San Juan 2
2
Ɨɨn viko tnundaꞌa ñuu nani Caná
1Nuu uni kɨu n‑xio ɨɨn viko tnundaꞌa ñuu nani Caná distrito Galilea. Te viko veꞌe ijan tuu dɨꞌɨ Jesús. 2Te dɨuni n‑ka jaꞌan ñayiu ijan Jesús xiꞌin se dakuaꞌa‑ia, xa jɨꞌɨn‑ia viko tnundaꞌa. 3Te n‑ndoko vinu kuixi, te n‑jaꞌan dɨꞌɨ Jesús nuu‑ia:
—Xá n‑ndoko vinu.
4N‑jaꞌan Jesús:
—Dɨꞌɨ‑da, ¿nakuenda duꞌa jaꞌan‑n? Ta xee ka hora xa kada‑da tniu n‑taxi Ianyuux.
5N‑jaꞌan dɨꞌɨ‑ia nuu se ka dakee xio xa io viko:
—Kada koio davaꞌa nga xa taꞌu tniu‑i.
6Te io iñu yoo yuú kaxi yɨyujun ijan. Ɨɨn ɨɨn yoo ñuꞌu koon diko a ɨɨn cientu litro ndute. Ndute ka nandaꞌa ñayiu Israel xa xneꞌe ii‑i. 7Te n‑jaꞌan Jesús nuu se ka dakee xio xa io viko:
—Dachitu yoo ya ndute.
N‑ka dachitu‑s yoo ndute. 8N‑xiaꞌan‑ia:
—Vitna tava itaꞌu‑té, te kaneꞌe‑té juaꞌan nuu se yɨndaꞌa ntdaa xa io viko.
Te neꞌe‑s‑té juaꞌan. 9N‑xiꞌi se yɨndaꞌa viko itaꞌu ndute n‑nduu vinu, ko mee‑s ña n‑xini nde n‑kixi vinu. Ko n‑ka xini se ka dakee xio xa io viko, chi mee‑s n‑ka xe tava‑té. Se yɨndaꞌa xa io viko, n‑kana‑s noviu, te n‑jaꞌan‑s:
10—Ntdaa ñayiu, ditna ka dakee xio‑i vinu vaꞌa ka. Te dada, na n‑yaꞌa xa n‑ka xiꞌi vaꞌa se xyɨꞌɨ viko, dakee xio‑i vinu ndaꞌu ka. Ko mee‑n, nevaꞌa‑n vinu vaꞌa ka nde vitna.
11Duꞌa n‑kuu milagru kiꞌna nuu n‑kida Jesús. Ñuu nani Caná distrito Galilea, n‑dandeꞌa Jesús ñayiu xa taxnuni‑ia nuu ntdaa xa io. Te n‑ka jandixa ñaꞌa se dakuaꞌa‑ia. 12Te n‑xeꞌen Jesús ñuu nani Capernaum. Dɨꞌɨ‑ia, ñani‑ia, se dakuaꞌa‑ia du. Ijan n‑ndoo‑ia uni koon kɨu.
N‑jaꞌan Jesús: “Maxku kada koio ka‑n xa veꞌe Taa‑r kuu ná kuu nuyaꞌu”
(Mt. 21:12‑13; Mr. 11:15‑18; Lc. 19:45‑46)
13Vax kuyatni ɨɨn viko ñayiu Israel. Viko nani Paxcua. N‑xeꞌen Jesús ñuu nani Jerusalén. 14Ijan yeñuꞌu, n‑nanitnaꞌa‑ia xiꞌin se ka diko ngutu, tkachi, data. Se ka dama tvini du. N‑ka nukoo‑s ijan. 15N‑kava‑ia ɨɨn chirrión ñɨɨ. Chirrión jan, n‑kineꞌe‑ia ntdaa se ijan, xiꞌin tkachi‑s, ngutu‑s. N‑kida‑ia xa jungoio centau kuechi se ka dama tvini, te n‑dajane‑ia mexa‑s. 16N‑jaꞌan‑ia nuu se ka diko data:
—¡Kaneꞌe koio ntdaa xaꞌa juaꞌan! ¡Maxku kada koio ka‑n xa veꞌe Taa‑r kuu ná kuu nuyaꞌu!
17Te n‑ka najaꞌan se dakuaꞌa‑ia nax jaꞌan tnuꞌu Ianyuux: “Yo kudaꞌan‑da veꞌe Ianyuux. Kuu ná kuu ñuꞌu koko danaa ñaꞌa.”
18Xijan kuu xa n‑ka jaꞌan se Israel nuu‑ia:
—¿Na milagru kada‑n xa dandeꞌa ñaꞌa‑n xa taxnuni‑n? ¿Nax kuu xa kineꞌe‑n se ijan veñuꞌu?
19N‑jaꞌan Jesús:
—Kanu koio veñuꞌu yaꞌa, te nuu uni kɨu ndadavaꞌa‑r.
20Xijan kuu xa n‑ka jaꞌan se Israel:
—Uu diko iñu kuia n‑ka kidavaꞌa‑s veñuꞌu yaꞌa, ¿te mee‑n jaꞌan xa ndadavaꞌa‑n nuu uni kɨu a? ¡Juun!
21Ko xaxeꞌe yɨkɨ kuñu mee‑ia n‑jaꞌan‑ia. 22Xijan kuu xa, na n‑nandoto‑ia xa n‑kuu‑ia ndɨyɨ, te n‑ka najaꞌan se dakuaꞌa‑ia xa duꞌa n‑jaꞌan‑ia. Te n‑ka jandixa‑s tnuꞌu Ianyuux xiꞌin tnuꞌu n‑jaꞌan Jesús.
Vaꞌa kutnuni ini Jesús nax kuu anu ñayiu
23N‑xo tuu Jesús Jerusalén viko Paxcua, te n‑ka jandixa ñaꞌa kueꞌe ñayiu, chi n‑ka xini‑i milagru n‑kida‑ia. 24Ko mee Jesús, n‑xetnɨɨ anu‑ia nuu ñayiu jan, chi naꞌa‑ia ntdaa xa ka xani ini‑i. 25Ña ndoñuꞌu‑ia xa jaꞌan ndaa ni ɨɨn ñayiu xaxeꞌe ñayiu jan. Chi vaꞌa n‑kutnuni ini mee‑ia ntdaa ñayiu.
Voafantina amin'izao fotoana izao:
San Juan 2: xtd
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2001, Wycliffe Bible Translators, Inc. All rights reserved