JUAN 6
6
Gu Jesuus na muiꞌdhalhdhai gu koiꞌ tu ja makiaꞌ gu muiꞌ jaꞌtkam
(Mt. 14:13‑21; Mr. 6:30‑44; Lk. 9:10‑17)
1Baꞌ gatuuk na puiꞌ jɨꞌ xi chu aꞌgimɨk gu Jesuus, ma jii baasɨꞌn dɨr jaꞌk nam paiꞌ gook kɨꞌn jix chu mat kaꞌ, suudaiꞌ gɇꞌ suuꞌn na Galilea bhaan bipioꞌ, gio baꞌ suudaiꞌ gɇꞌ suuꞌn na Tibeeriyas bhaan bipioꞌ. 2Baꞌ muiꞌ jaꞌtkam mu oiꞌñchuꞌ am, nam guꞌ bɨɨpɨꞌ dɨr ba nɨiꞌñ nax bhaiꞌ tu bua na tuꞌr jix bhaiꞌm duukam, puiꞌ na jax gux kakoꞌkkam na ja duduadhiꞌñdhaꞌ. 3Baꞌ gu Jesuus jimɨɨk bhammɨ jim jɨɨp oidhaꞌ juraab na paiꞌx kotboraꞌ ja bɨɨm guiꞌ nam kaichuꞌ. 4Baꞌ moo janoꞌ pɨk jup bar miaꞌn bhaan Paaskua taꞌm nam paiꞌ dhuuk tu piastat gu Israel kam jaꞌtkam. 5Baꞌ muiꞌ pɨx jax ji ai mɨt gu jaꞌtkam nat ba ja tɨɨ gu Jesuus guiꞌ nam gatuuk dɨr mu jiimchuꞌ. Baꞌ gu Jesuus xi chɨkka gu Piliip, jup tɨtda:
―¿Jax jach baꞌ dui tu ja makiaꞌ dhi jaꞌtkam? ¿Tuꞌch kɨꞌn tu sabaꞌdaꞌ gu koiꞌ nach ja makiaꞌ?
6Ku guꞌ pɨx jap tɨtda ji, ea jax pɨk sap tɨꞌyaꞌ, na guꞌ pux maat gu Jesuus na jax dhui tu ja makiaꞌ. 7Baꞌp kaiꞌch gu Piliip:
―Dho pu ni jax dhui dho, nach guꞌ cham muiꞌ uaꞌ gu tuumiñ. ¿Tuꞌch gi kɨꞌn jup tu sabaꞌdaꞌ gu koiꞌ? Sia ku chich chi moo tɨi ma chu jua jɨꞌk xijum baik masaaꞌn, pu cham dho ja aix gu koiꞌ, sia ñich chi bɨɨx kaꞌm tu sabaꞌlh nañ jɨꞌk maiꞌchiaꞌ gu tuumiñ.
8Baꞌ gu jumai miꞌ dhɨr jaꞌp bhaiꞌp ji ñio Anrees tɨɨgim, na puiꞌp jir nobiiꞌñ gu Jesuus, nar sɨpdhiꞌñ gu Simoon Peegro, jup kaiꞌch ɨp:
9―Muni tɨi uaꞌ ji maaꞌn gu alhii jix chamaam gu paan gio gook gu boptop. ¿Tuꞌ gip ja aix, nam guꞌ giilhim jir muiꞌ dhi jaaduñ?
10Baꞌ gu Jesuus jup ja tɨtda:
―Ea na pim xi ja chiñiaꞌ nam bɨɨx xi dharaibuꞌ.
