Susumo 2
2
1Ano de ba tala yông jey na lagwi mwa na bwâng pyɛ́ e ji mo. 2E tuk hê taama, Dagwi a ga kana tala fwom de a ra, a tumal fwom mwa de a ga ra. 3A tɛ̀ nerat e ra tuk hê taama, ko a tik hɛ jaram, na he sè mɛ, yaga e tuk a hane de a tumal mwa fwôm yông jey. 4Gwong a gwomo de ba yong jey na lagwi.
Mwasi e Bwî Ɛdɛn
Jeng de Dagwi Darwey#2:4 Dagwi Darwey: E ji jɛ̂k BeIbrani hê lâng basa hemo ba jɛk rezâ Dagwi sede ngan: “Dagwi Darwey, Dagwi”. a yong jey na lagwi, 5vit à baburuk kɛ sɔng e hey de gwa ga tulu e ngyen, yaga Dagwi Darwey a ga kana tɛ̀ rwak wo rop e ra vwel wɛt, ko vit à mwasi de e how hɛ. 6Ko lwel gwa nunus na nshi yi e vwel, nà sing vwel o. 7Dagwi Darwey a vɛ nefongol,#2:7a nefongol: E lêm BeIbrani be tâng nefongol, à adama. ko a yong mɛ̀ mwasi,#2:7b mwasi: E lêm BeIbrani be tâng mwasi, à adam. a pɛl a yɛ nesong neken e ji wol mɛ, ko mwasi mo a tɛ́ ɛ wo neken.
8Dagwi Darwey a yong gwobwi e yɛnɛ̂ vwêl Ɛdɛn, e rwa rak. E hwomo de a tik ɛ̀ mwasi de a yong. 9Ko a tɛ̀ mwa yére batîn cɔ́gɔt de ba sé barat, de ba nɔngɔs nèy nerat nè re, ba ras e ji gwɛ. E tê bwi mo retîn cɔgɔt ra sé de ra nɔngɔs neken tanga rehak de ra nɔngɔs tɔ̂k pyɛ́ ryat na pyɛ́ vyes.
10Gwɔrɔt gwa nusu yi e Ɛdɛn, ko bwi mo gwa sɛsɛm nshi yi e gwɛ. Yi e hwomo gwa gas ɛ zang naas. 11Rezâ hê mɛsɛng o, à Pishɔn. E hɛ de ha kwey e mwa yɛnɛ̂ sevwêl Havila, e hwomo de ba sɛsɛm dyam shinang. 12Dyam shinang sevwel o ya sé celes o. Be to sɛsɛm yerê negang nehwogot ne nesang hyɔɔlɔl de be tang nɛ, à bedeliyum, tanga dyéngere ryat de be tang yɛ, à onis. 13Rezâ rɔt hê neba mo, à Gihɔn. E hɛ de ha kwey e mwa yɛnɛ̂ sevwêl Kush. 14Rezâ rɔt hê netat o, à Tigris. E hɛ de ha kwey e rwa rak na sevwêl Asirya. Ko rɔt o hê nenaas hɛ, à Ɛifaratɛs.
15Dagwi Darwey a tik mwasi mo e ji Bwî Ɛdɛn, na a ra fwôm gwɛ, na a to bɛrɛng gwɛ arɔng. 16A nɔng ɛ nu, a ye, “Hwô tɔk re yi e ji nèy kayɛ yerê cɔgɔ̂t bwi mo. 17Ko retîn cɔgɔt remo de re nɔngɔs tɔ̂k pyɛ́ ryat na pyɛ́ vyes, hwo kwon re nèy rɛ wɛt! Jeng de hwà re nɛ, ko hwà rɔda ku.”
18Dagwi Darwey a ye, “A jam de mwasi a sangal nju mɛ wɛt. Ma rɔda yóng a yɛ sâ sangal de e jam a yɛ, na a sè mwât sɛlɛ mɛ.” 19Ano kwong a vɛ nefongol, a yong mɛ mwa ngyāma na mwa benon. A vey na yɛ̄ na mwasi, na a bin di baza de e vos a yɛ̄, ko karɛ reza de mwasi a nɔ̂ng kayɛ mo reza ma rane. 20Ano de mwasi a nɔ̂ng mwa yas, na ngyāma tanga benon baza. Ko yaga mwasi, ba ga kana sɛ̀ a yɛ sâ sangal wɛt, de a jam a yɛ, na a sè mwât sɛlɛ mɛ. 21Ko Dagwi Darwey a tɛ̀ nevwâ reku na vo mwasi mo. Jeng de a sé e ji nɛ, a pat kup hagat mɛ gwining, ko a bang kwɔn o na nama. 22Na gwokup o a yong mɛ hwā, ko a vey a mwasi mo mɛ̀. 23Mwasi mo a ye,
“Káa, sɛ̌ a remo de mwat sede me!
Kup rebek mɛ yi e nwang, nama mɛ yi e nang.
Reza mɛ, à hwā,#2:23 hwā: E lêm BeIbrani be tâng hwā, à isha. yaga ba pat ɛ yi e ji rwas.”#2:23 rwas: E lêm BeIbrani be tâng rwas, à ish.
24Yaga ano de rwas e gas ɛ na da mɛ tanga neng mɛ, ko e wuna hɛ na hwā mɛ, yɛn beba ba rɔda tɛ́ ɛn pyɛ jining.
Mwasi a kyɛ́ ɛ redu Dagwi
25Rwas yɛ tanga hwā mɛ bá sè ferem, ko mwa ano á sè a yɛn pyɛ rekyen wɛt.
Селектирано:
Susumo 2: bomBI
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust