Serer Version Eglise luthérienne du Sénégal (Non-Drama)

NQAARIIT NE ROOG

Na waxtu faaga, wiin cuni-cuni a mbokatoora, a ndakraa. Yeesu a fera o maƭoox daalbe we ten, too a lay a den ee:
«Mbootooxyo poɗaxnir ke no Farisiya we! Kaa tekit yememaar. Ke singeena fop xan a singtel soo ke ɗasneena fop a ñuqtel. Ten taxu ke nu laykaa no niɓaan ole fop, xan a nanel ñaal ne, too ke nu nde’irkaa kam a ndok, xan a yegnitel no qel ke.»


«Kaam layan a nuun, nuun we ndefna qaariit es: Ba nu mbit we mbaagna o mbar cer, too cinj kaaga mbaagee o mbi kaa hupuuna. Xam lay a nuun oxe jarna o fitel. Mbityo a Roog fee waagna o war, soo a jeg sañ-sañ faa ta ɓekitna kam fiɗel laa ñufkeerna. Iyo, mexe layan a nuun, oxeene o mat refu oxe nu mbarna o mbit.
Ndax nu naangee o njikooraa xa ñere-ñere xa ƥetaq xa terem xa ƭaq? Yaaga fop toox de, Roog weecee o ndiiƭ onqe moƴna o neew na den. Wiil le na qoox ake nuun sax kaa limel. Ba nu saɗarat boog! Nuun ngupu giiraand xa ñere-ñere o njiriiñ.»


«Mexe layan a nuun, oxuu layna mbaambir no wiin we yee a andaxam, xan o Ƥeenqe no kiin oxe a lay mbaambir malaaka ke Roog ee a andaan. Kaa koy, oxuu layna mbaambir no wiin we yee andiraam, too a andaam, xam lay mbaambir no malaaka kaa Roog ee andinum.
Oxuu wenna o Ƥeenqe no kiin oxe, a waage o waasan. Kaa koy, oxuu wenna Yiif Tedu le, waasankaand.
Boo nu ƥiseena na hate no pind a qeƭ ke mbaat mbaambir no haahate we mbaat mbaambir no wiin maak we, ba nu nqalam ke nu ndoonkaa mbaat ne nu layitkaa, yaam na waxtu faaga sax sax xan Yiif Tedu le a jangin a nuun ke nu mbarna o lay.»

O leng ndeer no wiin mayu waa a laya a Yeesu yee:
«O Yaal oxe, layi o maag es ta xaajir fa mi ke i mbarna o lam.»
Yeesu a doonaan ee:
«Koor oxe, an ɓekaxam no tig nuun boo um xaajanaa a nuun halal nuun?»
Yeesu a laya a den ee:
«Yetooxyo too mbootoox o mbeq halal, yaam o ñoow no kiin refee no jeg halal, kuu ta mayna may halal oo.»
Maaga, Yeesu a naxooxa a den ee:
«Xa qol no fes o mayu halal a mbat’a mayu. A xalaata taa no yiif um ee: ‹Xar warum o fi, yaam jegiim maa geekuuma saxade le mi?› Kaa koy, a laya na xoox um ee: ‹Kene warum o fi. Xam yaq tap ke mi, riwatin kaa moƴna o magin. Xam geer teen kaaf es fop fo o jeg es fop. Cinj kaaga, xam lay na xoox es ee: Wo o laaw es, jegaa paax mayu kaa geekanoona a xoox of boo xa kiid xa mayu. Naagi ñootnooxaa, ñaamaa, yeraa, felakinooxaa!› Kaa koy, Roog a layaan ee: ‹Nawtul fene! O yeng oleeke sax sax xan o ñis of a xuufel, too yaaga boog an na jegkaa ke geeroona?›
Neene deŋ a nandu no xe na fokatanooxanaa a xoox um halal, too jegee a Roog ta ref halal um.»


Cinj kaaga, Yeesu a laya daalbe we ten ee:
«Ten taxu mexe layaa a nuun ee: Ba o ñoow mbaat ñaamel mbaat ñirax a njaaxɗand a nuun. Mee ndax o ñoow ole moƴu a ñaam ale, soo cer ke a moƴ ñirax ke? Mbetandooxyo a tooq ake andoona yee nduufkee, saxadkee, too njegee a semb mbaat tap, too Roog a ñoownaa a den. Ndax kaa nu andee yee nuun ngupu tiiƭ ke o njiriiñ? An na nuun, na pexey a qalam um, waagu o ɓaat poye no saqit mbaambaañ na xa kiid um? Yaaga boog, nu mbaaganangee a qoox nuun keene no ke moƴna o yooɓ, xar taxu nu njaaxɗaa no yoq ke? Ƭeetaqinyo ne sufar-naak le a maaktaa, too jalkee, forolkee. Mexe layaa a nuun ee: O maad Salomo sax, ke ta jeg’ina jeg o ndam fop oo, mosee o ñiroor nen leng na den. Roog a ñirtangaa neene daaƭ le na xa saawit axe, andoona yee a refangaa xaye, o feet ta deɓel no ngañ, ndax moƴkee o ñir a nuun? Nuun soo neew o ngim! Ba nu ndef no mbaaƭaa boog kaa nu ñaamna mbaat kaa nu yerna mbaat kaa nu ñirooxna. Keene fop koy, yeefar ke na adna fee fop na mbaaƭan. Kaa koy, Roog Faap nuun fee na asamaan a anda yee nu soxla’aan. Mbaaƭyo kañ Maat ne Roog, too keene fop xan nu ndoonanel o ten.»