Baꞌ guiꞌ xi ja chia mɨt ɨp. Baꞌ pɨx mi jaꞌp jup ji dharaibu mɨt saiꞌ dhaam gu jaꞌtkam, na guꞌ jaꞌp moo joidham jup jix xaꞌiiꞌ kaꞌ bhaiꞌ. Alh moo siamrir muiꞌ am dho baꞌ ji gu jaꞌtkam, jix chamaam mambhɨɨx jix chaꞌtman ooꞌm (5000) aix am dai gu chichioꞌñ, gu uꞌuub guꞌ cham daaxix kam ji gam aꞌaalh. 11Baꞌ gu Jesuus nat jax daa gu paan xi chu taxchaabgidhak jix dhaam jaꞌk pɨx muiꞌ ji ja maa gu noonbiꞌñ. Baꞌ guiꞌ miꞌ dhɨr pɨx naiꞌp ji ja maa mɨt gu jaꞌtkam nam mi jaꞌp pɨx jaꞌx dharaa. Gio miꞌ dhɨr gu boptop bɨɨx pɨx muiꞌp ji ja maa mɨt. Bɨɨx jam tu koiꞌmɨk nam jɨꞌx ɨlhiiꞌñ. 12Baꞌ jaꞌxpɨx na xi ja nɨiꞌñ gu Jesuus nam jaiꞌ mi jaꞌp cham ka jugiokkar na mɨt xiꞌ ba kakoob, jup ja tɨtda gu noonbiꞌñ:
―Jumpadaꞌ pim gu taꞌtak na mɨt cham jugio jaiꞌ dhɨt mɨjɨ jaꞌp, na cham tuꞌ kub miꞌ maiꞌ gɨxiaꞌ.
13Baꞌ guiꞌp ma chu jumaap jamɨt, mambhɨɨx daman gook bapaalh jamɨt ja susduiꞌ gu taꞌtak. Giilhim muiꞌp jum duu gux chamaan gu paan gio gu gook gu boptop. 14Baꞌ gu jaꞌtkam na mɨt tɨɨ nat puiꞌ jɨꞌ tu duu gu Jesuus, jup kaiꞌch am:
―Dhiꞌ ji bak jir diꞌ guiꞌ na saak bha jimdaꞌ na yaꞌ bhaankamuꞌn tu aꞌgaꞌ guch Gɨꞌkoraꞌ.
15Bɨɨx aixim ba ji chɨi mɨt, jup kaiꞌch am na sap jir am nam gɇꞌkam kɨꞌn daasaꞌ sia ku cham aaꞌ. Guꞌ ji na guꞌx maat gu Jesuus nam jax kaiꞌch, baꞌ pu jii cham ji ja aaꞌñdhak baasɨꞌn jaꞌk jix ioꞌm oidhaꞌ daam na paiꞌ cham jaroiꞌ oirɨ.
Gu Jesuus na joidham suudaiꞌ dhaam pɨx jimdaꞌ
(Mt. 14:22‑27; Mr. 6:45‑52)
16Baꞌ jaꞌxpɨx nat paiꞌ ba ji dhɨdɨmpu, ba jii mɨt gu noonbiꞌñ gu Jesuus bhaiꞌ dhɨr oidhaꞌ juraab na paiꞌx kotboraꞌ. Mummu mɨt ba juur na paiꞌ gɇꞌ suuꞌn gu suudaiꞌ. 17Miꞌ dhɨr na mɨt jax bha tɨɨtɨs kanuub taꞌm, gamaiꞌ pu bhɨi mɨt bɨɨx suudaiꞌ dhaam sɨlh baasɨꞌn dɨr jaꞌk Kapernaum. Jix ioꞌm bax chukgam ji guꞌ. Gu Jesuus pui bhammɨ paiꞌ pɨx maiꞌch, cham paiꞌ joiñ baꞌ. 18Baꞌ na mɨt nammɨ gama jaꞌk ba ji bhɨi, giilhim jix ioꞌm bhaiꞌ ji jɨb, bhaiꞌ ji guꞌngukɨ gu suudaiꞌ. 19Jix ioꞌm gama jaꞌk ɨrban pɨx iam na mɨt ba ji bhɨi nam paiꞌ cham pum aaꞌ, ba tɨɨ mɨt gu Jesuus na joidham bɨɨx suudaiꞌ dhaam pɨx tuꞌ tuiꞌdhiꞌ na muiꞌ ba jim, amuub ba ji bhɨi miꞌ nam paiꞌ jiimchuꞌ. Guiꞌ giilhim bhaiꞌ ji chootoꞌn jamɨt, 20guꞌ ji nat guꞌ jotmodaꞌ mu ñio gu Jesuus, jup ja tɨtda:
―¡Chaꞌpim totdon kaꞌ! Aañiꞌ pɨx jup tuiꞌdhiꞌ.
21Baꞌ gu noonbiꞌñ jix bhaiꞌm ɨlhdhak jup tɨtda am na bhaiꞌ xi chɨsdiaꞌ kanuub taꞌm. Baꞌ gu Jesuus bhaiꞌp xi chɨs, jotmodaꞌ mɨt pu baasɨꞌn dɨr ai cham jum ɨlhdham.
Gu jaꞌtkam nam ba gaꞌngadaꞌ gu Jesuus
22Baꞌ buimgidhak bhammɨ dɨr tɨi nɨɨra am gu Jesuus gu jaꞌtkam guiꞌ na mɨt bhammɨ dɨr pup bii baasɨꞌn dɨr, nam guꞌ ja nɨiꞌñ na mɨt dɨɨlh bhɨjɨ jaꞌk ji dhuu gu noonbiꞌñ, cham tuꞌ bɨɨx bha tɨs kanuub taꞌm gu Jesuus guiꞌ na mɨt bhaan bha jii. Baꞌ cham ɨlhiiꞌñ am noꞌt gatuuk dɨr dɨɨlh bha jii, nam guꞌ daipuꞌ maaꞌn miꞌ ka nɨidhat na sɇꞌ suudaiꞌ dhaam gu kanuub. 23Baꞌ moo ampɨk jaiꞌ gama jaꞌk jup ba ai mɨt gu jaꞌtkam kaknub taꞌm nam mu dɨr jaꞌk jiim Tibeeriyas, nar miaꞌn bhaiꞌ dhɨr oidhaꞌ juraab na paiꞌx kotboraꞌ, nat paiꞌ xi chu taxchaabgidhak gu Jesuus nat tu ja maa gu jaꞌtkam. 24Guꞌ baꞌ na guꞌ cham paiꞌ aajim gu Jesuus nam tɨi nɨɨra, ni gu noonbiꞌñ kum cham paiꞌ joiñ nam mu namkipuꞌ, baꞌ na mɨt jax bha tɨɨtɨs kaknub taꞌm, pu jii mɨt bhammɨ dɨr jaꞌk Kapernaum na mɨt ba gaagam.
Gu Jesuus nap kaiꞌch nar jix dhaam kam gu koiꞌ
25Baꞌ na mɨt jax bhammɨ dɨr tɨɨtɨs baasɨꞌn dɨr gu jaꞌtkam, bhaiꞌ pɨx jaꞌp ji chɨɨ mɨt gu Jesuus, baꞌp tɨtda am:
―¿Paa pich dhuuk yammɨ dɨr jaꞌk tɨs jiñ jaduuñ? Aach bhammɨ dɨr tɨim nɨɨraimɨk.
26Baꞌp ja tɨtda gu Jesuus:
―Tuꞌ sɨlhkam jañ yaꞌ pu jam tɨɨdaꞌ na pim jax kaiꞌñkam jiñ gaagim jiñ jaaduñ, na pim giop bax bhioꞌ dho. Guꞌ ni jɨꞌx ji ku pim xim gaꞌnga na jax jir jum duukam nañ baꞌ bɨxchuꞌx aichuꞌn nañ pu tu duñiaꞌ na tuꞌr jix bhaiꞌm duukam, noꞌñ jaxjɨ gɇꞌkam kat baꞌ puiꞌ tu bua, kaꞌ baꞌ guꞌ cham. 27Moo pim cham gam ɨrdat oipodaꞌñ jaaduñ. Xim gaꞌngadaꞌ pim na pim jax jaꞌk duuji biaꞌkaꞌ gu koiꞌ na cham tu juꞌngɨ, cham tuꞌ na pim dai bhaan tɨtɨɨꞌñchokaꞌ gu koiꞌ na ampɨx tu juꞌngɨ na kɨꞌn jum guguuxiꞌñ dhi jam tutkuꞌ. Guꞌ jaꞌpji na pim xim gaꞌngadaꞌ ji na jax jaꞌk gammɨjɨ jam aꞌm ba tɨ nɨidhidhaꞌ guñ Gɨꞌkoraꞌ na pim baꞌ ba biaꞌkaꞌ gu koiꞌ guiꞌ na cham tu juꞌngɨ. Aañiꞌ dho tu maak noꞌ jaroiꞌ soiꞌm ɨlhdhat jiñ chaan, nat guꞌ puiꞌñ chɨɨdak bhañ joot guñ Gɨꞌkoraꞌ.
