A pi ake 9
9
Sool a gimata na Yeesu
(ɗeeti 22:6-16; 26:12-18)
1Na pe akaaga koy, Sool a maad’a diirooxanaa daalbe we no Yaal oxe, ndax ta war a den. A soƥka o saasadax o maak oxaa, 2too a laacin xa leetar, ndax ta lalit a den no pind a qeƭ kaa na teeru faa Damaas. Ke ta bug’ina koy refu yee a soƥangaa maaga waa na ndeefaa a ƭat ale no Yaal oxe, ta ref o koor mbaat o tew, ta jeng a den, a ɓis a den Yeerusaleem.
3Ne ta maad’ina o refaa na ƭat, too a matiidaa a Damaas, ndak fo ndak a qoolaand a inoortiida na asamaan, a meleƈaa paam um. 4A yena a lanq, too a nana o ñuxur olaa layooguuna yee:
«Sool, Sool xar taxu o ñagadilaxam?»
5A laamta yee:
«Wo an oo, o Yaal oxe?»
Maaga, o ñuxur ole a doonaan ee:
«Mi yoo, mi Yeesu fee o ñagadilaa. 6Inooxi rok kam teeru fee! Xan o layel ke waroona o fi.»
7Wiin we yoon’ina fo ten kaa ngeenoox’u, a ndam xa ton. A nanooga fangax, ndaa nga’ee o leng. 8Sool a inooxa, ndaa ke ta ɗeetoogna fop oo, ga’oogee tus. A dame no ɓay, a ɓisel Damaas. 9A jega maaga ñaal tadik kaa andoona yee ga’ee, too ñaamee yeree.
10Kam Damaas koy a jeg’a o taalbe xaa ne’eena Anañaas. O Yaal oxe a layaan no ƭaaɗ ee:
«Anañaas!»
A doona yee:
«Mexey, o Yaal oxe.»
11Maaga, o Yaal oxe a layaan ee:
«Inooxi ret na ƭat ale ne’eena a Ƭat a cagu le. Ɗeeti kam mbind Yudaa o koor oxaa ne’eena Sool, a rimel kam teeru faa Tars. Oxaa maaga, a xeɗaa. 12Kaa ga no mbeeñil o koor oxaa ne’eena Anañaas a rokiid, a doonin o ɓay, ndax ta ga’atin.»
13Anañaas a doona yee:
«O Yaal oxe, nantaam no wiin mayu, da layaa paaxeer ke o koor oxeene a fi’na we mbogna na wo Yeerusaleem. 14Meeke sax, a jega sañ-sañ kaa ngatiidna no saasadax maak we, ndax oxuu na ƴufginoortaa gon of a jengel.»
15Kaa koy, o Yaal oxe a layaan ee:
«Inooxi rek! Yaam kaam jil o koor oxeene, too xam jiriiñoorin, ndax ta ɓis gon es mbaambir no qeet ke fo mbaambir no maad den fo mbaambir xeet fee Isra’el. 16Xam lalin ke ta warna o torox fop yaam gon es.»
17Anañaas a inooxa, too ye ta fadiidna no mbind ne, a doona xa ƥay um took Sool, a layin ee:
«O pog es Sool, o Yaal oxe Yeesu Kiristaa, feeñoox’oonga na ƭat ale ye o garaa, luliidaxam ndax o ga’atin, too may fo Yiif Tedu le.»
18Na waxtu faaga sax, kaa nandna nen xa ñaƥ axaa na miric-miricnaa a yenta na kid um, too a ga’atina. A inooxa, a batiise’el. 19Cinj kaaga, a ñaama, soo a jegatin doole.
Waare fee Sool kam Damaas
Sool a yoqa fo daalbe we ndeeƭna Damaas a pe a leng-leng. 20Ndak fo ndak, a waare’ooga kam pind a qeƭ kaa yee Yeesu refu o Ƥeenqe Roog. 21Waa nan’uuna fop kaa njaaxiɗ’u, too a layaa yee:
«Mee ndax oxeeke ñagadiloogu we ƈufginooroogna gon leene kam Yeerusaleem? Mee ndax ten gar’u meeke ndax ta jengnoor a den, a ɓis a den mbaambir no saasadax maak waa?»
22Sool koy, a moƴ’a o saƭkaa, too a jaaxɗand’a Yaawuur we ngenna Damaas, yaa ta lalaa a den ee Yeesu refu Kiristaa fee, o Muumucil oxe regteena.
