Matiu 27
27
Yesu sa Foyahi Lawen Pailati Lisina
Matiu 27:1-2
(Maleko 15:1; Luka 23:1-2; Diyon 18:28-32)
1Ya ifi tatatali, tau antalasam yo baꞌibaꞌisa edi sa oiliba bena Yesu sa lau funuhi. 2Sa auꞌaui, habahim sa foyahi lawen, Pailati lisina. In Loma edi Baꞌisa Diudeya ganahewana yai mate, in edi gawana.
Diudasi ya Faluke Fuyoi
Matiu 27:3-10
(Paisowa 1:16-19)
3Fuyanna Diudasi, Yesu ana tau wewe, ya siba mate Yesu sa fagilu bena sa wunui, yofede ya nuwatuhu lobahi mate laupono ya ginauli yo ya nuwabui. Yofede siluba oulina 30 ya fafuyodi Tau Antalasam Baꞌisana yo babada lisidi.
4Ya falibadi iyen,
Egu heyaheyaya, paꞌana doga dudulaina ꞌwasinana E fatabuliwa.
Alinana sa fafuyo, tiyen,
Mate um em mode. Ai hige ema mode amainiya.
5Yofede Diudasi moni ya peidi Dubu Tabuna tefana yai na ya auꞌaulaha ya lau be ya faluke fuyoi. (Paisowa 1:18)
6Tau antalasam babaꞌisadi moni wa sa tanoꞌidi, na tiyen,
Moni te hige gonowana ai Dubu Tabuna ta fapaisowa, paꞌana itete ꞌwasina maisana.
7Yofede, sa nuwanuwatuhu be Gulewa Tau Laulau ginauli ena gabu sa une, be taꞌowawa adi bwana sa ginauli.#27:7 <<Gulewa Tau Laulau ginaulina ena gabu sa une, liba aniyona te begana i fakau, 1) Gabuna mate Tau Laulau ginaulina enehena, 2) Tefana somo yai Gulewa Tau Laulau ginaulina bwadagowa sa abi o gulewa sa ginaulidi, e 3) somo yai gulewa haꞌa sa heyaya mate, senadi sa pei afuledi. 8Logena, ahoꞌite mate, nuꞌuna hesana sa ataꞌatahi <<ꞌWasina Nuꞌuna.>>
9Lisina yai, Peloweta Delamaiya ena liba sa fawananaha, (fuyana) iyen,
Isalaela dodogadi maisa sa lau yogaen,
<<Siluba 30 hewana yai mate sa abidi. 10Be Gulewa Tau Laulau ginauli ena gabu sa une, gonogonowana doha Yaubada ya falibagu. (Sekalaiya 11:12-13; Delamaiya 36:6-12)
Yesu, Pailati Matana yai
Matiu 27:11-14
(Maleko 15:2-5; Luka 23:3-5; Diyon 18:33-38)
11Yesu, Gawana Pailati matana yai ya obiyo, na ya fatiꞌoi, iyen,
Um Diusi edi Kin?
Alinana Yesu ya bui, iyen,
Somo wa libaen mate, logena.
12Tau antalasam laꞌilaꞌidi yo babada edi gilu bwalabwala lisina yai, hige laꞌi i bui. 13Habahim Pailati ya fatiꞌo iyen,
Ginauli mahudoꞌidi sa fagilum ni, wa atahiyedi, e higeꞌe?
14Inmoho, edi lau fagilu mahudoꞌidi, mate hige Yesu laꞌi i bui. Yofede, Gawana ya noꞌo wananaha.
15Fuya ouꞌouli, Gawana ena laulau mate, yena Bayawa Anꞌangogona fuyana ya laoma, haba dodoga sa liba, be sai deli yai sa soꞌefahi. 16Fuyana yai mate, tau lau deli hesa, hesana Balabasi. 17Dodoga sa faꞌoigogoma, yofede Pailati ya fatiꞌo lau lisidi, iyen,
“Emi fanuha dogana tausomo bena E soꞌefahi: Balabasi, o Yesu, hesana hesa Keliso?”
18Haꞌa ya sibai mate sa leyama ya lau fatala paꞌana sa nuwa elaꞌelaꞌen.
19Pailati mate aba lau fatala yai hola ya taꞌataꞌai, na lahuna alina ya fatamali lawen lisina iyen,
Doga dudulaina ni tabu ai lisina somo u ginauli. Maihona yai doga ni E eno suwaiyen be in debana yai kamkamna laꞌilaꞌi E fahoina.
20Inmoho, antalasam babaꞌisadi yo babada, dodoga sa nuwa liuidi mate Balabasi bena sa soꞌefahi, na Yesu wunuina libana moho bena sa oilibaen.
21Yofede, Gawana ya fatiꞌo lau lebedi iyen,
Tataudi luwaga haba tausomo ami fanuha bena E soꞌefahi?
Tiyen,
Balabasi.