28Baꞌ bhaiꞌ ji chɨkka mɨt, jup tɨtda am:
―¿Jax gi jaꞌk jix bhaaiꞌ nach dhuuji miꞌ puiꞌ jimiaꞌ na jax jix aaꞌ gu Dios?
29Baꞌp ja tɨtda gu Jesuus:
―Dho dai na pim bɨɨx jam jujur kɨꞌn tɨ jɨɨgiꞌñdhaꞌ aañ jiñ bui nar sɨlhkam nat guiꞌ bhañ joot.
30Baꞌp tɨtda am ɨp gio:
―Dho ea nap maaꞌn jup duñiaꞌ gu tuꞌ nar jix bhaiꞌm duukam jich ñɨiꞌñchudat nach tuꞌ cham paiꞌ nɨiꞌñ, nach baꞌ tɨ jɨɨgiꞌñdhaꞌ aap jum bui noꞌ baabuiꞌr sɨlhkam nap jax kaiꞌch. 31Jaꞌp na jax jum kaiꞌch mi uꞌuan taꞌm nat tu uaꞌnak gu Moisees na saak mu paiꞌ oirɨt gampɨx ja bɨɨm gu jaiꞌch bopxikat nabap tanoolh ja maakdaꞌ gux dhaam kam gu koiꞌ guiꞌ na saak manaa tɨɨꞌkaꞌ.
32Baꞌp ja tɨtda gu Jesuus:
―Tuꞌ sɨlhkam jañ yaꞌ pu jam tɨɨdaꞌ, matgam dhiꞌ alh jaꞌp moo pu cham jum aꞌga ji na pim aapiꞌm tuꞌ aaꞌ. Na guꞌ cham tuꞌ dɨɨlh gu Moisees na ja maakdaꞌ gux dhaam kam gu koiꞌ, guñ Gɨꞌkoraꞌ ji na ja maakdaꞌ, ku guꞌr maaꞌn ji na jax juꞌngɨdaꞌ. Guꞌ matgam dhiꞌ nañ aañ xib yaꞌ aaꞌ nañ jax chuꞌm tu maak bhaankamuꞌn guñ Gɨꞌkoraꞌ, jir jix kɨɨꞌ koiꞌ ji na pu cham tu juꞌngɨ. 33Baꞌ gu koiꞌ na Dios tu maak, jir bhammɨ kam jix dhaam. Aañ baꞌ yaꞌ ja mattudaꞌ gu jaꞌtkam na jax jaꞌk jix bhaaiꞌ nam duñiaꞌ na baꞌ ja makiaꞌ gu Dios gux dhaam kam gu koiꞌ guiꞌ nam kɨꞌn gammɨjɨ pu ba duduakaꞌ gu ja iꞌiiꞌmdaꞌ bhaan.
34Baꞌp tɨtda am:
―Ea nap jich makiaꞌ gu tuꞌ pux kɨɨꞌ koiꞌ nap aaꞌ.