23A cinj a pe a leng-leng, Yaawuur waa a mbaaja ndax da mbarnoor a Sool,#2Kor 11:32-33 24ndaa Sool a yega yuuƥ ne den. Kaa yetooxoogu xa ton-maax axe na teeru fee, ndax da nquuf ñoot o ñis um. 25Maaga, daalbe we a njangaan o yeng, a ƥekin na cenjel, soo a njolnin no saax o lakas ole no saŋe naa.
Sool a fadiida Yeerusaleem
26Ye Sool a fadiidna Yeerusaleem, a jeemooga o hiɓoor fo daalbe we, ndaa fop kaa saɗar’u, yaam ngim’ee a paax ee Sool o taalbe a reeƭatu. 27Maaga, Barnabaas a jangaan, a ɓisin no apootar waa. A wetandooxa a den ne Sool a ga’it’ina o Yaal oxe na ƭat ale fo ne ta layit’ina fo ten. Barnabaas a wetandooxa a den itam ne Sool a waare’toogna fo njambaar no gon le Yeesu kam Damaas. 28A koom o mat a refu fa den, a rokaa a sutooxaa fa den kam Yeerusaleem, a waare’aa fo njambaar no gon le no Yaal oxe. 29Kaa layoogu itam, too a ñimatiraa fo Yaawuur we na layaa a gerek, ndaa weene kaa mbaaƭoogu maa da nquufitna ñoot o ñis um. 30Yaa fog gimu waa a yeguuna, a ƥisaan Kesare, soo a ngeblin ta ret Tars.
31O fog ole no gimu we a ref’ata na jam kam xa cegel axene fop: Yudee fa Galile fa Samari. Kaa jokooxoogu, a ñoowaa no saɗar o Yaal oxe, soo a xayaa no pexey o ndimle nqe no Yiif Tedu le.
Enee a wodande
32Piyeer a widooga saax laa fop. Neene itam, a reta bes farna fo gimu we ngen’ina Lid. 33A soƥa maaga o ƥoof o ne’e Enee a wondoox took njong boo xa kiid ɓetaa tadaq. 34Piyeer a layaan ee:
«Enee, Yeesu Kiristaa a wodandaang. Inooxi doran a xoox of njong of!»
Ndak fo ndak, a inooxa. 35Waa ngen’ina Lid fo kam xa saawit axe Saron fop a nga’aan, too a ngim’ata no Yaal oxe.
Tabita a xontooxnoore
36Kam teeru faa Yope, a jega ndeer no daalbe waa o tew oxaa ne’eena Tabita (kaa layeel Dorkas no ɗelem gerek, ta tekit «mbat ne»). Oxeene kaa fi’oogu a pi a paax a mayu, a sadaxtaa. 37Na pe akaaga, o tew oxeene a yena jir boo a xon. Ye da ƥoguuna, a ndoonaan na ndok-took alaa. 38Daalbe we ndeeƭna Yope a nana yee Piyeer oxaa Lid, paam Yope. Naaga, a lula wiin ɗik maa Piyeer, ndax da layin ee ta ñof o jaaɓiid a den. 39Piyeer a naaga daket a inoox, a yoon fa den. Ye da mbadiidna, a ƥisaan na ndok-took alaa. Ñaaw we fop kaa mbid’un o kurul-keƥ, a ndef na xa lool, a lalan sabadoor ke fo xa porok axe Dorkas a ɗiisoogna ye ta refaa fa den. 40Piyeer a suta wiin waa fop tafil. Maaga, a gooknooxa, a xeɗ. Cinj kaaga, a faambra fo o dal ole, too a layin ee:
«Tabita, inooxi!»
O tew oxe a weta a kid um, too ye ta ga’na a Piyeer, a inooxa, a moof. 41Piyeer a cooxaan o ɓay, soo a geennin. Cinj kaaga, a xoya gimu we fo ñaaw we itam, soo a lal a den o tew oxe na ñoowatinaa. 42Kaaga a nannooxa kam Yope fop, too mayu a ngim’ata no Yaal oxe. 43Piyeer a moof’a Yope no mbind no koohoora o ne’e Simoŋ boo a miñ.