22Pailati ya fatiꞌo bodaidi iyen,
Na Yesu, sa kawakawa Kelisoꞌen#27:22 Giliki Alinadi yai <<Keliso>> aniyona mate, <<Mesaiya,>> o <<Yaubada Tau Fasinabo Dogana.>> ai lisina haba somo E ginauli?
Mahudoꞌidi alinana sa bui, tiyen,
U tutu fapatu!
23Pailati iyen,
Na bee–, ena laupono somo?
Sa yoga laꞌilaꞌi, tiyen,
U tutu fapatu!
24Yofede Pailati nuwana yai ya lobahi mate, haꞌa sa leihafihafiti, yo bobohalahala mate ya laꞌilaꞌi. Be hoꞌowa ya abi, na ya nima kaisu baiwa matadi yai na iyen,
Doga dudulaina ꞌwasinana te ibege giluna au fabaheigu, umi haba ami bahei.
25Mahudoꞌidi tiyen,
Doga te, ꞌwasinana haba ai yo nanatumai giluna ꞌe bahei.
26Yofede Pailati Balabasi ya soꞌefahi. Na ya liba be Yesu sa pidili, habahim tau hiyala ya feledi, be haba sa tutu fapatu.
Tau Hiyala Yesu sa Lau Faliuhwaꞌen
Matiu 27:27-31
(Maleko 15:16-20; Diyon 19:2-3)
27Habahim, Gawana Pailati ena tau hiyala Yesu sa lawen edi aba oigogo,#27:27 Uli'uli haisa tiyen, <<Palaetolium,>> Gawana ena Luma La'ila'i yai. be hiyala dodogadi mahudoꞌidi sa fataꞌiꞌili. 28Ena leli sa pwala fahidi, na leli ginaulina hesa balebalelemna sa faliꞌo.#27:28 Au italau, Maleko 15:17 <<Yesu mate Kin edi leli kapikapitana sa faliꞌo.>>
29Na habahim nulinuli sa fatuli,#27:29 Uli'uli haisa tiyen, <<Oyagi nulinulidi yai kolona sa fatuli.>> be sa fakoku kuluna yai, yo tuꞌe bigabigana nima sibana yai sa tole lawen hinaga. Habahim, sa tulibono nuwanuwana yai na sa lau faliuhwaꞌen, tiyen,
Diusi edi Baꞌisa, yauwedo!
30Sa kanisofi, yo tuꞌe wa sa abi be kuluna yai sa oiꞌoiyen. 31Edi faꞌatiti bwalabwalana ya ofi, na mulina yai, leli ginaulina ni sa kamfahi, na in ena ginauli sa faliꞌo fuyoi. Mulina yai, habahim, sa foyahi lawen, bena sa tutu fapatu.
Yesu sa Tutu Fapatu
Matiu 27:32-44
(Maleko 15:21-32; Luka 23:26-43; Diyon 19:17-27)
32Sa aulaha, sa lau ganamuli. Sailin dogana hesa sa lobahi, hesana Saimon. Sa bayahoi, be Yesu aba tutu fapatuna ya bahei.
33Sa laoma nuꞌu hesa hesana Gologota. (Aniyona mate Kulukulu Nuꞌuna). 34Amainiya mate waen sa falamo maꞌena nomnom kalakalapi hesa sa felen be ya nomina, be ya ꞌwaiyoꞌoen. (Samsi 69:21)
35Sa tutu fapatu mulina yai, habahim ena leli sa soiyedi, habahim sa aiheya failakoꞌedi haba sai esega ya abi. (Samsi 22:18)
36Mulina yai sa taꞌai amainiya, na sa itaꞌita watan. 37Ana mata paꞌana sa uli, be Yesu kuluna hewana yai sa tutu fapatu, Uliꞌulina doha ite,
<<Itete Yesu, Diusi edi Baꞌisa.>>
38Tau angafu luwaga mate, maꞌedi Yesu sa tutu fapatudi, hesa sibana yai na hesa seuseulina yai. 39Saluma sa bayawai mate, sa lau faliuhwaꞌen. Kuludi sa talatala oiyedi, na sa liba, tiyen, (Samsi 22:7; Samsi 109:25)
40Um bena Aba Antalasam Dubuna wa faheyaya, na lahai faihona ai ganahewana haba wa faꞌobiyo fuyoi, haga ibom u saguhi fuyoim! Yena moꞌisa um Yaubada Natuna, haga beti ai aba tutu fapatum ni u tulubeꞌuma!
41Laulauna eseꞌesegana, tau antalasam yo laugagayo tau laulau faꞌataina yo Isalaela babada lalaꞌi sa lau faliuhwaꞌen hinaga.
42Tiyen,
Dodoga haisa ya saguhidi, inmoho ibege ibona i saguhi fuyoi! In Isalaela eda Baꞌisa, e higeꞌe? Ibe doꞌata te, ai aba tutu fapatuna ni ya tulubeꞌuma, haba te kawawananahaꞌen. 43In Yaubada ya kawawananahaꞌen, na ya liba bena in Yaubada Natuna. Haga beti, ta ita haba Yaubada bena i fanuha haba doꞌata te i famwahuli! (Samsi 22:8)
44Laulauna gonogonowana tau angafu luwaga Yesu ma afa haidana sa fakautidi mate, Yesu sa liba fafaheyaya.
Yesu ya Peꞌi
Matiu 27:45-57
(Maleko 15:33-41; Luka 23:44-49; Diyon 19:28-30)
45Lahai laꞌi mate, nuꞌu mahudoꞌina ya kamumu lubilubi, ya lau ee–, ya mailafi.
46Maihala doha 3 koloki, Yesu ya yoga laꞌilaꞌi, iyen,
Eli, Eli, lama sabatani?
Aniyona mate,
Egu Yaubada, paꞌana somo wa nuwa afulegu? (Samsi 22:1)
47Haisa sa obiꞌobiyo amainiya sa atahiyen be tiyen,
Ilaidiya ya yogayogaim.
48Feula na, hudoꞌi ya lau, be bwalofi ya abi. Ya dauꞌwai waen kalakalapina yai, na siꞌosiꞌo yai ya lolon hasaen, be bena Yesu ya nom. (Samsi 69:21)
49Haisa tiyen,
I otawa! Haba Ilaidiya ya laoma ya fofofahi, te ita, e higeꞌe?
50Yofede Yesu ya yoga laꞌilaꞌi fuyo. Maꞌesega na, yawasina ya ofi. 51Yesu ya peꞌi, yofede, mwanuꞌunuꞌu ya fatubu be tanohi ya mwahimwahiu. Yofede, bwanali sa taꞌifiꞌifi. Na Dubu Tabuna ganahewana yai, bili daili kalekona ya tapuliti luwagai, hewa yai ya lidi ubu. (Esedo 26:31-33)
52Boꞌusa sa tasoꞌe, na dodoga tabudi haꞌa sa peꞌi mate, sa mwahuli fuyo. 53Boꞌusa yai sa kalamahano. Na Yesu ena obiyo fuyo, mulina yai mate sa lau duhu balabalamumu tabuna yai, be dodoga boludi matadi yai sa taumahata.
54Fuyana tau hiyala dodogadi haisa maꞌedi baꞌisa, Yesu sa ita watan. Na mwanuꞌunuꞌu sa fahoina, yo ginauli te sa itadi, mate sa ꞌwasabu wananaha, be tiyen,
Moꞌisa, in mate Yaubada Natuna wananahana.
55Wawahin boludi mate amainiya, manamanaꞌa yai sa obiꞌobiyo. Iti Galili yai Yesu sa lau watan, be somo ya fanuha haba sa felen. 56Ganahewadi yai mate, Maliya Magadala, ena falihesa Diyemsi yo Diyosepa tinadi, yo Sebedi nanatudi tinadi.
Yesu Silanna sa Boꞌusai
Matiu 27:57-61
(Maleko 15:42-47; Luka 23:50-56; Diyon 19:38-42)
57Maihala hola hige i bulu, na Alimatiya dogana hesa fafagogona hesana Diyosepa ya laoma. In mate Yesu ena tau kawawananahaꞌenna hesa.
58Ya lau Pailati ya anꞌetai, bena Yesu silanna ya abi. Pailati ya tauꞌulu be liba ya fatamali bena Yesu silanna sa felen. 59Yofede, Diyosepa silan wa ya abi, ya suma fataꞌiꞌili kabobo fwaufwauna yai. 60Habahim in ana bwana fwaufwauna bwanali yai haꞌa ya pidi nonohai, amainiya ya boꞌusai. Na Diyosepa umeꞌehu ya fatapipili, be boꞌusa hafohafona ya gudu, na ya lau afulen. 61Maliya Magadala yo Maliya hesa mate, sadai yai sa taꞌataꞌai, na boꞌusa sa maimainenei.
Tau Gati Boꞌusa yai
Matiu 27:62-66
62Sabati abi nonohana lahaina, na bobonna, yofede antalasam babaꞌisadi yo Falesiya sa lau Pailati lisina be tiyen,
63Baꞌisa, doga bwalabwalana ni, ma mwahumwahulina ya liba iyen,
<<Lahai faihona ai mulidi haba E mwahuli fuyo.>>
64Debana yai, haba tau gati wa faliba, be boꞌusa sa gatini komakomaniꞌi, ya lau wee–, lahai faihona sa ofi. Paꞌana ana hewahewali ibe ti lau be silanina ti angafuhi. Na haba dodoga sa bwalaidi tiyen,
<<In haꞌa ya mwahuli fuyo.>>
Bwalabwala mulimulitana te, haba ya heyaya wananaha habahim bwala bwa'ibwa'ina.
65Alinadi Pailati ya bui iyen,
Gati au abi be au lau boꞌusa au gudu au komakomaniꞌi.
66Yofede sa lau be boꞌusa sa gudu komakomaniꞌi, yo gati sa toledi.
Селектирано:
Matiu 27: Buhutu
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2024, SIL Global. All Rights Reserved.