35Baꞌp ja tɨtda gu Jesuus:
―Aañiꞌ dhor diꞌ gux kɨɨꞌ koiꞌ nar jix dhaam kam. Baꞌ gu jaroiꞌ noꞌt ba tɨ jɨɨꞌñ aañ jiñ bui, jaꞌp ji buusniaꞌ na cham ka bhioꞌm kaꞌ, ni ku cham ka tanoom kaꞌ, na guꞌ gammɨjɨ bhaan ba tɨ nɨidhidhaꞌ guñ Gɨꞌkoraꞌ. 36Ku guꞌ jaiꞌ dhɨt cham tɨ jɨɨgiꞌñ japim ji noꞌt guiꞌ bhañ joot, sia kuñ guꞌ tɨi jam nɨiꞌñchudat jup tu bua na tuꞌr jix bhaiꞌm duukam. 37Dai guiꞌ nat jɨꞌk puiꞌ jaꞌk ja jujurtuda guñ Gɨꞌkoraꞌ nam baꞌ siamrim guguuxiꞌñ nam tɨ jɨɨꞌñdhaꞌ aañ jiñ bui, baꞌ aañ miꞌ dhɨr ja guguuxdhaꞌ cham jax ji chɨꞌji. 38Na ñich guꞌ aañ cham tuꞌ jax kaiꞌñkam bha jii bhammɨ dɨr jix dhaam nañ yaꞌ ɇɇji bɨɨx aixim ba ji chu buimiaꞌ nañ jax ɨlhiiꞌñ dɨɨlh, guꞌ jaꞌpji nat jax pɨx jiñ chɨɨꞌn ji guiꞌ nat bhañ joot. 39Na guꞌ guñ Gɨꞌkoraꞌ jaꞌpni jaꞌk jix aaꞌ, na guiꞌ nat jɨꞌk puiꞌ jaꞌk ba ja jujurtuda nam ba tɨ jɨɨꞌñdhaꞌ aañ jiñ bui, jix aaꞌ nam gammɨjɨ bañ kaichgɨdaꞌ, na baꞌ janoꞌ na paiꞌ dhuuk tum kuugalhdhaꞌ yaꞌ dhi oiꞌñgaꞌn, cham ja tulhiiñchudaꞌ iñ, dai nañ pu ja baidhikaꞌx dhaam jaꞌk. 40Gio baꞌ jaꞌpni jaꞌk moop jix aaꞌ guñ Gɨꞌkoraꞌ nat bhañ joot, na bɨɨx guiꞌ nam jɨꞌk jix maatɨt jiñ kɇɇ, noꞌ mɨt ba tɨ jɨɨꞌñ nar sɨlhkam nañ jax tu aꞌgadaꞌ, gammɨjɨ ja aꞌm ba tɨ nɨidhidhaꞌ. Aañ baꞌ ja baidhikaꞌx dhaam jaꞌk na paiꞌ dhuuk tum kuugalhdhaꞌ yaꞌ dhi oiꞌñgaꞌn.
41Baꞌ pɨx am bhaak jamɨt gu gɇꞌgɇrkam Israel kam nap ja tɨtda gu Jesuus: “Aañ jir diꞌ gux kɨɨꞌ koiꞌ, nañ guꞌ bhammɨ dɨr jim jix dhaam.” 42Bhaiꞌ ji ñiokbo mɨt, jup kaiꞌch am:
―¿Jax ku baꞌ puiꞌ kaiꞌch dhi jaduuñ? ¿Cham aar diꞌ gu Jesuus tɨɨgim, maraaꞌn gu Josee, gio gu dɨꞌɨɨꞌn jach jup jix maat ɨp? ¿Jax gi ji ku baꞌp jich chɨtda: “Aañ bhammɨ dɨr jim jix dhaam”?
