ maca i̱pi capi, i̱te:
“¿Me yo'ore'ni?”
Caquëna, i̱ohua'ipi cahuë:
“Jesús Nazaret aquëpi, Maija'quëre quëacaiquëpi, si'aye tutu quë'ipi cui'ne i̱ cayeje̱ Maija'quë ña hue̱'ñana, nuñerepa caquëpi si'a pa̱i ña hue̱'ñana caquëre pare yo'ose'ere cayë. 20Ja̱je pa'ini, que̱ni huani je̱ohuë, Maija'quë huë'e ñacaicohua'i ëjaohua'i maire cua̱ñecohua'i cui'ne si'a ëjaohua'i huani je̱oñe pa'iji cajëna. 21Yëquë cato ja̱ëpi Israel pa̱ire huasoja̱'quë api cajë utecohua'i paë'ë. Yure ja̱je pa'ijëna, si'aye iye co'aye yo'ohuë, coa toaso̱ mu'seña i̱te yo'ose'e tëtosaiji, yure. 22Ja̱je yo'ose'e pa'itoje̱ ai jerepa ai cuasaye pa'iji. Yëquë ja̱'re co̱ni nomiohua'i pa'icohua'ipi nea hue̱'ñarepa sani ña quëquëhuë, ta̱si daripë. 23Jesús ca̱pë peoco pa'ina, ja̱je ñani ja̱ohua'ipi dani yëquëre quëahuë. Huëo ca̱ni ñañeje pa'ye hui̱ñaohua'ire ñajëna, ja̱ohua'ipi Jesús huajëquëpi pa'iji cahuë cajë. 24Ja̱ jeteyo'je yëquë cajeohua'ije̱ ta̱si daripëre sani ñajëna, ja̱re ja̱je nomiohua'i case'eje̱ pa'ye pa'ina, ti̱'ani ñahuë. Jesureta'a ñama'pë paë'ë.”
25Ja̱je quëaquëna, ja̱ maca Jesupi capi, ja̱ohua'ire:
“Asa ti̱'ama'cohua'ire pa'ni, mësaru. Je yëhua asani sehuoja̱'cohua'i a'ni Maija'quëre quëacaicohua'i cajë pa'ise'e. 26¿Mësarupi cuasato Cristo ai yo'oye paja̱'quë paquë si'aye iye ja̱ yë'ta'a i̱ de'o hue̱'ñarepa saima'ë pani?”
27Ja̱je se cani ja̱ maca quëa huëopi, si'aye i̱te yo'o ja̱'ñere cajë toyase'ere. Moisés toyaquë pa'ise'epi huëoni cui'ne yecohua'i Maija'quë quëaquëna, toyasicohua'i toyajë pa'ise'e co̱ni quëapi.
28I̱ohua'i cajë saisi daripëna ti̱'ani, Jesús ja̱ yë'ta'a i̱ sai hue̱'ña sasi'i caquë yo'oyeje̱ yo'opi. 29Ja̱je yo'oquëna, ja̱ohua'ipi soihuë:
“Yëquë ja̱'re co̱ni pëajë̱'ë na'iji, coa ñami de'o tëjiji.” Asani ja̱ maca Jesús i̱ohua'i ja̱'re co̱ni cacani pëapi. 30Pëasiquëpi a̱o a̱i saihuëna i̱ohua'i ja̱'re co̱ni ja'rusi maca i̱pi panpë i̱ni Maija'quëre se pëpani jëyoni jë'yequë ja̱ohua'ire a̱opi. 31Ja̱je i̱ yo'o maca ña ti̱tahuë, i̱re papi cuasajë. Ja̱je cuasa maca tsoe peo hue̱'ña huesëpi. 32Ja̱ maca i̱ohua'ija̱'a sa̱'ñe cahuë:
“Maipi asahuë, mai joñoa ai sihua ëaye nëiñe, ma'aja'a dai toyase'ere i̱pi quëaquëna.”
33Ja̱je ñani ti uteye peoyerepa ma'aja'a dai huëoni daë'ë, cui'naohua'ipi Jerusalénna. Ti̱tajëna, ja̱rote paë'ë, once Jesús soicohua'i tsi'sisicohua'ipi i̱ohua'i cajeohua'i ja̱'re co̱ni. 34Pa'ijëna, ti̱tani asajëna, ja̱ohua'ije̱ cahuë:
“Nuñerepa Jesús huëji'i. Cui'ne i̱se'ere i̱ñopi, Simónre.”
35Cajëna, ja̱ maca i̱ohua'ije̱ quëahuë, ma'aja'a saijëna, yo'ose'ere. Cui'ne Jesupi panre jë'yequëna, ñani i̱te ña ti̱tase'ere.