Селектирано:
A pi ake 9: SRR23
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Copyright © 2015-2023 by Eglise luthérienne du Sénégal
A pi ake 9
9
Sool a gimata na Yeesu
(ɗeeti 22:6-16; 26:12-18)
1Na pe akaaga koy, Sool a maad’a diirooxanaa daalbe we no Yaal oxe, ndax ta war a den. A soƥka o saasadax o maak oxaa, 2too a laacin xa leetar, ndax ta lalit a den no pind a qeƭ kaa na teeru faa Damaas. Ke ta bug’ina koy refu yee a soƥangaa maaga waa na ndeefaa a ƭat ale no Yaal oxe, ta ref o koor mbaat o tew, ta jeng a den, a ɓis a den Yeerusaleem.
3Ne ta maad’ina o refaa na ƭat, too a matiidaa a Damaas, ndak fo ndak a qoolaand a inoortiida na asamaan, a meleƈaa paam um. 4A yena a lanq, too a nana o ñuxur olaa layooguuna yee:
«Sool, Sool xar taxu o ñagadilaxam?»
5A laamta yee:
«Wo an oo, o Yaal oxe?»
Maaga, o ñuxur ole a doonaan ee:
«Mi yoo, mi Yeesu fee o ñagadilaa. 6Inooxi rok kam teeru fee! Xan o layel ke waroona o fi.»
7Wiin we yoon’ina fo ten kaa ngeenoox’u, a ndam xa ton. A nanooga fangax, ndaa nga’ee o leng. 8Sool a inooxa, ndaa ke ta ɗeetoogna fop oo, ga’oogee tus. A dame no ɓay, a ɓisel Damaas. 9A jega maaga ñaal tadik kaa andoona yee ga’ee, too ñaamee yeree.
10Kam Damaas koy a jeg’a o taalbe xaa ne’eena Anañaas. O Yaal oxe a layaan no ƭaaɗ ee:
«Anañaas!»
A doona yee:
«Mexey, o Yaal oxe.»
11Maaga, o Yaal oxe a layaan ee:
«Inooxi ret na ƭat ale ne’eena a Ƭat a cagu le. Ɗeeti kam mbind Yudaa o koor oxaa ne’eena Sool, a rimel kam teeru faa Tars. Oxaa maaga, a xeɗaa. 12Kaa ga no mbeeñil o koor oxaa ne’eena Anañaas a rokiid, a doonin o ɓay, ndax ta ga’atin.»
13Anañaas a doona yee:
«O Yaal oxe, nantaam no wiin mayu, da layaa paaxeer ke o koor oxeene a fi’na we mbogna na wo Yeerusaleem. 14Meeke sax, a jega sañ-sañ kaa ngatiidna no saasadax maak we, ndax oxuu na ƴufginoortaa gon of a jengel.»
15Kaa koy, o Yaal oxe a layaan ee:
«Inooxi rek! Yaam kaam jil o koor oxeene, too xam jiriiñoorin, ndax ta ɓis gon es mbaambir no qeet ke fo mbaambir no maad den fo mbaambir xeet fee Isra’el. 16Xam lalin ke ta warna o torox fop yaam gon es.»
17Anañaas a inooxa, too ye ta fadiidna no mbind ne, a doona xa ƥay um took Sool, a layin ee:
«O pog es Sool, o Yaal oxe Yeesu Kiristaa, feeñoox’oonga na ƭat ale ye o garaa, luliidaxam ndax o ga’atin, too may fo Yiif Tedu le.»
18Na waxtu faaga sax, kaa nandna nen xa ñaƥ axaa na miric-miricnaa a yenta na kid um, too a ga’atina. A inooxa, a batiise’el. 19Cinj kaaga, a ñaama, soo a jegatin doole.
Waare fee Sool kam Damaas
Sool a yoqa fo daalbe we ndeeƭna Damaas a pe a leng-leng. 20Ndak fo ndak, a waare’ooga kam pind a qeƭ kaa yee Yeesu refu o Ƥeenqe Roog. 21Waa nan’uuna fop kaa njaaxiɗ’u, too a layaa yee:
«Mee ndax oxeeke ñagadiloogu we ƈufginooroogna gon leene kam Yeerusaleem? Mee ndax ten gar’u meeke ndax ta jengnoor a den, a ɓis a den mbaambir no saasadax maak waa?»
22Sool koy, a moƴ’a o saƭkaa, too a jaaxɗand’a Yaawuur we ngenna Damaas, yaa ta lalaa a den ee Yeesu refu Kiristaa fee, o Muumucil oxe regteena.