43Guꞌ ji na guꞌ ja kɇɇ gu Jesuus nam jax kaiꞌch, baꞌp ja tɨtda:
―Moo pim cham tuꞌ bhaan ñiokbodaꞌñ jaaduñ. 44Na guꞌ cham jɨꞌxkat tɨ jɨɨꞌñdhaꞌ gu jaroiꞌ aañ jiñ bui noꞌ cham puiꞌ jaꞌk jurtuꞌn guñ Gɨꞌkoraꞌ nat bhañ joot, nañ baꞌ aañ miꞌ dhɨr baidhikaꞌ gɨt jix dhaam jaꞌk janoꞌ na paiꞌ dhuuk tum kuugalhdhaꞌ yaꞌ dhi oiꞌñgaꞌn. 45Na guꞌ puiꞌ jaꞌk tu uaꞌñix mi uꞌuan taꞌm nat paiꞌ tu uaꞌnak maadɨt guiꞌ nam bhaankamuꞌn ya jaꞌp tu aꞌgimɨk guñ Gɨꞌkoraꞌ bɨjɨk, nap jum kaiꞌch: “Gu Dios bɨɨx ka ja mattudaꞌ na jɨꞌk jaꞌtkam gu ñioꞌkiꞌñ.” Baꞌ dhiꞌ jaꞌpni kaiꞌñkam jup jum kaiꞌch, na guiꞌ nam jɨꞌk bɨɨx ja jujur kɨꞌn jix biiñak kaꞌ buiñor guñ Gɨꞌkoraꞌ, dɨɨlh pɨx bhaiꞌx maatɨt ji kaayaꞌ am nañ jax tu ja aꞌgiꞌñ.
46’Ku guꞌ guñ Gɨꞌkoraꞌ cham jaroiꞌ nɨiꞌñ ji gu maaxik, na guꞌ giilhim jir jix uañ. Dai aañ ji nañ baꞌ nɨiꞌñ, nañ guꞌ bhammɨ dɨr jim jix dhaam na paiꞌp tuꞌiiꞌ. 47Tuꞌ sɨlhkam jañ yaꞌ pu jam tɨɨdaꞌ, gu jaroiꞌ noꞌt ba tɨ jɨɨꞌñ aañ jiñ bui, gammɨjɨ bhaan ba tɨ nɨidhidhaꞌ guñ Gɨꞌkoraꞌ, 48na guꞌ aañ jir diꞌ gux kɨɨꞌ koiꞌ gux dhaam kam. 49Jir sɨlhkam dho nam tu koiꞌmɨk gu manaa gu bɨjɨk dɨr kam janoꞌ nam mummu oipimɨk gampɨx, ku guꞌ puiꞌ pɨx jup koi mɨt ji. 50Guꞌ aañ gux dhaam kam gu koiꞌ nañ aagɨt jup kaiꞌch, pu cham tu juꞌngɨ ji. Baꞌ gu jaroiꞌ na tu jugiaꞌ, cham ka tu mumkɨdaꞌ gu iiꞌmdagaram bhaan. 51Na guꞌ kaiꞌñkam aañ pɨx jir diꞌ gux kɨɨꞌ gu koiꞌ nar jix dhaam kam, na baꞌ gu jaroiꞌ noꞌt puꞌñi ba tu juu, gammɨjɨ ba duakaꞌ gu iiꞌmdagaram bhaan. Na guꞌ dhiꞌñi dhi koiꞌ nañ aañ tu maak, jir jiñ chuukuꞌ na ñich bha ja maakim nam tu jugiaꞌ bɨɨx na jɨꞌk gu jaꞌtkam, nam baꞌ kɨꞌn gammɨjɨ pu ba duduakaꞌ gu ja iꞌiiꞌmdaꞌ bhaan.
52Baꞌ gio bhaiꞌp ji ñio mɨt gu gɇꞌgɇrkam Israel kam, jup kaiꞌch am:
―¿Jax baꞌm aagɨt jup kaiꞌch dhi jaduuñ? ¿Jax gi dhuip jich makiaꞌ gu tukgaꞌn nach tu jugiaꞌ?
