Популарни Библиски стихови од Исаија 60

Сподели

Дигни се, заблескај Ерусалиме, зашто дојде твојата светлина, и славата Господова изгреа над тебе.

И народите ќе дојдат кон твоето видело, царевите – кон светлината што изгрева над тебе.

Зашто, ете, темнина ќе ја покрие земјата, и мрак – народите; а над тебе ќе засветли Господ, и славата Негова ќе се јави над тебе.

Од мал народ ќе се намножат илјади, од најслабиот – силен народ. Јас, Господ, ќе побрзам да го завршам тоа навреме.

Нема повеќе сонцето да ти биде видело на денот, ниту сјајот на месе­чината ќе ти свети; Господ ќе ти биде вечна светлина, и твојот Бог – твоја слава.

Нема да заоѓа веќе твоето сонце, ниту твојата месечина ќе потемнува, зашто Господ ќе ти биде вечна светлина; ќе се свршат дните на твоето тагување.

Тогаш ќе видиш и ќе се зарадуваш, и срцето твое ќе затрепери и ќе се рашири, зашто богатството на морето ќе потече кон тебе, имотот на народите ќе дојде кај тебе.

Крени ги очите и погледај наоколу: сите тие се собираат, идат кај тебе; твоите синови ќе дојдат оддалеку, и твоите ќерки на раце ќе се носат.

И сиот народ твој ќе биде праведен, засекогаш ќе ја наследи земјата, – фи­данка од она што сум го посадил, дела на рацете Мои, за Мое прославување.

Нема повеќе да се слуша за насилство во земјата твоја, ниту опусто­шување и разурнување – во пределите твои; и ѕидовите свои ќе ги нарекуваш спасение и портите свои – слава.

Твоите порти секогаш ќе бидат отворени, нема да се затвораат ни дење, ни ноќе, за да се принесува кај тебе имотот на народите и да се доведуваат нивните цареви.

Множество камили ќе те покријат, едногрби камили од Мидјан и од Ефа; сите тие ќе дојдат од Сева, ќе донесат злато и темјан и ќе ја објавуваат славата Господова.

Тогаш синовите на туѓинци ќе ги градат ѕидовите твои, и нивните цареви – ќе ти служат; зашто во гневот Свој те казнував, но во благоволението Свое бев милостив кон тебе.

Затоа што беше изоставен и намра­зен, така што никој не минуваше преку тебе, – Јас ќе те направам вечна слава, и радост од род во род.

Ти ќе се наситуваш од млекото на народите, и ќе смукаш од царски гради, и ќе познаеш дека Јас, Господ, сум твој Спасител и твој Искупител, Силниот Јаковов.