Matiu 14
14
Diyon Babasito ya Peꞌi
Matiu 14:1-12
(Maleko 6:14-29; Luka 9:7-9)
1Fuyana yai Gawana Heloda, Galili Nuꞌuna tau ita watanina mate, Yesu wasana ya atahiyen. Ena tau paisowa ya falibadi, iyen,
2Moꞌisa Diyon Babasito peꞌi yai ya obiyo fuyo! Logena, gigibwali lebena yai be noꞌo abiꞌabidi ya lau ginauli.
3Bwaꞌibwaꞌina mate, Heloda haꞌa ya liba be Diyon sa au, be deli yai sa gudu buluhi. Mata paꞌana mate, Helodiya, tasina Pilipi lahuna halana yai. (Maleko 6:17-18)
4Paꞌana Diyon mate, Heloda ya faliba iyen,
Waihin wa fai mate, wa laupono! (Lewitikusi 18:16; Lewitikusi 20:21)
5Heloda ya fanuha bena ya tala funuhi. Inmoho, Diusi dodogadi ya ꞌwasabuwedi, paꞌana edi nuwatuhu mate, Diyon peloweta hesa.
6Heloda ena fuya tubu lahaina yai, lahuna Helodiya natuna waiwaihinna,#14:6 Helodiya natuna mate, hesana mate Salome. Beyabeyana, Doga hesa hesana Diyosefusi ena buka yai, tineꞌeu wa, hesana sa uli. dodoga boludi nuwanuwadi yai ya leꞌileꞌi. Heloda nuwana ya amna, 7be ya liba fasunumaꞌen, iyen,
E liba dudulai mate, somo wa fanuha, haba E felem!
8Tau tinatina mate, haꞌa natuna ya faꞌoinigugu bwaꞌiyen, iyen,
Doꞌata te, aiteꞌi, itete Diyon Babasito kuluna ai gaeba wa felegu!
9Kin Heloda nuwana ya heyaya. Inmoho, paꞌana haꞌa ya liba fasunuma ana taumana matadi yai mate, tineꞌeu ena fanuha somo haba ya felen. 10Yofede, ya liba be Diyon deli yai, gadona sa ibo. 11Kuluna gaeba yai sa leyama, be tineꞌeu sa felen, be ya lawen tinana ya felen. 12Diyon tau famuli watanina sa laoma silanna sa bahei be sa boꞌusai. Habahim sa fuyo be Yesu ena sa liba.
Yesu Dodoga 5,000 ya Fakalahedi
Matiu 14:13-21
(Maleko 6:30-44; Luka 9:10-17; Diyon 6:1-14)
13Lahaina yai Diyon wasana Yesu ya atahiyen, yofede waga yai ya gelu modigafu be ya lau nuꞌu laulau gesana yai. Dodoga wasana sa atahiyen yofede, edi taon sa lau afuledi, na sa laufote be sa lau watan. 14Yesu waga yai ya tulubeꞌu, na dodoga boludi ya itadi be ya nuwatohatohaedi, yofede salumadi sa asiyebo ya faloholohodi. 15Maimailafina tau famuli watanina sa laoma lisina be tiyen,
Haꞌa ya maimailafi. Amaiteꞌi hige taon laꞌi. Dodoga u duidi be ti lau luma haisa haba ainiya kalahe adi sa unedi.
16Alinadi ya bui iyen,
Ibege ti lau. Umi kalahe adi au feledi be ti an!
17Alinana sa bui, tiyen,
Fwalawa faligigi yo hama luwaga dumaduma moho, itete.
18Yesu iyen,
Gonowana, au ledima.
19Dodoga ya falibadi, be sa taꞌai hawahawa hewadi yai. Habahim fwalawa faligigi yo hama luwaga ya abidi. Ya itaꞌita hasa galewa, na ena lautoꞌi Yaubada ya felen. Fwalawa wa ya ifidi; tau famuli watanina ya feledi be dodoga sa feledi. 20Mahudoꞌidi sa kalahe be–, bogadi sa yahayaha. Habahim, taꞌifiꞌifidi sa antoledi, ana hewahewali sa tano gogoidi be noho 12 sa famohafudi.
21Tatau oulina sa kalahe mate 5,000, wawahin yo wawaya mate hige ti fatili esegahidi.
Yesu Gabogabo Hewana yai ya Laulau
Matiu 14:22-33
(Maleko 6:45-52; Diyon 6:15-21)
22Sa kalahe mulina yai, Yesu ana hewali ya dalu beleleidi be sa awa waga yai na sa dohe bwaꞌi hoꞌowa tefana. Mulidi yai dodoga ya duidi be sa laulau. 23Sa failaulau habahim, ibona ya finahe hasa tuꞌa be ya lauꞌuꞌula. Maimailafina mate, Yesu ibona amainiya. 24Maihalana yai, mate, waga haꞌa hoꞌowa atipuna yai. Bagodu ya lubilubi faꞌeo, paꞌana hwayahwayau, nuwanuwadi yai ya towama.
25Maihala doha 3 o 6 kiloki atipudi yai, Yesu ya laoma ana hewahewali lisidi hoꞌowa hewana yai. 26Sa ita ya laolaoma hoꞌowa hewana yai be sa ꞌwasabu. Edi nuwatuhu bena haga onaꞌonaha yofede sa ꞌwalaꞌwalawui.
27Yesu ya libalau lisidi, iyen,
Au nuwa adidili! Yau! Tabu au ꞌwasabu.
28Yofede, alinana Pita ya bui, iyen,
Guyau, yena moꞌisa um, u liba, be ya laowa lisim ai gabogabo hewana.
29Pita alinana, Yesu ya bui iyen,
U laoma!
Yofede, Pita, waga yai ya kalamahano be gabogabo hewana yai ya lau Yesu lisina. 30Hwayahwayau laꞌilaꞌi ya laoma amnana ya atahi, be ya ꞌwasabu, yofede ya buluhidi gabogabo ganahewana, na ya yogalau, iyen,
Guyau, u saguhigu!
31Yofede, Yesu ya tiꞌe lau, be Pita ya tohai na iyen,
Em kawawananaha haga i kiu! Paꞌana somo be wa nuwa luwaluwaga?
32Tataudi luwaga sa awalau waga yai, habahim ya daumwali. 33Tau famuli watanina haisa waga yai, Yesu sa fadebasae, na tiyen,
Wananaha, um Yaubada Natuna.
Tau Asiyebo Haisa Genesaleta yai Yesu ya Faloholohodi
Matiu 14:34-36
(Maleko 6:53-56)
34Fuyana waga yai sa dohe, Genesaleta Nuꞌuna yai sa duna. 35Dodogadi mate, Yesu haꞌa sa sibai. Yofede liba sa fatamalidi, be tau lepalepa tefa hesa-hesa yai sa ledima Yesu lisina. 36Sa anꞌetai be ena leli moho bena sa abiꞌinadi. Na salumadi ena leli moho tau abiꞌinana mate, adi asiyebo sa ofi.
Селектирано:
Matiu 14: Buhutu
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2024, SIL Global. All Rights Reserved.