53Guꞌ ji na guꞌ ja kɇɇ gu Jesuus na mɨt giop ba ji ñiokbo, baꞌp ja tɨtda:
―Tuꞌ sɨlhkam jañ yaꞌ pu jam tɨɨdaꞌ, gu jaroiꞌ noꞌt cham tu juu dhiñ chuukuꞌ gio noꞌt cham tu ii guñ ɨꞌɨɨr, aañ na ñich jix dhaam dɨr bha jii, cham tuꞌ bhaan tɨ nɨidhidhaꞌ guñ Gɨꞌkoraꞌ. 54Na guꞌ gu jaroiꞌ noꞌt ba tu juu dhiñ chuukuꞌ gio noꞌt ba tu ii guñ ɨꞌɨɨr, gammɨjɨ bhaan ba tɨ nɨidhidhaꞌ guñ Gɨꞌkoraꞌ, nañ baꞌ aañ miꞌ dhɨr cham tuꞌ ka tulhiiñchudaꞌ, dai nañ pu baidhikaꞌx dhaam janoꞌ na paiꞌ dhuuk tum kuugalhdhaꞌ yaꞌ dhi oiꞌñgaꞌn. 55Na guꞌ dhiñ chuukuꞌ gio dhiñ ɨꞌɨɨr, jir diꞌ pɨx gux kɨɨꞌ koiꞌ. 56Baꞌ gu jaroiꞌ noꞌt ba tu juu dhiñ chuukuꞌ gio noꞌt ba tu ii guñ ɨꞌɨɨr, maap bach kɇkɇɇkɇꞌ ich gook dɨt. 57Baꞌ puiꞌ na jax guñ Gɨꞌkoraꞌ na cham tu mumkɨ, aañ puiꞌ cham jup tu mumkɨ, nañ guꞌ bhammɨ dɨr jim jia. Baꞌ gu jaroiꞌ noꞌt ba tu juu dhiñ chuukuꞌ gio noꞌt ba tu ii guñ ɨꞌɨɨr nañ jax ba kaiꞌch, cham ka tu mumkɨdaꞌ ɨp gu iiꞌmdagaram bhaan. 58Aañiꞌ ji nañ baꞌr diꞌ gux kɨɨꞌ koiꞌ nañ bhammɨ dɨr jim jix dhaam, cham tuꞌ pu chuꞌm na gu manaa nam jax chuꞌm koiꞌmɨk gu bɨjɨk dɨr kam gu jam bopxikat na mɨt puiꞌ pɨx jup koi. Guꞌ matgam noꞌt jaroiꞌ ba tu juu gu koiꞌ nañ aañ jax chuꞌm tu maak, gammɨjɨ ba duakaꞌ ji gu iiꞌmdagaram bhaan.
59Jaꞌpni tu ja aꞌgi gu Jesuus guiꞌ nam miꞌp tuꞌiiꞌ Kapernaum nam paiꞌ tu chiopiꞌ gu Israel kam jaꞌtkam.
Gu Jesuus na ba ja aagiꞌñdhaꞌ gu jaꞌtkam na jax jaꞌk jix bhaaiꞌ na gammɨjɨ ja aꞌm tɨ nɨidhidhaꞌ guch Gɨꞌkoraꞌ
60Baꞌ muiꞌ jaiꞌ dhɨt guiꞌ nam kaichuꞌ gu Jesuus giilhim jix xijaim ɨlhiiꞌñ am gu puiꞌ nat jax tu aꞌga, jup kaiꞌch am:
―¿Jaroo gix maatɨt jup ba kai, na guꞌ giilhim jix xijaim kaiꞌch?
61Guꞌ ji na guꞌx bhaiꞌx maat gu Jesuus nam giilhim jix xijaim ɨlhiiꞌñ na jax tu ja aꞌgidhimɨk, baꞌp ja tɨtda:
―¿Giilhim jix xijaim kaiꞌch iñ aa panaas na pim xiñ kɇɇ? 62¿Jax japim baꞌm duñiaꞌ noꞌ guꞌ aañ nat bhañ joot guñ Gɨꞌkoraꞌ nañ yaꞌ ka tu aꞌga, jotmodaꞌ bhaꞌñi pu tɨs jañich bhɨjɨmmɨni jaꞌk jix dhaam na ñich paiꞌ dhɨr bha jii? 63Dhiꞌ moo jam aꞌm jum aaꞌ ji na pim tɨ jɨɨꞌñdhaꞌ bɨɨx jam jujur kɨꞌn nañ jax jam tɨtda na baꞌ jam tajaañdhaꞌ guñ Gɨꞌkoraꞌ gux Dhuuduꞌ kam jix Uañ Iiꞌmdaꞌ na pim baꞌx mat kaꞌ na jax jaꞌk jam aꞌm tɨ nɨidhidhaꞌ. Na guꞌ gu dɨɨlh pɨx cham jɨꞌxkat machiaꞌ pim, na guꞌ dai gu tuꞌ yaꞌ kam dhi oiꞌñgaꞌn na pim bhaan tɨtɨɨꞌñcho. 64Puiꞌ na jax aapiꞌm jaiꞌ dhɨt na pim guꞌ cham tuꞌ bɨɨx jam jujur kɨꞌn tɨ jɨɨgiꞌñ aañ jiñ bui.