23A cinj a pe a leng-leng, Yaawuur waa a mbaaja ndax da mbarnoor a Sool,#2Kor 11:32-33 24ndaa Sool a yega yuuƥ ne den. Kaa yetooxoogu xa ton-maax axe na teeru fee, ndax da nquuf ñoot o ñis um. 25Maaga, daalbe we a njangaan o yeng, a ƥekin na cenjel, soo a njolnin no saax o lakas ole no saŋe naa.
Sool a fadiida Yeerusaleem
26Ye Sool a fadiidna Yeerusaleem, a jeemooga o hiɓoor fo daalbe we, ndaa fop kaa saɗar’u, yaam ngim’ee a paax ee Sool o taalbe a reeƭatu. 27Maaga, Barnabaas a jangaan, a ɓisin no apootar waa. A wetandooxa a den ne Sool a ga’it’ina o Yaal oxe na ƭat ale fo ne ta layit’ina fo ten. Barnabaas a wetandooxa a den itam ne Sool a waare’toogna fo njambaar no gon le Yeesu kam Damaas. 28A koom o mat a refu fa den, a rokaa a sutooxaa fa den kam Yeerusaleem, a waare’aa fo njambaar no gon le no Yaal oxe. 29Kaa layoogu itam, too a ñimatiraa fo Yaawuur we na layaa a gerek, ndaa weene kaa mbaaƭoogu maa da nquufitna ñoot o ñis um. 30Yaa fog gimu waa a yeguuna, a ƥisaan Kesare, soo a ngeblin ta ret Tars.
31O fog ole no gimu we a ref’ata na jam kam xa cegel axene fop: Yudee fa Galile fa Samari. Kaa jokooxoogu, a ñoowaa no saɗar o Yaal oxe, soo a xayaa no pexey o ndimle nqe no Yiif Tedu le.
Enee a wodande
32Piyeer a widooga saax laa fop. Neene itam, a reta bes farna fo gimu we ngen’ina Lid. 33A soƥa maaga o ƥoof o ne’e Enee a wondoox took njong boo xa kiid ɓetaa tadaq. 34Piyeer a layaan ee:
«Enee, Yeesu Kiristaa a wodandaang. Inooxi doran a xoox of njong of!»
Ndak fo ndak, a inooxa. 35Waa ngen’ina Lid fo kam xa saawit axe Saron fop a nga’aan, too a ngim’ata no Yaal oxe.
Tabita a xontooxnoore
36Kam teeru faa Yope, a jega ndeer no daalbe waa o tew oxaa ne’eena Tabita (kaa layeel Dorkas no ɗelem gerek, ta tekit «mbat ne»). Oxeene kaa fi’oogu a pi a paax a mayu, a sadaxtaa. 37Na pe akaaga, o tew oxeene a yena jir boo a xon. Ye da ƥoguuna, a ndoonaan na ndok-took alaa. 38Daalbe we ndeeƭna Yope a nana yee Piyeer oxaa Lid, paam Yope. Naaga, a lula wiin ɗik maa Piyeer, ndax da layin ee ta ñof o jaaɓiid a den. 39Piyeer a naaga daket a inoox, a yoon fa den. Ye da mbadiidna, a ƥisaan na ndok-took alaa. Ñaaw we fop kaa mbid’un o kurul-keƥ, a ndef na xa lool, a lalan sabadoor ke fo xa porok axe Dorkas a ɗiisoogna ye ta refaa fa den. 40Piyeer a suta wiin waa fop tafil. Maaga, a gooknooxa, a xeɗ. Cinj kaaga, a faambra fo o dal ole, too a layin ee:
«Tabita, inooxi!»
O tew oxe a weta a kid um, too ye ta ga’na a Piyeer, a inooxa, a moof. 41Piyeer a cooxaan o ɓay, soo a geennin. Cinj kaaga, a xoya gimu we fo ñaaw we itam, soo a lal a den o tew oxe na ñoowatinaa. 42Kaaga a nannooxa kam Yope fop, too mayu a ngim’ata no Yaal oxe. 43Piyeer a moof’a Yope no mbind no koohoora o ne’e Simoŋ boo a miñ.
Селектирано:
:
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Copyright © 2015-2023 by Eglise luthérienne du Sénégal