Genesis 5
5
Is menge Kevuwazan ni Adan
(1 Cronica 1:1-4)
1Iyan heini keguǥuza te menge kevuwazan ni Adan. Dutun te kedlimbaǥa te Megbevayà te menusiyà, midhimu zin is etew iring te kandin he zagwey. 2Maama wey vahi is midlimbag din. Ne hein nepasad din, midtuvazan din sikandan, ne migngezanan din sikandan he “menusiyà”.
3Hein 130 en is penuiǥen ni Adan nevuwad sikandin te maama he utew midsempù kandin ne migngezanan din ki Set. 4Ne puun dutun te ked-enaka ki Set, 800 pa he tuig is keluǥayad te untung ni Adan, ne zuen duma pa he menge anak din he maama wey vahi. 5Ne hein 930 en he tuig is penuiǥen din, minatey sikandin.
6Hein 105 en is penuiǥen ni Set nevuwad sikandin ki Enosh. 7Ne puun dutun te ked-enaka ki Enosh, 807 pa he tuig is keluǥayad te untung ni Set, ne zuen duma pa he menge anak din he maama wey vahi. 8Ne hein 912 en he tuig is penuiǥen din, minatey sikandin.
9Hein 90 en is penuiǥen ni Enosh nevuwad sikandin ki Kenan. 10Ne puun dutun te ked-enaka ki Kenan, 815 pa he tuig is keluǥayad te untung ni Enosh, ne zuen duma pa he menge anak din he maama wey vahi. 11Ne hein 905 en he tuig is penuiǥen din, minatey sikandin.
12Hein 70 en is penuiǥen ni Kenan nevuwad sikandin ki Mahalalel. 13Ne puun dutun te ked-enaka ki Mahalalel, 840 pa he tuig is keluǥayad te untung ni Kenan, ne zuen duma pa he menge anak din he maama wey vahi. 14Ne hein 910 en he tuig is penuiǥen din, minatey sikandin.
15Hein 65 en is penuiǥen ni Mahalalel nevuwad sikandin ki Jared. 16Ne puun dutun te ked-enaka ki Jared, 830 pa he tuig is keluǥayad te untung ni Mahalalel, ne zuen duma pa he menge anak din he maama wey vahi. 17Ne hein 895 en he tuig is penuiǥen din, minatey sikandin.
18Hein 162 en is penuiǥen ni Jared nevuwad sikandin ki Enoc. 19Ne puun dutun te ked-enaka ki Enoc, 800 pa he tuig is keluǥayad te untung ni Jared, ne zuen duma pa zaan he menge anak din he maama wey vahi. 20Ne hein 962 en he tuig is penuiǥen din, minatey sikandin.
21Hein 65 en is penuiǥen ni Enoc nevuwad sikandin ki Metusela. 22-24Ne puun dutun te ked-enaka ki Metusela, 300 pa he tuig is keluǥayad te untung ni Enoc, ne zuen duma pa zaan he menge anak din he vahi wey maama. Dutun he timpu utew meupiya is kedepità ni Enoc wey Megbevayà, umbe nekeuma te 365 is keluǥayad te untung din ne nahanew sikandin, su midtulus sikandin te Megbevayà.
25Hein 187 en is penuiǥen ni Metusela nevuwad sikandin ki Lamec. 26Ne puun dutun te ked-enaka ki Lamec, 782 pa he tuig is keluǥayad te untung ni Metusela, ne zuen duma pa zaan he menge anak din he maama wey vahi. 27Ne hein 969 en he tuig is penuiǥen din, minatey sikandin.
28Hein 182 en is penuiǥen ni Lamec nevuwad sikandin te maama. 29Ne migngezanan din ki Noe su ke sikandin te, “Pinaaǥi kayi te vatà malù ebmahagkap is meveǥat he terebahu tew te kebasuk he imbeǥey kenitew tenged te midrewakan dengan te Nengazen is tanà.” 30Ne puun dutun te ked-enaka ki Noe, 595 pa he tuig is keluǥayad te untung ni Lamec, ne zuen duma pa zaan he menge anak din he vahi wey maama. 31Ne hein 777 en he tuig is penuiǥen din, minatey sikandin.
32Hein 500 en is penuiǥen ni Noe nevuwad sikandin ki Shem, ki Ham, wey ki Jafet.
Voafantina amin'izao fotoana izao:
Genesis 5: mbbOT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2013, Wycliffe Bible Translators, Inc. All rights reserved.