«Ba nu mbit dara, o njiir onqe nu ndefna ndef! Yaam a fela a Faap nuun boo ta ci a nuun Maat um. Njikooxyo ke nu njegna fop, soo ndimle’tin rool we. Mbaaƭanyo a qoox nuun o geekand o yaqukeer muk, ndax halal nuun a miñ na asamaan maa guuɗ we a matiidkeerna fo maa max ke a naangeerna o yaqtaa tus. Yaam me kalal nuun a ndefna, maaga a yiif nuun a ndefkaa itam.»

«Njagandooxyo, too ngen no ngumnooxaa no ndet, ngeƥand xa lampa nuun. Nuun boog, nandyo nen wiin waa na cungaa o yaal mbind den a nomtooxiid no ngulook ne, ndax da mbaagin o mbetan yaa ta fadiidna boo a koŋ-koŋin. Faɗ we o yaal den a soƥkaa da yetooxaa a ƭaaya! No ndigil, mexe layaa a nuun ee: Xan a humnoox boo yee ŋaƭ, a diƈ a den, soo a matiid ndax ta dagoox a den. A garangaa ndeer o yeng ole mbaat farna fa siik-a-peraand, we ta soƥkaa da yetooxaa, xan a ƭaay lool! Andyo kene a paax: Boo o yaal mbind a and’ina waxtu fee o kuuɗ oxe a garkaa, xaƴkoogee mbind um a gefel. Njagandooxyo nuun itam, yaam o Ƥeenqe no kiin oxe xan a gar na waxtu faa nu mboogooxkeeruuna.»


Maaga, Piyeer a layaan ee:
«O Yaal oxe, ndax in soom o naxooxaa keene ndi lakas we fop?»
O Yaal oxe a doonaan ee:
«Jawdiin fum gore’u too a ƴiƴ boog, ndax o yaal mbind um a xaƴin fo wiin mbind um, ta cooxaa a den ñaamel, oxuu refna a las um, yaa waxtu fee a fadna? O paɗ oxe o yaal mbind um a soƥkaa ta fi’aa ne warna, a ɗaaya! No ndigil, mexe layaa a nuun ee: Xan a hooloox o doxnin o jeg um fop. Kaa koy, boo ta refna o paɗ oxaa na layaa taa no yiif um ee: ‹O yaal mbind es oxe miñaa a koƥ›, soo a refat no xawaa faɗ we ta doxneena, goor fo rew, a ñaamaa, a yeraa wayaa, xan o yaal mbind no paɗ oxaaga a gar no ñaal naa ta cungoogeeruuna fo na waxtu faa ta andeerna. Xan a ɗegin teɓ-reɓ, a fokat a las um fo gimaƭaru we.
O paɗ oxe andna ke o yaal mbind um a bugna, soo a fañ o jagandoox mbaat ta fañ o fi ke o yaal mbind um a bugna, na moƴkeel o xaw. Kaa koy, o paɗ oxe andeerna ke o yaal mbind um a bugna, soo a fi’aa kaa waagna o tax ta xawel, oxeene o ndik rek a xawkeel. Xan oxe cooxeena mayu a laamtel mayu, soo oxe doxneena mayu a laamtel kupu.»


«Fiɗel kaƥniidum na adna fee, too bugaam tigi ta fi ƈulfaan. Kaam war o jaɓ batiise fa ƭomu, ndaa bug’iim o ñaam jamaane es too fadninum. Ndax kaa nu mboog ee jam ɓisiidum na adna fee? Ha’aa, mexe layan a nuun, kaam xaajiid. Ndiiki boog, wiin ɓetuk we ngenna no mbind xan a nqaajel. Xan ɗik we a yoonaƭar fo daduk we, soo daduk we a yoonaƭar fo ɗik we. Xan faap a xaajoor fo o ƥeem o ngoor, too xan o ƥiy o ngoor a xaajoor fa faap um. Xan yaay a xaajoor fo o ƥeem o ndew, too xan o ƥiy o ndew a xaajoor fa ya um. Xan o seemir o tew oxe a xaajoor fo o tew o tolooxiidu xe, too xan o tew o tolooxiidu xe a xaajoor fo o seemir um o tew.»


Yeesu a layahina wiin waa yee:
«Nu nga’angaa garinj no mudand, kaa nu layaa yee ndiik ta deɓ, too keene a naaga o jegaa. Pooyo ke a mbadangaa, kaa nu layaa yee xan a sum, too keene a naaga o jegaa. Yememaar we nu ndefna! Xar taxu nu mbaag o njekit ke na xewkaa a lanq fo na asamaan, too nu mbaagee o njekit jamaane fene sax?»


«Xar taxu nu ngorooxankee a qoox nuun muk, ndax nu nga ke jofna? Boo nu ndetaa no maad, wo fo o pañ of, ñofi o xendandoor fo ten yaa nu ndefna na ƭat, yaam ndik nu ndet no kaahate xaa, soo ta ɓurong. O ɓurange, xan o kaahate xaa a ɓoxotong alkaati faa, too xan a ɓekong kaso. Mexe layang o ten ee: Sutooxkiro maaga, too rabdiro o fiftin o falakaand ole.»

Слушни за Lik 12