Jesupi Ñaiñe, I̱re Ye'yecohua'ina
(Mt 28.16-20; Mr 16.14-18; Jn 20.19-23)
36Ja̱ yë'ta'a i̱ti yo'ose'ere cajëna, Jesús i̱ohua'i jopore pana ñai nëcapi. Ja̱ maca pëpapi, ñeje caquë:
“De'oye pa'ija̱'cohua'i a'ë, mësaru.”
37Caquëna, ja̱ohua'ipi ai quëquë huesëhuë, i̱ pa'isi joyore ñañë cuasajë. 38Ja̱je cuasajëna, Jesupi ja̱ohua'ire capi:
“¿Me yo'ojë quëquë huesësicohua'i pa'iye'ni? ¿Me yo'ojë mësaru joñoa jëa coeyeque hue'eye'ni? 39Ñajë'ë, yë'ë jë̱ñare cui'ne yë'ë quë̱ore. Ja̱re yë'ë i̱ a'ë, mësaru ñasiquërepa. Patoni cui'ne ñajë'ë. Joyo cato ca̱pë cui'ne tara peocoa. Mësarupi yë'ëre ñajëta'a ca̱pë tara hue'equë pa'iye. Yë'ë a'ë, me joyo pa'iye'ni.”
40Ja̱je cani ja̱ohua'ire i̱ñopi, jë̱ña cui'ne quë̱o i̱te que̱se'ere. 41Ja̱je yo'oquëna, ja̱ yë'ta'a i̱re papi cuasaye pa̱huë, ai sihua do'ire, cui'ne quëquë do'ire. Ja̱je pa'ina, Jesupi ja̱ohua'ire capi:
“¿A̲i maña paye, i̱ño?”
42Caquëna, i̱ni i̱sihuë, tsiaya hua'i tsaro sëyosiconi. 43I̱sijëna, i̱ni i̱ohua'ique ñajëna, a̱ji'i. 44Ja̱ jeteyo'je capi, ja̱ohua'ire:
“Ja̱ yo'ose'e cato yë'ë mësaru ja̱'re ja̱ yë'ta'a co̱ni pa'i case'ere yo'ohuë. Si'aye Moisés cua̱ñese'e cui'ne Maija'quëre quëacaicohua'i toyase'e, cui'ne Salmos toyase'e si'aye ti̱'añe paji'i. Me paquë'ni, nuñerepa case'e. Ja̱je pa'ina, yo'ohuë.”
45Ja̱ cato quëapi, toyase'e cayere nuñerepa asa ti̱'ajajë caquë. 46Ja̱je pa'ina, quëaquë ja̱ohua'ire capi:
“Ñeje toyase'e pa'iji. Cristo ai yo'oquë ju̱ni huesëye pa'iji. Ja̱je ju̱'isiquëta'a toaso̱ mu'seña pa'i maca cui'naëpi huëija̱'quë api. 47Ja̱je pa'ina, Cristo mamire cajë quëaye pa'iji. Si'a hue̱'ña pa'icohua'ire Jerusalén pa̱ire quëa huëoye pa'iji. Huëosicohua'ipi ñeje cajë: Ja̱'në cuasase'e je̱oni po̱nëjë'ë. Ja̱je yo'ojëna, mësaru co'aye yo'ose'ere sa̱i de'huacaiye pa'ija̱'coa. 48Ja̱je pa'ina, mësaru a'ë, yure iye ñasicohua'irepa. 49I̱na, yë'ëpi, ja'quë ca nëose'e jëjo daoja̱'quë a'ë, mësaruna. Ja̱je pa'ina, saima'pë i̱ño Jerusalén daripëre pa'ijë̱'ë, ma'tëmo jëjo dao tuture utejë̱'ë, mësaru su̱ña ja̱'ñere.”
Ma'tëmona Sa Cua̱ñoñe
(Mr 16.19-20)
50Jesupi sai sapi, jai daripë Betaniare pana. Ja̱rona jë̱ña mëani Maija'quëre se̱cacaji'i, ja̱ohua'ire. 51De'oye pa'ijë̱'ë, cani ja̱ohua'ire je̱oni ma'tëmona sa cua̱ñopi. 52Ja̱ jeteyo'je Maija'quëre se̱ni tëjini co'ihuë, Jerusalénna ai sihuajë. 53Cui'ne si'anë Maija'quëre se̱ huë'ere pa'ijë Maija'quëre de'oquë api cajë sihuajë paë'ë. De'oji. Ca tëjihuë.
Voafantina amin'izao fotoana izao:
Lucas 24: sey
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2012, Wycliffe Bible Translators, Inc. All rights reserved.