Mateo 3
3
Juan Oco Doquë Cue̱ne Yeja Pa'iye
(Mr 1.1-8; Lc 3.1-9, 15-17; Jn 1.19-28)
1Ja̱ mu'seña Juan oco doquëpi Judea cue̱ne yejana so̱quë peo hue̱'ñana Maija'quë cocare quëaquë daji'i. 2Ñeje caquë: “Ma'tëmo cua̱ñeñe ja'yere pa'iji. Ja̱ do'ire ja̱'rë cuasase'e je̱oni po̱nëjë'ë.”
3Iquë Juan yo'o ja̱'ñere Maija'quëre quëacaiquë Isaías toya'a̱ji'i, ñeje:
Cue̱ne yejapi pa̱i ñeje cuiye asa cua̱ñoji.
Ne de'huajë̱'ë, Ëjaërepa ma'are.
Nui ma'arepa hui'yocaijë̱'ë.
4Juan ju'i ca̱ camello nañapi nesico paji'i. Cui'ne i̱ të̱ica̱je ca̱'ni me paji'i. Ja̱je pa'ipi pu̱'suni a̱ji'i. Cui'ne mejaë payare o̱cuequë paji'i. 5Jerusalén daripë pa'icohua'i, cui'ne si'aohua'i Judea yeja pa'icohua'ije̱, cui'ne Jordán tsiaya ja'ye maca pa'icohua'ije̱ i̱ quëaye daijë asahuë. 6Ja̱ohua'ipi i̱ohua'i co'aye yo'ose'ere oijë quëacohua'ini Juanpi Jordán tsiayana dopi.
7Ja̱je yo'oquëna, jai pa̱i fariseohua'i cui'ne saduceohua'i co̱ni oco do cua̱ñoñu'u cajë daijëna, Juanpi ñani capi, ja̱ohua'ire: “¡A̲ña tsëcapë acohua'i! ¿Nepi mësarute quëare'ni, Maija'quë nejoñe, ti̱'añere jëajë̱'ë, cajë? 8Ja̱je pa'ito nuñerepa po̱nësicohua'i yo'oyere yo'ojë̱'ë, ti̱ña ñañerepa ja̱'në pa'ise'e je̱oni. 9Cui'ne mësaruja̱'a sa̱'ñe yëquë Abraham tsëcapë acohua'i a'ë cama'pë pa'ijë̱'ë. Care payë, Maija'quëpi iye quë̱na pë̱aque i̱pi yëni Abraham tsëcapëre neñe pa'iji. 10Ja̱je pa'ina, tsu̱'upo tsoe niusicoa, so̱quë ñëa cue̱ja'core. Si'a so̱quë ñëa de'o ca̱ quë̱i ma'ñe cue̱ni ta̱oni ëo ja̱'ñe a'ë. 11Yë'ë nuñerepa ocopi doyë, mësarute, ja̱'në cuasase'e je̱oñere i̱ño ja̱'ñere. Ja̱je pa'iquëta'are jeteyo'je daiquë api. Ja̱ëpi yureta'a Maija'quë joyopi cui'ne toapi doja̱'quë api, jerepa pa'ipi. Yë'ë cato i̱te de'oye necaiye ti̱'ama'quë a'ë. 12Tsoe i̱ jë̱tëpi pala ca̱jiji, trigo ne de'huaquë jorose'e ti̱rona huahueja̱'core. I̱ti ca̱re pase'e huë'ena de'huaquë, i̱ti jorose'e se yayama'a toana ëoja̱'quë api.”
Jesure Doye
(Mr 1.9-11; Lc 3.21-22)
13Juanpi doja̱quë caquë Jesús Galileapi Jordán tsiayana daji'i. 14Ja̱je daquëna, Juan du'ru macarepa coepi, doye. Ja̱je coequë capi, Jesure:
“Yë'ëpi më'ëni do cua̱ño'ñe pa'i a'ë. ¿Me yo'oquë yë'ë quë'rona daquë'ni?”
15Caquëna, Jesús i̱te capi:
“Yurese'e ja̱je pa'ija̱quë. Coa Maija'quë yëyeje̱ pa'ye yo'oye pa'iji.”
Caëna, ja̱ maca Juanpi sehuoni dopi. 16Jesús do cua̱ñosiquëpi tsiayapi tu̱masi maca, ma'tëmopi hui'yo sai maca Jesús ñapi, Maija'quë joyopi su'teje̱ pa'ipi i̱ si̱opë quë'rona nëca meina. 17Ja̱ maca ma'tëmopi yë'ose'e ñeje pi̱siquëna, asahuë: “Iquë api, yë'ë mamaquë. Ja̱ëni sihuaquë pa'iyë.”
Voafantina amin'izao fotoana izao:
Mateo 3: sey
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2012, Wycliffe Bible Translators, Inc. All rights reserved.