Baꞌ dhiꞌ na puiꞌ jɨꞌ kaiꞌch gu Jesuus, na guꞌ bɨɨpɨꞌ pux bhaiꞌx mat kaꞌ nam jax chuꞌm cham bɨɨx ja jujur kɨꞌn tɨ jɨɨgiꞌñdhaꞌ, jaꞌp na jax guiꞌ na jaroiꞌ maaxik kɨɨsaꞌ nam boi bhɨichdhaꞌ. 65Miꞌ dhɨr baꞌ giop xi ja tɨꞌñchoix na jax ba ja tɨtda, jup kaiꞌch:
―Kaiꞌñkam cham jɨꞌxkat tɨ jɨɨꞌñdhaꞌ aañ jiñ bui gu jaroiꞌ noꞌ cham puiꞌ jaꞌk jurtuꞌn guñ Gɨꞌkoraꞌ.
66Baꞌ janoꞌ dɨr muiꞌ cham ka kaichgɨdaꞌ am gu Jesuus guiꞌ nam ka kaichgɨt, cham paiꞌ ka aꞌjɨdaꞌ am. 67Miꞌ dhɨr baꞌ jaꞌxpɨx na mɨt dɨɨlh miꞌ ji bii gu mambhɨɨx daman gook gu noonbiꞌñ gu Jesuus, xi ja tɨkka noꞌm puiꞌp bax ooꞌn nam kaichgɨdaꞌ, jup ja tɨtda:
―¿Aapiꞌm aa puiꞌ cham jup kam guguuxiꞌñ na pim jiñ kaichgɨdaꞌ?
68Baꞌ bhaiꞌ ji ñio gu Simoon Peegro, jup kaiꞌch:
―¿Paach gi chi baꞌ jaꞌk jup bhɨɨyaꞌ? Na guꞌ cham jaroiꞌ jaꞌxbuiꞌr gɇꞌkam na jax aap jich jaduuñ nach aagiꞌñdhaꞌ na jax jaꞌk gammɨjɨch aꞌm tɨ nɨidhidhaꞌ guch Gɨꞌkoraꞌ. 69Guꞌ aach dai aap pɨx bhaiꞌ bam nɨidhim ji, na chich guꞌ bɨɨx jich jujur kɨꞌn ba tɨ jɨɨꞌñ aap jum bui, nach guꞌ bax maat nap aap jir diꞌ guch Xoiꞌkam nap jir Maraaꞌn gu Dios nat bham joot.
70Baꞌp ja tɨtda gu Jesuus:
―Dho pu kaiꞌñkam jañich dho jam guguux aapiꞌm mambhɨɨx daman gook na pim jir jiñ ñoonob kaꞌ. Guꞌ ji na guꞌ maadɨt cham puiꞌ ɨlhiiꞌñ, na guꞌ dai mu jaꞌk tukgiꞌñ gu jaꞌook.
71Baꞌ dhiꞌ na puiꞌ jɨꞌ kaiꞌch gu Jesuus, gu Juudas Iskariote maraaꞌn gu Simoon Iskariote na aagɨt jup kaiꞌch, na guꞌ dhiꞌr diꞌ maadɨt gu mambhɨɨx daman gook gu noonbiꞌñ na maaxik kɨɨsaꞌ gatuuk nam boi bhɨichdhaꞌ.
Voafantina amin'izao fotoana izao:
JUAN 6: stp
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2007, Wycliffe Bible Translators, Inc. All rights reserved.